Deuteronomy 13
The Book of Deuteronomy
܀ ܬܢܝܢ ܢܡܘܣܐ ܝܓ ܀
1 ܘܟܰܕ ܢܩܽܘܡ ܒܰܝܢܳܬܟܽܘܢ ܢܒܺܝܳܐ ܐܰܘ ܚܳܠܶܡ ܚܶܠ̈ܡܶܐ. ܘܢܶܬܶܠ ܠܳܟ ܐܳܬܳܐ ܘܬܶܕܡܽܘܪܬܳܐ.
2 ܘܬܶܗܘܶܐ ܐܳܬܳܐ ܘܬܶܕܡܽܘܪܬܳܐ ܕܳܐܡܰܪ ܠܳܟ. ܘܢܺܐܡܰܪ ܠܳܟ ܕܬܳܐ ܢܺܐܙܰܠ ܒܳܬܰܪ ܐܰܠܳܗ̈ܶܐ ܐ̱ܚܖ̈ܳܢܶܐ. ܕܠܳܐ ܝܳܕܰܥ ܐܰܢ̱ܬ ܠܗܽܘܢ. ܘܢܶܦܠܽܘܚ ܐܶܢܽܘܢ.
3 ܠܳܐ ܬܶܫܡܰܥ ܠܦܶܬܓܳܡܰܘ̈ܗܝ ܕܰܢܒܺܝܳܐ ܗܰܘ. ܐܰܘ ܕܚܳܠܶܡ ܚܶܠ̈ܡܶܐ ܗܰܘ. ܡܶܛܽܠ ܕܰܡܢܰܣܳܝܽܘ ܡܢܰܣܶܐ ܠܟܽܘܢ ܡܳܪܝܳܐ ܐܰܠܳܗܟܽܘܢ. ܕܢܶܕܰܥ ܐܶܢ ܪܳܚܡܺܝܢ ܐ̱ܢܬܽܘܢ ܠܶܗ ܠܡܳܪܝܳܐ ܐܰܠܳܗܟܽܘܢ. ܡܶܢ ܟܽܠܶܗ ܠܶܒܟܽܘܢ. ܘܡܶܢ ܟܽܠܳܗ̇ ܢܰܦܫܟܽܘܢ.
4 ܒܳܬܰܪ ܡܳܪܝܳܐ ܐܰܠܳܗܟܽܘܢ ܙܶܠܘ. ܘܠܶܗ ܕܚܰܠܘ. ܘܦܽܘܩܕܳܢܰܘ̈ܗܝ ܛܰܪܘ. ܘܠܶܗ ܫܡܰܥܘ. ܘܠܶܗ ܦܠܽܘܚܘ. ܘܠܶܗ ܐܶܬܢܰܩܦܘ.
5 ܘܰܢܒܺܝܳܐ ܗܰܘ. ܐܰܘ ܚܳܠܶܡ ܚܶܠ̈ܡܶܐ ܗܰܘ. ܢܶܬܩܛܶܠ. ܥܰܠ ܕܡܰܠܶܠ ܥܰܘܠܳܐ ܩܕܳܡ ܡܳܪܝܳܐ ܐܰܠܳܗܟܽܘܢ. ܕܰܐܦܶܩܟܽܘܢ ܡܶܢ ܐܰܪܥܳܐ ܕܡܶܨܪܶܝܢ. ܘܰܦܪܰܩܟܽܘܢ ܡܶܢ ܒܶܝܬ ܥܰܒܕܽܘܬܳܐ. ܕܢܰܛܥܶܝܟ ܡܶܢ ܐܽܘܪܚܳܐ ܕܦܰܩܕܳܟ ܡܳܪܝܳܐ ܐܰܠܳܗܳܟ ܠܡܺܐܙܰܠ ܒܳܗ̇. ܘܒܰܥܰܪ ܒܺܝܫܬܳܐ ܡܶܢ ܓܰܘܳܟ.
6 ܘܶܐܢ ܢܓܰܪܓܳܟ ܐܰܚܽܘܟ ܒܰܪ ܐܶܡܳܟ. ܐܰܘ ܒܪܳܟ. ܐܰܘ ܒܰܪܬܳܟ. ܐܰܘ ܐܰܢ̱ܬܰܬ ܩܝܳܡܳܟ. ܐܰܘ ܪܳܚܡܳܟ ܕܰܐܝܟ ܢܰܦܫܳܟ. ܒܣܶܬܪܳܐ. ܘܢܺܐܡܰܪ ܠܳܟ. ܬܳܐ ܢܺܐܙܰܠ ܢܶܦܠܽܘܚ ܠܰܐܠܳܗ̈ܶܐ ܐ̱ܚܖ̈ܳܢܶܐ ܕܠܳܐ ܝܺܕܰܥܬ ܐܰܢ̱ܬ ܘܰܐܒܳܗܰܝ̈ܟ.
7 ܡܶܢ ܐܰܠܳܗ̈ܶܐ ܕܥܰܡ̈ܡܶܐ ܕܒܰܚܕܳܖ̈ܰܝܟܽܘܢ. ܕܩܰܪܺܝܒܺܝܢ ܠܟܽܘܢ ܐܰܘ ܕܪܰܚܺܝܩܺܝܢ ܡܶܢܟܽܘܢ ܡܶܢ ܣܰܘ̈ܦܶܝܗ̇ ܕܰܐܪܥܳܐ ܘܰܥܕܰܡܳܐ ܠܣܰܘ̈ܦܶܝܗ̇ ܕܰܐܪܥܳܐ.
8 ܠܳܐ ܬܶܬܛܦܺܝܣ ܡܶܢܶܗ. ܘܠܳܐ ܬܶܫܡܥܺܝܘܗܝ. ܘܠܳܐ ܬܚܽܘܣ ܥܰܝܢܳܟ ܥܠܰܘܗܝ. ܘܠܳܐ ܬܪܰܚܶܡ. ܘܠܳܐ ܬܟܰܣܶܐ ܥܠܰܘܗܝ.
9 ܐܶܠܳܐ ܡܶܩܛܰܠ ܩܛܽܘܠܳܝܗܝ. ܐܺܝܕܳܟ ܬܫܰܪܶܐ ܒܶܗ ܠܽܘܩܕܰܡ ܠܡܶܩܛܠܶܗ ܘܺܐܝܕܳܐ ܕܟܽܠܶܗ ܥܰܡܳܐ ܒܰܐ̱ܚܪܳܝܬܳܐ.
10 ܘܪܽܘܓܡܽܘܗܝ ܒܟܺܐܦ̈ܶܐ ܘܰܢܡܽܘܬ. ܥܰܠ ܕܰܒ̣ܥܳܐ ܠܡܰܛܥܳܝܽܘܬܳܟ ܡܶܢ ܡܳܪܝܳܐ ܐܰܠܳܗܳܟ. ܕܰܐܦܩܳܟ ܡܶܢ ܐܰܪܥܳܐ ܕܡܶܨܪܶܝܢ. ܡܶܢ ܒܶܝܬ ܥܰܒܕܽܘܬܳܐ.
11 ܘܟܽܠܗܽܘܢ ܕܒܶܝܬ ܝܺܣܪܳܐܶܝܠ ܢܶܫܡܥܽܘܢ ܘܢܶܕܚܠܽܘܢ. ܘܠܳܐ ܢܰܘܣܦܽܘܢ ܠܡܶܥܒܰܕ ܐܰܝܟ ܦܶܬܓܳܡܳܐ ܗܳܢܳܐ ܒܺܝܫܳܐ ܒܰܝܢܳܬܟܽܘܢ.
12 ܘܟܰܕ ܬܶܫܡܰܥ ܒܰܚܕܳܐ ܡܶܢ ܩܽܘܖ̈ܝܳܟ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ ܠܡܶܬܰܒ ܒܳܗ̇. ܘܢܺܐܡܪܽܘܢ ܠܳܟ.
13 ܢܦܰܩܘ ܓܰܒܖ̈ܶܐ ܒܢܰܝ̈ ܚ̣ܛܳܐ ܡܶܢ ܓܰܘܳܟ. ܘܰܐܛܥܺܝܘ ܠܐ̱ܢܳܫ̈ܳܐ ܕܰܩܪܺܝܬܗܽܘܢ. ܘܶܐܡܰܪܘ ܢܺܐܙܰܠ ܢܶܦܠܽܘܚ ܠܰܐܠܳܗ̈ܶܐ ܐ̱ܚܖ̈ܳܢܶܐ ܕܠܳܐ ܝܺܕܰܥܬܽܘܢ.
14 ܬܒܰܥ ܘܰܒܨܺܝ ܘܫܰܐܶܠ ܫܰܦܺܝܪ. ܐܶܢ ܫܰܪܺܝܪܳܐܺܝܬ ܐܺܝܬܰܘܗܝ ܦܶܬܓܳܡܳܐ. ܘܶܐܬܥܰܒܕܰܬ ܛܰܢܦܽܘܬܳܐ ܗܳܕܶܐ ܒܓܰܘܳܟ.
15 ܚܪܽܘܒ ܠܥܳܡܽܘܖ̈ܶܝܗ̇ ܕܰܩܪܺܝܬܳܐ ܗܳܝ ܒܦܽܘܡܳܐ ܕܚܰܪܒܳܐ. ܚܪܽܘܒܶܝܗ̇ ܘܰܠܟܽܠ ܕܺܐܝܬ ܒܳܗ̇. ܘܠܰܒܥܺܝܪܳܗ̇ ܒܦܽܘܡܳܐ ܕܚܰܪܒܳܐ.
16 ܘܟܽܠܳܗ̇ ܒܶܙܬܳܗ̇ ܟܰܢܶܫ ܠܓܰܘ ܫܶܛܚܳܗ̇. ܘܰܐܘܩܶܕܶܝܗ̇ ܠܰܩܪܺܝܬܳܐ ܒܢܽܘܪܳܐ ܘܰܠܟܽܠܳܗ̇ ܒܶܙܬܳܗ̇ ܠܰܓܡܳܪ ܩܕܳܡ ܡܳܪܝܳܐ ܐܰܠܳܗܳܟ. ܘܬܶܗܘܶܐ ܬܶܠܳܐ ܠܥܳܠܰܡ. ܘܬܽܘܒ ܠܳܐ ܬܶܬܒܢܶܐ.
17 ܘܠܳܐ ܢܶܕܒܰܩ ܒܺܐܝܕܳܟ ܡܶܕܶܡ ܡܶܢ ܚܶܪܡܳܐ. ܕܢܶܬܦܢܶܐ ܡܳܪܝܳܐ ܡܶܢ ܚܶܡܬܳܐ ܕܪܽܘܓܙܶܗ. ܘܢܶܬܶܠ ܠܳܟ ܖ̈ܰܚܡܶܐ ܘܰܢܪܰܚܶܡ ܥܠܰܝܟ. ܘܢܶܪܚܡܳܟ ܘܢܰܣܓܶܝܟ ܐܰܝܟ ܕܺܝܡܳܐ ܠܰܐܒܳܗܰܝ̈ܟ.
18 ܐܶܢ ܬܶܫܡܰܥ ܒܩܳܠܶܗ ܕܡܳܪܝܳܐ ܐܰܠܳܗܳܟ. ܘܬܶܛܰܪ ܦܽܘܩܕܳܢܰܘ̈ܗܝ ܕܰܡܦܰܩܶܕ ܐ̱ܢܳܐ ܠܳܟ ܝܰܘܡܳܢܳܐ. ܘܬܶܥܒܶܕ ܕܫܰܦܺܝܪ ܩܕܳܡ ܡܳܪܝܳܐ ܐܰܠܳܗܳܟ.