Jesus Sirach 33
The Book of Jesus Sirach
܀ ܝܫܘܥ ܒܪ ܐܣܝܪܐ ܠܓ ܀
1 ܕܕܳܚܶܠ ܠܰܐܠܳܗܳܐ: ܠܳܐ ܢܶܦܓܰܥ ܒܶܗ ܒܺܝܫܳܐ: ܐܶܠܳܐ ܐܶܢ ܒܢܶܣܝܳܢܳܐ. ܘܢܶܗܦܽܘܟ ܘܢܶܬܦܰܠܰܛ.
2 ܐܰܝܟ ܓܺܝܓܠܳܐ ܩܰܠܺܝܠܬܳܐ ܠܶܒܶܗ ܕܥܰܘܳܠܳܐ. ܘܰܝܟ ܚܙܺܝܪܳܐ ܟܽܠܗܶܝܢ ܬܰܪܥܝܳܬܶܗ.
3 ܐܰܝܟ ܣܽܘܣܝܳܐ ܥܬܺܝܕܳܐ ܪ̈ܳܚܡܰܘܗܝ ܕܥܰܘܳܠܳܐ. ܕܰܬܚܶܝܬ ܟܽܠܡܰܢ ܕܪܳܚܶܡ ܠܶܗ ܨܳܗܶܠ.
4 ܠܡܳܢܳܐ ܐܺܝܬ ܝܰܘܡܳܐ ܒܫܰܢܬܳܐ: ܕܡܶܢ ܝܰܘ̈ܡܳܬܳܐ ܦܪܺܝܫ. ܡܶܛܽܠ ܕܟܽܠܗܽܘܢ ܢܰܗܺܝܖ̈ܶܐ: ܝܰܘ̈ܡܳܬܳܐ ܕܫܰܢܬܳܐ ܡܫܰܡܫܺܝܢ.
5 ܒܪܰܡ ܒܚܶܟܡܬܶܗ ܕܰܐܠܳܗܳܐ ܐܶܬܦܪܶܫܘ.
6 ܘܰܥܒܰܕ ܡܶܢܗܽܘܢ ܙܰܒ̈ܢܶܐ ܘܥܶܕܳܢ̈ܶܐ. ܡܶܢܗܽܘܢ ܒܰܪܶܟ ܘܩܰܕܶܫ. ܘܡܶܢܗܽܘܢ ܥܒܰܕ ܠܡܶܢܝܳܢܳܐ ܕܝܰܘ̈ܡܳܬܳܐ. ܘܳܐܦ ܒܢܰܝ̈ܢܳܫܳܐ ܟܽܠܗܽܘܢ ܡܶܢ ܛܺܝܢܳܐ ܐܶܬܥܒܶܕܘ. ܘܡܶܢ ܥܰܦܪܳܐ ܐܶܬܒܪܺܝ ܐܳܕܳܡ.
7 ܒܪܰܡ ܒܚܶܟܡܬܶܗ ܕܰܐܠܳܗܳܐ ܦܰܪܶܫ ܐܶܢܽܘܢ. ܘܰܥܒܰܕ ܐܶܢܽܘܢ ܥܳܡܽܘܖ̈ܶܐ ܕܰܐܪܥܳܐ.
8 ܡܶܢܗܽܘܢ ܒܰܪܶܟ ܘܰܐܪܺܝܡ. ܘܡܶܢܗܽܘܢ ܩܰܕܶܫ: ܘܰܥܕܰܡܳܐ ܠܘܳܬܶܗ ܡܰܛܺܝܘ. ܘܡܶܢܗܽܘܢ ܠܳܛ ܘܰܗܦܰܟ. ܘܰܥܩܰܪ ܐܶܢܽܘܢ ܡܶܢ ܡܶܕܝܳܖ̈ܰܝܗܽܘܢ.
9 ܐܰܝܟ ܛܺܝܢܳܐ ܕܰܓܒܺܝܠ ܒܺܐܝܕܳܐ ܕܦܰܚܳܪܳܐ.
10 ܗܳܟܰܢܳܐ ܐ̱ܢܳܫܳܐ ܒܺܐܝܕܳܐ ܕܒܳܪܝܶܗ: ܠܰܡܩܳܡܽܘܬܶܗ ܒܟܽܠ ܥܒܳܕܰܘ̈ܗܝ.
11 ܠܽܘܩܒܰܠ ܒܺܝܫܳܐ: ܐܶܬܒܪܺܝ ܛܳܒܳܐ. ܘܠܽܘܩܒܰܠ ܡܰܘܬܳܐ: ܐܶܬܒܪܺܝܘ ܚܰܝ̈ܶܐ. ܘܠܽܘܩܒܰܠ ܢܽܘܗܪܳܐ: ܐܶܬܒܪܺܝ ܚܶܫܽܘܟܳܐ. ܗܳܟܰܢܳܐ ܚܰܘܺܝ ܐܰܠܳܗܳܐ ܥܒܳܕܰܘ̈ܗܝ ܟܽܠܗܽܘܢ. ܬܪܶܝܢ ܬܪܶܝܢ: ܚܰܕ ܠܽܘܩܒܰܠ ܚܰܕ.
12 ܘܳܐܦ ܐܶܢܳܐ ܐ̱ܚܪܳܝܰܬ ܐܶܬܺܝܬ: ܐܰܝܟ ܡܒܰܥܪܳܢܳܐ ܕܟܰܪܡܳܐ ܒܳܬܰܪ ܩܳܛܽܘ̈ܦܶܐ.
13 ܘܰܒܛܳܒ̈ܳܬܶܗ ܕܰܐܠܳܗܳܐ ܐܶܢܳܐ ܩܳܡܶܬ. ܘܰܐܝܟ ܩܳܛܽܘܦܳܐ ܡܺܠܝܬ ܡܰܥܨܰܪܬܝ.
14 ܫܽܘܡܥܽܘܢܝ ܫܰܠܺܝ̈ܛܳܢܶܐ ܕܥܰܡܳܐ. ܘܪܰܘܪ̈ܒܳܢܶܐ ܕܰܟܢܽܘܫܬܳܐ ܨܽܘܬܽܘܢܳܢܝ.
15 ܒܪܳܐ ܘܰܐܢ̱ܬܬܳܐ ܘܰܐܚܳܐ ܘܪܳܚܡܳܐ: ܠܳܐ ܬܰܫܠܶܛ ܒܳܟ ܒܚܰܝܰܝ̈ܟ.
16 ܥܰܕ ܐܰܢ̱ܬ ܚܰܝ ܘܰܢܫܰܡܬܳܐ ܒܳܟ: ܠܳܐ ܬܰܫܠܶܛ ܒܳܟ ܟܽܠܒܣܰܪ. ܠܳܐ ܬܶܬܶܠ ܠܰܐ̱ܚܪ̈ܳܢܶܐ ܢܶܟܣܰܝ̈ܟ: ܠܡܶܗܦܰܟ ܘܰܠܡܶܒܥܳܐ ܡܶܢܗܽܘܢ.
17 ܡܶܛܽܠ ܕܛܳܒ ܗܽܘ ܕܢܶܒܥܽܘܢ ܡܶܢܳܟ ܒܢܰܝ̈ܟ: ܡܶܢ ܕܬܶܒܥܶܐ ܐܰܢ̱ܬ ܡܶܢܗܽܘܢ.
18 ܒܟܽܠ ܥܒܳܕܰܝ̈ܟ ܗܘܰܝܬ ܡܥܰܠܰܝ.
19 ܘܠܳܐ ܬܶܬܶܠ ܡܽܘܡܳܐ ܒܺܐܝܩܳܪܳܟ. ܘܰܒܙܰܒܢܳܐ ܕܢܶܓܡܪܽܘܢ ܡܶܢܝܳܢܳܐ ܕܝܰܘ̈ܡܰܝܟ: ܒܝܰܘܡܳܐ ܕܡܰܘܬܳܟ: ܐܰܘܪܶܬ ܢܶܟܣܰܝ̈ܟ ܠܰܒܢܰܝ̈ܟ.
20 ܟܶܣܬܳܐ ܘܫܰܘܛܳܐ ܘܛܰܥܢܳܐ ܠܰܚܡܳܪܳܐ. ܘܡܰܪܕܽܘܬܳܐ ܘܠܰܚܡܳܐ ܘܦܽܘܠܚܳܢܳܐ ܠܥܰܒܕܳܐ.
21 ܘܠܳܐ ܬܶܬܶܠ ܠܶܗ ܢܝܳܚܳܐ. ܘܶܐܢ ܐܰܪܺܝܡܬ ܒܪܺܝܫܶܗ: ܒܳܥܶܐ ܚܪܽܘܖ̈ܶܐ.
22 ܦܠܽܘܚ ܒܥܰܒܕܳܟ ܕܠܳܐ ܢܶܡܪܰܕ.
23 ܡܶܛܽܠ ܕܣܽܘܓܳܐܐ ܕܒܺܝ̈ܫܳܬܳܐ ܥܳܒܶܕ ܒܶܛܠܳܢܳܐ.
24 ܘܰܐܝܟܰܢܳܐ ܕܘܳܠܶܐ ܠܶܗ: ܐܰܫܠܛܺܝܘܗܝ ܒܒܰܝܬܳܟ. ܘܶܐܢ ܠܳܐ ܫܰܡܰܥ ܠܳܟ: ܐܰܣܓܳܐ ܐܰܣܽܘܖ̈ܰܘܗܝ. ܠܳܐ ܕܶܝܢ ܗܳܟܰܢܳܐ ܥܰܠ ܟܽܠ ܐ̱ܢܳܫ ܘܰܕܠܳܐ ܒܢܳܡܽܘܣܳܐ: ܠܳܐ ܬܶܥܒܶܕ ܨܒܽܘ.
25 ܐܶܢ ܚܰܕ ܗܽܘ ܥܰܒܕܳܟ ܢܶܗܘܶܐ ܐܰܟܘܳܬܳܟ. ܡܶܛܽܠ ܕܰܐܟܘܳܬܳܟ ܗܳܟܰܢܳܐ ܚܽܘܣܪܳܢܳܟ. ܐܶܢ ܚܰܕ ܗܽܘ ܥܰܒܕܳܟ: ܐܰܝܟ ܐܰܚܽܘܟ ܚܫܽܘܒܳܝܗܝ. ܘܠܳܐ ܬܶܬܟܰܬܰܫ ܒܰܕܡܳܐ ܕܢܰܦܫܳܟ.
26 ܡܶܛܽܠ ܕܶܐܢ ܬܛܰܪܦܺܝܘܗܝ: ܢܶܦܽܘܩ ܢܺܐܒܰܕ.
27 ܘܒܰܐܝܕܳܐ ܐܽܘܪܚܳܐ ܬܶܫܟܚܺܝܘܗܝ.