Deuteronomy 30
The Book of Deuteronomy
܀ ܬܢܝܢ ܢܡܘܣܐ ܠ ܀
1 ܘܢܶܗܘܶܐ ܕܟܰܕ ܢܺܐܬܽܘܢ ܥܠܰܝܟ ܗܳܠܶܝܢ ܟܽܠܗܽܘܢ ܦܶܬܓܳܡ̈ܶܐ. ܒܽܘܖ̈ܟܳܬܳܐ ܘܠܰܘ̈ܛܳܬܳܐ ܕܝܶܗܒܶܬ ܩܕܳܡܰܝܟ. ܘܬܶܬܚܰܫܰܒ ܒܠܶܒܳܟ ܒܟܽܠܗܽܘܢ ܥܰܡ̈ܡܶܐ. ܕܰܢܒܰܕܪܳܟ ܡܳܪܝܳܐ ܐܰܠܳܗܳܟ ܠܬܰܡܳܢ.
2 ܘܬܶܬܦܢܶܐ ܠܘܳܬ ܡܳܪܝܳܐ ܐܰܠܳܗܳܟ. ܘܬܶܫܡܰܥ ܒܩܳܠܶܗ ܐܰܝܟ ܟܽܠܡܶܕܶܡ ܕܰܡܦܰܩܶܕ ܐ̱ܢܳܐ ܝܰܘܡܳܢܳܐ. ܐܰܢ̱ܬ ܘܰܒܢܰܝ̈ܟ. ܒܟܽܠܶܗ ܠܶܒܳܟ. ܘܰܒܟܽܠܳܗ̇ ܢܰܦܫܳܟ.
3 ܢܰܗܦܶܟ ܡܳܪܝܳܐ ܐܰܠܳܗܳܟ ܫܒܺܝܬܳܟ. ܘܰܢܪܰܚܶܡ ܥܠܰܝܟ. ܘܰܢܬܽܘܒ ܘܰܢܟܰܢܫܳܟ ܡܶܢ ܟܽܠܗܽܘܢ ܥܰܡ̈ܡܶܐ. ܕܒܰܕܪܳܟ ܒܗܽܘܢ ܡܳܪܝܳܐ ܐܰܠܳܗܳܟ.
4 ܘܶܐܢ ܢܶܗܘܽܘܢ ܡܒܰܕܖ̈ܰܝܟ ܝܺܣܪܳܐܶܝܠ ܪܰܚܺܝܩܺܝܢ ܒܣܰܘ̈ܦܰܝ ܫܡܰܝܳܐ. ܡܶܢ ܬܰܡܳܢ ܢܟܰܢܫܳܟ ܡܳܪܝܳܐ ܐܰܠܳܗܳܟ. ܘܡܶܢ ܬܰܡܳܢ ܢܩܰܪܒܳܟ.
5 ܘܢܰܝܬܶܝܟ ܡܳܪܝܳܐ ܐܰܠܳܗܳܟ ܠܰܐܪܥܳܐ ܕܺܝܪܶܬܘ ܐܰܒܳܗܰܝ̈ܟ. ܘܬܺܐܪܬܺܝܗ̇. ܘܢܰܛܐܶܒ ܠܳܟ. ܘܢܰܣܓܶܝܟ ܛܳܒ ܡܶܢ ܐܰܒܳܗܰܝ̈ܟ.
6 ܘܢܶܓܙܽܘܪ ܡܳܪܝܳܐ ܐܰܠܳܗܳܟ ܠܶܒܳܟ. ܘܠܶܒܳܐ ܕܙܰܪܥܳܟ ܠܥܳܠܰܡ. ܘܬܶܪܚܰܡ ܠܡܳܪܝܳܐ ܐܰܠܳܗܳܟ ܡܶܢ ܟܽܠܶܗ ܠܶܒܳܟ ܘܡܶܢ ܟܽܠܳܗ̇ ܢܰܦܫܳܟ. ܡܶܛܽܠ ܕܰܢܢܺܝܚܳܟ.
7 ܘܢܶܬܶܠ ܡܳܪܝܳܐ ܐܰܠܳܗܳܟ ܗܳܠܶܝܢ ܟܽܠܗܶܝܢ ܠܰܘ̈ܛܳܬܳܐ. ܥܰܠ ܒܥܶܠܕܒܳܒܰܝ̈ܟ. ܘܥܰܠ ܣܳܢ̈ܰܐܝܟ ܕܪܰܕܦܽܘܟ.
8 ܘܰܐܢ̱ܬ ܬܶܬܦܢܶܐ ܘܬܶܫܡܰܥ ܒܩܳܠܶܗ ܕܡܳܪܝܳܐ ܐܰܠܳܗܳܟ. ܘܬܶܥܒܶܕ ܟܽܠܗܽܘܢ ܦܽܘܩܕܳܢܰܘ̈ܗܝ ܕܰܡܦܰܩܶܕ ܐ̱ܢܳܐ ܠܳܟ ܝܰܘܡܳܢܳܐ.
9 ܘܢܰܘܬܪܳܟ ܡܳܪܝܳܐ ܐܰܠܳܗܳܟ. ܒܟܽܠܶܗ ܥܒܳܕܳܐ ܕܺܐܝܕܰܝ̈ܟ. ܘܰܒܦܺܐܖ̈ܶܐ ܕܰܐܪܥܳܟ ܠܛܳܒܬܳܐ. ܡܶܛܽܠ ܕܢܶܬܦܢܶܐ ܡܳܪܝܳܐ ܠܡܶܚܕܳܐ ܥܠܰܝܟ ܠܛܳܒܬܳܐ. ܐܰܝܟ ܕܰܚܕܺܝ ܥܰܠ ܐܰܒܳܗܰܝ̈ܟܽܘܢ.
10 ܐܶܢ ܬܶܫܡܰܥ ܒܩܳܠܶܗ ܕܡܳܪܝܳܐ ܐܰܠܳܗܳܟ. ܘܬܶܛܰܪ ܦܽܘܩܕܳܢܰܘ̈ܗܝ. ܘܢܳܡܽܘܣܰܘ̈ܗܝ ܕܰܟܬܺܝܒܺܝܢ ܒܰܟܬܳܒܳܐ ܗܳܢܳܐ. ܘܬܶܬܦܢܶܐ ܠܘܳܬ ܡܳܪܝܳܐ ܐܰܠܳܗܳܟ ܡܶܢ ܟܽܠܶܗ ܠܶܒܳܟ. ܘܡܶܢ ܟܽܠܳܗ̇ ܢܰܦܫܳܟ.
11 ܡܶܛܽܠ ܕܦܽܘܩܕܳܢܳܐ ܗܳܢܳܐ ܕܰܡܦܰܩܶܕ ܐ̱ܢܳܐ ܠܳܟ ܝܰܘܡܳܢܳܐ. ܠܳܐ ܗܘܳܐ ܟܣܶܐ ܡܶܢܳܟ. ܐܳܦܠܳܐ ܗܘܳܐ ܪܰܚܺܝܩ.
12 ܠܳܐ ܗܘܳܐ ܒܰܫܡܰܝܳܐ ܗܽܘ. ܕܬܺܐܡܰܪ ܡܰܢܽܘ ܢܶܣܰܩ ܠܳܟ ܠܰܫܡܰܝܳܐ ܘܢܶܣܒܺܝܘܗܝ ܠܰܢ. ܘܢܶܫܡܰܥ ܘܢܶܥܒܕܺܝܘܗܝ.
13 ܘܠܳܐ ܗܘܳܐ ܒܥܶܒܪܳܐ ܕܝܰܡܳܐ. ܕܬܺܐܡܰܪ ܡܰܢܽܘ ܢܶܥܒܰܪ ܠܰܢ ܠܥܶܒܪܳܐ ܕܝܰܡܳܐ. ܘܢܶܣܒܺܝܘܗܝ ܠܰܢ. ܘܢܶܫܡܰܥ ܘܢܶܥܒܕܺܝܘܗܝ.
14 ܐܶܠܳܐ ܩܰܪܺܝܒ ܗܽܘ ܠܳܟ ܦܶܬܓܳܡܳܐ ܛܳܒ. ܒܦܽܘܡܳܟ ܘܰܒܠܶܒܳܟ ܠܡܶܥܒܕܶܗ.
15 ܚܙܺܝ. ܕܝܶܗܒܶܬ ܩܕܳܡܰܝܟ ܝܰܘܡܳܢܳܐ ܚܰܝ̈ܶܐ ܘܛܳܒ̈ܳܬܳܐ. ܘܡܰܘܬܳܐ ܘܒܺܝ̈ܫܳܬܳܐ.
16 ܕܰܡܦܰܩܶܕ ܐ̱ܢܳܐ ܠܳܟ ܝܰܘܡܳܢܳܐ. ܕܬܶܪܚܰܡ ܠܡܳܪܝܳܐ ܐܰܠܳܗܳܟ. ܘܰܬܗܰܠܶܟ ܒܽܐܘܖ̈ܚܳܬܶܗ. ܘܬܶܛܰܪ ܦܽܘܩܕܳܢܰܘ̈ܗܝ. ܘܢܳܡܽܘܣܰܘ̈ܗܝ. ܘܕܺܝܢܰܘ̈ܗܝ. ܘܬܺܚܶܐ ܘܬܶܣܓܶܐ ܛܳܒ. ܘܰܢܒܰܪܟܳܟ ܡܳܪܝܳܐ ܐܰܠܳܗܳܟ ܒܰܐܪܥܳܐ ܕܥܳܐܶܠ ܐܰܢ̱ܬ ܠܬܰܡܳܢ ܠܡܺܐܪܬܳܗ̇
17 ܘܶܐܢ ܢܶܣܛܶܐ ܠܶܒܳܟ ܘܠܳܐ ܬܶܫܡܰܥ. ܘܬܶܛܥܶܐ ܘܬܶܣܓܽܘܕ ܠܰܐܠܳܗ̈ܶܐ ܐ̱ܚܖ̈ܳܢܶܐ. ܘܬܶܦܠܽܘܚ ܐܶܢܽܘܢ.
18 ܚܰܘܺܝܬܟܽܘܢ ܝܰܘܡܳܢܳܐ ܕܡܺܐܒܰܕ ܐܳܒܕܺܝܢ ܐܢ̱ܬܽܘܢ. ܘܠܳܐ ܬܰܓܪܽܘܢ ܝܰܘ̈ܡܳܬܳܐ ܒܰܐܪܥܳܐ ܕܥܳܒܪܺܝܢ ܐܢ̱ܬܽܘܢ ܝܽܘܪܕܢܳܢ. ܠܡܶܥܰܠ ܠܬܰܡܳܢ ܠܡܺܐܪܬܳܗ̇
19 ܣܰܗܕܶܬ ܒܟܽܘܢ ܝܰܘܡܳܢܳܐ ܫܡܰܝܳܐ ܘܰܐܪܥܳܐ. ܕܚܰܝ̈ܶܐ ܘܡܰܘܬܳܐ ܝܶܗܒܶܬ ܩܕܳܡܰܝܟܽܘܢ ܒܽܘܖ̈ܟܳܬܳܐ ܘܠܰܘ̈ܛܳܬܳܐ ܓܒܺܝ ܠܳܟ ܚܰܝ̈ܶܐ. ܕܬܺܚܶܐ ܐܰܢ̱ܬ ܘܙܰܪܥܳܟ.
20 ܟܰܕ ܬܶܪܚܰܡ ܠܡܳܪܝܳܐ ܐܰܠܳܗܳܟ. ܘܬܶܫܡܰܥ ܒܩܳܠܶܗ ܘܬܶܬܢܰܩܰܦ ܠܶܗ. ܡܶܛܽܠ ܕܗܽܘܝܽܘ ܚܰܝܰܝ̈ܟ ܘܢܽܘܓܪܳܐ ܕܝܰܘ̈ܡܳܬܳܟ. ܕܬܶܬܶܒ ܒܰܐܪܥܳܐ ܕܺܝܡܳܐ ܡܳܪܝܳܐ ܠܰܐܒܳܗܰܝ̈ܟ. ܠܰܐܒܪܳܗܳܡ. ܘܠܺܐܝܣܚܳܩ. ܘܰܠܝܰܥܩܽܘܒ ܠܡܶܬܰܠ ܠܳܟ.