Jesus Sirach 30
The Book of Jesus Sirach
܀ ܝܫܘܥ ܒܪ ܐܣܝܪܐ ܠ ܀
1 ܕܪܳܚܶܡ ܒܪܶܗ: ܢܚܰܕܶܬ ܙܶܩܬܰܘ̈ܗܝ. ܡܶܛܽܠ ܕܢܶܚܕܶܐ ܒܰܐ̱ܚܪܳܝܬܶܗ.
2 ܕܪܳܕܶܐ ܒܪܶܗ ܢܶܚܕܶܐ ܒܶܗ. ܘܒܰܝܢܳܬ ܚܰܒܖ̈ܰܘܗܝ ܢܶܫܬܰܒܰܚ ܒܶܗ.
3 ܕܡܰܠܶܦ ܒܪܶܗ: ܡܰܛܶܢ ܠܣܳܢܶܐܗ. ܘܰܠܥܺܝܢ ܪ̈ܳܚܡܰܘܗܝ ܢܶܫܬܰܒܰܚ ܒܶܗ.
4 ܡܺܝܬ ܐܰܒܽܘܗܝ: ܘܰܟܒܰܪ ܕܠܳܐ ܡܺܝܬ. ܡܶܛܽܠ ܕܰܐܟܘܳܬܶܗ ܫܒܰܩ ܒܳܬܪܶܗ.
5 ܒܚܰܝܰܘ̈ܗܝ ܚܙܳܝܗܝ ܘܰܚܕܺܝ. ܘܰܒܡܰܘܬܶܗ ܠܳܐ ܟܳܪܝܳܐ ܠܶܗ.
6 ܠܪ̈ܳܚܡܰܘܗܝ ܦܳܪܰܥ ܛܰܝܒܽܘܬܳܐ. ܘܡܶܢ ܒܥܶܕܒܳܒܰܘ̈ܗܝ ܡܶܬܦܪܰܥ ܦܽܘܪܥܳܢܳܐ.
7 ܕܰܢܦܰܢܶܩ ܠܰܒܪܶܗ: ܢܶܣܓ̈ܝܳܢ ܨܽܘ̈ܠܦܳܬܶܗ. ܘܰܠܟܽܠ ܝܺܠܶܠܬܳܐ ܢܣܰܪܶܩ ܠܶܒܶܗ.
8 ܘܰܐܝܟ ܣܽܘܣܝܳܐ ܥܺܝܠܳܐ ܕܠܳܐ ܡܟܰܒܰܫ: ܗܳܟܰܢܳܐ ܒܪܳܐ ܡܳܪܽܘܕܳܐ ܕܠܳܐ ܡܶܫܬܡܰܥ ܠܰܐܒܽܘܗܝ.
9 ܪܕܺܝ ܒܪܳܟ ܕܠܳܐ ܬܶܬܡܰܝܰܩ. ܘܶܐܢ ܬܶܓܚܰܟ ܥܰܡܶܗ ܢܫܰܢܩܳܟ.
10 ܠܳܐ ܬܺܐܙܰܠ ܥܰܡܶܗ ܐܰܝܟ ܨܶܒܝܳܢܶܗ. ܕܠܳܐ ܢܰܪܓܙܳܟ: ܘܰܠܚܰܪܬܳܐ ܢܰܩܗܶܐ ܫܶܢܰܝ̈ܟ.
11 ܠܳܐ ܬܫܰܠܛܺܝܘܗܝ ܒܛܰܠܝܽܘܬܶܗ. ܘܠܳܐ ܬܶܫܒܽܘܩ ܠܶܗ ܟܽܠ ܣܽܘܪ̈ܚܳܢܰܘܗܝ.
12 ܟܽܘܦ ܪܺܝܫܶܗ ܥܰܕ ܗܽܘ ܛܠܶܐ. ܘܦܰܩܰܥ ܡܰܬܢ̈ܳܬܶܗ ܥܰܕ ܗܽܘ ܙܥܽܘܪ: ܕܠܳܐ ܢܶܥܫܰܢ ܘܢܶܡܪܰܕ ܡܶܢܳܟ.
13 ܛܽܘܪܦܳܐ ܕܢܰܦܫܳܐ ܐܰܠܶܦ ܒܪܳܟ. ܘܰܐܩܫܳܐ ܥܠܰܘܗܝ. ܕܰܠܡܳܐ ܒܣܰܟܠܽܘܬܶܗ ܢܰܬܩܠܳܟ.
14 ܛܳܒ ܗܽܘ ܓܶܝܪ ܡܶܣܟܺܢܳܐ ܕܚܰܝ ܘܫܰܪܺܝܪ ܒܓܽܘܫܡܶܗ. ܡܶܢ ܥܰܬܺܝܪܳܐ ܕܰܟܬܺܝܫ ܒܒܶܣܪܶܗ.
15 ܚܰܝ̈ܶܐ ܕܰܫܪܳܪܳܐ ܪܶܚܡܶܬ ܡܶܢ ܕܰܗܒܳܐ. ܘܪܽܘܚܳܐ ܛܳܒܬܳܐ ܡܶܢ ܡܰܪ̈ܓܳܢܝܳܬܳܐ.
16 ܠܰܝܬ ܥܽܘܬܪܳܐ ܐܰܝܟ ܫܰܪܺܝܪܽܘܬܳܐ ܕܦܰܓܪܳܐ. ܘܠܰܝܬ ܚܰܕܽܘܬܳܐ ܐܰܝܟ ܠܶܒܳܐ ܛܳܒܳܐ.
17 ܦܰܩܳܚ ܠܰܡܡܳܬ ܡܶܢ ܚܰܝ̈ܶܐ ܒܺܝ̈ܫܶܐ. ܘܰܠܡܶܚܰܬ ܠܰܫܝܽܘܠ ܡܶܢ ܟܺܐܒܳܐ ܕܩܰܝܳܡ.
18 ܛܳܒ̈ܳܬܳܐ ܕܰܡܟܰܣ̈ܝܳܢ ܥܰܠ ܦܽܘܡܳܐ ܕܰܡܟܰܣܰܝ. ܐܰܝܟ ܕܣܺܝ̈ܡܳܢ ܥܰܠ ܩܰܒܖ̈ܶܐ.
19 ܡܳܢܳܐ ܗܶܢܝܳܢܳܐ ܐܺܝܬ ܠܨܰܠܡ̈ܶܐ ܕܥܰܡ̈ܡܶܐ. ܕܠܳܐ ܐܳܟܠܺܝܢ ܘܠܳܐ ܡܪܰܝܚܺܝܢ.
20 ܗܳܟܰܢܳܐ ܡܰܢ ܕܺܐܝܬ ܠܶܗ ܥܽܘܬܪܳܐ ܘܠܳܐ ܡܶܬܚܰܫܰܚ ܒܶܗ.
21 ܘܚܳܙܶܐ ܒܥܰܝܢܰܘ̈ܗܝ ܘܡܶܬܬܰܢܰܚ. ܐܰܝܟ ܡܗܰܝܡܢܳܐ ܕܕܳܡܶܟ ܠܘܳܬ ܒܬܽܘܠܬܳܐ. ܘܡܳܪܝܳܐ ܬܳܒܰܥ ܒܺܐܝܕܶܗ.
22 ܠܳܐ ܬܶܬܶܠ ܠܕܽܘܘܳܢܳܐ ܢܰܦܫܳܟ. ܘܠܳܐ ܬܶܬܩܶܠ ܒܡܶܠܟܳܐ ܕܢܰܦܫܳܟ.
23 ܚܰܕܽܘܬ ܠܶܒܳܐ ܐܶܢܽܘܢ ܓܶܝܪ ܚܰܝܰܘ̈ܗܝ ܕܒܰܪܢܳܫܳܐ. ܘܬܰܪܥܺܝܬܶܗ ܕܒܰܪܢܳܫܳܐ ܗܺܝ ܬܶܣܓܶܐ ܚܰܝܰܘ̈ܗܝ.
24 ܫܰܕܶܠ ܢܰܦܫܳܟ: ܘܦܰܝܶܓ ܠܶܒܳܟ. ܘܟܰܪܝܽܘܬܳܐ ܐܰܪܚܶܩ ܡܶܢܳܟ.
25 ܡܶܛܽܠ ܕܰܠܣܰܓܺܝ̈ܐܶܐ ܩܛܰܠ ܕܽܘܘܳܢܳܐ. ܘܰܐܘܒܕܰܬ ܐܶܢܽܘܢ ܟܰܪܝܽܘܬܳܐ.
26 ܛܢܳܢܳܐ ܘܪܽܘܓܙܳܐ ܡܒܰܠܶܝܢ ܝܰܘ̈ܡܳܬܳܐ. ܘܰܕܠܳܐ ܒܙܰܒܢܶܗܝܢ ܡܰܦܩܳܐ ܚܶܘܳܪ̈ܳܬܳܐ ܨܶܦܬܳܐ.
27 ܠܶܒܳܐ ܛܳܒܳܐ ܣܰܓܺܝܐܳܢ ܡܶܐܟ̈ܠܳܬܶܗ. ܘܟܽܠ ܕܳܐܟܶܠ ܣܳܠܶܩ ܥܰܠ ܦܰܓܪܶܗ.