Jesus Sirach 28
The Book of Jesus Sirach
܀ ܝܫܘܥ ܒܪ ܐܣܝܪܐ ܟܚ ܀
1 ܘܓܰܒܪܳܐ ܢܰܟܽܘܠܬܳܢܳܐ ܡܰܘܒܶܕ ܐܽܘܪܚܶܗ. ܘܦܽܘܪܥܳܢܳܐ ܡܶܢ ܩܕܳܡ ܐܰܠܳܗܳܐ ܢܶܫܟܰܚ. ܡܶܛܽܠ ܕܟܽܠ ܚܛܳܗܰܘ̈ܗܝ: ܡܶܛܰܪ ܢܛܺܝܪܺܝܢ ܠܶܗ.
2 ܫܒܽܘܩ ܡܳܐ ܕܰܒܠܶܒܳܟ ܘܒܳܬܰܪܟܶܢ ܨܰܠܳܐ. ܘܟܽܠ ܚܛܳܗܰܝ̈ܟ ܢܶܫܬܰܒܩܽܘܢ ܠܳܟ.
3 ܒܰܪܢܳܫܳܐ ܕܰܠܒܰܪܢܳܫܳܐ ܢܳܛܰܪ ܪܽܘܓܙܳܐ: ܡܶܢ ܩܕܳܡ ܐܰܠܳܗܳܐ ܡܳܢܳܐ ܒܳܥܶܐ ܐܳܣܝܽܘܬܳܐ.
4 ܗܽܘ ܕܒܰܪܢܳܫܳܐ ܗܽܘ ܠܳܐ ܒܳܥܶܐ ܠܡܶܫܒܰܩ ܠܶܗ: ܡܰܢܽܘ ܫܳܒܶܩ ܠܶܗ ܚܛܳܗܰܘ̈ܗܝ.
5 ܐܶܬܕܰܟܪ ܡܰܘܬܳܐ ܘܰܐܥܒܰܪ ܒܥܶܠܕܒܳܒܽܘܬܳܐ.
6 ܘܠܰܫܝܽܘܠ ܘܠܰܐܒܕܳܢܳܐ: ܘܶܐܬܟܰܠܝܝ ܡܶܢ ܕܰܠܡܶܚܛܳܐ.
7 ܐܶܬܕܰܟܪ ܦܽܘܩܕܳܢܳܐ: ܘܠܳܐ ܬܶܣܢܶܐ ܚܰܒܪܳܟ ܩܕܳܡ ܐܰܠܳܗܳܐ.
8 ܘܗܰܒܠܶܗ ܡܶܕܶܡ ܕܚܰܣܺܝܪ ܠܶܗ.
9 ܐܰܪܚܶܩ ܡܶܢ ܗܶܪܬܳܐ. ܘܢܶܬܪܰܚܩܽܘܢ ܡܶܢܳܟ ܚܛܳܗ̈ܶܐ.
10 ܒܰܪܢܳܫܳܐ ܓܶܝܪ ܥܰܘܳܠܳܐ ܕܪܳܚܶܡ ܕܺܝܢܳܐ: ܒܥܶܠܕܒܳܒܽܘܬܳܐ ܪܳܡܶܐ ܒܶܝܬ ܐܰܚ̈ܶܐ.
11 ܟܽܠ ܕܬܰܪܡܶܐ ܒܢܽܘܪܳܐ: ܢܺܐܩܰܕ. ܘܰܟܡܳܐ ܕܬܰܣܓܶܐ ܒܕܺܝܢܳܐ: ܡܶܣܓܳܐ ܣܳܓܶܐ. ܐܰܝܟ ܬܶܫܒܽܘܚܬܳܐ ܕܺܐܝܕܰܝ̈ܳܐ ܕܐ̱ܢܳܫ̈ܳܐ: ܗܳܟܰܢܳܐ ܪܽܘܓܙܶܗ. ܘܰܐܝܟ ܣܽܘܓܰܐܬ ܢܶܟܣܰܘ̈ܗܝ: ܗܳܟܰܢܳܐ ܪܳܡܶܗ ܪܽܘܚܶܗ.
12 ܨܰܪܘܳܐ ܘܥܰܝܛܪܳܢܳܐ. ܡܰܘܩܕܺܝܢ ܢܽܘܪܳܐ. ܘܕܺܝ̈ܢܶܐ ܣܰܓܺܝ̈ܐܶܐ ܐܳܫܕܺܝܢ ܕܡܳܐ.
13 ܐܶܢ ܬܶܦܽܘܚ ܒܢܽܘܪܳܐ ܬܺܐܩܰܕ. ܘܶܐܢ ܬܪܽܘܣ ܥܠܶܝܗ̇ ܡܰܝ̈ܳܐ ܬܶܕܥܰܟ. ܘܬܰܪ̈ܬܰܝܗܶܝܢ ܡܶܢܳܟ ܐܶܢܶܝܢ.
14 ܘܳܐܦ ܠܶܫܳܢܳܐ ܬܠܺܝܬܳܝܳܐ ܠܺܝܛ ܢܶܗܘܶܐ. ܕܩܶܛ̈ܠܶܐ ܣܰܓܺܝ̈ܐܶܐ ܐܰܪܡܺܝ.
15 ܠܶܫܳܢܳܐ ܬܠܺܝܬܳܝܳܐ ܠܣܰܓܺܝ̈ܐܶܐ ܒܫܶܒܝܳܐ ܐܶܦܶܩ. ܘܒܰܕܰܪ ܐܶܢܽܘܢ ܡܶܢ ܥܰܡܳܐ ܠܥܰܡܳܐ.
16 ܘܳܐܦ ܠܐ̱ܢܳܫ̈ܳܐ ܡܝܰܩܖ̈ܶܐ ܕܰܡܕܺܝ̈ܢܳܬܳܐ ܡܶܢ ܒܳܬܰܝ̈ܗܽܘܢ ܛܪܰܕ. ܘܒ̈ܳܬܶܐ ܕܡܰܠ̈ܟܶܐ ܡܰܚܪܳܒܽܘ ܐܰܚܪܶܒ.
17 ܠܶܫܳܢܳܐ ܬܠܺܝܬܳܝܳܐ ܠܣܰܓܺܝ̈ܐܶܐ ܒܫܶܒܝܳܐ ܐܰܦܶܩ. ܘܰܐܪܚܶܩ ܐܶܢܽܘܢ ܡܶܢ ܢܶܟܣܰܝ̈ܗܽܘܢ.
18 ܡܚܽܘܬܳܐ ܕܚܽܘܛܪܳܐ: ܥܳܒܕܳܐ ܫܽܘܚܢܳܐ. ܘܰܡܚܽܘܬܳܐ ܕܠܶܫܳܢܳܐ: ܬܳܒܪܳܐ ܓܰܪ̈ܡܶܐ.
19 ܣܰܓܺܝܐܺܝܢ ܐܶܢܽܘܢ ܩܛܺܝ̈ܠܰܝ ܚܰܪܒܳܐ. ܒܪܰܡ ܠܳܐ ܐܰܝܟ ܩܛܺܝ̈ܠܰܝ ܠܶܫܳܢܳܐ.
20 ܛܽܘܒܰܘܗܝ ܠܓܰܒܪܳܐ ܕܶܐܬܦܰܨܶܝ ܡܶܢܶܗ: ܘܰܒܚܶܡܬܶܗ ܠܳܐ ܐܶܬܚܰܠܰܛ. ܛܽܘܒܰܘܗܝ ܠܓܰܒܪܳܐ ܕܠܳܐ ܢܓܰܕ ܒܢܺܝܪܶܗ. ܘܒܰܐܣܽܘܖ̈ܰܘܗܝ ܠܳܐ ܐܶܬܶܐܣܰܪ.
21 ܡܶܛܽܠ ܕܢܺܝܪܳܐ ܩܰܫܝܳܐ ܢܺܝܪܶܗ. ܘܰܐܣܽܘܖ̈ܰܘܗܝ ܐܰܣܽܘܖ̈ܶܐ ܐܶܢܽܘܢ ܕܦܰܪܙܠܳܐ.
22 ܡܰܘܬܳܐ ܒܺܝܫܳܐ ܡܰܘܬܶܗ. ܘܰܢܝܳܚܳܐ ܐܺܝܬ ܒܰܫܝܽܘܠ ܛܳܒ ܡܶܢ ܕܰܠܘܳܬܶܗ.
23 ܠܳܐ ܬܶܐܩܰܕ ܒܙܰܕܺܝ̈ܩܶܐ. ܘܙܰܠܺܝ̈ܩܶܐ ܕܢܽܘܪܳܐ ܠܳܐ ܢܰܘܩܕܽܘܢܳܟ.
24 ܟܽܠ ܕܫܳܒܩܺܝܢ ܕܚܶܠܬܶܗ ܕܰܐܠܳܗܳܐ: ܒܳܗ̇ ܢܶܦܠܽܘܢ. ܘܰܒܗܽܘܢ ܬܺܐܩܰܕ ܢܽܘܪܳܐ: ܘܠܳܐ ܬܶܕܥܰܟ. ܘܬܶܫܠܰܛ ܒܗܽܘܢ ܐܰܝܟ ܐܰܪܝܳܐ. ܘܰܐܝܟ ܢܶܡܪܳܐ ܬܒܰܣܒܶܣ ܐܶܢܽܘܢ.
25 ܐܰܝܟܰܢܳܐ ܓܶܝܪ ܕܣܳܐܶܓ ܐܰܢ̱ܬ ܟܰܪܡܳܟ ܒܗܰܛ̈ܛܶܐ: ܗܳܟܰܢܳܐ ܐܳܦ ܠܦܽܘܡܳܟ ܥܒܶܕ ܬܰܪ̈ܥܶܐ ܘܣܽܘܟܖ̈ܶܐ.
26 ܠܟܶܣܦܳܟ ܘܰܠܕܰܗܒܳܟ ܥܳܒܶܕ ܐܰܢ̱ܬ ܚܳܬܡܳܐ. ܘܰܠܡܶܠܬܳܟ ܥܒܶܕ ܡܰܬܩܳܠܳܐ.
27 ܐܶܙܕܰܗܪ ܕܰܠܡܳܐ ܬܶܦܶܠ: ܕܠܳܐ ܬܶܬܪܡܶܐ ܩܕܳܡ ܣܳܢܐܳܟ.