Jesus Sirach 38
The Book of Jesus Sirach
܀ ܝܫܘܥ ܒܪ ܐܣܝܪܐ ܠܚ ܀
1 ܝܰܩܰܪ ܐܳܣܝܳܐ ܥܰܕܠܳܐ ܢܶܬܒܥܶܐ ܠܳܟ. ܡܶܛܽܠ ܕܳܐܦ ܠܶܗ ܐܰܠܳܗܳܐ ܒܪܳܝܗܝ.
2 ܘܡܶܢ ܩܕܳܡ ܐܰܠܳܗܳܐ ܢܶܬܚܰܟܰܡ ܐܳܣܝܳܐ. ܘܡܶܢ ܡܰܠܟܳܐ ܢܳܣܶܒ ܡܰܘ̈ܗܒܳܬܳܐ.
3 ܘܡܶܢ ܬܰܪܥܺܝܬܶܗ ܕܳܐܣܝܳܐ ܢܪܰܡܪܡܽܘܢܶܗ. ܘܰܩܕܳܡ ܡܰܠ̈ܟܶܐ ܢܩܺܝܡܽܘܢܶܗ.
4 ܐܰܠܳܗܳܐ ܡܶܢ ܐܰܪܥܳܐ ܒܪܳܐ ܣܰܡ̈ܡܳܢܶܐ. ܘܓܰܒܪܳܐ ܚܰܟܺܝܡܳܐ ܠܳܐ ܢܶܒܣܶܐ ܥܠܰܝܗܽܘܢ.
5 ܒܩܰܝܣܳܐ ܓܶܝܪ ܚܰܠܺܝܘ ܡܰܝ̈ܳܐ ܡܰܪܺܝܖ̈ܶܐ.
6 ܡܶܛܽܠ ܕܢܶܬܺܝܕܰܥ ܚܰܝܠܶܗ ܕܰܐܠܳܗܳܐ: ܕܝܰܗܒ ܠܰܒܢܰܝ̈ܢܳܫܳܐ ܚܶܟܡܬܳܐ: ܠܡܶܫܬܰܒܳܚܽܘ ܒܰܓܒܰܪ̈ܘܳܬܶܗ.
7 ܒܗܽܘܢ ܐܳܣܝܳܐ ܡܢܺܝܚ ܡܶܢ ܟܺܐܒ̈ܶܐ. ܘܳܐܦ ܒܰܣܳܡܳܐ ܡܰܬܩܶܢ ܒܶܣܡܳܢ̈ܶܐ.
8 ܡܶܛܽܠ ܕܠܳܐ ܢܶܒܛܰܠ ܥܒܳܕܳܐ ܘܚܶܟܡܬܳܐ ܡܶܢ ܐܰܦܰܝ̈ ܐܰܪܥܳܐ.
9 ܒܶܪܝ: ܐܳܦ ܒܡܰܕܥܳܟ ܨܰܠܳܐ ܩܕܳܡ ܐܰܠܳܗܳܐ: ܕܗܽܘܝܽܘ ܡܰܐܣܶܐ.
10 ܐܰܥܒܰܪ ܥܰܘܠܳܐ ܘܫܽܘܩܪܳܐ. ܘܡܶܢ ܟܽܠ ܚܛܳܗ̈ܶܐ ܕܰܟܳܐ ܠܶܒܳܟ.
11 ܘܳܐܦ ܠܳܐܣܝܳܐ ܗܰܒ ܐܰܬܪܳܐ.
12 ܡܶܛܽܠ ܕܳܐܦ ܒܶܗ ܐܺܝܬ ܒܑܶܗ ܗܶܢܝܳܢܳܐ.
13 ܡܶܛܽܠ ܕܺܐܝܬ ܙܰܒܢܳܐ ܕܒܺܐܝܕܶܗ ܡܰܨܠܚܳܐ ܐܳܣܝܽܘܬܳܐ.
14 ܕܰܢܨܰܠܶܐ ܠܰܐܠܳܗܳܐ: ܘܢܶܬܶܠ ܒܺܐܝܕܶܗ ܚܽܘܠܡܳܢܳܐ. ܘܬܺܐܬܶܐ ܐܳܣܝܽܘܬܳܐ ܒܺܐܝܕܶܗ ܘܚܰܝ̈ܶܐ.
15 ܡܶܛܽܠ ܕܡܰܢ ܕܚܳܛܶܐ ܩܕܳܡ ܐܰܠܳܗܳܐ: ܡܶܬܺܝܗܶܒ ܠܺܐܝܕܰܝ̈ ܐܳܣܝܳܐ.
16 ܒܶܪܝ: ܥܰܠ ܡܺܝܬܳܐ ܐܰܣܓܳܐ ܕܶܡ̈ܥܶܐ. ܘܢܶܟܐܰܒ ܠܳܟ: ܘܶܐܡܰܪ ܐܽܘܠܺܝܬܳܐ. ܘܰܟܡܳܐ ܕܘܳܠܶܐ ܠܶܗ ܟܢܽܘܫ ܦܰܓܪܶܗ. ܘܠܳܐ ܬܶܒܣܶܐ ܥܰܠ ܩܒܽܘܪܬܶܗ.
17 ܚܰܡܪܳܐ ܘܣܰܝܒܳܪܬܳܐ ܠܰܒܢܰܝ̈ܢܳܫܳܐ ܕܡܰܪܩܕܺܝܢ.
18 ܘܶܥܒܶܕ ܐܳܒܠܳܐ ܒܙܶܕܩܶܗ. ܝܰܘܡܳܐ ܘܰܬܪܶܝܢ ܡܶܛܽܠ ܒܢܰܝ̈ܢܳܫܳܐ. ܘܶܐܬܒܰܝܰܐ ܡܶܛܽܠ ܚܰܝ̈ܶܐ.
19 ܡܶܛܽܠ ܕܡܶܢ ܟܰܪܝܽܘܬܳܐ ܡܶܬܝܰܠܕܳܐ ܥܳܩܬܳܐ.
20 ܗܳܟܰܢܳܐ ܓܶܝܪ ܠܶܒܳܐ ܒܺܝܫܳܐ. ܝܰܬܺܝܪ ܡܶܢ ܡܰܘܬܳܐ ܬܳܒܰܪ ܒܨܶܦܬܳܐ ܠܡܶܣܟܺܢ̈ܶܐ. ܘܡܰܝܬܶܐ ܥܳܩܬܳܐ. ܡܶܛܽܠ ܕܚܰܝܰܘ̈ܗܝ ܕܡܶܣܟܺܢܳܐ ܠܠܰܘܛܬܳܐ ܕܠܶܒܳܐ.
21 ܠܳܐ ܬܶܬܶܠ ܠܶܒܳܟ ܠܡܰܘ̈ܡܳܬܳܐ. ܐܶܬܕܰܟܪ ܥܳܩܬܳܐ: ܘܰܐܥܒܰܪ ܚܛܳܗ̈ܶܐ.
22 ܘܠܳܐ ܬܶܬܟܶܠ ܥܰܠ ܥܽܘܬܪܳܐ. ܡܶܛܽܠ ܕܠܰܝܬ ܒܶܗ ܣܰܒܪܳܐ. ܡܶܛܽܠ ܕܰܐܝܟ ܦܳܪܰܚܬܳܐ ܕܰܫܡܰܝܳܐ ܕܦܳܪܚܳܐ ܘܫܳܟܢܳܐ. ܗܳܟܰܢܳܐ ܗܽܘ ܥܽܘܬܪܳܐ ܩܕܳܡ ܒܢܰܝ̈ܢܳܫܳܐ. ܠܳܟ ܡܚܰܕܶܐ: ܘܠܰܐ̱ܚܪܺܢܳܐ ܡܰܒܐܶܫ.
23 ܐܶܬܕܰܟܪ ܕܦܽܘܣܩܳܢܳܐ ܗܽܘ ܠܳܟ. ܠܶܗ ܐܶܬܡܳܠܝ: ܘܠܳܟ ܝܰܘܡܳܢܳܐ.
24 ܐܰܝܟ ܕܰܒܛܶܠ ܡܺܝܬܳܐ: ܗܳܟܰܢܳܐ ܒܛܶܠ ܕܽܘܟܪܳܢܶܗ. ܘܶܐܬܒܰܝܰܐ ܥܰܡ ܡܰܦܩܳܢܳܐ ܕܢܰܦܫܶܗ.
25 ܚܶܟܡܬܶܗ ܕܣܳܦܪܳܐ ܬܰܘܣܶܦ ܠܶܗ ܚܶܟܡܬܳܐ. ܘܰܕܠܳܐ ܡܦܰܪܶܩ ܣܪ̈ܺܝܩܳܬܳܐ: ܗܽܘ ܢܶܬܚܰܟܰܡ.
26 ܡܳܢܳܐ ܓܶܝܪ ܢܶܬܚܰܟܰܡ ܐܰܚܺܝܕ ܚܰܪܒܳܐ ܕܦܰܕܳܢܳܐ. ܕܰܒܬܰܘܖ̈ܶܐ ܕܳܒܰܪ: ܘܰܒܬܰܘܖ̈ܶܐ ܡܬܺܝܪ.
27 ܘܫܽܘܥܺܝܬܶܗ ܥܰܡ ܒܢܰܝ̈ ܬܰܘܖ̈ܶܐ. ܘܠܶܒܶܗ ܪܳܢܶܐ ܒܠܶܓܬܳܐ ܕܙܰܪܥܶܗ. ܘܫܰܗܪܶܗ ܠܡܶܓܡܳܪܽܘ ܥܒܳܕܶܗ.
28 ܗܳܟܰܢܳܐ ܐܳܦ ܟܽܠܗܽܘܢ ܐܽܘ̈ܡܳܢܶܐ ܡܶܬܬܙܺܝܥܺܝܢ ܐܰܟܚܕܳܐ. ܘܠܺܠܝܳܐ ܘܺܐܝܡܳܡܳܐ ܒܗܽܘܢ ܗܽܘ ܪܳܢܶܝܢ: ܒܰܥܒܳܕܳܐ ܕܰܓܠܺܝ̈ܦܶܐ ܘܰܕܛܰܒܥ̈ܶܐ ܘܰܕܡܰܪ̈ܓܳܢܝܳܬܳܐ.
29 ܐܳܦ ܚܽܘܫܒܳܢܰܝ̈ܗܽܘܢ ܠܰܥܒܳܕܳܐ ܕܽܐܘܡܳܢܽܘܬܗܽܘܢ ܡܶܬܒܥܶܝܢ. ܠܶܡܬܰܒ ܥܰܠ ܟܽܘܪܳܐ: ܘܰܠܡܶܣܬܰܟܳܠܽܘ ܒܡܳܐܢܰܝ̈ ܡܰܬܩܳܠܳܐ.
30 ܫܰܠܗܶܒ̈ܝܳܬܳܐ ܕܢܽܘܪܳܐ ܡܦܰܩ̈ܥܳܢ ܒܶܣܪܶܗ. ܘܝܳܩܶܕ ܒܚܶܡܬܳܐ ܕܢܽܘܪܳܐ.
31 ܠܽܘܩܒܰܠ ܣܽܘܟܳܠܳܐ ܢܰܪܟܶܢ ܐܺܝܕܶܗ. ܘܠܽܘܩܒܰܠ ܨܽܘܪܬܳܐ ܕܰܥܒܳܕܶܗ ܢܰܨ̈ܕܳܢ ܥܰܝܢܰܘ̈ܗܝ.
32 ܗܳܟܰܢܳܐ ܐܳܦ ܦܰܚܳܪܳܐ ܕܝܳܬܶܒ ܥܰܠ ܓܺܝܓܠܳܐ. ܘܰܡܙܺܝܥ ܒܦܰܪܣܬܶܗ ܡܳܐܢܳܐ. ܥܰܝܢܰܘ̈ܗܝ ܒܡܳܐܢܰܝ̈ ܟܽܠ ܥܒܳܕܶܗ.
33 ܘܰܕܪ̈ܳܥܰܘܗܝ ܡܦܰܩܥܺܝܢ ܛܺܝܢܳܐ. ܘܥܰܕܠܳܐ ܡܳܐܶܬ: ܟܦܺܝܦ ܘܰܓܗܺܝܢ.
34 ܘܠܶܒܶܗ ܣܺܝܡ ܠܰܡܓܰܡܳܪܽܘ ܥܒܳܕܶܗ. ܘܫܰܗܪܶܗ ܠܒܳܢܳܐ ܐܰܬܽܘܢܶܗ.
35 ܟܽܠܗܽܘܢ ܗܳܠܶܝܢ ܡܶܛܽܠ ܟܽܘܫܳܪܗܽܘܢ. ܘܟܽܠ ܓܒܰܪ ܒܰܥܒܳܕܳܐ ܕܽܐܘܡܳܢܽܘܬܗܽܘܢ ܢܶܬܚܰܟܡܽܘܢ.
36 ܘܒܶܠܥܳܕܰܝ̈ܗܽܘܢ ܠܳܐ ܡܶܬܝܰܬܒܳܐ ܡܕܺܝܢܬܳܐ.
37 ܘܰܐܬܰܪ ܕܥܳܡܪܺܝܢ ܠܳܐ ܢܶܟܦܢܽܘܢ. ܒܪܰܡ ܠܡܶܠܟܳܐ ܕܥܰܡܳܐ ܠܳܐ ܢܶܬܒܽܘܢ. ܘܒܰܟܢܽܘܫܬܳܐ ܠܳܐ ܢܶܬܬܪܺܝܡܽܘܢ.
38 ܘܥܰܠ ܟܽܘܪܣܝܳܐ ܕܕܺܝܢܳܐ ܠܳܐ ܢܶܬܒܽܘܢ. ܘܰܩܝܳܡ̈ܶܐ ܘܕܺܝܢ̈ܶܐ ܠܳܐ ܢܶܣܬܰܟܠܽܘܢ. ܠܳܐ ܢܶܬܒܰܝܢܽܘܢ ܝܽܘܠܦܳܢܳܐ ܕܚܶܟܡܬܳܐ. ܘܰܒܡܰܬ̈ܠܶܐ ܕܚܰܟܺܝ̈ܡܶܐ ܠܳܐ ܢܶܣܬܰܟܠܽܘܢ.
39 ܡܶܛܽܠ ܕܒܰܥܒܺܝ̈ܕܳܬܶܗ ܕܥܳܠܡܳܐ ܗܶܢܽܘܢ ܢܰܗܺܝܪܺܝܢ. ܘܪܶܢܝܗܽܘܢ ܒܰܥܒܳܕܳܐ ܕܘܽܐܘܡܳܢܽܘܬܗܽܘܢ.