Jesus Sirach 23
The Book of Jesus Sirach
܀ ܝܫܘܥ ܒܪ ܐܣܝܪܐ ܟܓ ܀
1 ܐܰܠܳܗܳܐ ܐܳܒܝ: ܘܡܳܪܗܽܘܢ ܕܚܰܝܰܝ̈. ܠܳܐ ܬܰܬܩܠܰܢܝ ܡܶܛܽܠܳܬܗܽܘܢ.
2 ܡܰܢ ܕܶܝܢ ܐܰܩܺܝܡ ܥܰܠ ܬܰܪܥܺܝܬܝ ܫܰܘܛܳܐ: ܘܥܰܠ ܠܶܒܝ ܫܰܒܛܳܐ ܕܝܽܘܠܦܳܢܳܐ. ܕܗܽܘ ܡܳܪܝܳܐ ܢܚܽܘܣ ܥܰܠ ܚܰܘ̈ܒܰܝ. ܕܒܰܟܢܽܘܫܬܗܽܘܢ ܠܳܐ ܢܺܐܪܬܽܘܢ. ܘܠܳܐ ܢܶܪܚܡܽܘܢ ܠܰܡܚܰܒܳܠܽܘ.
3 ܡܶܛܽܠ ܕܠܳܐ ܢܶܣܓܽܘܢ ܚܰܘ̈ܒܰܝ: ܘܠܳܐ ܢܶܥܫܢܽܘܢ ܚܛܳܗܰܝ̈. ܘܢܶܓܠܽܘܢܳܢܝ ܩܕܳܡ ܒܶܥܠܕܒܳܒܳܐ: ܘܢܶܚܕܶܐ ܠܺܝ ܣܳܢܳܐܐ.
4 ܐܰܠܳܗܳܐ ܐܳܒܝ: ܘܡܳܪܗܽܘܢ ܕܚܰܝܰܝ̈. ܠܳܐ ܬܰܪܡܶܝܢܝ ܒܛܳܥܝܽܘܬܗܽܘܢ.
5 ܥܰܝܢܳܐ ܪܳܡܬܳܐ: ܠܳܐ ܬܶܬܶܠ ܠܺܝ. ܘܠܶܒܳܐ ܦܰܚܙܳܐ: ܐܰܪܚܶܩ ܡܶܢܝ. ܡܶܕܶܡ ܕܫܰܦܺܝܪ: ܠܳܐ ܢܦܰܠܛܰܢܝ.
6 ܘܦܰܚܙܳܐ ܕܒܶܣܪܳܐ: ܠܳܐ ܢܦܰܚܙܰܢܝ. ܘܢܰܦܫܳܐ ܚܨܺܝܦܬܳܐ: ܠܳܐ ܬܶܫܬܰܠܰܛ ܒܺܝ.
7 ܝܽܘܠܦܳܢܳܐ ܕܦܽܘܡܝ: ܫܡܰܥܘ ܒܢܰܝ̈ܳܐ ܘܰܕܡܶܙܕܰܗܰܪ: ܠܳܐ ܢܶܬܚܰܣܰܕ.
8 ܒܡܰܡܠܶܠܶܗ ܓܶܝܪ: ܡܶܬܬܚܶܕ ܪܰܫܺܝܥܳܐ. ܘܣܰܟܠܳܐ: ܒܦܽܘܡܶܗ ܡܶܬܬܩܶܠ.
9 ܠܡܰܘ̈ܡܳܬܳܐ: ܠܳܐ ܬܰܠܶܦ ܦܽܘܡܳܟ.
10 ܘܒܰܝܢܳܬ ܕܰܝܳܢ̈ܶܐ: ܠܳܐ ܬܶܗܘܶܐ ܝܳܬܶܒ.
11 ܡܶܛܽܠ ܕܟܽܠ ܒܰܪܢܳܫܳܐ ܕܡܰܣܓܶܐ ܠܡܺܐܡܳܐ: ܡܶܢ ܡܚܽܘܬܳܐ: ܠܳܐ ܙܳܟܶܐ. ܗܳܟܰܢܳܐ ܟܽܠ ܕܰܡܕܰܓܶܠ ܘܝܳܡܶܐ: ܡܶܢ ܚܰܘ̈ܒܶܐ ܠܳܐ ܙܳܟܶܐ.
12 ܓܰܒܪܳܐ ܝܰܡܳܝܳܐ: ܩܳܢܶܐ ܚܰܘ̈ܒܶܐ. ܘܠܳܐ ܢܰܥܒܰܪ ܡܶܢ ܒܺܝܬܶܗ: ܡܰܟܬܳܫܳܐ.
13 ܐܶܢ ܒܛܽܘܥܝܰܝ ܝܳܡܶܐ: ܚܛܳܗܶܗ ܥܠܰܘܗܝ.
14 ܘܶܐܢ ܒܰܫܪܳܪܳܐ: ܠܳܐ ܢܺܐܡܶܐ. ܡܶܛܽܠ ܕܟܽܠ ܕܝܳܡܶܐ ܒܟܽܠܥܶܕܳܢ: ܣܰܢܝܳܐ ܗ̱ܝ: ܘܠܳܐ ܙܳܟܶܐ.
15 ܘܳܐܦܶܢ ܐܺܝܬ ܐ̱ܚܪܺܬܳܐ ܕܦܳܚܡܳܐ ܠܳܗ̇: ܠܳܐ ܬܶܫܬܟܰܚ ܒܝܳܪܬܽܘܬܶܗ ܕܝܰܥܩܽܘܒ.
16 ܘܳܐܦ ܡܰܢ ܕܙܳܓܰܪ ܢܰܦܫܶܗ ܡܶܢ ܗܳܠܶܝܢ ܢܺܚܶܐ: ܘܒܰܚܛܳܗ̈ܶܐ ܠܳܐ ܢܶܬܚܰܠܰܛ.
17 ܘܳܐܦ ܠܣܰܟܠܽܘܬܳܐ ܠܳܐ ܬܰܠܶܦ ܦܽܘܡܳܟ. ܡܶܛܽܠ ܕܳܐܦ ܒܳܗ̇: ܐܺܝܬ ܒܳܗ̇ ܡ̈ܶܠܶܐ ܕܫܽܘܩܪܳܐ.
18 ܐܶܬܕܰܟܪ ܕܰܐܒܳܐ ܘܶܐܡܳܐ ܐܺܝܬ ܠܳܟ. ܘܡܶܢ ܐܰܝܕܳܐ ܕܶܚܠܬܳܐ ܬܶܬܦܰܠܰܛ.
19 ܕܠܳܐ ܬܶܬܩܶܠ ܩܕܳܡܰܝܗܽܘܢ: ܘܰܒܝܽܘܠܦܳܢܳܟ ܬܶܨܛܰܥܰܪ. ܘܬܺܐܡܰܪ ܕܶܐܠܽܘܠܳܐ ܐܶܬܒܪܺܝܬ. ܘܰܠܝܰܘܡܳܐ ܕܶܐܬܝܰܠܕܶܬ ܒܶܗ: ܬܠܽܘܛ.
20 ܓܰܒܪܳܐ ܓܶܝܪ ܕܢܺܐܠܰܦ ܡ̈ܶܠܶܐ ܒܰܛܳܠ̈ܳܬܳܐ: ܟܽܠ ܝܰܘ̈ܡܰܝ ܚܰܝܰܘ̈ܗܝ ܚܶܟܡܬܳܐ ܠܳܐ ܢܺܐܠܰܦ. ܘܠܳܐ ܠܝܽܘܠܦܳܢܳܐ ܡܩܰܒܶܠ ܓܰܒܪܳܐ ܕܰܦܚܶܙ ܒܨܰܥܪܳܐ ܕܒܶܣܪܶܗ.
21 ܬܪܶܝܢ ܙܢܺܝ̈ܢ ܣܢܳܬ ܢܰܦܼܶܝ. ܘܕܰܬܠܳܬܳܐ ܡܰܣܶܩ ܪܽܘܓܙܳܐ.
22 ܓܰܒܪܳܐ ܕܰܦܚܶܙ ܒܨܰܥܪܳܐ ܕܒܶܣܪܶܗ: ܠܳܐ ܢܶܬܬܢܺܝܚ ܥܕܰܡܳܐ ܕܬܺܐܩܰܕ ܒܶܗ ܢܽܘܪܳܐ.
23 ܠܒܶܣܪܳܐ ܕܓܰܒܪܳܐ ܦܰܚܙܳܐ ܟܽܠܒܣܰܪ ܒܰܣܺܝܡ ܠܶܗ. ܘܠܳܐ ܢܶܬܟܠܶܐ ܥܕܰܡܳܐ ܕܢܺܐܒܰܕ.
24 ܓܰܒܪܳܐ ܕܰܡܫܰܩܰܪ ܥܰܠ ܬܶܫܘܺܝܬܳܐ ܕܥܰܪܣܶܗ: ܘܳܐܡܰܪ ܒܢܰܦܫܶܗ ܡܰܢܽܘ ܚܳܙܶܐ ܠܺܝ.
25 ܗܳܐ ܐܶܣ̈ܶܐ ܕܒܰܝܬܝ ܡܣܰܬܪ̈ܳܢ ܥܠܰܝ. ܘܛܶܠܳܠܳܐ ܕܒܰܝܬܝ ܡܰܓܶܢ ܥܠܰܝ. ܘܠܰܝܬ ܕܚܳܙܶܐ ܠܺܝ.
26 ܡܰܢܽܘ ܟܳܠܶܐ ܠܺܝ ܕܶܐܚܛܶܐ.
27 ܘܠܳܐ ܝܳܕܰܥ ܕܥܰܝܢܰܘ̈ܗܝ ܕܰܐܠܳܗܳܐ ܪܰܘܪ̈ܒܳܢ ܚܰܕ ܒܪܶܒܽܘ ܒܫܶܡܫܳܐ. ܘܚܳܙܶܐ ܐܽܘܪ̈ܚܳܬܳܐ ܕܟܽܠ ܒܢܰܝ̈ܢܳܫܳܐ. ܘܡܶܣܬܰܟܰܠ ܒܚܶܫܽܘܟܳܐ ܩܽܘܒܳܠܳܐ ܥܒܳܕܰܝ̈ܗܽܘܢ.
28 ܡܶܛܽܠ ܕܥܰܕܠܳܐ ܗܳܘܶܐ ܟܽܠܡܶܕܶܡ: ܓܠܶܐ ܗܽܘ ܩܕܳܡܰܘܗܝ. ܐܳܦ ܡܶܢ ܒܳܬܰܪ ܓܡܽܘܪܝܶܗ ܕܥܳܠܡܳܐ: ܗܽܘ ܕܳܐܶܢ ܠܶܗ: ܘܰܒܡܶܕܶܡ ܠܳܐ ܣܳܒܰܪ ܠܶܗ ܒܰܪܢܳܫܳܐ ܕܡܶܬܬܚܶܕ.
29 ܗܳܢܳܐ ܒܫܽܘ̈ܩܶܐ ܕܰܡܕܺܝܢܬܳܐ ܢܶܬܦܰܪܣܶܐ.
30 ܘܳܐܦ ܐܰܢ̱ܬܬܳܐ ܕܣܳܪܚܳܐ ܥܰܠ ܒܰܥܠܳܗ̇: ܘܰܡܩܺܝܡܳܐ ܝܳܪܬܳܐ ܡܶܢ ܐ̱ܚܪܺܢܳܐ.
31 ܚܕܳܐ ܕܟܰܕܒܰܬ ܒܢܳܡܽܘܣܳܐ ܕܰܐܠܳܗܳܐ. ܘܰܕܬܰܪܬܶܝܢ ܒܰܒܥܶܠ ܛܰܠܝܽܘܬܳܗ̇. ܘܕܰܬܠܳܬ ܒܙܳܢܝܽܘܬܳܐ ܕܓܰܘܪܳܐ. ܕܡܶܢ ܢܽܘܟܪܳܝܳܐ ܐܰܩܺܝܡܰܬ ܝܰܠܕܳܐ.
32 ܐܳܦ ܗܺܝ ܡܶܢ ܟܢܽܘܫܬܳܐ ܬܶܦܽܘܩ. ܘܥܰܠ ܝܰܠܕܶܝ̈ܗ̇ ܚܛܳܗܶܝ̈ܗ̇ ܢܶܬܕܰܟܪܽܘܢ.
33 ܠܳܐ ܢܰܪܡܽܘܢ ܒܢܶܝ̈ܗ̇ ܥܶܩܳܪܳܐ ܒܳܐܪܥܳܐ. ܘܣܰܘ̈ܟܶܝܗ̇ ܠܳܐ ܢܶܥ̈ܒܕܳܢ ܦܺܐܖ̈ܶܐ.
34 ܘܢܶܫܬܒܶܩ ܠܠܰܘܛܬܳܐ ܕܽܘܟܪܳܢܳܗ̇. ܘܚܰܘ̈ܒܶܝܗ̇ ܢܶܬܥܛܽܘܢ.
35 ܘܢܶܕܥܽܘܢ ܟܽܠܗܽܘܢ ܥܳܡܽܘܪ̈ܶܝܗ̇ ܕܰܐܪܥܳܐ: ܘܢܶܣܬܰܟܠܽܘܢ ܟܽܠ ܕܡܶܫܬܰܚܪܺܝܢ ܒܬܺܒܶܝܠ. ܕܠܰܝܬ ܕܛܳܒܳܐ ܡܶܢ ܕܶܚܠܶܬܗ ܕܰܐܠܳܗܳܐ. ܘܠܰܝܬ ܕܒܰܣܺܝܡ ܡܶܢ ܕܰܠܡܶܛܰܪ ܦܽܘܩܕܳܢܰܘ̈ܗܝ.