Jesus Sirach 37
The Book of Jesus Sirach
܀ ܝܫܘܥ ܒܪ ܐܣܝܪܐ ܠܙ ܀
1 ܘܰܠܪܳܚܡܶܗ ܐܳܡܰܪ ܕܪܶܚܡܶܬ. ܒܪܰܡ ܐܺܝܬ ܪܳܚܡܳܐ ܕܰܫܡܶܗ ܪܳܚܡܳܐ: ܕܠܳܐ ܡܳܛܶܐ ܥܕܰܡܳܐ ܠܡܰܘܬܳܐ.
2 ܪܳܚܡܳܐ ܕܰܫܪܳܪܳܐ: ܐܰܝܟ ܢܰܦܫܳܟ ܢܶܗܘܶܐ ܠܳܟ.
3 ܣܳܢܳܐܐ ܘܒܺܝܫܳܐ ܠܡܳܢܳܐ ܐܶܬܒܪܺܝܘ. ܐܶܠܳܐ ܠܡܶܡܠܳܐ ܐܰܪܥܳܐ ܥܒܳܕ̈ܶܐ ܕܥܰܘܠܳܐ.
4 ܒܺܝܫ ܪܳܚܡܳܐ ܕܩܰܪܺܝܒ ܠܦܳܬܽܘܪܳܐ. ܘܰܒܥܶܕܳܢ ܥܳܩܬܳܐ ܩܳܐܶܡ ܡܶܢ ܩܒܽܘܠ.
5 ܛܳܒ ܪܳܚܡܳܐ ܕܡܶܬܟܰܬܰܫ ܠܽܘܩܒܰܠ ܒܥܶܠܕܒܳܒܳܐ: ܘܰܐܚܺܝܕ ܣܰܟܪܳܐ.
6 ܠܳܐ ܬܫܰܒܰܚ ܪܳܚܡܳܟ ܒܩܽܘܪܒܳܐ. ܘܠܳܐ ܬܫܰܠܛܺܝܘܗܝ ܒܒܰܝܬܳܟ.
7 ܟܽܠ ܡܳܠܽܘܟܳܐ ܚܙܺܝ. ܒܪܰܡ ܐܺܝܬ ܡܶܠܟܳܐ ܕܫܰܦܺܝܪ ܥܒܺܝܕ.
8 ܡܶܢ ܡܳܠܽܘܟܳܐ ܥܰܘܳܠܳܐ ܛܰܪ ܢܰܦܫܳܟ. ܘܕܰܥ ܠܽܘܩܕܰܡ ܡܳܢܳܐ ܒܳܥܶܐ. ܡܶܛܽܠ ܕܳܐܦ ܗܽܘ ܒܢܰܦܫܶܗ ܗܽܘ ܡܶܬܪܰܥܶܐ.
9 ܕܕܰܠܡܳܐ ܢܰܪܡܶܐ ܥܠܰܝܟ ܬܽܘܟܳܐ ܒܺܝܫܳܐ.
10 ܘܢܺܐܡܰܪ ܡܳܐ ܛܳܒܳܐ ܗ̱ܝ ܐܽܘܪܚܳܟ. ܘܰܢܩܽܘܡ ܡܶܢ ܩܒܽܘܠ: ܘܢܶܚܙܶܐ ܒܨܰܥܪܳܟ. ܠܳܐ ܬܶܬܡܠܶܟ ܒܣܳܢܳܐܟ. ܘܡܶܢܶܗ ܟܰܣܺܝ ܐ̱ܪܳܙܳܟ.
11 ܘܥܰܡ ܐܰܢ̱ܬܬܳܐ ܕܠܳܐ ܬܓܺܘܪܶܝܗ̇. ܘܥܰܡ ܣܳܢܳܐܐ ܕܠܳܐ ܬܶܬܟܰܬܰܫ: ܘܥܰܡ ܬܰܓܳܪܳܐ ܥܰܠ ܬܶܐܓܽܘܪܬܶܗ. ܘܥܰܡ ܡܙܰܒܢܳܢܳܐ ܥܰܠ ܙܶܒܢܶܗ: ܐܰܘ ܥܰܡ ܥܰܘܳܠܳܐ ܠܡܶܥܒܰܕ ܕܫܰܦܺܝܪ.
12 ܘܥܰܡ ܐܰܝܢܳܐ ܕܠܺܝܬ ܠܶܗ ܖ̈ܰܚܡܶܐ: ܠܡܶܥܒܰܕ ܖ̈ܰܚܡܶܐ. ܥܰܡ ܐܰܓܺܝܪܳܐ ܕܰܡܕܰܓܶܠ ܒܰܥܒܳܕܶܗ.
13 ܘܥܰܡ ܐܰܓܺܝܪܳܐ ܥܰܘܳܠܳܐ ܠܳܐ ܬܶܩܛܽܘܪ ܐ̱ܪܳܙܳܐ. ܘܥܰܡ ܥܰܒܕܳܐ ܕܒܳܥܶܐ ܠܡܶܛܥܰܡ ܡܳܖ̈ܰܘܗܝ: ܠܳܐ ܬܶܗܘܶܐ ܠܶܗ ܒܥܶܠ ܡܶܠܟܳܐ.
14 ܥܰܡ ܐ̱ܢܳܫ̈ܳܐ ܙܰܕܺܝ̈ܩܶܐ ܗܘܰܝܬ ܥܳܡܰܪ. ܕܗܶܢܽܘܢ ܕܳܚܠܺܝܢ ܠܡܶܚܛܳܐ ܩܕܳܡ ܐܰܠܳܗܳܐ. ܘܠܶܒܗܽܘܢ ܫܘܶܐ ܥܰܡ ܠܶܒܳܟ.
15 ܘܶܐܢ ܡܰܒܐܶܫ ܠܳܟ: ܠܢܰܦܫܶܗ ܗܽܘ ܡܰܒܐܶܫ. ܘܶܐܢ ܡܰܛܐܶܒ ܠܳܟ: ܠܢܰܦܫܶܗ ܗܽܘ ܡܰܛܐܶܒ.
16 ܡܶܛܽܠ ܗܰܝܡܳܢܽܘܬܶܗ: ܗܺܝ ܬܰܚܶܝܘܗܝ. ܘܳܐܦ ܗܽܘ ܡܗܰܝܡܰܢ ܗܽܘ ܐܰܟܘܳܬܳܟ.
17 ܠܶܒܶܗ ܕܰܒܪܢܳܫܳܐ ܢܶܚܕܶܐ ܒܽܐܘܪܚܶܗ: ܝܰܬܺܝܪ ܡܶܢ ܥܽܘܬܪܳܐ ܕܥܳܠܡܳܐ ܕܠܳܐ ܡܰܗܢܶܐ.
18 ܘܥܰܡ ܟܽܠܗܶܝܢ ܗܳܠܶܝܢ ܗܘܰܝܬ ܡܨܰܠܶܐ ܠܰܐܠܳܗܳܐ. ܕܗܽܘ ܢܰܬܩܶܢ ܐܽܘܪܚܳܟ ܒܩܽܘܫܬܳܐ: ܩܕܳܡ ܒܢܰܝ̈ܢܳܫܳܐ ܘܰܩܕܳܡ ܟܽܠ ܡܶܕܶܡ.
19 ܡܳܪܝܳܐ ܒܪܳܐ ܟܽܠ ܛܳܒ ܘܒܺܝܫ. ܚܰܝ̈ܶܐ ܘܡܰܘܬܳܐ. ܘܰܕܫܰܠܺܝܛ ܒܠܶܫܳܢܶܗ: ܢܶܬܦܰܨܶܐ ܡܶܢ ܒܺܝܫܳܐ. ܘܟܽܠ ܡܰܢ ܕܚܰܟܺܝܡ ܒܪܶܥܝܳܢܶܗ: ܗܽܘܝܽܘ ܣܰܟ̱ܳܐ.
20 ܐܺܝܬ ܓܶܝܪ ܕܚܰܟܺܝܡ. ܘܰܒܫܽܘ̈ܥܝܳܬܶܗ ܡܶܣܬܢܶܐ. ܘܡܶܢ ܟܽܠ ܐܺܝܩܳܪ ܟܳܠܶܐ ܢܰܦܫܶܗ.
21 ܘܺܐܝܬ ܚܰܟܺܝܡܳܐ ܕܰܒܟܽܠܥܶܕܳܢ ܚܰܟܺܝܡ. ܦܺܐܖ̈ܰܝܗܽܘܢ ܕܚܰܟܺܝ̈ܡܶܐ ܠܢܰܦܫܗܽܘܢ.
22 ܘܺܐܝܬ ܚܰܟܺܝܡܳܐ ܕܰܠܢܰܦܫܶܗ ܚܰܟܺܝܡ. ܘܦܺܐܖ̈ܶܐ ܕܰܥܒܳܕܰܘ̈ܗܝ ܡܶܢ ܚܶܙܘܳܐ ܕܰܐܦܰܘ̈ܗܝ.
23 ܘܰܕܚܰܟܺܝܡ ܠܢܰܦܫܶܗ ܢܶܣܒܰܥ ܬܰܦܢܺܝ̈ܩܶܐ. ܘܰܢܫܰܒܚܽܘܢܶܗ ܟܽܠܗܽܘܢ ܚܰܙܳܝܰܘ̈ܗܝ.
24 ܚܰܟܺܝܡܳܐ ܕܥܰܡܳܐ ܢܺܐܪܰܬ ܐܺܝܩܳܪܳܐ. ܘܰܫܡܶܗ ܩܰܝܳܡ ܠܚܰܝ̈ܶܐ ܕܰܠܥܳܠܰܡ.
25 ܒܶܪܝ: ܒܚܰܝܰܝ̈ܟ ܢܰܣܳܐ ܢܰܦܫܳܟ. ܘܰܚܙܺܝ ܡܶܕܶܡ ܕܒܺܝܫ ܠܳܗ̇: ܠܳܐ ܬܶܬܶܠ ܠܳܗ̇.
26 ܡܶܛܽܠ ܕܠܳܐ ܗܘܳܐ ܟܽܠ ܛܳܒܳܐ. ܘܠܳܐ ܟܽܠ ܢܰܦܫܳܐ ܒܩܰܠܺܝܠ ܡܶܬܪܰܥܝܳܐ.
27 ܠܳܐ ܬܰܣܓܶܐ ܠܳܗ̇ ܡܶܐܟܽܘܠܬܳܐ ܕܬܰܦܢܺܝ̈ܩܶܐ. ܘܠܳܐ ܬܰܒܐܶܫ ܥܰܝܢܳܟ ܥܰܠ ܡܶܐܟܽܘܠܬܳܐ ܣܰܓܺܝܐܬܳܐ.
28 ܡܶܛܽܠ ܕܡܶܢ ܣܰܓܺܝܐܽܘܬܳܐ ܕܡܶܐܟܽܘܠܬܳܐ ܗܳܘܶܐ ܡܰܪܥܳܐ. ܘܰܕܡܰܣܓܶܐ ܠܡܶܐܟܰܠ ܡܶܬܟܪܰܗ.
29 ܣܰܓܺܝ̈ܐܶܐ ܓܶܝܪ ܕܡܺܝܬܘ ܡܶܛܽܠ ܡܶܐܟܽܘܠܬܳܐ ܣܰܓܺܝܐܬܳܐ. ܘܰܕܡܶܙܕܰܗܰܪ ܡܰܘܣܶܦ ܚܰܝ̈ܶܐ.