Jesus Sirach 22
The Book of Jesus Sirach
܀ ܝܫܘܥ ܒܪ ܐܣܝܪܐ ܟܒ ܀
1 ܐܰܝܟ ܟܺܐܦܳܐ ܨܚܰܢܬܳܐ ܕܪܰܡܝܳܐ ܒܫܽܘܩܳܐ: ܘܟܽܠ ܐ̱ܢܳܫ ܥܳܪܶܩ ܡܶܢ ܪܺܝܚܳܗ̇. ܗܳܟܰܢܳܐ ܐܺܝܬܰܘܗܝ ܣܰܟܠܳܐ. ܟܽܠܢܳܫ ܡܶܬܪܰܚܰܩ ܡܶܢܶܗ.
2 ܟܰܕ ܢܳܦܶܩ ܐ̱ܢܳܫ ܠܒܰܪ ܠܫܽܘܩܳܐ ܘܰܡܨܰܥܰܪ ܢܰܦܫܶܗ. ܘܟܽܠܡܰܢ ܕܚܳܙܶܐ ܠܶܗ ܡܛܰܪܰܦ ܐܺܝܕܰܘ̈ܗܝ.
3 ܒܶܗܬܬܰܐ ܗ̱ܘ ܠܰܐܒܳܐ: ܒܪܳܐ ܣܰܟܠܳܐ.
4 ܘܢܶܩܒܬܳܐ ܠܚܽܘܣܪܳܢܳܐ ܡܶܬܝܰܠܕܳܐ.
5 ܐܰܒܽܘܗ̇ ܘܶܐܡܳܗ̇ ܬܰܒܗܶܬ ܣܰܟܠܬܳܐ. ܘܡܶܢ ܬܖ̈ܰܝܗܽܘܢ ܗܺܝ ܬܶܨܛܰܥܪ.
6 ܐܰܝܟ ܙܡܳܪܳܐ ܒܶܝܬ ܒܳܟܶܐ: ܫܽܘܥܺܝܬܳܐ ܕܠܳܐ ܒܥܶܕܳܢܳܗ̇. ܘܡܰܪܕܽܘܬܳܐ ܘܝܽܘܠܦܳܢܳܐ: ܒܟܽܠܥܶܕܳܢ ܚܶܟܡܬܳܐ ܗ̱ܝ.
7 ܐܰܝܟ ܐ̱ܢܳܫ ܕܰܡܕܶܒܶܩ ܚܶܨ̈ܦܶܐ. ܗܳܟܰܢܳܐ ܡܰܢ ܕܡܰܠܶܦ ܠܣܰܟܠܳܐ.
8 ܘܰܐܝܟ ܐ̱ܢܳܫ ܕܰܡܥܺܝܪ ܕܰܡܟܳܐ ܡܶܢ ܫܶܢܬܳܐ ܥܰܡܺܝܩܬܳܐ.
9 ܘܰܐܝܟ ܐ̱ܢܳܫ ܕܳܐܟܶܠ ܠܰܚܡܳܐ ܟܰܕ ܠܳܐ ܟܦܶܢ: ܗܳܟܰܢܳܐ ܡܰܢ ܕܡܰܠܶܦ ܠܣܰܟܠܳܐ. ܘܡܳܐ ܕܰܓܡܰܪ ܡܶܠܰܝ̈ܟ ܐܳܡܰܪ ܠܳܟ. ܡܳܢܳܐ ܐܶܡܰܪܬ.
10 ܥܰܠ ܡܺܝܬܳܐ ܠܡܶܒܟܳܐ ܕܶܐܬܟܠܺܝ ܡܶܢ ܢܽܘܗܪܳܐ. ܘܥܰܠ ܣܰܟܠܳܐ ܕܶܐܬܟܠܺܝ ܡܶܢ ܚܶܟܡܬܳܐ.
11 ܠܰܝܬ ܠܡܶܒܟܳܐ ܥܰܠ ܡܺܝܬܳܐ ܕܡܶܬܬܢܺܝܚ.
12 ܒܺܝܫܺܝܢ ܐܶܢܽܘܢ ܓܶܝܪ ܡܶܢ ܡܰܘܬܳܐ ܚܰܝ̈ܶܐ ܒܺܝ̈ܫܶܐ. ܒܶܝܬ ܒܳܟܶܐ ܓܶܝܪ ܕܡܺܝܬܳܐ ܫܰܒܥܳܐ ܝܰܘ̈ܡܺܝܢ.
13 ܘܒܶܝܬ ܒܳܟܶܐ ܕܣܰܟܠܳܐ ܟܽܠ ܝܰܘ̈ܡܰܝ ܚܰܝܰܘ̈ܗܝ.
14 ܥܰܡ ܣܰܟܠܳܐ ܠܳܐ ܬܰܫܦܰܪ ܫܽܘ̈ܥܝܳܬܳܐ. ܘܥܰܡ ܚܙܺܝܪܳܐ ܠܳܐ ܬܺܐܙܰܠ ܒܽܐܘܪܚܳܐ.
15 ܐܰܪܚܶܩ ܡܶܢܶܗ: ܕܠܳܐ ܢܥܺܝܩ ܠܳܟ. ܘܠܳܐ ܢܛܰܢܦܳܟ ܟܰܕ ܗܽܘ ܡܶܬܢܰܦܰܨ.
16 ܐܰܪܚܶܩ ܡܶܢܶܗ: ܘܬܶܫܟܰܚ ܢܳܝܚܳܐ. ܘܠܳܐ ܢܰܠܐܶܝܟ ܒܣܽܘܓܳܐܐ ܕܫܽܘ̈ܥܝܳܬܶܗ.
17 ܡܶܢ ܐܰܒܳܪܳܐ ܓܶܝܪ ܣܰܓܺܝ ܝܰܩܺܝܪ. ܘܡܳܢܰܘ ܫܡܶܗ ܐܶܠܳܐ ܣܰܟܠܳܐ.
18 ܚܳܠܳܐ ܘܡܶܠܚܳܐ ܘܛܰܥܢܳܐ ܕܦܰܪܙܠܳܐ ܢܺܝܚ ܠܡܶܫܩܰܠ: ܡܶܢ ܕܰܠܡܶܥܡܰܪ ܥܰܡ ܓܰܒܪܳܐ ܣܰܟܠܳܐ.
19 ܐܰܝܟ ܥܪܰܩܬܳܐ ܕܩܰܝܣܳܐ ܕܰܐܣܺܝܪܳܐ ܒܶܐܣ̈ܶܐ ܕܙܳܘ̈ܝܳܬܳܐ ܕܒܰܝܬܳܐ. ܗܳܟܰܢܳܐ ܠܶܒܳܐ ܡܗܰܘܢܳܐ ܒܡܶܠܟܳܐ ܕܪܶܥܝܳܢܶܗ. ܘܟܽܠ ܕܶܚܠܳܐ ܠܳܐ ܬܙܺܝܥܺܝܘܗܝ.
20 ܠܶܒܳܐ ܫܰܪܺܝܪܳܐ ܒܡܰܚܫܰܒܬܳܐ ܕܪܶܥܝܳܢܶܗ ܐܰܝܟ ܨܶܒܬܳܐ ܕܰܓܠܺܝܦܳܐ ܥܰܠ ܐܶܣ̈ܶܐ ܡܨܰܒ̈ܬܳܬܳܐ.
21 ܨܪܳܪܳܐ ܙܥܽܘܪܳܐ ܥܰܠ ܟܺܐܦܳܐ ܕܪܳܡܳܐ. ܘܰܕܩܰܠܺܝܠ ܛܳܒ ܩܕܳܡ ܪܽܘܚܳܐ ܠܳܐ ܡܶܫܟܰܚ ܠܰܡܩܳܡ.
22 ܐܰܝܟ ܕܡܳܐܢܳܐ ܕܟܶܬܳܢܳܐ ܘܰܕܥܰܡܪܳܐ ܚܶܘܳܪܳܐ ܩܕܳܡ ܥܰܠܥܳܠܳܐ ܠܳܐ ܢܶܬܩܰܝܡܽܘܢ.
23 ܗܳܟܰܢܳܐ ܠܶܒܶܗ ܕܣܰܟܠܳܐ ܒܥܰܡܠܰܘ̈ܗܝ ܬܒܺܝܪ. ܘܰܩܕܳܡ ܥܳܩܬܳܐ ܠܳܐ ܡܶܫܟܰܚ ܠܰܡܩܳܡ.
24 ܡܚܽܘܬܳܐ ܕܥܰܝ̈ܢܶܐ ܡܰܚܬܳܐ ܕܶܡ̈ܥܶܐ. ܘܰܡܚܽܘܬܳܐ ܕܠܶܒܳܐ ܡܰܥܒܪܳܐ ܪܳܚܡܽܘܬܳܐ.
25 ܕܫܳܕܶܐ ܟܺܐܦܳܐ ܒܨܶܦܪܳܐ: ܡܰܦܪܰܚ ܠܳܗ̇. ܘܡܰܢ ܕܓܳܠܶܙ ܚܰܒܪܶܗ: ܡܰܥܒܰܪ ܪܳܚܡܽܘܬܶܗ.
26 ܥܰܠ ܪܳܚܡܳܟ ܠܳܐ ܬܶܫܬܰܚܠܰܦ. ܘܶܐܢ ܐܶܫܬܰܚܠܰܦܬ: ܠܳܐ ܬܶܣܒܰܪ ܕܺܐܝܬ ܠܳܟ ܥܰܡܶܗ ܪܳܚܡܽܘܬܳܐ. ܥܰܠ ܪܳܚܡܳܐ ܐܳܦܶܢ ܬܶܫܡܽܘܛ ܣܰܝܦܳܐ: ܠܳܐ ܬܰܘܚܶܠ. ܐܺܝܬ ܠܶܗ ܓܶܝܪ ܡܰܦܩܳܢܳܐ.
27 ܘܶܐܢ ܥܰܠ ܪܳܚܡܳܟ ܬܶܦܬܰܚ ܦܽܘܡܳܟ: ܠܳܐ ܬܶܕܚܰܠ. ܡܶܛܽܠ ܕܺܐܝܬ ܠܶܗ ܓܶܝܪ ܬܰܪܥܽܘܬܳܐ. ܒܰܪ ܚܶܣܕ̈ܶܐ ܡܰܢ ܕܓܳܠܶܐ ܐ̱ܪܳܙܳܐ. ܘܰܡܚܽܘܬܳܐ ܕܣܶܬܳܪܳܐ ܡܰܥܒܪܳܐ ܪܳܚܡܽܘܬܳܐ.
28 ܣܡܽܘܟ ܚܰܒܪܳܟ ܒܡܶܣܟܺܢܽܘܬܶܗ. ܕܳܐܦ ܒܛܳܒ̈ܳܬܶܗ ܬܶܫܬܰܘܬܰܦ.
29 ܒܥܶܕܳܢ ܥܳܩܬܳܐ ܗܘܺܝ ܠܶܗ ܚܰܒܪܳܐ. ܕܳܐܦ ܒܝܳܪܬܽܘܬܶܗ ܬܺܐܪܰܬ.
30 ܩܕܳܡ ܢܽܘܪܳܐ ܥܳܛܰܪ ܬܶܢܳܢܳܐ. ܘܰܩܕܳܡ ܐܳܫܶܕ ܕܡܳܐ ܨܰܥܪܳܐ.
31 ܐܶܢ ܐܶܬܡܰܣܟܰܢ ܪܳܚܡܳܟ: ܠܳܐ ܬܰܒܗܬܺܝܘܗܝ. ܘܡܶܢ ܩܕܳܡܰܘܗܝ ܠܳܐ ܬܶܬܛܰܫܶܐ. ܐܶܢ ܓܳܠܶܐ ܠܳܟ ܚܰܒܪܳܟ ܐ̱ܪܳܙܳܐ: ܠܳܐ ܬܰܦܩܺܝܘܗܝ.
32 ܕܠܳܐ ܟܽܠ ܕܢܶܫܡܥܳܟ ܢܶܙܕܗܰܪ ܡܶܢܳܟ: ܘܰܐܝܟ ܣܳܪܽܘܚܳܐ ܢܶܚܫܒܳܟ.
34 ܡܰܢ ܕܶܝܢ ܐܰܩܺܝܡ ܥܰܠ ܦܽܘܡ ܢܳܛܽܘܪܳܐ: ܘܥܰܠ ܣܶܦ̈ܘܳܬܝ ܚܳܬܡܳܐ ܕܺܐܝܩܳܪܳܐ. ܕܠܳܐ ܐܺܡܰܪ ܒܗܽܘܢ ܢܶܟܠܳܐ. ܘܠܶܫܳܢܝ ܠܳܐ ܢܰܘܒܕܰܢܝ.