Jesus Sirach 12
The Book of Jesus Sirach
܀ ܝܫܘܥ ܒܪ ܐܣܝܪܐ ܝܒ ܀
1 ܐܶܢ ܡܰܛܐܶܒ ܐܰܢ̱ܬ ܠܒܺܝܫܳܐ: ܠܳܐ ܗܘܳܐ ܡܶܕܶܡ ܥܳܒܶܕ ܐܰܢ̱ܬ. ܐܳܦܠܳܐ ܐܺܝܬ ܛܰܝܒܽܘ ܠܛܰܝܒܽܘܬܳܟ.
2 ܐܰܛܐܶܒ ܠܙܰܕܺܝܩܳܐ. ܘܬܶܫܟܰܚ ܦܽܘܪܥܳܢܳܐ. ܐܶܢ ܠܳܐ ܡܶܢܶܗ: ܡܶܢ ܩܕܳܡ ܡܳܪܶܗ.
3 ܠܰܝܬ ܛܰܝܒܽܘܬܳܐ ܠܡܰܢ ܕܰܡܝܰܩܰܪ ܠܒܺܝܫܳܐ. ܡܰܢ ܕܥܳܒܶܕ ܠܙܰܕܺܝܩܳܐ: ܠܳܐ ܡܰܘܒܶܕ.
4 ܚܰܕ ܬܪܶܝܢ ܒܺܝܫܳܐ ܡܶܫܟܰܚ ܠܳܟ ܒܥܶܕܳܢܳܐ ܕܰܨܪܺܝܟܽܘܬܳܟ. ܡܳܐܢܰܝ̈ ܙܰܝܢܳܟ. ܠܳܐ ܬܶܬܶܠ ܠܶܗ. ܕܰܠܡܳܐ ܒܗܽܘܢ ܢܶܬܟܰܬܰܫ ܥܰܡܳܟ. ܘܳܐܦ ܐܰܠܳܗܳܐ ܣܳܢܶܐ ܠܒܺܝ̈ܫܶܐ ܘܥܰܠ ܥܰܘ̈ܳܠܶܐ ܡܰܝܬܶܐ ܦܽܘܪܥܳܢܶܗ.
5 ܐܰܛܐܶܒ ܠܛܳܒܳܐ: ܘܰܟܺܠܝ ܡܶܢ ܒܺܝܫܳܐ.
6 ܗܰܒ ܠܡܰܟܺܝܟܳܐ: ܘܰܟܠܺܝ ܡܶܢ ܡܰܪܳܚܳܐ.
7 ܠܳܐ ܢܶܬܚܰܟܰܡ ܒܛܳܒ̈ܳܬܶܗ ܪܳܚܡܳܐ. ܘܠܳܐ ܢܶܬܛܰܫܶܐ ܒܒܺܝ̈ܫܳܬܶܗ ܣܳܢܳܐܐ.
8 ܒܛܳܒ̈ܳܬܶܗ ܓܶܝܪ ܕܓܰܒܪܳܐ: ܒܥܶܠܕܒܳܒܰܘ̈ܗܝ ܒܟܰܪܝܽܘܬܳܐ ܗܳܘܶܝܢ. ܘܰܒܒܺܝ̈ܫܳܬܶܗ: ܡܶܬܦܪܶܫ ܪܳܚܡܳܐ.
9 ܠܳܐ ܬܗܰܝܡܶܢ ܒܣܳܢܳܐܐ ܠܥܳܠܰܡ. ܡܶܛܽܠ ܕܰܐܝܟ ܢܚܳܫܳܐ ܗܽܘ ܕܰܡܛܰܢܶܦ ܚܰܒܪܶܗ.
10 ܐܳܦܶܢ ܡܶܫܬܡܰܥ ܠܳܟ ܘܰܡܗܰܠܶܟ ܩܕܳܡܰܝܟ ܟܦܺܝܦ: ܗܰܒ ܠܶܒܳܟ ܠܡܶܕܚܰܠ ܡܶܢܶܗ. ܗܘܺܝ ܠܶܗ ܐܰܝܟ ܓܳܠܶܐ ܐ̱ܪܳܙܳܐ: ܠܳܐ ܢܶܫܟܰܚ ܠܰܡܚܰܒܳܠܽܘܬܳܟ. ܘܬܶܕܰܥ ܚܰܪܬܳܐ ܕܩܶܢܶܐܬܶܗ.
11 ܠܳܐ ܬܩܺܝܡܺܝܘܗܝ ܠܘܳܬܳܟ: ܕܠܳܐ ܢܶܬܗܦܶܟ ܢܩܽܘܡ ܒܕܽܘܟܬܳܟ. ܠܳܐ ܬܰܘܬܒܺܝܘܗܝ ܡܶܢ ܝܰܡܺܝܢܳܟ. ܕܰܠܡܳܐ ܢܶܒܥܶܐ ܟܽܘܪܣܳܝܟ: ܘܰܒܚܰܪܬܳܐ ܬܶܕܰܥ ܡܶܠܰܝ̈. ܘܰܒܡܺܐܡܖ̈ܰܝ ܬܶܬܕܰܡܰܪ.
12 ܡܰܢܽܘ ܓܶܝܪ ܢܪܰܚܶܡ ܥܰܠ ܐܳܫܽܘܦܳܐ. ܕܢܳܟܶܬ ܠܶܗ ܚܶܘܝܳܐ.
13 ܗܳܟܰܢܳܐ. ܐܳܦ ܟܽܠܡܰܢ ܕܩܳܪܶܒ ܠܚܰܝܘܰܬ ܫܶܢܳܐ. ܗܳܟܰܢܳܐ ܟܽܠ ܕܡܶܬܫܰܘܬܰܦ ܠܓܰܒܪܳܐ ܥܰܘܳܠܳܐ. ܠܳܐ ܢܶܥܒܰܪ ܥܕܰܡܳܐ ܕܬܺܐܩܰܕ ܒܶܗ ܢܽܘܪܳܐ.
14 ܟܡܳܐ ܕܥܳܐܶܠ ܥܰܡܳܟ. ܠܳܐ ܡܶܬܓܠܶܐ ܠܳܟ. ܘܶܐܢ ܬܶܦܶܠ: ܠܳܐ ܡܨܶܐ ܐܰܢ̱ܬ ܚܰܝܠܶܗ. ܒܣܶܦ̈ܘܳܬܶܗ ܪܳܡܶܙ ܣܳܢܳܐܐ. ܘܰܒܠܶܒܶܗ ܡܶܬܪܰܥܶܐ ܬܰܪܥܺܝܬܳܐ ܥܰܡܺܝܩܬܳܐ.
15 ܐܳܦܶܢ ܡܶܢ ܥܰܝܢܰܘ̈ܗܝ ܡܰܚܶܬ ܕܶܡ̈ܥܶܐ. ܐܶܢ ܢܶܫܟܰܚ ܠܶܗ ܐܰܬܪܳܐ: ܠܳܐ ܢܶܣܒܰܥ ܡܶܢ ܕܡܳܟ.
16 ܐܶܢ ܬܶܐܪܥܳܟ ܒܺܝܫܬܳܐ: ܬܶܫܟܚܺܝܘܗܝ ܬܰܡܳܢ ܐܰܝܟ ܓܰܒܪܳܐ ܡܥܰܕܪܳܢܳܐ.
17 ܘܢܶܒܥܶܐ ܠܡܰܥܩܳܪܽܘ ܥܶܩܒܰܝ̈ܟ.
18 ܒܪܺܝܫܶܗ ܡܢܺܝܕ: ܘܰܡܢܺܝܦ ܒܺܐܝܕܶܗ. ܘܣܰܓܺܝ ܡܠܰܚܶܫ: ܘܡܰܣܢܶܐ ܐܰܦܰܘ̈ܗܝ.