Deuteronomy 19
The Book of Deuteronomy
܀ ܬܢܝܢ ܢܡܘܣܐ ܝܛ ܀
1 ܘܟܰܕ ܢܰܘܒܶܕ ܡܳܪܝܳܐ ܐܰܠܳܗܳܟ ܥܰܡ̈ܡܶܐ ܕܡܳܪܝܳܐ ܐܰܠܳܗܳܟ ܝܳܗܶܒ ܠܟ ܐܰܪܥܗܽܘܢ. ܘܬܺܐܪܰܬ ܐܶܢܽܘܢ. ܘܬܶܬܶܒ ܒܩܽܘܖ̈ܝܗܽܘܢ. ܘܰܒܒܳܬܰܝ̈ܗܽܘܢ.
2 ܬܠܳܬ ܩܽܘܖ̈ܝܳܐ ܦܪܽܘܫ ܠܳܟ ܒܓܰܘ ܐܰܪܥܳܟ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ ܝܽܘܪܬܳܢܳܐ.
3 ܛܰܝܶܒ ܐܽܘܪܚܳܐ. ܘܬܰܠܶܬ ܬܚܽܘܡܳܐ ܕܰܐܪܥܳܐ ܕܡܰܘܪܶܬ ܠܳܟ ܡܳܪܝܳܐ ܐܰܠܳܗܳܟ. ܕܢܶܗܘܶܐ ܥܳܪܶܩ ܠܬܰܡܳܢ ܟܽܠ ܩܳܛܽܘܠܳܐ.
4 ܘܗܳܢܰܘ ܙܶܕܩܶܗ ܕܩܳܛܽܘܠܳܐ ܕܩܳܛܶܠ ܠܚܰܒܪܶܗ ܘܚܳܝܶܐ. ܡܳܐ ܕܰܩܛܰܠ ܠܚܰܒܪܶܗ ܕܠܳܐ ܒܨܶܒܝܳܢܶܗ. ܘܠܳܐ ܣܳܢܶܐ ܗܘܳܐ ܠܶܗ ܡܶܢ ܐܶܬܡܳܠܝ ܘܡܶܢ ܡܢܳܬܡܳܠܝ.
5 ܘܡܰܢ ܕܢܶܥܽܘܠ ܥܰܡ ܚܰܒܪܶܗ ܠܥܳܒܳܐ ܕܩܰܝ̈ܣܶܐ ܠܡܶܦܣܰܩ. ܘܰܢܪܺܝܡ ܐܺܝܕܶܗ ܒܢܳܪܓܳܐ ܠܡܶܦܣܰܩ ܩܰܝ̈ܣܶܐ. ܘܢܶܫܬܡܶܛ ܦܰܪܙܠܳܐ ܡܶܢ ܩܰܝܣܳܐ. ܘܢܶܡܚܶܐ ܠܚܰܒܪܶܗ ܘܰܢܡܽܘܬ. ܗܳܢܳܐ ܢܶܥܪܽܘܩ ܠܰܚܕܳܐ ܡܶܢ ܗܳܠܶܝܢ ܩܽܘܖ̈ܝܳܐ ܘܢܺܚܶܐ.
6 ܕܠܳܐ ܟܰܕ ܢܶܪܕܽܘܦ ܬܳܒܰܥ ܥܝܳܪܬܳܐ ܕܰܕܡܳܐ ܒܳܬܰܪ ܩܳܛܽܘܠܳܐ ܒܚܰܡܺܝܡܽܘܬܳܐ ܕܠܶܒܶܗ. ܘܢܰܕܪܟܺܝܘܗܝ. ܟܰܕ ܬܶܗܘܶܐ ܣܰܓܺܝܐܳܐ ܐܽܘܪܚܳܐ. ܘܢܶܩܛܠܺܝܘܗܝ ܟܰܕ ܠܳܐ ܚܰܝܳܒ ܕܺܝܢܳܐ ܕܡܰܘܬܳܐ. ܠܳܐ ܓܶܝܪ ܣܳܢܶܐ ܗܘܳܐ ܠܶܗ ܡܶܢ ܐܶܬܡܳܠܝ ܘܡܶܢ ܡܢܳܬܡܳܠܝ.
7 ܡܶܛܽܠ ܗܳܢܳܐ ܡܦܰܩܶܕ ܐ̱ܢܳܐ ܠܳܟ. ܘܳܐܡܰܪ ܐ̱ܢܳܐ ܠܳܟ. ܕܬܶܦܪܽܘܫ ܠܳܟ ܬܠܳܬ ܩܽܘܖ̈ܝܳܐ.
8 ܘܟܰܕ ܢܪܰܘܰܚ ܡܳܪܝܳܐ ܐܰܠܳܗܳܟ ܬܚܽܘܡܳܟ. ܐܰܝܟ ܕܺܝܡܳܐ ܠܰܐܒܳܗܰܝ̈ܟ. ܘܢܶܬܶܠ ܠܳܟ ܟܽܠܳܗ̇ ܐܰܪܥܳܐ ܕܺܝܡܳܐ ܠܰܐܒܳܗܰܝ̈ܟ.
9 ܐܶܢ ܬܶܛܰܪ ܟܽܠܗܽܘܢ ܦܽܘܩ̈ܕܳܢܶܐ ܗܳܠܶܝܢ ܘܬܶܥܒܶܕ ܐܶܢܽܘܢ. ܕܰܡܦܰܩܶܕ ܐ̱ܢܳܐ ܠܳܟ ܝܰܘܡܳܢܳܐ. ܕܬܶܪܚܰܡ ܠܡܳܪܝܳܐ ܐܰܠܳܗܳܟ ܘܰܬܗܰܠܶܟ ܒܽܐܘܖ̈ܚܳܬܶܗ ܟܽܠܗܽܘܢ ܝܰܘ̈ܡܳܬܳܐ. ܬܰܘܣܶܦ ܠܳܟ ܬܽܘܒ ܬܠܳܬ ܩܽܘܖ̈ܝܳܐ ܥܰܠ ܗܳܠܶܝܢ ܬܠܳܬ.
10 ܕܠܳܐ ܢܶܬܐܫܶܕ ܕܡܳܐ ܙܰܟܳܝܳܐ ܒܓܰܘ ܐܰܪܥܳܟ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ. ܘܢܶܬܚܫܶܒ ܥܠܰܝܟ ܕܡܳܐ ܙܰܟܳܝܳܐ.
11 ܘܶܐܢ ܢܶܗܘܶܐ ܓܰܒܪܳܐ ܣܳܢܶܐ ܠܚܰܒܪܶܗ. ܘܢܶܟܡܰܢ ܠܶܗ. ܘܰܢܩܽܘܡ ܥܠܰܘܗܝ ܘܢܶܡܚܶܝܘܗܝ ܘܰܢܡܽܘܬ. ܘܢܶܥܪܽܘܩ ܠܶܗ ܠܰܚܕܳܐ ܡܶܢ ܗܳܠܶܝܢ ܩܽܘܖ̈ܝܳܐ.
12 ܢܫܰܕܪܽܘܢ ܣܳܒ̈ܶܐ ܕܰܩܪܺܝܬܶܗ ܘܢܶܕܒܪܽܘܢܶܗ ܡܶܢ ܬܰܡܳܢ. ܘܢܰܫܠܡܽܘܢܶܗ ܠܬܳܒܰܥ ܥܝܳܪܬܳܐ ܕܰܕܡܳܐ ܘܢܶܩܛܠܺܝܘܗܝ.
13 ܘܠܳܐ ܬܚܽܘܣ ܥܰܝܢܳܟ ܥܠܰܘܗܝ ܕܬܶܩܛܠܺܝܘܗܝ. ܘܥܰܩܶܒ ܕܡܳܐ ܙܰܟܳܝܳܐ ܡܶܢ ܝܺܣܪܳܐܶܝܠ. ܘܢܰܛܐܶܒ ܠܳܟ.
14 ܘܠܳܐ ܬܫܰܢܶܐ ܬܚܽܘܡܳܐ ܕܡܶܢ ܥܳܠܰܡ. ܕܬܰܚܶܡܘ ܩܰܕܡܳܝ̈ܶܐ ܒܝܳܪܬܽܘܬܳܟ. ܕܬܺܐܪܰܬ ܒܰܐܪܥܳܐ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ ܠܡܺܐܪܬܳܗ̇
15 ܠܳܐ ܢܩܽܘܡ ܣܳܗܕܳܐ ܚܰܕ ܥܰܠ ܓܰܒܪܳܐ ܥܰܠ ܟܽܠ ܣܰܟܽܠܘܳܬܐ ܘܥܰܠ ܟܽܠ ܚܛܳܗܳܐ. ܒܟܽܠ ܚܛܳܗܳܐ ܕܢܶܚܛܶܐ. ܥܰܠ ܦܽܘܡ ܬܪܶܝܢ ܣܳܗ̈ܕܺܝܢ. ܐܰܘ ܥܰܠ ܦܽܘܡ ܬܠܳܬܳܐ ܣܳܗ̈ܕܺܝܢ. ܬܶܬܩܰܝܰܡ ܡܶܠܬܳܐ.
16 ܘܶܐܢ ܢܩܽܘܡ ܣܳܗܕܳܐ ܕܰܓܳܠܳܐ ܥܰܠ ܓܰܒܪܳܐ. ܘܢܰܣܗܶܕ ܥܠܰܘܗܝ ܥܰܘܠܳܐ.
17 ܢܩܽܘܡܽܘܢ ܬܖ̈ܰܝܗܽܘܢ ܓܰܒܖ̈ܶܐ ܕܺܐܝܬ ܠܗܽܘܢ ܕܺܝܢܳܐ ܩܕܳܡ ܡܳܪܝܳܐ. ܘܰܩܕܳܡ ܟܳܗ̈ܢܶܐ ܘܕܰܝܳܢ̈ܶܐ. ܕܢܶܗܘܽܘܢ ܒܝܰܘ̈ܡܳܬܳܐ ܗܳܢܽܘܢ.
18 ܘܰܢܥܰܩܒܽܘܢ ܕܰܝܳܢ̈ܶܐ ܫܰܦܺܝܪ. ܘܢܶܚܙܽܘܢ ܐܶܢ ܣܳܗܕܽܘܬܳܐ ܕܰܓܳܠܬܳܐ ܒܳܥܶܐ ܗܘܳܐ ܕܢܰܣܗܶܕ ܥܰܠ ܐܰܚܽܘܗܝ.
19 ܥܒܶܕܘ ܠܶܗ ܐܰܝܟ ܕܶܐܬܚܰܫܰܒ ܠܡܶܥܒܰܕ ܠܰܐܚܽܘܗܝ. ܘܒܰܥܰܪܘ ܒܺܝܫܬܳܐ ܡܶܢ ܒܰܝܢܳܬܟܽܘܢ.
20 ܘܰܐܝܠܶܝܢ ܕܡܶܫܬܰܚܪܺܝܢ. ܢܶܫܡܥܽܘܢ ܘܢܶܕܚܠܽܘܢ. ܘܠܳܐ ܢܰܘܣܦܽܘܢ ܬܽܘܒ ܠܡܶܥܒܰܕ ܦܶܬܓܳܡܳܐ ܗܳܢܳܐ ܒܺܝܫܳܐ ܒܰܝܢܳܬܟܽܘܢ.
21 ܠܳܐ ܬܚܽܘܣ ܥܰܝܢܳܟ. ܐܶܠܳܐ ܢܰܦܫܳܐ ܚܠܳܦ ܢܰܦܫܳܐ. ܥܰܝܢܳܐ ܚܠܳܦ ܥܰܝܢܳܐ. ܫܶܢܳܐ ܚܠܳܦ ܫܶܢܳܐ. ܐܺܝܕܳܐ ܚܠܳܦ ܐܺܝܕܳܐ. ܪܶܓܠܳܐ ܚܠܳܦ ܪܶܓܠܳܐ.