Deuteronomy 23
The Book of Deuteronomy
܀ ܬܢܝܢ ܢܡܘܣܐ ܟܓ ܀
1 ܠܳܐ ܢܶܥܽܘܠ ܓܰܝܳܪܳܐ ܠܰܟܢܽܘܫܬܶܗ ܕܡܳܪܝܳܐ.
2 ܘܠܳܐ ܢܶܥܽܘܠ ܒܰܪ ܓܰܘܪܳܐ ܠܰܟܢܽܘܫܬܶܗ ܕܡܳܪܝܳܐ. ܐܳܦܠܳܐ ܥܰܠ ܥܶܣܪܳܐ ܕܳܖ̈ܺܝܢ ܢܶܥܽܘܠ ܠܰܟܢܽܘܫܬܶܗ ܕܡܳܪܝܳܐ.
3 ܠܳܐ ܢܶܥܽܘܠ ܥܰܡܽܘܢܳܝܳܐ ܘܡܽܘܐܳܒܳܝܳܐ ܠܰܟܢܽܘܫܬܶܗ ܕܡܳܪܝܳܐ. ܐܳܦܠܳܐ ܠܕܳܪܳܐ ܥܣܺܝܪܳܝܳܐ ܢܶܥܠܽܘܢ ܠܰܟܢܽܘܫܬܶܗ ܕܡܳܪܝܳܐ ܠܥܳܠܰܡ.
4 ܥܰܠ ܕܠܳܐ ܩܰܪܶܒܘ ܠܟܽܘܢ ܠܰܚܡܳܐ ܘܡܰܝ̈ܳܐ ܒܽܐܘܪܚܳܐ ܟܰܕ ܢܦܰܩܬܽܘܢ ܡܶܢ ܡܶܨܪܶܝܢ. ܘܥܰܠ ܕܶܐܓܰܪ ܥܠܰܝܟ ܠܒܶܠܥܳܡ ܒܰܪ ܒܥܽܘܪ ܡܶܢ ܦܺܝܬܽܘܪ ܕܳܐܪܳܡ ܢܰܗܖ̈ܺܝܢ. ܠܰܡܠܳܛܳܟ.
5 ܘܠܳܐ ܨܒܳܐ ܡܳܪܝܳܐ ܐܰܠܳܗܳܟ ܠܡܶܫܡܥܶܗ ܠܒܶܠܥܳܡ. ܘܰܐܗܦܶܟ ܐܶܢܶܝܢ ܡܳܪܝܳܐ ܐܰܠܳܗܳܟ ܠܰܘ̈ܛܳܬܶܗ ܠܒ̣ܽܘܖ̈ܟܳܬܳܐ. ܡܶܛܽܠ ܕܪܰܚܡܳܟ ܡܳܪܝܳܐ ܐܰܠܳܗܳܟ.
6 ܠܳܐ ܬܶܨܒܶܐ ܠܰܫܠܳܡܗܽܘܢ ܘܰܠܛܳܒ̈ܳܬܗܽܘܢ ܟܽܠ ܝܰܘ̈ܡܰܝ ܚܰܝܰܝ̈ܟ ܠܥܳܠܰܡ.
7 ܠܳܐ ܬܶܕܚܩܺܘܗܝ ܠܰܐܕܽܘܡܳܝܳܐ. ܡܶܛܽܠ ܕܰܐܚܽܘܟ ܗܽܘ. ܘܠܳܐ ܬܶܕܚܩܺܝܘܗܝ ܠܡܶܨܪܳܝܳܐ. ܡܶܛܽܠ ܕܥܳܡܽܘܪܳܐ ܗܘܰܝܬ ܒܰܐܪܥܶܗ.
8 ܒܢܰܝ̈ܳܐ ܕܡܶܬܝܰܠܕܺܝܢ ܠܗܽܘܢ ܒܕܳܪܳܐ ܬܠܺܝܬܳܝܳܐ. ܢܶܥܠܽܘܢ ܠܰܟܢܽܘܫܬܶܗ ܕܡܳܪܝܳܐ.
9 ܘܟܰܕ ܬܶܦܽܘܩ ܒܡܰܫܪܺܝܬܳܐ ܥܰܠ ܒܥܶܠܕܒܳܒܰܝ̈ܟ. ܐܶܙܕܰܗܪ ܡܶܢ ܟܽܠܡܶܕܶܡ ܕܒܺܝܫ.
10 ܘܶܐܢ ܢܶܗܘܶܐ ܒܳܟ ܓܰܒܪܳܐ ܕܠܳܐ ܗܘܳܐ ܕܟܶܐ ܡܶܢ ܩܶܪܝܳܐ ܕܠܺܠܝܳܐ. ܢܶܦܽܘܩ ܠܶܗ ܠܒܰܪ ܡܶܢ ܡܰܫܪܺܝܬܳܐ. ܘܠܳܐ ܢܶܥܽܘܠ ܠܓܰܘ ܡܰܫܪܺܝܬܳܐ.
11 ܘܰܠܥܶܕܳܢ ܪܰܡܫܳܐ ܢܶܣܚܶܐ ܒܡܰܝ̈ܳܐ. ܘܡܳܐ ܕܥܶܪܒܰܬ ܫܶܡܫܳܐ ܢܶܥܽܘܠ ܠܓܰܘ ܡܰܫܪܺܝܬܳܐ.
12 ܘܰܐܬܪܳܐ ܢܶܗܘܶܐ ܝܺܕܺܝܥ ܠܳܟ ܠܒܰܪ ܡܶܢ ܡܰܫܪܺܝܬܳܐ. ܘܦܽܘܩ ܠܬܰܡܳܢ ܠܡܰܝ̈ ܖ̈ܶܓܠܰܝܟ.
13 ܘܣܶܟܬܳܐ ܬܶܗܘܶܐ ܠܳܟ ܥܰܠ ܙܰܝܢܳܟ. ܘܡܳܐ ܕܝܳܬܶܒ ܐܰܢ̱ܬ ܠܡܰܝ̈ ܖ̈ܶܓܠܰܝܟ. ܗܘܰܝܬ ܚܳܦܰܪ ܒܳܗ̇. ܘܰܗܘܰܝܬ ܡܟܰܣܶܐ ܬܶܒܬܳܟ.
14 ܡܶܛܽܠ ܕܡܳܪܝܳܐ ܐܰܠܳܗܳܟ ܡܗܰܠܶܟ ܒܓܰܘ ܡܰܫܪܺܝܬܳܟ. ܕܰܢܦܰܨܶܝܟ ܘܢܰܫܠܶܡ ܒܥܶܠܕܒܳܒܰܝ̈ܟ ܩܕܳܡܰܝܟ. ܘܬܶܗܘܶܐ ܡܰܫܪܺܝܬܳܟ ܩܰܕܺܝܫܳܐ. ܕܠܳܐ ܢܶܚܙܶܐ ܒܳܟ ܨܒܽܘܬܳܐ ܕܰܡܦܰܪܣܝܳܐ. ܘܢܶܗܦܽܘܟ ܠܶܗ ܡܶܢܟܽܘܢ.
15 ܠܳܐ ܬܰܫܠܶܡ ܥܰܒܕܳܐ ܠܡܳܪܶܗ ܕܥܳܪܶܩ ܠܘܳܬܳܟ ܡܶܢ ܡܳܪܶܗ.
16 ܐܶܠܳܐ ܥܰܡܳܟ ܢܶܬܶܒ ܒܰܐܬܪܳܐ ܕܨܳܒܶܐ. ܒܰܚܕܳܐ ܡܶܢ ܩܽܘܖ̈ܝܳܟ ܐܰܬܰܪ ܕܫܰܦܺܝܪ ܠܶܗ. ܘܠܳܐ ܬܶܥܠܒܺܝܘܗܝ.
17 ܠܳܐ ܬܶܗܘܶܐ ܙܳܢܺܝܬܳܐ ܡܶܢ ܒ̈ܢܳܬ ܝܺܣܪܳܐܶܝܠ. ܘܳܐܦܠܳܐ ܢܶܗܘܶܐ ܕܰܡܙܰܢܶܐ ܡܶܢ ܒܢܰܝ̈ ܝܺܣܪܳܐܶܝܠ.
18 ܠܳܐ ܬܰܥܶܠ ܐܰܓܰܪ ܙܳܢܺܝܬܳܐ ܘܰܕܡܰܝ̈ ܟܰܠܒܳܐ ܠܒܰܝܬܶܗ ܕܡܳܪܝܳܐ ܐܰܠܳܗܳܟ ܠܟܽܠ ܢܕܰܪ. ܡܶܛܽܠ ܕܛܰܡܐܺܝܢ ܐܶܢܽܘܢ ܩܕܳܡ ܡܳܪܝܳܐ ܐܰܠܳܗܳܟ ܬܖ̈ܰܝܗܽܘܢ.
19 ܠܳܐ ܬܪܰܒܶܐ ܥܰܠ ܐܰܚܽܘܟ ܪܶܒܺܝܬܳܐ ܕܟܶܣܦܳܐ. ܘܪܶܒܺܝܬܳܐ ܕܰܥܒܽܘܪܳܐ. ܘܪܶܒܺܝܬܳܐ ܕܟܽܠܡܶܕܶܡ ܕܪܳܒܶܐ.
20 ܥܰܠ ܢܽܘܟܪܳܝܳܐ ܪܰܒܳܐ. ܘܥܰܠ ܐܰܚܽܘܟ ܠܳܐ ܬܪܰܒܶܐ. ܕܰܢܒܰܪܟܳܟ ܡܳܪܝܳܐ ܐܰܠܳܗܳܟ ܒܟܽܠܡܶܕܶܡ ܕܡܰܘܫܶܛ ܐܰܢ̱ܬ ܐܺܝܕܳܟ. ܒܰܐܪܥܳܐ ܕܥܳܐܶܠ ܐܰܢ̱ܬ ܠܳܗ̇ ܠܡܺܐܪܬܳܗ̇
21 ܘܶܐܢ ܢܳܕܰܪ ܐܰܢ̱ܬ ܢܶܕܪܳܐ ܠܡܳܪܝܳܐ ܐܰܠܳܗܳܟ. ܠܳܐ ܬܫܰܘܚܰܪ ܠܡܶܦܪܥܶܗ. ܡܶܛܽܠ ܕܡܶܬܒܰܥ ܬܳܒܰܥ ܠܶܗ ܡܳܪܝܳܐ ܡܶܢܳܟ. ܘܗܳܘܶܐ ܥܠܰܝܟ ܚܛܳܗܳܐ.
22 ܘܶܐܢ ܠܳܐ ܨܳܒܶܐ ܐܰܢ̱ܬ ܠܡܶܕܰܪ. ܠܳܐ ܗܳܘܶܐ ܥܠܰܝܟ ܚܛܳܗܳܐ.
23 ܡܶܕܶܡ ܕܰܢܦܰܩ ܡܶܢ ܣܶܦ̈ܘܳܬܳܟ ܛܰܪ ܘܰܥܒܶܕ. ܐܰܝܟ ܕܰܢܕܰܪܬ ܠܡܳܪܝܳܐ ܐܰܠܳܗܳܟ. ܦܽܘܪܫܳܢܳܐ ܕܡܰܠܶܠܬ ܒܦܽܘܡܳܟ.
24 ܘܡܳܐ ܕܥܳܐܶܠ ܐܰܢ̱ܬ ܠܟܰܪܡܳܐ ܕܚܰܒܪܳܟ. ܐܰܟܽܘܠ ܥܶܢ̈ܒܶܐ ܥܕܰܡܳܐ ܕܣܳܒܥܳܐ ܢܰܦܫܳܟ. ܘܰܒܡܳܐܢܳܟ ܠܳܐ ܬܰܪܡܶܐ.
25 ܘܡܳܐ ܕܥܳܐܶܠ ܐܰܢ̱ܬ ܠܩܳܝܶܡܬܳܐ ܕܚܰܒܪܳܟ. ܡܠܽܘܓ ܫܶܒ̈ܶܐ ܒܺܐܝܕܳܟ. ܘܡܰܓܠܳܐ ܠܳܐ ܬܢܺܝܦ ܥܰܠ ܩܳܝܶܡܬܳܐ ܕܚܰܒܪܳܟ.