Jesus Sirach 21
The Book of Jesus Sirach
܀ ܝܫܘܥ ܒܪ ܐܣܝܪܐ ܟܐ ܀
1 ܒܶܪܝ: ܣܰܓܺܝ ܗܘܰܝܬ ܥܳܪܶܩ ܡܶܢ ܚܛܳܗܳܐ.
2 ܘܶܐܢ ܬܶܩܪܽܘܒ ܠܘܳܬܳܗ̇: ܢܶܟܬܳܟ.
3 ܘܰܐܝܟ ܫܶܢܰܝ̈ ܐܰܪܝܳܐ ܗ̱ܝ: ܟܰܕܳܒܽܘܬܳܐ. ܘܰܡܚܰܒܠܳܐ ܢܰܦ̈ܫܳܬܳܐ ܕܰܒܢܰܝ̈ܢܳܫܳܐ.
4 ܣܰܝܦܳܐ ܕܰܬܪܶܝܢ ܦܽܘܡܰܘ̈ܗܝ: ܙܳܢܺܝܬܳܐ. ܘܠܰܡܚܽܘܬܳܗ̇: ܠܰܝܬ ܐܳܣܝܽܘܬܳܐ.
5 ܡܶܢ ܨܰܦܪܳܐ ܠܪܰܡܫܳܐ ܡܰܚܪܒܳܐ ܡܶܕܝܳܖ̈ܶܐ. ܘܳܐܦܰܕܢ̈ܶܐ ܣܰܓܺܝ̈ܐܶܐ ܥܳܩܪܳܐ.
6 ܨܠܽܘܬܶܗ ܕܡܶܣܟܺܢܳܐ ܐܰܝܟ ܕܡܶܢ ܦܽܘܡܶܗ ܠܶܐܕܢܶܗ. ܘܰܩܕܳܡ ܕܰܝܳܢܳܐ ܕܥܶܠ̈ܡܶܐ ܣܳܠܩܳܐ.
7 ܣܳܢܶܐ ܡܰܟܣܳܢܽܘܬܳܐ ܓܰܒܪܳܐ ܥܰܘܳܠܳܐ. ܘܰܕܕܳܚܶܠ ܡܶܢ ܡܳܪܝܳܐ ܬܳܐܶܒ ܡܶܢ ܠܶܒܶܗ.
8 ܚܰܟܺܝܡܳܐ: ܡܶܢ ܠܽܘܩܒܰܠ ܥܰܝܢܰܘ̈ܗܝ ܡܶܫܬܰܘܕܰܥ. ܘܒܳܩܶܐ ܗܽܘ ܒܰܥܓܰܠ ܠܥܰܘ̈ܳܠܶܐ.
9 ܕܒܳܢܶܐ ܒܰܝܬܶܗ ܒܚܰܝܠܳܐ ܕܚܰܒܖ̈ܰܘܗܝ: ܡܟܰܢܶܫ ܟܺܐܦ̈ܶܐ ܠܝܰܓܪܶܗ.
10 ܐܰܝܟ ܡܰܣܰܩܬܳܐ ܣܚܳܠܳܐ ܒܪ̈ܶܓܠܰܘܗܝ ܕܓܰܒܪܳܐ ܩܰܫܺܝܫܳܐ: ܗܳܟܰܢܳܐ ܬܽܘܩܦܗܽܘܢ ܕܥܰܘ̈ܳܠܶܐ ܠܘܳܬ ܢܽܘܪܳܐ.
11 ܘܰܫܒܺܝܠܶܗ ܕܪܰܫܺܝܥܳܐ ܬܽܘܩܰܠܬܳܐ ܗܽܘ ܠܶܗ. ܡܶܛܽܠ ܕܚܰܪܬܶܗ ܓܽܘܒܳܐ ܗܽܘ ܥܰܡܺܝܩܳܐ.
12 ܕܢܳܛܰܪ ܢܳܡܽܘܣܳܐ: ܐܳܠܶܨ ܝܰܨܪܶܗ.
13 ܘܰܕܕܳܚܶܠ ܠܰܐܠܳܗܳܐ: ܠܳܐ ܢܶܚܣܰܪ ܠܶܗ ܡܶܕܶܡ.
14 ܘܡܰܕܥܶܗ ܕܚܰܟܺܝܡܳܐ: ܐܰܝܟ ܡܰܒܽܘܥܳܐ ܕܡܰܝ̈ܳܐ ܢܶܣܓܶܐ. ܘܬܰܪܥܶܝܬܶܗ: ܐܰܝܟ ܡܰܝ̈ܳܐ ܚܰܝ̈ܶܐ.
15 ܠܶܒܶܗ ܕܪܰܫܺܝܥܳܐ: ܐܰܝܟ ܓܽܘܒܳܐ ܬܒܺܝܪܳܐ. ܘܟܽܠ ܝܰܘ̈ܡܰܝ ܚܰܝܰܘ̈ܗܝ: ܚܶܟܡܬܳܐ ܠܳܐ ܢܺܐܠܰܦ.
16 ܡܶܠܬܶܗ ܕܚܰܟܺܝܡܳܐ: ܫܳܡܰܥ ܠܳܗ̇ ܚܰܟܺܝܡܳܐ. ܘܠܳܗ̇ ܡܰܘܕܶܐ: ܘܰܥܠܶܝܗ̇ ܡܰܘܣܶܦ. ܘܫܳܡܰܥ ܠܳܗ̇ ܣܰܟܠܳܐ: ܘܰܥܠܶܝܗ̇ ܓܳܚܶܟ. ܘܪܳܡܶܐ ܠܳܗ̇ ܠܚܰܕ ܡܶܢ ܓܰܒܰܘ̈ܗܝ.
17 ܫܽܘ̈ܥܝܳܬܶܗ ܕܪܰܫܺܝܥܳܐ: ܐܰܝܟ ܛܰܥܢܳܐ ܝܰܩܺܝܪܳܐ ܒܽܐܘܪܚܳܐ. ܘܟܽܠ ܡܰܡܠܶܠܗ ܕܙܰܕܺܝܩܳܐ: ܛܰܝܒܽܘܬܳܐ.
18 ܦܽܘܡܶܗ ܕܚܰܟܺܝܡܳܐ ܡܶܬܒܥܶܐ ܒܰܟܢܽܘܫܬܳܐ. ܘܰܠܡܰܡܠܶܠܗ ܢܣܺܝܡܽܘܢ ܠܶܒܗܽܘܢ.
19 ܐܰܝܟ ܒܶܝܬ ܐܰܣܺܝܖ̈ܶܐ ܗ̱ܝ ܚܶܟܡܬܳܐ ܠܣܰܟܠܳܐ. ܘܡܰܕܥܳܐ ܠܫܳܛܝܳܐ ܐܰܝܟ ܓܽܘܡܖ̈ܶܐ ܕܢܽܘܪܳܐ. ܐܰܝܟ ܡܨܺܝܕܬܳܐ ܗܽܘ ܝܽܘܠܦܳܢܳܐ ܒܪ̈ܶܓܠܰܘܗܝ ܕܣܰܟܠܳܐ. ܘܰܐܝܟ ܐܰܣܽܘܖ̈ܶܐ ܥܰܠ ܝܰܡܺܝܢܶܗ.
20 ܣܰܟܠܐ: ܒܓܽܘܚܟܳܐ ܡܪܺܝܢ ܩܳܠܶܗ. ܘܓܰܒܪܳܐ ܚܰܟܺܝܡܳܐ ܒܰܢܝܳܚܳܐ ܓܳܚܶܟ.
21 ܐܰܝܟ ܩܽܘܠܒܳܐ ܕܕܰܗܒܳܐ: ܚܶܟܡܬܳܐ ܠܣܰܟܽܘܠܬܳܢܳܐ. ܘܰܐܝܟ ܨܶܦܬܳܐ ܥܰܠ ܐܺܝܕܶܗ ܕܝܰܡܺܝܢܳܐ.
22 ܪ̈ܶܓܠܰܘܗܝ ܕܣܰܟܠܳܐ ܥܳܐܠ̈ܳܢ ܒܰܥܓܰܟ ܠܓܰܘ ܒܰܝܬܳܐ. ܘܓܰܒܪܳܐ ܚܰܟܺܝܡܳܐ ܡܰܪܟܶܢ ܐܰܦܰܘ̈ܗܝ.
23 ܣܰܟܠܳܐ ܡܕܺܝܩ ܡܶܢ ܬܰܪܥܳܐ ܠܓܰܘ ܒܰܝܬܳܐ. ܘܺܐܝܩܳܪܶܗ ܕܓܰܒܪܳܐ ܕܰܢܩܽܘܡ ܡܶܢ ܠܒܰܪ ܘܰܢܡܰܠܶܠ.
24 ܣܰܟܠܽܘܬܳܐ ܗ̱ܝ ܠܒܰܪܢܳܫܳܐ ܕܨܳܐܶܬ ܥܰܠ ܬܰܪܥܳܐ: ܘܰܠܚܰܟܺܝܡܳܐ ܩܫܶܐ ܨܰܥܪܶܗ.
25 ܦܽܘܡܶܗ ܕܪܰܫܺܝܥܳܐ ܒܓܽܘܫܡܳܐ ܕܢܰܦܫܶܗ ܡܡܰܠܶܠ. ܘܰܒܡܰܬܩܳܠܳܐ ܡܡܰܠܶܠ ܚܰܟܺܝܡܳܐ.
26 ܦܽܘܡܶܗ ܕܣܰܟܠܳܐ ܗܽܘܝܽܘ ܠܶܒܶܗ. ܘܦܽܘܡܶܗ ܕܚܰܟܺܝܡܳܐ ܒܠܶܒܶܗ.
27 ܟܰܕ ܠܳܐܶܛ ܣܰܟܠܳܐ ܠܡܰܢ ܕܠܳܐ ܚܛܳܐ ܠܶܗ: ܗܽܘܝܽܘ ܡܠܰܝܶܛ ܠܢܰܦܫܶܗ.
28 ܥܰܝܺܝܩܳܐ ܢܰܦܫܶܗ ܕܚܰܟܺܝܡܳܐ ܥܰܠ ܣܰܟܠܳܐ. ܡܶܛܽܠ ܕܠܳܐ ܝܳܕܰܥ ܡܳܢܳܐ ܢܺܐܡܰܪ ܠܶܗ.