Jesus Sirach 40
The Book of Jesus Sirach
܀ ܝܫܘܥ ܒܪ ܐܣܝܪܐ ܡ ܀
1 ܨܶܒ̈ܘܳܬܳܐ ܪܰܘܪ̈ܒܳܬܳܐ ܒܪܳܐ ܐܰܠܳܗܳܐ. ܘܓܶܢ̈ܣܶܐ ܬܰܩܺܝ̈ܦܶܐ ܥܰܠ ܒܢܰܝ̈ܢܳܫܳܐ ܡܶܢ ܝܰܘܡܳܐ ܕܰܢܦܰܩܘ ܡܶܢ ܟܰܪܣܳܐ ܕܶܐܡܗܽܘܢ: ܘܰܥܕܰܡܳܐ ܕܣܳܡܟܺܝܢ ܠܰܐܪܥܳܐ ܕܚܰܝ̈ܶܐ.
2 ܬܶܫܒܽܘܚܬܗܽܘܢ ܘܬܰܪܥܺܝܬܳܐ ܕܠܶܒܗܽܘܢ ܘܚܰܪܬܳܐ ܕܡܶܠܰܝ̈ܗܽܘܢ: ܥܕܰܡܳܐ ܠܝܰܘܡܳܐ ܕܡܰܘܬܗܽܘܢ.
3 ܡܶܢ ܝܳܬܒܰܝ̈ ܟܽܘܪ̈ܣܰܘܳܬܳܐ ܕܡܰܠ̈ܟܶܐ: ܘܰܥܕܰܡܳܐ ܠܝܳܬܒܰܝ̈ ܥܰܦܪܳܐ ܘܩܶܛܡܳܐ. ܘܡܶܢ ܩܳܛܖ̈ܰܝ ܬܳܓܳܐ: ܘܰܥܕܰܡܳܐ ܠܰܐܝܠܶܝܢ ܕܠܳܒܫܺܝܢ ܠܒܽܘܫܳܐ ܕܡܶܣܟܺܢܽܘܬܳܐ: ܪܽܘܓܙܳܐ: ܘܟܰܪܝܽܘܬܳܐ: ܘܰܛܢܳܢܳܐ: ܘܕܶܚܠܰܬ ܡܰܘܬܳܐ: ܚܶܪܝܳܢܳܐ ܘܩܶܪܝܳܐ.
4 ܘܰܒܥܶܕܳܢܳܐ ܕܡܶܬܬܢܺܝܚܺܝܢ ܥܰܠ ܥܰܪ̈ܣܳܬܗܽܘܢ.
5 ܒܫܶܢܬܳܐ ܕܠܺܠܝܳܐ ܡܰܢܶܕ ܠܗܽܘܢ. ܕܡܶܬܡܰܠܰܟ ܒܚܶܙܘܳܐ ܕܠܺܠܝܳܐ. ܐܰܝܟ ܓܰܒܪܳܐ ܕܥܳܪܶܩ ܡܶܢ ܩܕܳܡ ܪܳܕܽܘܦܳܐ.
6 ܐܶܢ ܨܶܒܢܳܝܳܐ ܒܠܶܒܶܗ. ܡܶܬܬܥܺܝܪ ܘܚܳܙܶܐ ܕܠܰܝܬ ܠܶܗ ܡܶܕܶܡ.
7 ܥܰܡ ܟܽܠܗܽܘܢ ܒܢܰܝ̈ ܒܶܣܪܳܐ ܨܶܦܬܗܽܘܢ ܥܰܡܗܽܘܢ. ܘܥܽܘܬܪܳܐ ܡܰܢܶܕ ܫܶܢܬܗܽܘܢ.
8 ܟܽܠܡܶܕܶܡ ܡܶܢ ܐܰܪܥܳܐ ܗܽܘ: ܘܠܰܐܪܥܳܐ ܗܳܦܶܟ. ܘܰܕܡܶܢ ܪܰܘܡܳܐ: ܠܪܰܘܡܳܐ.
9 ܟܽܠܡܰܢ ܕܚܳܛܶܐ ܘܰܡܕܰܓܶܠ: ܢܶܒܛܰܠ. ܘܟܰܫܺܝܖ̈ܰܝ ܥܳܠܡܳܐ: ܐܳܦ ܗܶܢܽܘܢ ܢܶܬܩܰܝܡܽܘܢ.
10 ܢܶܟ̈ܣܶܐ ܕܫܽܘܩܪܳܐ ܐܰܝܟ ܢܰܚܠܳܐ ܢܶܬܓܰܪܦܽܘܢ. ܘܰܐܝܟ ܢܰܗܖ̈ܰܘܳܬܳܐ ܕܰܡܠܶܝܢ ܡܶܢ ܥܢܳܢ̈ܶܐ ܩܰܠܺܝ̈ܠܳܬܳܐ.
11 ܟܰܕ ܗܶܢܽܘܢ ܓܠܺܝܙܺܝܢ: ܢܶܓܡܪܽܘܢ. ܘܚܶܠܦܳܐ ܠܐ̱ܢܳܫܳܐ ܪܰܫܺܝܥܳܐ ܠܶܐ ܬܶܗܘܶܐ.
12 ܥܶܩܳܪܗܽܘܢ ܓܶܝܪ ܕܚܰܛܳܝ̈ܶܐ: ܐܰܝܟ ܫܶܒܠܳܐ ܕܺܝܥܳܬ ܥܰܠ ܫܶܢܳܐ ܕܰܫܩܺܝܦܳܐ. ܘܰܐܝܟ ܚܒܶܠܒܠܳܐ ܕܺܝܥܳܬ ܥܰܠ ܓܕܳܢܦܳܐ ܕܢܰܚܠܳܐ: ܕܰܩܕܳܡ ܟܽܠ ܝܽܘܪܳܩ: ܗܺܝ ܝܳܒܫܳܐ.
13 ܘܰܥܒܳܕ̈ܶܐ ܕܟܺܐܢ̈ܶܐ ܒܥܶܕܳܢܳܐ ܡܶܬܒܰܪܟܺܝܢ. ܘܰܥܒܳܕ̈ܶܐ ܕܙܰܕܺܝ̈ܶܩܐ ܠܥܳܠܰܡ ܢܶܬܩܰܝܡܽܘܢ. ܘܰܕܡܶܬܩܰܪܰܒ ܠܗܽܘܢ ܐܰܝܟ ܕܐ̱ܢܳܫ ܡܶܫܟܰܚ ܣܺܝܡܬܳܐ.
14 ܪܰܒܽܘܬܳܐ ܘܺܐܝܩܳܪܳܐ ܢܩܺܝܡܽܘܢ ܫܡܳܐ. ܡܶܢ ܬܖ̈ܰܝܗܽܘܢ: ܡܰܢ ܕܡܶܫܟܰܚ ܚܶܟܡܬܳܐ.
15 ܒܶܢܝܳܢܳܐ ܘܢܶܨܒܬܳܐ ܡܚܰܕܬܺܝܢ ܫܡܳܐ. ܘܡܶܢ ܬܖ̈ܰܝܗܽܘܢ: ܐܰܢ̱ܬܬܳܐ ܚܟܺܝܡܬܳܐ.
16 ܚܰܡܪܳܐ ܥܰܬܺܝܩܳܐ ܡܚܰܕܶܐ ܠܶܒܳܐ. ܘܛܳܒܳܐ ܡܶܢܶܗ: ܪܳܚܡܽܘܬܶܗ ܕܪܳܚܡܳܐ.
17 ܐܰܒܽܘܒܳܐ ܘܰܐܦܽܘܕܝܳܐ ܡܒܰܣܡܺܝܢ ܙܡܳܪܳܐ. ܡܶܢ ܬܖ̈ܰܝܗܽܘܢ: ܠܶܫܳܢܳܐ ܕܰܟܝܳܐ.
18 ܝܳܐܝܽܘܬܳܐ ܘܫܽܘܦܪܳܐ ܪܶܓܬܳܐ ܕܥܰܝ̈ܢܶܐ. ܘܡܶܢ ܬܖ̈ܰܝܗܽܘܢ: ܫܶܒ̈ܠܶܐ ܕܚܰܩܠܳܐ.
19 ܪܳܚܡܳܐ ܘܚܰܒܪܳܐ ܒܥܶܕܳܢܳܐ ܢܶܬܒܰܪܟܽܘܢ. ܘܡܶܢ ܬܖ̈ܰܝܗܽܘܢ: ܐܰܢ̱ܬܬܳܐ ܛܳܒܬܳܐ.
20 ܐܰܚܳܐ ܘܰܡܥܰܕܪܳܢܳܐ ܒܥܶܕܳܢܳܐ ܕܥܳܩܬܳܐ. ܘܡܶܢ ܬܖ̈ܰܝܗܽܘܢ: ܙܶܕܩܬܳܐ ܦܳܪܩܳܐ.
21 ܕܰܗܒܳܐ ܘܣܺܐܡܳܐ ܡܩܺܝܡܺܝܢ ܪܶܓܠܳܐ. ܘܡܶܢ ܬܖ̈ܰܝܗܽܘܢ: ܡܶܠܟܳܐ ܛܳܒܳܐ.
22 ܚܰܝܠܳܐ ܘܬܽܘܩܦܳܐ ܡܪܺܝܡܺܝܢ ܠܶܒܳܐ. ܘܡܶܢ ܬܖ̈ܰܝܗܽܘܢ: ܕܶܚܠܬܶܗ ܕܰܐܠܳܗܳܐ.
23 ܠܰܝܬ ܕܒܶܚܠܬܶܗ ܕܰܐܠܳܗܳܐ ܚܽܘܣܪܳܢܳܐ. ܘܠܰܝܬ ܠܡܶܒܥܳܐ ܥܰܡܳܗ̇ ܡܥܰܕܪܳܢܳܐ.
24 ܕܶܚܠܶܬܗ ܕܰܐܠܳܗܳܐ ܥܰܠ ܟܽܠܡܶܕܶܡ ܐܶܬܬܪܺܝܡܰܬ. ܐܰܚܽܘܕܶܝܗ̇ ܒܶܪܝ: ܘܠܳܐ ܬܰܪܦܶܝܗ̇. ܡܶܛܽܠ ܕܠܰܝܬ ܐܰܟܘܳܬܶܗ. ܕܶܚܠܬܶܗ ܕܰܐܠܳܗܳܐ ܒܥܶܕܳܢܳܐ ܡܶܬܒܰܪܟܳܐ. ܘܰܠܥܶܠ ܡܶܢ ܟܽܠ ܐܺܝܩܳܪ: ܗܺܝ ܡܶܫܬܰܒܚܳܐ.
25 ܒܶܪܝ: ܡܰܢ ܕܫܳܐܶܠ ܠܳܟ: ܠܳܐ ܬܶܟܠܺܝܘܗܝ. ܠܳܐ ܬܶܗܘܶܐ ܛܳܒ ܠܶܡܩܛܰܠ: ܐܶܠܳܐ ܗܘܺܝ ܛܳܒ ܠܡܰܚܳܝܽܘ.
26 ܓܰܒܪܳܐ ܕܣܳܒܰܥ ܥܰܠ ܦܳܬܽܘܪܳܐ ܕܰܐ̱ܚܪ̈ܳܢܶܐ: ܠܳܐ ܐ̱ܢܳܫ ܢܚܰܫܒܺܝܘܗܝ ܐܰܝܟ ܕܚܰܝܰܐ ܗ̱ܘ.
27 ܣܳܢܶܐ ܢܰܦܫܶܗ ܡܰܢ ܕܪܳܚܶܡ ܪ̈ܺܓܝܓܳܬܳܐ. ܘܓܰܒܪܳܐ ܕܝܳܕܰܥ ܗܳܠܶܝܢ: ܟܺܐܒܳܐ ܐܶܢܶܝܢ ܕܰܡܥܰܝ̈ܳܐ.
28 ܒܦܽܘܡܶܗ ܕܰܚܨܺܝܦܳܐ ܬܶܒܣܰܡ ܫܶܐܠܬܶܗ. ܘܰܐܝܟ ܢܽܘܪܳܐ ܝܳܩܕܳܐ ܒܓܰܘܶܗ.