Deuteronomy 6
The Book of Deuteronomy
܀ ܬܢܝܢ ܢܡܘܣܐ ܘ ܀
1 ܗܳܠܶܝܢ ܦܽܘܩ̈ܕܳܢܶܐ ܘܢܳܡܽܘܣ̈ܶܐ ܘܕܺܝܢ̈ܶܐ ܕܦܰܩܕܰܢܝ ܡܳܪܝܳܐ ܐܰܠܳܗܟܽܘܢ. ܕܰܐܠܶܦܟܽܘܢ. ܕܬܶܥܒܕܽܘܢ ܒܰܐܪܥܳܐ ܕܥܳܐܠܺܝܢ ܐ̱ܢܬܽܘܢ ܠܳܗ̇ ܠܡܺܐܪܬܳܗ̇.
2 ܘܬܶܕܚܠܽܘܢ ܡܶܢ ܡܳܪܝܳܐ ܐܰܠܳܗܟܽܘܢ. ܘܬܶܛܪܽܘܢ ܟܽܠܗܽܘܢ ܦܽܘܩܕܳܢܰܘ̈ܗܝ. ܘܢܳܡܽܘܣܰܘ̈ܗܝ. ܘܕܺܝܢܰܘ̈ܗܝ ܕܰܡܦܰܩܶܕ ܐ̱ܢܳܐ ܠܳܟ. ܐܰܢ̱ܬ ܘܰܒܪܳܟ. ܘܒܰܪ ܒܪܳܟ. ܟܽܠܗܽܘܢ ܝܰܘ̈ܡܰܝ ܚܰܝܰܝ̈ܟ. ܕܢܶܣܓܽܘܢ ܝܰܘ̈ܡܳܬܳܟ.
3 ܫܡܰܥ ܝܺܣܪܳܐܶܝܠ. ܘܛܰܪ ܘܰܥܒܶܕ. ܕܢܰܛܐܶܒ ܠܳܟ ܘܬܶܣܓܶܐ ܛܳܒ. ܐܰܝܟ ܕܶܐܡܰܪ ܠܳܟ ܡܳܪܝܳܐ ܐܰܠܳܗܳܐ ܕܰܐܒܳܗܰܝ̈ܟ. ܕܢܶܬܶܠ ܠܳܟ ܐܰܪܥܳܐ ܕܡܰܪܕܝܳܐ ܚܰܠܒܳܐ ܘܕܶܒܫܳܐ.
4 ܫܡܰܥ ܝܺܣܪܳܐܶܝܠ. ܡܳܪܝܳܐ ܐܰܠܳܗܰܢ ܡܳܪܝܳܐ ܚܰܕ ܗ̱ܘ.
5 ܪܚܰܡ ܠܡܳܪܝܳܐ ܐܰܠܳܗܳܟ. ܡܶܢ ܟܽܠܶܗ ܠܶܒܳܟ. ܘܡܶܢ ܟܽܠܳܗ̇ ܢܰܦܫܳܟ. ܘܡܶܢ ܟܽܠܶܗ ܩܶܢܝܳܢܳܟ.
6 ܘܢܶܗܘܽܘܢ ܗܳܠܶܝܢ ܦܶܬܓܳܡ̈ܶܐ ܕܰܡܦܰܩܶܕ ܐ̱ܢܳܐ ܠܳܟ ܝܰܘܡܳܢܳܐ ܥܰܠ ܠܶܒܳܟ.
7 ܘܬܰܢܳܐ ܐܶܢܽܘܢ ܠܰܒܢܰܝ̈ܟ. ܘܡܰܠܶܠ ܒܗܽܘܢ ܡܳܐ ܕܝܳܬܶܒ ܐܰܢ̱ܬ ܒܒܰܝܬܳܟ. ܘܡܳܐ ܕܳܐܙܶܠ ܐܰܢ̱ܬ. ܒܽܐܘܪܚܳܐ. ܘܡܳܐ ܕܕܳܡܶܟ ܐܰܢ̱ܬ. ܘܡܳܐ ܕܩܳܐܶܡ ܐܰܢ̱ܬ.
8 ܘܰܩܛܽܘܪ ܐܶܢܽܘܢ ܐܳܬܳܐ ܥܰܠ ܐܺܝܕܳܟ. ܘܢܶܗܘܽܘܢ ܪܽܘܫܡܳܐ ܒܶܝܬ ܥܰܝܢܰܝ̈ܟ.
9 ܘܰܟܬܽܘܒ ܐܶܢܽܘܢ ܥܰܠ ܐܶܣ̈ܟܦܳܬܳܐ ܕܒܳܬܰܝ̈ܟ ܘܥܰܠ ܬܰܖ̈ܥܰܝܟ.
10 ܘܡܳܐ ܕܰܐܥܠܳܟ ܡܳܪܝܳܐ ܐܰܠܳܗܳܟ ܠܰܐܪܥܳܐ ܕܺܝܡܳܐ ܠܰܐܒܳܗܰܝ̈ܟ ܠܡܶܬܰܠ ܠܗܽܘܢ. ܠܰܐܒܪܳܗܳܡ. ܘܠܺܐܝܣܚܳܩ. ܘܰܠܝܰܥܩܽܘܒ. ܠܡܶܬܰܠ ܠܳܟ ܩܽܘܖ̈ܝܳܐ ܕܪܰܘܖ̈ܒܳܢ ܘܛܳܒ̈ܳܢ ܕܠܳܐ ܒܢܰܝܬ.
11 ܘܒ̈ܳܬܶܐ ܕܰܡܠܶܝܢ ܟܽܠ ܛܳܒ̈ܳܬܳܐ ܕܠܳܐ ܡܠܰܝܬ ܘܓܽܘ̈ܒܶܐ ܚܦܺܝܖ̈ܶܐ ܕܠܳܐ ܚܦܰܪܬ. ܘܟܰܖ̈ܡܶܐ ܘܙܰܝ̈ܬܶܐ ܕܠܳܐ ܢܨܰܒܬ. ܘܬܶܐܟܽܘܠ ܘܬܶܣܒܰܥ.
12 ܐܶܙܕܰܗܪ ܕܠܳܐ ܬܶܛܥܶܐ ܠܡܳܪܝܳܐ ܐܰܠܳܗܳܟ. ܕܰܐܦܩܳܟ ܡܶܢ ܐܰܪܥܳܐ ܕܡܶܨܪܶܝܢ. ܡܶܢ ܒܶܝܬ ܥܰܒܕܽܘܬܳܐ.
13 ܠܡܳܪܝܳܐ ܐܰܠܳܗܳܟ ܕܚܰܠ. ܘܠܶܗ ܦܠܽܘܚ. ܘܒܰܫܡܶܗ ܝܺܡܰܝ.
14 ܠܳܐ ܬܺܐܙܽܠܘܢ ܒܳܬܰܪ ܐܰܠܳܗ̈ܶܐ ܐ̱ܚܖ̈ܳܢܶܐ ܕܥܰܡ̈ܡܶܐ ܕܒܰܚܕܳܖ̈ܰܝܟܽܘܢ.
15 ܡܶܛܽܠ ܕܰܐܠܳܗܰܐ ܗ̱ܘ ܛܰܢܳܢܳܐ ܡܳܪܝܳܐ ܐܰܠܳܗܳܟ ܒܓܰܘܳܟ. ܕܠܳܐ ܢܶܬܚܰܡܰܬ ܪܽܘܓܙܶܗ ܕܡܳܪܝܳܐ ܐܰܠܳܗܳܟ ܥܠܰܝܟ. ܘܢܰܘܒܕܳܟ ܡܶܢ ܐܰܦܶܝ̈ܗ̇ ܕܰܐܪܥܳܐ.
16 ܠܳܐ ܬܢܰܣܽܘܢ ܠܡܳܪܝܳܐ ܐܰܠܳܗܟܽܘܢ. ܐܰܝܟ ܕܢܰܣܺܝܬܽܘܢ ܒܢܶܣ̈ܝܽܘܢܶܐ.
17 ܐܶܠܳܐ ܛܰܪܘ ܦܽܘܩܕܳܢܰܘ̈ܗܝ ܕܡܳܪܝܳܐ ܐܰܠܳܗܟܽܘܢ. ܘܣܗ̈ܕܘܳܬܶܗ. ܘܢܳܡܽܘܣܰܘ̈ܗܝ ܕܦܰܩܕܳܟ.
18 ܘܰܥܒܶܕ ܕܫܰܦܺܝܪ ܘܰܬܪܺܝܨ ܩܕܳܡ ܡܳܪܝܳܐ ܐܰܠܳܗܳܟ ܕܢܰܛܐܶܒ ܠܳܟ. ܘܬܶܥܽܘܠ ܘܬܺܐܪܰܬ ܐܰܪܥܳܐ ܛܳܒܬܳܐ ܕܺܝܡܳܐ ܡܳܪܝܳܐ ܠܰܐܒܳܗܰܝ̈ܟ.
19 ܘܢܶܬܒܰܪ ܠܟܽܠܗܽܘܢ ܒܥܶܠܕܒܳܒܰܝ̈ܟ ܡܶܢ ܩܕܳܡܰܝܟ ܐܰܝܟ ܕܶܐܡܰܪ ܡܳܪܝܳܐ.
20 ܘܟܰܕ ܢܫܰܐܠܳܟ ܒܪܳܟ ܡܚܳܪ. ܘܢܺܐܡܰܪ ܠܳܟ. ܡܳܢܳܐ ܗ̱ܝ ܣܳܗܕܽܘܬܳܐ. ܘܢܳܡܽܘܣܳܐ. ܘܕܺܝܢܳܐ ܕܦܰܩܶܕܟܽܘܢ ܡܳܪܝܳܐ ܐܰܠܳܗܰܢ.
21 ܐܶܡܰܪ ܠܰܒܪܳܟ. ܕܥܰܒ̈ܕܶܐ ܗܘܰܝܢ ܕܦܶܪܥܽܘܢ ܒܡܶܨܪܶܝܢ. ܘܰܐܦܩܰܢ ܡܳܪܝܳܐ ܡܶܢ ܡܶܨܪܶܝܢ ܒܺܐܝܕܳܐ ܬܰܩܺܝܦܬܳܐ.
22 ܘܰܥܒܰܕ ܡܳܪܝܳܐ ܐܳܬܘ̈ܳܬܳܐ. ܘܬܶܕܡܖ̈ܳܬܳܐ ܪܰܘܖ̈ܒܳܬܳܐ. ܘܒܺܝ̈ܫܳܬܳܐ ܒܡܶܨܪܶܝܢ. ܒܦܶܪܥܽܘܢ ܘܰܒܟܽܠܶܗ ܒܰܝܬܶܗ ܠܥܺܝܢܰܝ̈ܢ.
23 ܘܠܰܢ ܐܰܦܶܩ ܡܳܪܝܳܐ ܡܶܢ ܬܰܡܳܢ. ܕܢܰܥܠܰܢ ܘܢܶܬܶܠ ܠܰܢ ܐܰܪܥܳܐ ܕܺܝܡܳܐ ܠܰܐܒܳܗܰܝ̈ܢ.
24 ܘܦܰܩܕܰܢ ܡܳܪܝܳܐ ܠܡܶܥܒܰܕ ܗܳܠܶܝܢ ܟܽܠܗܽܘܢ ܢܳܡܽܘܣ̈ܶܐ. ܠܡܶܕܚܰܠ ܡܶܢ ܩܕܳܡ ܡܳܪܝܳܐ ܐܰܠܳܗܰܢ. ܕܢܰܛܐܶܒ ܠܰܢ ܟܽܠܗܽܘܢ ܝܰܘ̈ܡܳܬܳܐ. ܘܢܰܚܶܝܢ ܐܰܝܟ ܕܝܰܘܡܳܢܳܐ.
25 ܘܙܰܕܺܝܩܽܘܬܳܐ ܬܶܗܘܶܐ ܠܰܢ ܡܳܐ ܕܰܢܛܰܪܢ ܘܰܥܒܰܕܢ ܦܽܘܩܕܳܢܳܐ ܗܳܢܳܐ ܟܽܠܶܗ ܩܕܳܡ ܡܳܪܝܳܐ ܐܰܠܳܗܰܢ ܐܰܝܟ ܕܦܰܩܕܰܢ.