Jesus Sirach 29
The Book of Jesus Sirach
܀ ܝܫܘܥ ܒܪ ܐܣܝܪܐ ܟܛ ܀
1 ܪܳܡܶܐ ܚܽܘ̈ܒܠܶܐ ܛܳܒ̈ܶܐ ܡܰܢ ܕܡܰܘܙܶܦ ܠܚܰܒܪܶܗ. ܘܕܳܐܚܶܕ ܒܺܐܝܕܳܐ: ܢܳܛܰܪ ܦܽܘܩܕܳܢܳܐ ܗܽܘ.
2 ܐܰܘܙܶܦ ܠܚܰܒܪܳܟ ܒܥܶܕܳܢܳܐ ܕܰܨܪܺܝܟܽܘܬܶܗ. ܘܶܐܬܟܶܠ ܚܰܒܪܳܟ.
3 ܘܰܒܥܶܕܳܢ ܙܰܒܢܳܐ ܐܰܫܰܪ ܡܶܠܬܳܟ. ܘܰܐܩܺܝܡ ܡܶܠܬܳܟ: ܘܶܐܬܩܰܝܰܡ ܥܰܡ ܚܰܒܪܳܟ. ܘܰܒܟܽܠܥܶܕܳܢ ܬܶܫܟܰܚ ܨܶܒܝܳܢܳܟ ܡܶܢܶܗ.
4 ܣܰܓܺܝ̈ܐܶܐ ܓܶܝܪ ܝܳܙܽܘ̈ܦܶܐ ܕܰܒܥܰܘ ܝܺܙܳܦܬܳܐ ܘܰܐܗܰܪܘ ܠܡܰܘܙܦܳܢܰܝ̈ܗܽܘܢ.
5 ܒܥܶܕܳܢܳܐ ܓܶܝܪ ܕܝܳܙܶܦ: ܢܳܫܶܩ ܐܺܝܕܶܗ ܕܡܰܘܙܦܳܢܳܐ. ܘܥܰܠ ܢܶܟܣ̈ܶܐ ܕܚܰܒܪܶܗ ܡܪܺܝܡ ܩܳܠܶܗ.
6 ܘܰܒܥܶܕܳܢܳܐ ܕܡܰܝܬܶܐ ܝܺܙܳܦܬܳܐ: ܡܦܺܝܚ ܢܰܦܫܶܗ. ܘܰܠܙܰܒܢܳܐ ܣܰܓܺܝܐܳܐ ܝܳܗܶܒ ܠܳܗ̇.
7 ܕܶܐܢ ܢܶܫܟܰܚ: ܢܶܬܦܪܰܥ ܦܶܠܓܳܐ. ܘܚܳܫܶܒ ܠܳܗ̇ ܐܰܝܟ ܕܡܶܫܟܳܚܽܘ ܐܶܫܟܚܶܗ̇. ܘܣܳܠ̈ܩܳܢ ܐܺܝܕܰܘ̈ܗܝ ܡܶܢ ܢܶܟܣܰܘ̈ܗܝ ܣܪܺܝܩܳܐܺܝܬ.
8 ܘܩܳܢܶܐ ܠܶܗ ܣܳܢܳܐܐ: ܘܶܐܫܽܘܦ ܕܶܝܢ ܡܰܓܳܢ.
9 ܡܰܨ̈ܘܳܬܳܐ ܘܨܽܘܚ̈ܝܳܬܳܐ ܦܰܪܰܥ ܠܶܗ. ܘܰܚܠܳܦ ܐܺܝܩܳܪܳܐ ܨܰܥܪܳܐ.
10 ܣܰܓܺܝ̈ܐܶܐ ܕܠܳܐ ܗܘܳܐ ܡܶܢ ܒܺܝܫܽܘܬܳܐ ܐܶܬܟܠܺܝܘ ܠܡܰܘܙܳܦܽܘ. ܐܶܠܳܐ ܡܶܛܽܠ ܕܕܳܚܠܺܝܢ ܡܶܢ ܗܶܪܬܳܐ ܣܪܺܝܩܬܳܐ.
11 ܒܪܰܡ ܥܰܡ ܡܶܣܟܺܢܳܐ ܐܰܓܰܪ ܪܽܘܚܳܟ ܥܰܡܶܗ.
12 ܘܰܐܝܟ ܕܰܠܡܶܛܰܪ ܦܽܘܩܕܳܢܳܐ ܐܰܪܘܰܚܳܝܗܝ. ܘܶܐܢ ܢܶܗܘܶܐ ܚܽܘܣܪܳܢܳܐ: ܠܳܐ ܬܰܝܬܶܐ ܥܰܠ ܒܳܠܳܟ.
13 ܐܰܘܒܶܕ ܟܶܣܦܳܟ ܥܰܠ ܐܰܚܽܘܟ ܘܥܰܠ ܚܰܒܪܳܟ. ܘܠܳܐ ܬܣܺܝܡܺܝܘܗܝ ܬܚܶܝܬ ܟܺܐܦܳܐ ܘܶܐܣܬܳܐ.
14 ܣܺܝܡ ܠܳܟ ܣܺܝܡܬܳܐ ܒܙܰܕܺܝܩܽܘܬܳܐ ܘܰܒܚܽܘܒܳܐ. ܘܗܺܝ ܛܳܒܳܐ ܠܳܟ ܡܶܢ ܟܽܠ ܡܳܐ ܕܺܐܝܬ ܠܳܟ.
15 ܨܽܘܪ ܙܶܕܩܬܳܐ: ܘܣܺܝܡ ܒܶܝܬ ܓܰܙܳܟ.
16 ܘܗܺܝ ܬܶܦܪܩܳܟ ܡܶܢ ܟܽܠ ܕܒܺܝܫ: ܣܰܟܪܳܐ ܕܬܽܘܩܦܳܐ ܘܪܽܘܚܡܳܐ ܘܫܽܘܪܳܐ ܠܰܩܪܳܒܳܐ. ܘܠܽܘܩܒܰܠ ܣܰܓܺܝ̈ܐܶܐ ܗܺܝ ܬܢܺܝܚܳܟ.
17 ܓܰܒܪܳܐ ܛܳܒܳܐ ܡܰܢ ܕܥܳܪܶܒ ܠܚܰܒܪܶܗ. ܘܡܰܢ ܕܡܰܘܒܶܕ ܒܶܗܬܬܳܐ: ܥܳܪܶܩ ܡܶܢ ܥܰܪܒܶܗ.
18 ܛܰܝܒܽܘܬܳܐ ܕܥܰܪܳܒܳܐ ܢܶܫܒܽܘܩ ܥܰܘܳܠܳܐ. ܘܰܕܫܳܒܶܩ ܠܒܳܪܝܶܗ. ܫܳܒܶܩ ܦܳܪܩܶܗ.
19 ܥܰܪܳܒܽܘܬܳܐ ܠܣܰܓܺܝ̈ܐܶܐ ܐܰܘܒܕܰܬ. ܘܰܫܒܰܩܘ ܢܶܟܣܰܝ̈ܗܽܘܢ ܐܰܝܟ ܓܰܠ̈ܠܶܐ ܕܝܰܡܳܐ.
20 ܐܳܦ ܠܡܳܖ̈ܰܝ ܢܶܟ̈ܣܶܐ ܣܰܪܩܰܬ. ܘܶܐܙܰܠܘ ܠܥܰܡܳܐ ܢܽܘܟܪܳܝܳܐ.
21 ܚܰܛܳܝܳܐ ܕܥܳܒܰܪ ܥܰܠ ܦܽܘܩܕܳܢܰܘ̈ܗܝ ܕܡܳܪܝܳܐ: ܒܥܰܪܳܒܽܘܬܳܐ ܢܶܦܶܠ. ܘܰܕܪܳܕܶܦ ܠܰܡܩܰܒܳܠܽܘ ܥܠܰܘܗܝ ܚܛܳܗ̈ܶܐ: ܢܶܦܶܠ ܒܕܺܝ̈ܢܶܝܗ̇. ܚܛܳܗ̈ܶܐ ܣܰܓܺܝ̈ܐܶܐ ܡܰܝܬܝܳܐ ܥܰܪܳܒܽܘܬܳܐ. ܕܡܶܬܶܐܠܶܨ ܡܰܓܰܢ: ܡܶܫܟܰܚ ܕܺܝܢܳܐ.
22 ܥܪܽܘܒ ܠܚܰܒܪܳܟ: ܐܰܟܡܳܐ ܕܰܡܨܶܐ ܐܰܢ̱ܬ ܒܚܰܝܠܳܐ. ܘܦܰܨܳܐ ܢܰܦܫܳܟ ܡܶܢ ܐܰܥܦܳܐ.
23 ܪܺܝܫ ܚܰܝܰܘ̈ܗܝ ܕܒܰܪܢܳܫܳܐ: ܠܰܚܡܳܐ ܘܡܰܝ̈ܳܐ ܘܬܰܟܣܺܝܬܳܐ. ܘܒܰܝܬܳܐ ܡܟܰܣܶܐ ܨܰܥܪܳܐ.
24 ܛܳܒܺܝܢ ܐܶܢܽܘܢ ܓܶܝܪ ܚܰܝܰܘ̈ܗܝ ܕܡܶܣܟܺܢܳܐ ܬܚܶܝܬ ܛܶܠܳܠܳܐ ܕܩܳܪ̈ܝܳܬܶܗ: ܡܶܢ ܥܽܘܬܪܳܐ ܣܰܓܺܝܐܳܐ ܒܰܐܟܣܢܳܝܽܘܬܳܐ.
25 ܥܰܡ ܣܰܓܺܝ ܘܥܰܡ ܙܥܽܘܪ ܐ̱ܢܳܫ ܠܳܐ ܝܳܕܰܥ. ܘܡܳܢܳܐ ܥܳܒܶܕ ܒܓܰܘ ܒܰܝܬܶܗ: ܐ̱ܢܳܫ ܠܳܐ ܚܳܙܶܐ ܠܶܗ.
26 ܚܰܝ̈ܶܐ ܒܺܝ̈ܫܶܐ ܡܶܢ ܒܰܝ ܠܒܰܝ. ܘܥܰܠ ܕܺܝ̈ܢܶܐ ܪܰܘܪ̈ܒܶܐ ܠܳܐ ܐܶܫܟܰܚ ܠܡܶܦܬܰܚ ܦܽܘܡܶܗ.
27 ܐܰܟܣܢܳܝܳܐ ܐܰܢ̱ܬ. ܘܫܳܬܶܐ ܣܰܥܪܳܐ. ܘܒܳܬܰܪ ܗܳܠܶܝܢ ܬܶܫܡܰܥ ܡܰܪܺܝܪ̈ܳܬܳܐ.
28 ܐܰܟܣܢܳܝܳܐ ܐܰܢ̱ܬ: ܥܒܰܪ ܬܰܩܶܢ ܦܳܬܽܘܪܳܐ. ܘܰܠܥܰܣ ܡܶܕܶܡ ܕܺܐܝܬ ܩܕܳܡܰܝܟ.
29 ܦܽܘܩ ܡܶܢ ܩܕܳܡ ܐܺܝܩܳܪܳܐ. ܐܳܪܚܳܐ ܓܶܝܪ ܥܪܰܨ ܥܠܰܝ.
30 ܝܰܩܺܝܪ̈ܳܢ ܗܳܠܶܝܢ ܠܓܰܒܪܳܐ ܚܰܟܺܝܡܳܐ. ܟܳܐܬܳܐ ܘܪܶܒܺܝܬܳܐ ܘܺܝܙܳܦܬܳܐ ܘܡܰܘܙܦܳܢܳܐ. ܛܳܒ ܛܳܒ ܗܰܒ ܠܡܶܣܟܺܢܳܐ. ܘܡܶܢ ܡܳܐ ܕܒܺܐܝܕܳܟ ܐܰܘܟܶܠܳܝܗܝ. ܘܶܐܢ ܥܰܪܛܳܠܳܝ ܗܽܘ: ܐܰܠܒܶܫܳܝܗܝ. ܡܶܛܽܠ ܕܒܶܣܪܳܟ ܐܰܢ̱ܬ ܡܟܰܣܶܐ. ܘܠܰܐܠܳܗܳܐ ܗܽܘ ܡܰܘܙܶܦ ܐܰܢ̱ܬ. ܘܗܽܘ ܦܳܪܰܥ ܠܳܟ ܚܰܕ ܒܫܰܒܥܳܐ.