Jesus Sirach 31
The Book of Jesus Sirach
܀ ܝܫܘܥ ܒܪ ܐܣܝܪܐ ܠܐ ܀
1 ܫܰܗܪܳܐ ܡܕܰܝܶܒ ܒܶܣܪܶܗ ܕܥܰܬܺܝܪܳܐ. ܘܨܶܦܬܳܐ ܡܰܦܪܕܳܐ ܫܶܢܬܶܗ.
2 ܨܶܦܬܳܐ ܕܡܳܙܽܘܢܳܐ ܕܳܚܩܳܐ ܢܰܘܡܬܳܐ. ܘܡܰܪܥܳܐ ܬܰܩܺܝܦܳܐ ܡܰܦܪܶܕ ܫܶܢܬܳܐ.
3 ܥܳܡܶܠ ܥܰܬܺܝܪܳܐ ܠܰܡܟܰܢܳܫܽܘ ܠܶܗ ܢܶܟ̈ܣܶܐ. ܘܡܶܬܬܢܺܝܚ ܠܰܡܩܰܒܳܠܽܘ ܬܰܦܢܺܝ̈ܩܶܐ.
4 ܥܳܡܶܠ ܡܶܣܟܺܢܳܐ ܠܚܰܣܺܝܪܽܘܬܳܐ ܕܥܽܘܡܪܶܗ. ܘܶܐܢ ܢܶܬܬܢܺܝܚ ܢܶܗܘܶܐ ܨܪܺܝܟܳܐ.
5 ܕܪܳܚܶܡ ܡܳܡܽܘܢܳܐ ܠܳܐ ܢܶܙܟܶܐ. ܘܰܕܪܳܕܶܦ ܒܳܬܰܪ ܩܶܢܝܳܢܳܐ ܒܶܗ ܢܶܛܥܶܐ.
6 ܣܰܓܺܝ̈ܐܶܐ ܕܰܗܘܰܘ ܥܰܬܺܝܖ̈ܶܐ: ܘܶܐܬܬܟܶܠܘ ܥܰܠ ܢܶܟܣܰܝ̈ܗܽܘܢ. ܘܠܳܐ ܐܶܫܟܰܚܘ ܠܰܡܦܰܨܳܝܽܘ ܐܶܢܽܘܢ ܡܶܢ ܒܺܝܫܬܳܐ. ܘܳܐܦܠܳܐ ܠܡܶܦܪܰܩ ܐܶܢܽܘܢ ܒܝܰܘܡܳܐ ܕܩܶܨܗܽܘܢ.
7 ܡܶܛܽܠ ܕܬܽܘܩܰܠܬܳܐ ܗܽܘ ܡܳܡܽܘܢܳܐ ܠܣܰܟ̈ܠܶܐ. ܘܟܽܠ ܡܰܢ ܕܛܳܥܶܐ ܒܶܗ ܡܶܬܬܩܶܠ.
8 ܛܽܘܒܰܘܗܝ ܠܥܰܬܺܝܪܳܐ ܕܶܐܫܬܟܰܚ ܕܠܳܐ ܡܽܘܡܳܐ. ܘܒܳܬܰܪ ܡܳܡܽܘܢܳܐ ܠܳܐ ܛܥܳܐ.
9 ܡܰܢܽܘ ܗܳܢܳܐ ܘܰܢܫܰܒܚܺܝܘܗܝ. ܕܣܰܓܺܝ ܓܒܰܪ̈ܘܳܬܳܐ ܥܒܰܕ ܒܥܰܡܶܗ.
10 ܡܰܢܽܘ ܗܳܢܳܐ ܕܶܐܬܕܰܒܰܩ ܒܶܗ. ܘܰܗܘܳܐ ܠܶܗ ܫܠܳܡܳܐ. ܘܰܗܘܳܐ ܠܶܗ ܠܬܶܫܒܽܘܚܬܳܐ. ܡܰܢܽܘ ܗܳܢܳܐ ܕܶܐܫܟܰܚ ܠܡܶܛܥܳܐ: ܘܠܳܐ ܛܥܳܐ. ܘܰܠܡܰܒܳܐܫܽܘ ܠܚܰܒܪܶܗ: ܘܠܳܐ ܐܰܒܐܶܫ.
11 ܡܶܛܽܠ ܗܳܢܳܐ ܢܶܥܫܰܢ ܛܽܘܒܶܗ. ܘܬܶܫܒ̈ܚܳܬܶܗ ܢܬܰܢ̈ܝܳܢ ܟܢܽܘ̈ܫܳܬܳܐ.
12 ܒܶܪܝ: ܐܶܢ ܬܶܬܒ ܥܰܠ ܦܳܬܽܘܪܳܐ ܕܓܰܒܪܳܐ ܥܰܬܺܝܪܳܐ: ܠܳܐ ܬܶܦܬܰܚ ܓܰܓܰܪܬܳܟ ܥܠܰܘܗܝ.
13 ܠܳܐ ܬܺܐܡܰܪ ܕܠܳܐ ܣܳܦܶܩ ܠܺܝ.
14 ܡܶܛܽܠ ܕܒܺܝܫܽܘܬ ܥܰܝܢܳܐ: ܣܢܳܐ ܐܰܠܳܗܳܐ. ܘܰܕܒܺܝܫ ܡܶܢܳܗ̇: ܠܳܐ ܒܪܳܐ.
15 ܡܶܛܽܠ ܗܳܢܳܐ ܡܶܢ ܩܕܳܡ ܟܽܠܡܶܕܶܡ ܙܳܝܥܳܐ ܥܰܝܢܳܐ. ܘܡܶܢ ܐܰܦ̈ܶܐ ܕܳܡܥܳܐ ܕܶܡ̈ܥܶܐ.
16 ܡܳܐ ܕܰܚܙܰܝܬ: ܠܳܐ ܬܰܘܫܶܛ ܐܺܝܕܳܟ.
17 ܘܰܒܠܰܓܬܳܐ: ܠܳܐ ܬܶܚܒܽܘܨ ܐܺܝܕܳܟ.
18 ܕܰܥ ܕܚܰܒܪܳܟ ܐܰܝܟ ܕܺܝܠܳܟ.
19 ܠܥܰܣ ܐܰܝܟ ܓܰܒܪܳܐ ܡܶܕܶܡ ܕܣܺܝܡ ܩܕܳܡܰܝܟ. ܘܠܳܐ ܬܶܗܘܶܐ ܓܰܓܰܪܬܰܢ ܕܠܳܐ ܬܶܣܬܢܶܐ.
20 ܐܶܙܕܰܗܪ ܡܶܛܽܠ ܡܰܪܕܽܘܬܳܐ.
21 ܘܟܰܕ ܬܶܬܶܒ ܒܶܝܬ ܣܰܓܺܝ̈ܐܶܐ ܠܡܶܠܥܰܣ: ܠܳܐ ܬܰܘܫܶܛ ܐܺܝܕܳܟ ܩܕܳܡܰܝܗܽܘܢ.
22 ܡܶܕܶܡ ܓܶܝܪ ܙܥܽܘܪ: ܡܶܣܬܢܶܐ ܙܰܕܺܝܩܳܐ. ܘܥܰܠ ܡܰܫܟܒܶܗ: ܠܳܐ ܢܶܬܬܙܺܝܥ.
23 ܟܺܐܒܳܐ ܘܫܰܗܪܳܐ ܘܰܫܚܳܩܳܐ ܘܫܽܘܢܳܩܳܐ ܘܰܗܦܳܟ ܓܰܘܳܐ ܥܰܡ ܓܰܒܪܳܐ ܝܰܥܢܳܐ.
24 ܫܶܢܬܳܐ ܕܰܚܠܺܝܡܽܘܬܳܐ ܥܰܡ ܓܰܒܪܳܐ ܕܒܰܣܺܝܡܳܐܺܝܬ ܥܒܺܝܕ. ܕܰܥܕܰܡܳܐ ܠܨܰܦܪܳܐ ܢܶܕܡܰܟ ܘܢܰܦܫܶܗ ܠܘܳܬܶܗ.
25 ܘܶܐܢ ܬܶܬܶܐܠܶܨ ܒ: ܓܶܕ ܢܰܦܫܳܟ ܡܶܢ ܡܶܨܥܰܬ ܓܰܘܳܐ: ܘܬܶܬܢܺܝܚ.
26 ܫܡܰܥ ܒܶܪܝ ܘܩܰܒܶܠ ܝܽܘܠܦܳܢܝ. ܘܠܳܐ ܬܒܰܣܰܪ ܥܠܰܝ. ܘܰܠܚܰܪܬܳܐ ܬܶܫܟܰܚ ܡܶܠܰܝ̈.
27 ܒܟܽܠ ܥܒܳܕܰܝ̈ܟ: ܗܘܰܝܬ ܡܰܟܺܝܟ.ܘܟܽܠ ܒܺܝܫܳܐ: ܠܳܐ ܢܶܬܩܰܪܰܒ ܠܳܟ.
28 ܥܰܝܢܳܐ ܛܳܒܬܳܐ: ܥܰܠ ܠܰܚܡܳܐ ܡܒܰܪܟܳܐ. ܘܣܳܗܕܽܘܬܳܐ ܛܳܒܬܳܐ: ܡܗܰܝܡܢܳܐ.
29 ܐܳܦ ܥܰܠ ܚܰܡܪܳܐ ܠܳܐ ܬܶܬܓܰܢܒܰܪ. ܡܶܛܽܠ ܕܰܠܣܰܓܺܝ̈ܐܶܐ ܐܰܘܒܶܕ ܥܰܬܺܝܩܳܐ.
30 ܐܰܟܙܢܳܐ ܓܶܝܪ ܕܟܽܘܪܳܐ ܒܳܩܶܐ ܥܒܳܕܶܗ ܕܩܰܝܢܳܝܳܐ: ܗܳܟܰܢܳܐ ܚܰܡܪܳܐ ܡܓܰܪܝܳܢܳܐ ܗܽܘ ܕܥܰܘܠܳܐ.
31 ܐܰܝܟ ܡܰܝ̈ܳܐ ܚܰܝ̈ܶܐ ܚܰܡܪܳܐ ܠܒܰܪܢܳܫܳܐ: ܟܰܕ ܢܶܫܬܶܝܘܗܝ ܒܘܳܠܺܝܬܳܐ.
32 ܡܳܢܳܐ ܐܶܢܽܘܢ ܚܰܝܰܘ̈ܗܝ ܕܚܰܣܺܝܪ ܚܰܡܪܳܐ.
33 ܕܗܽܘ ܡܶܢ ܪܺܝܫܺܝܬܳܐ ܠܚܰܕܽܘܬܳܐ ܐܶܬܒܪܺܝ.
34 ܚܰܕܽܘܬܳܐ ܕܠܶܒܳܐ ܘܬܰܦܢܺܝ̈ܩܶܐ ܘܥܶܕܳܢ̈ܶܐ ܛܳܒ̈ܶܐ: ܚܰܡܪܳܐ ܕܡܶܫܬܬܶܐ ܒܘܳܠܺܝܬܳܐ.
35 ܟܺܐܒܳܐ ܘܡܶܣܟܺܢܽܘܬܳܐ ܘܟܺܐܒ ܪܺܝܫܳܐ: ܚܰܡܪܳܐ ܡܶܫܬܬܶܐ ܒܚܶܪܝܳܢܳܐ.
36 ܣܰܓܺܝܐܽܘܬܳܐ ܕܚܰܡܪܳܐ ܥܶܒܕܰܬ ܠܣܰܟܠܳܐ ܬܽܘܩܰܠܬܳܐ. ܚܣܰܪ ܚܰܝܠܶܗ. ܘܰܣܓܺܝ ܨܽܘ̈ܠܦܳܬܶܗ.
37 ܒܡܰܫܬܝܳܐ ܕܚܰܡܪܳܐ ܠܳܐ ܬܰܟܶܣ ܪܳܚܡܳܟ. ܘܠܳܐ ܬܰܗܪܺܝܘܗܝ ܒܚܰܕܽܘܬܶܗ.
38 ܡ̈ܶܠܶܐ ܕܚܽܘܣܪܳܢܳܐ: ܠܳܐ ܬܺܐܡܰܪ ܠܶܗ. ܘܠܳܐ ܬܶܨܶܐ ܥܰܡܶܗ: ܠܥܺܝܢ ܒܢܰܝ̈ܢܳܫܳܐ.