Deuteronomy 29
The Book of Deuteronomy
܀ ܬܢܝܢ ܢܡܘܣܐ ܟܛ ܀
1 ܗܳܠܶܝܢ ܦܶܬܓܳܡ̈ܶܐ ܕܰܩܝܳܡܳܐ ܕܦܰܩܶܕ ܡܳܪܝܳܐ ܠܡܽܘܫܶܐ. ܠܰܡܩܳܡܽܘ ܥܰܡ ܒܢܰܝ̈ ܝܺܣܪܳܐܶܝܠ ܒܰܐܪܥܳܐ ܕܡܽܘܐܳܒ. ܣܛܰܪ ܡܶܢ ܩܝܳܡܳܐ ܕܰܐܩܺܝܡ ܥܰܡܗܽܘܢ ܒܚܽܘܪܺܝܒ.
2 ܘܰܩܪܳܐ ܡܽܘܫܶܐ ܠܟܽܠܶܗ ܝܺܣܪܳܐܶܝܠ. ܘܶܐܡܰܪ ܠܗܽܘܢ. ܐܰܢ̱ܬܽܘܢ ܚܙܰܝܬܽܘܢ ܟܽܠ ܡܶܕܶܡ ܕܰܥܒܰܕ ܡܳܪܝܳܐ ܠܥܺܝܢܰܝ̈ܟܽܘܢ ܒܰܐܪܥܳܐ ܕܡܶܨܪܶܝܢ. ܠܦܶܪܥܽܘܢ ܘܰܠܟܽܠܗܽܘܢ ܥܰܒܕܰܘ̈ܗܝ. ܘܰܠܟܽܠܶܗ ܥܰܡܶܗ. ܘܰܠܟܽܠܳܗ̇ ܐܰܪܥܶܗ.
3 ܢܶܣܝܽܘ̈ܢܶܐ ܪܰܘܖ̈ܒܶܐ ܕܰܚ̈ܙܰܝ ܥܰܝܢܰܝ̈ܟܽܘܢ. ܐܳܬܘ̈ܳܬܳܐ. ܘܬܶܕܡܖ̈ܳܬܳܐ ܪܰܘܖ̈ܒܳܬܳܐ ܗܳܠܶܝܢ ܕܰܚܙܰܝܬܽܘܢ.
4 ܘܠܳܐ ܝܰܗܒ ܠܟܽܘܢ ܡܳܪܝܳܐ ܠܶܒܳܐ ܠܡܶܕܰܥ. ܘܥܰܝ̈ܢܶܐ ܠܡܶܚܙܳܐ. ܘܶܐܕܢ̈ܶܐ ܠܡܶܫܡܰܥ ܥܕܰܡܳܐ ܠܝܰܘܡܳܢܳܐ.
5 ܘܕܰܒܰܪܟܽܘܢ ܐܰܪܒܥܺܝܢ ܫܢܺܝ̈ܢ ܒܡܰܕܒܪܳܐ. ܠܳܐ ܒܠܺܝܘ ܢܰܚܬܰܝ̈ܟܽܘܢ ܡܶܢܟܽܘܢ. ܘܰܡܣܳܢܰܝ̈ܟܽܘܢ ܠܳܐ ܒܠܺܝܘ ܡܶܢ ܖ̈ܶܓܠܰܝܟܽܘܢ.
6 ܘܠܰܚܡܳܐ ܠܳܐ ܐܶܟܰܠܬܽܘܢ. ܘܚܰܡܪܳܐ ܘܫܰܟܪܳܐ ܠܳܐ ܐܶܫܬܺܝܬܽܘܢ. ܡܶܛܽܠ ܕܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ ܐܰܠܳܗܟܽܘܢ.
7 ܘܰܐܝܬܺܝܟܽܘܢ ܠܰܐܬܪܳܐ ܗܳܢܳܐ. ܘܰܢܦܰܩ ܣܺܝܚܽܘܢ ܡܰܠܟܳܐ ܕܚܶܫܒܽܘܢ. ܘܥܽܘܓ ܡܰܠܟܳܐ ܕܡܰܬܢܺܝܢ ܠܽܐܘܪܥܰܢ ܠܰܩܪܳܒܳܐ. ܘܰܚܪܰܒܢ ܐܶܢܽܘܢ.
8 ܘܰܢܣܰܒܢ ܐܰܪܥܗܽܘܢ. ܘܝܰܗܒܢܳܗ̇ ܝܽܘܪܬܳܢܳܐ ܠܪܽܘܒܺܝܠ. ܘܰܠܓܳܕ. ܘܰܠܦܶܠܓܶܗ ܕܫܰܒܛܳܐ ܕܰܡܢܰܫܶܐ.
9 ܛܰܪܘ ܦܽܘܩܕܳܢܰܘ̈ܗܝ ܕܢܳܡܽܘܣܳܐ ܗܳܢܳܐ. ܘܰܥܒܶܕܘ ܐܶܢܽܘܢ. ܕܰܗܘܰܝܬܽܘܢ ܡܰܣܩܺܝܢ ܠܪܺܝܫ ܟܽܠ ܡܶܕܶܡ ܕܥܳܒܕܺܝܢ ܐ̱ܢܬܽܘܢ.
10 ܐܰܢ̱ܬܽܘܢ ܩܳܝܡܺܝܢ ܐܰܢ̱ܬܽܘܢ ܝܰܘܡܳܢܳܐ ܩܕܳܡ ܡܳܪܝܳܐ ܐܰܠܳܗܟܽܘܢ. ܟܽܠܗܽܘܢ ܖ̈ܺܝܫܰܝ ܫܰܒܛܰܝ̈ܟܽܘܢ. ܘܣܳܒܰܝ̈ܟܽܘܢ. ܘܣܳܦܖ̈ܰܝܟܽܘܢ. ܟܽܠܗܽܘܢ ܓܰܒܖ̈ܶܐ ܕܺܝܣܪܳܐܶܝܠ.
11 ܘܺܝܩܰܪܬܟܽܘܢ. ܘܢܶܫܰܝ̈ܟܽܘܢ. ܘܥܳܡܽܘܪܳܐ ܕܰܒܓܰܘ ܡܰܫܪܺܝܬܳܟ. ܡܶܢ ܠܳܩܶܛ ܩܰܝ̈ܣܰܝܟ. ܘܰܥܕܰܡܳܐ ܠܡܳܠܶܐ ܡܰܝ̈ܟ.
12 ܕܠܳܐ ܬܶܥܒܪܽܘܢ ܥܰܠ ܩܝܳܡܶܗ ܕܡܳܪܝܳܐ ܐܰܠܳܗܟܽܘܢ. ܘܥܰܠ ܡܰܘ̈ܡܳܬܶܗ ܕܡܳܪܝܳܐ ܐܰܠܳܗܟܽܘܢ. ܕܰܐܩܺܝܡ ܥܰܡܟܽܘܢ ܝܰܘܡܳܢܳܐ.
13 ܡܶܛܽܠ ܕܰܢܩܺܝܡܳܟ ܠܶܗ ܝܰܘܡܳܢܳܐ ܥܰܡܳܐ. ܘܗܽܘ ܢܶܗܘܶܐ ܠܳܟ ܐܰܠܳܗܳܐ ܐܰܝܟ ܕܶܐܡܰܪ ܠܳܟ. ܘܰܐܝܟ ܕܺܝܡܳܐ ܠܰܐܒܳܗܰܝ̈ܟ. ܠܰܐܒܪܳܗܳܡ. ܘܠܺܐܝܣܚܳܩ. ܘܰܠܝܰܥܩܽܘܒ.
14 ܠܳܐ ܗܘܳܐ ܥܰܡܟܽܘܢ ܒܰܠܚܽܘܕܰܝܟܽܘܢ ܡܩܺܝܡ ܐ̱ܢܳܐ ܩܝܳܡܳܐ ܗܳܢܳܐ ܘܡܰܘܡܬܳܐ ܗܳܕܶܐ.
15 ܐܶܠܳܐ ܥܰܡ ܟܽܠܡܰܢ ܕܗܳܪܟܳܐ ܗܽܘ. ܘܥܰܡܰܢ ܩܳܐܶܡ ܝܰܘܡܳܢܳܐ ܩܕܳܡ ܡܳܪܝܳܐ ܐܰܠܳܗܰܢ. ܘܥܰܡ ܟܽܠ ܡܰܢ ܕܠܳܐ ܗܘܳܐ ܥܰܡܰܢ ܗܳܪܟܳܐ ܝܰܘܡܳܢܳܐ.
16 ܡܶܛܽܠ ܕܰܐܢ̱ܬܽܘܢ ܝܳܕܥܺܝܢ ܐܰܢ̱ܬܽܘܢ. ܕܰܥܡܰܪܢ ܒܰܐܪܥܳܐ ܕܡܶܨܪܶܝܢ. ܘܰܥܒܰܪܢ ܒܶܝܬ ܥܰܡ̈ܡܶܐ ܕܰܥܒܰܪܬܽܘܢ.
17 ܘܰܚܙܰܝܬܽܘܢ ܛܰܢܦ̈ܘܳܬܗܽܘܢ. ܘܕܶܚ̈ܠܳܬܗܽܘܢ ܕܩܰܝܣܳܐ. ܘܰܕܟܺܐܦܳܐ. ܘܰܕܣܺܐܡܳܐ. ܘܰܕܕܰܗܒܳܐ. ܕܰܩܪܺܝܡܺܝܢ.
18 ܕܰܠܡܳܐ ܐܺܝܬ ܒܟܽܘܢ ܓܰܒܪܳܐ. ܐܰܘ ܐܰܢ̱ܬܬܳܐ. ܐܰܘ ܫܰܪܒܬܳܐ. ܐܰܘ ܫܰܒܛܳܐ. ܕܣܳܛܶܐ ܠܶܒܶܗ ܝܰܘܡܳܢܳܐ ܡܶܢ ܡܳܪܝܳܐ ܐܰܠܳܗܰܢ. ܠܡܺܐܙܰܠ ܠܡܶܦܠܰܚ ܠܰܐܠܳܗ̈ܶܐ ܕܥܰܡ̈ܡܶܐ ܗܳܢܽܘܢ. ܕܰܠܡܳܐ ܐܺܝܬ ܒܟܽܘܢ ܥܶܩܳܪܳܐ ܕܡܰܘܥܶܐ ܡܶܪܬܳܐ ܘܓܶܕ̈ܕܶܐ.
19 ܘܡܳܐ ܕܰܫܡܰܥ ܦܶܬܓܳܡ̈ܶܐ ܕܡܰܘܡܬܳܐ ܗܳܕܶܐ. ܢܶܬܚܰܫܰܒ ܒܠܶܒܶܗ. ܘܢܺܐܡܰܪ. ܫܠܳܡܳܐ ܢܶܗܘܶܐ ܠܺܝ ܕܰܒܨܶܒܝܳܢ ܠܶܒܝ ܐܳܙܶܠ ܐ̱ܢܳܐ. ܕܢܰܘܣܶܦ ܪܰܘܳܝܽܘܬܳܐ ܥܰܠ ܨܶܗܝܽܘܬܳܐ.
20 ܠܳܐ ܢܶܨܛܒܶܐ ܡܳܪܝܳܐ ܠܡܶܫܒܰܩ ܠܶܗ. ܐܶܠܳܐ ܗܳܝܕܶܝܢ ܢܶܥܫܰܢ ܪܽܘܓܙܶܗ ܕܡܳܪܝܳܐ ܘܰܛܢܳܢܶܗ ܒܓܰܒܪܳܐ ܗܰܘ. ܘܬܺܐܬܶܐ ܥܠܰܘܗܝ ܟܽܠܳܗ̇ ܠܰܘܛܬܳܐ ܕܰܟܬܺܝܒܳܐ ܒܰܟܬܳܒܳܐ ܗܳܢܳܐ. ܘܢܶܥܛܶܐ ܡܳܪܝܳܐ ܫܡܶܗ ܡܶܢ ܬܚܶܝܬ ܫܡܰܝܳܐ.
21 ܘܢܶܦܪܫܺܝܘܗܝ ܡܳܪܝܳܐ ܠܒܺܝܫܬܳܐ ܡܶܢ ܟܽܠܗܽܘܢ ܫܰܒ̈ܛܶܐ ܕܺܝܣܪܳܐܶܝܠ. ܐܰܝܟ ܟܽܠܗܶܝܢ ܠܰܘ̈ܛܳܬܳܐ ܕܰܩܝܳܡܳܐ ܕܰܟܬܺܝ̈ܒܳܢ ܒܰܟܬܳܒܳܐ ܕܢܳܡܽܘܣܳܐ ܗܳܢܳܐ.
22 ܘܢܺܐܡܰܪ ܕܳܪܳܐ ܐ̱ܚܪܺܢܳܐ. ܒܢܰܝ̈ܟܽܘܢ ܕܰܢܩܽܘܡܽܘܢ ܒܳܬܰܪܟܽܘܢ. ܘܢܽܘܟܖ̈ܳܝܶܐ ܕܢܺܐܬܽܘܢ ܡܶܢ ܐܰܪܥܳܐ ܪܰܚܺܝܩܬܳܐ. ܘܢܶܚܙܽܘܢ ܡܰܚ̈ܘܳܬܳܗ̇ ܕܰܐܪܥܳܐ ܗܳܝ. ܘܟܽܘܖ̈ܗܳܢܶܐ ܕܰܐܝܬܺܝ ܥܠܶܝܗ̇ ܡܳܪܝܳܐ.
23 ܟܶܒܪܺܝܬܳܐ. ܘܡܶܠܚܳܐ ܝܰܩܺܝܕܬܳܐ. ܟܽܠܳܗ̇ ܐܰܪܥܳܐ ܠܳܐ ܬܶܙܕܪܰܥ. ܘܠܳܐ ܬܰܘܥܶܐ. ܘܠܳܐ ܢܶܣܰܩ ܒܳܗ̇ ܟܽܠ ܥܣܶܒ. ܐܶܠܳܐ ܬܶܗܘܶܐ ܐܰܝܟ ܣܕܽܘܡ ܘܰܐܝܟ ܥܰܡܽܘܪܳܐ ܘܰܐܝܟ ܐܰܕܡܳܐ ܘܰܐܝܟ ܨܒܽܘܐܳܝܺܡ ܕܰܗܦܰܟ ܐܶܢܶܝܢ ܡܳܪܝܳܐ ܒܪܽܘܓܙܶܗ ܘܰܒܚܶܡܬܶܗ.
24 ܘܢܺܐܡܪܽܘܢ ܟܽܠܗܽܘܢ ܥܰܡ̈ܡܶܐ. ܥܰܠ ܡܳܢܳܐ ܥܒܰܕ ܡܳܪܝܳܐ ܗܳܟܰܢܳܐ ܠܰܐܪܥܳܐ ܗܳܕܶܐ. ܘܥܰܠ ܡܳܢܳܐ ܐܶܬܚܰܡܰܬ ܪܽܘܓܙܶܗ ܗܳܢܳܐ ܪܰܒܳܐ.
25 ܘܢܺܐܡܪܽܘܢ. ܥܰܠ ܕܰܫܒܰܩܘ ܩܝܳܡܶܗ ܕܡܳܪܝܳܐ ܐܰܠܳܗܳܐ ܕܰܐܒܳܗܰܝ̈ܗܽܘܢ. ܕܰܐܩܺܝܡ ܥܰܡܗܽܘܢ ܟܰܕ ܐܰܦܶܩ ܐܶܢܽܘܢ ܡܶܢ ܐܰܪܥܳܐ ܕܡܶܨܪܶܝܢ.
26 ܘܶܐܙܰܠܘ ܘܰܦܠܰܚܘ ܠܰܐܠܳܗ̈ܶܐ ܐ̱ܚܖ̈ܳܢܶܐ. ܘܰܣܓܶܕܘ ܠܗܽܘܢ. ܐܰܠܳܗ̈ܶܐ ܕܠܳܐ ܝܺܕܰܥܘ ܐܶܢܽܘܢ. ܘܠܳܐ ܐܶܬܦܰܠܰܓܘ ܠܗܽܘܢ.
27 ܘܶܐܬܚܰܡܰܬ ܪܽܘܓܙܶܗ ܕܡܳܪܝܳܐ ܥܰܠ ܐܰܪܥܳܐ ܗܳܝ. ܕܢܰܝܬܶܐ ܥܠܶܝܗ̇ ܟܽܠܗܶܝܢ ܠܰܘ̈ܛܳܬܳܐ ܕܰܟܬܺܝ̈ܒܳܢ ܒܰܟܬܳܒܳܐ ܗܳܢܳܐ.
28 ܘܢܶܥܩܽܘܪ ܐܶܢܽܘܢ ܡܳܪܝܳܐ ܡܶܢ ܐܰܬܪܗܽܘܢ. ܒܚܶܡܬܳܐ ܘܰܒܪܽܘܓܙܳܐ ܪܰܒܳܐ. ܘܢܶܫܕܶܐ ܐܶܢܽܘܢ ܠܰܐܪܥܳܐ ܐ̱ܚܪܺܬܳܐ ܐܰܝܟ ܕܝܰܘܡܳܢܳܐ.
29 ܣܬܺܝܖ̈ܳܬܳܐ ܕܡܳܪܝܳܐ ܐܶܢܶܝܢ ܐܰܠܳܗܰܢ. ܘܓܰܠ̈ܝܳܬܳܐ ܕܺܝܠܰܢ ܘܕܰܒܢܰܝ̈ܢ ܠܥܳܠܰܡ. ܘܢܶܥܒܶܕ ܟܽܠܗܽܘܢ ܦܶܬܓܳܡܰܘ̈ܗܝ ܕܢܳܡܽܘܣܳܐ ܗܳܢܳܐ.