Jesus Sirach 46
The Book of Jesus Sirach
܀ ܝܫܘܥ ܒܪ ܐܣܝܪܐ ܡܘ ܀
1 ܓܰܒܪܳܐ ܒܰܪ ܚܰܝܠܳܐ ܝܶܫܽܘܥ ܒܰܪܢܳܘܢ. ܒܰܢܒܺܝܽܘܬܳܐ ܐܶܬܢܛܰܪ ܠܡܶܗܘܳܐ ܐܰܝܟ ܡܽܘܫܶܐ ܪܰܒܳܐ.
2 ܠܡܰܝܬܳܝܽܘ ܒܺܐܝܕܶܗ ܦܽܘܪܩܳܢܳܐ ܠܪ̈ܳܚܡܰܘܗܝ: ܘܰܠܡܶܬܦܪܳܥܽܘ ܡܶܢ ܓܰܒܖ̈ܶܐ ܣܳܢ̈ܶܐܐ: ܘܰܠܡܰܘܪܳܬܽܘ ܠܰܒܢܰܝ̈ ܝܺܣܪܳܐܶܝܠ ܐܰܪܥܳܐ ܕܡܽܘܠܟܳܢܳܐ.
3 ܡܳܐ ܝܳܐܶܐ ܠܶܗ ܟܰܕ ܡܪܺܝܡ ܒܢܰܝܙܟܳܐ ܕܒܺܐܝܕܶܗ: ܘܟܰܕ ܡܢܺܝܦ ܥܰܠ ܡܕܺܝ̈ܢܳܬܳܐ.
4 ܡܰܢܽܘ ܡܶܫܟܰܚ ܠܰܡܩܳܡ ܩܕܳܡܰܘܗܝ. ܡܶܛܽܠ ܕܰܩܪܳܒܶܗ ܕܡܳܪܝܳܐ ܗܽܘ ܥܒܰܕ.
5 ܡܶܛܽܠ ܕܒܺܐܝܕܶܗ ܩܳܡ ܫܶܡܫܳܐ: ܘܰܗܘܳܐ ܝܰܘܡܳܐ ܚܰܕ: ܬܪܶܝܢ ܝܰܘ̈ܡܺܝܢ.
6 ܡܶܛܽܠ ܕܨܰܠܺܝ ܩܕܳܡ ܡܳܪܝܳܐ: ܘܰܥܢܳܝܗܝ ܘܝܰܗܒ ܒܺܐܝܕܶܗ ܬܽܘܩܦܳܐ. ܘܰܥܢܳܝܗܝ ܒܟܺܐܦ̈ܶܐ ܕܒܰܪܕܳܐ. ܘܟܶܒܪܺܝܬܳܐ ܡܶܢ ܫܡܰܝܳܐ ܐܰܚܶܬ.
7 ܘܰܚܒܰܛ ܥܰܠ ܥܰܡܳܐ ܣܳܢܳܐܐ: ܘܰܐܘܒܶܕ ܠܟܽܠܗܽܘܢ.
8 ܘܺܝܕܰܥܘ ܟܽܠܗܽܘܢ ܥܰܡ̈ܡܶܐ ܚܰܪ̈ܡܶܐ: ܕܰܐܠܳܗܳܐ ܗܽܘ ܐܰܩܪܶܒ ܥܰܡܗܽܘܢ. ܘܳܐܦ ܗܽܘ ܫܠܶܡ ܒܳܬܰܪ ܐܰܠܳܗܳܐ.
9 ܘܰܒܝܰܘ̈ܡܰܝ ܡܽܘܫܶܐ ܥܒܰܕ ܛܰܝܒܽܘܬܳܐ. ܗܽܘ ܘܟܳܠܳܒ ܒܰܪ ܝܽܘܦܰܢܝܳܐ. ܠܰܡܩܳܡ ܒܬܽܘܪܰܥܬܳܐ ܕܥܰܡܳܐ ܠܡܰܗܦܳܟܽܘ ܟܢܽܘܫܬܳܐ. ܘܠܰܡܒܰܛܳܠܽܘ ܛܶܒܳܐ ܒܺܝܫܳܐ ܡܶܢ ܐܰܪܥܳܐ ܕܡܽܘܠܟܳܢܳܐ.
10 ܘܗܶܢܽܘܢ ܒܰܠܚܽܘܕܰܝܗܽܘܢ ܐܶܬܦܰܨܺܝܘ ܡܶܢ ܫܶܬܡܳܐܐ ܐܰܠܦܺܝ̈ܢ. ܠܡܰܥܳܠܽܘ ܐܶܢܽܘܢ ܠܝܳܪܬܽܘܬܗܽܘܢ: ܠܰܐܪܥܳܐ ܕܡܰܪܕܝܳܐ ܚܰܠܒܳܐ ܘܕܶܒܫܳܐ.
11 ܘܝܰܗܒ ܠܟܳܠܳܒ ܬܽܘܩܦܳܐ. ܘܰܥܕܰܡܳܐ ܠܣܰܝܒܽܘܬܶܗ ܐܶܬܩܰܝܰܡ ܥܰܡܶܗ: ܠܰܡܫܰܠܳܛܽܘܬܶܗ ܥܰܠ ܬܽܘܩܦܳܗ̇ ܕܰܐܪܥܳܐ.
12 ܘܳܐܦ ܙܰܪܥܶܗ ܢܺܐܪܰܬ ܝܽܘܪܬܳܢܳܐ. ܡܶܛܽܠ ܕܢܶܕܰܥ ܙܰܪܥܶܗ ܕܝܰܥܩܽܘܒ ܕܫܰܠܶܡ ܢܳܡܽܘܣܶܗ ܕܰܐܠܳܗܳܐ.
13 ܘܕܺܝ̈ܢܶܐ: ܓܒܰܪ ܓܒܰܪ ܒܰܫܡܶܗ. ܟܽܠ ܕܠܳܐ ܛܥܳܐ ܠܶܒܗܽܘܢ: ܘܠܳܐ ܗܦܰܟܘ ܡܶܢ ܢܳܡܽܘܣܶܗ ܕܰܐܠܳܗܳܐ.
14 ܢܶܗܘܶܐ ܕܽܘܟܪܳܢܗܽܘܢ ܠܒܽܘܪܟܬܳܐ. ܘܢܰܙܗܪܽܘܢ ܓܰܪ̈ܡܰܝܗܽܘܢ ܐܰܝܟ ܫܽܘ̈ܫܰܢܶܐ.
15 ܘܢܶܫܒܩܽܘܢ ܫܶܡܗܽܘܢ ܛܳܒܳܐ ܠܰܒܢܰܝ̈ܗܽܘܢ. ܘܰܠܟܽܠܶܗ ܥܰܡܳܐ ܬܶܫܒ̈ܚܳܬܗܽܘܢ.
16 ܘܰܪܚܺܝܡ ܠܒܳܪܝܶܗ ܡܶܢ ܐܶܫܬܐܶܠ ܡܶܢ ܟܰܪܣܳܐ ܕܶܐܡܶܗ: ܢܙܺܝܪܳܐ ܒܰܢܒܺܝܽܘܬܳܐ ܫܡܽܘܐܶܝܠ: ܕܰܝܳܢܳܐ ܘܟܳܗܢܳܐ. ܕܰܒܡܶܠܬܶܗ ܬܶܩܢܳܬ ܛܰܝܒܽܘܬܳܐ. ܘܰܡܫܰܚ ܫܰܠܺܝܛܳܢ̈ܶܐ ܘܡܰܠܟ̈ܶܐ ܠܥܰܡܳܐ.
17 ܒܢܳܡܽܘܣܶܗ ܦܩܰܕ ܟܢܽܘ̈ܫܳܬܳܐ. ܐܰܝܟܰܢܳܐ ܕܦܰܩܶܕ ܡܳܪܶܗ ܕܝܰܥܩܽܘܒ.
18 ܘܳܐܦ ܗܽܘ ܬܒܰܪ ܣܳܢ̈ܶܐܐ ܡܶܢ ܟܽܠܗܽܘܢ ܚܕܳܖ̈ܰܘܗܝ. ܒܡܰܣܩܶܗ ܐܶܡܪܳܐ ܕܚܰܠܒܳܐ.
19 ܘܰܪܥܶܡ ܡܶܢ ܫܡܰܝܳܐ ܡܳܪܝܳܐ. ܘܒܰܦܩܳܥܳܐ ܚܰܣܺܝܢܳܐ ܐܰܫܡܰܥ ܩܳܠܶܗ.
20 ܬܒܰܪ ܟܽܠܗܽܘܢ ܫܰܠܺܝܛܳܢ̈ܶܐ ܕܨܽܘܪ. ܘܰܐܘܒܶܕ ܟܽܠܗܽܘܢ ܛܪ̈ܽܘܢܶܐ ܕܰܦܠܶܫܬܳܝ̈ܶܐ.
21 ܘܰܒܙܰܒܢܳܐ ܕܡܶܬܬܢܺܝܚ ܥܰܠ ܥܰܪܣܶܗ: ܐܰܣܗܶܕ ܩܕܳܡ ܡܳܪܝܳܐ ܘܰܩܕܳܡ ܡܫܺܝܚܶܗ: ܕܫܽܘܚܕܳܐ ܘܩܽܘܪ̈ܒܳܢܶܐ ܡܶܢ ܐ̱ܢܳܫ ܠܳܐ ܢܣܰܒ. ܘܟܽܠ ܒܣܰܪ ܠܳܐ ܐܰܣܗܶܕ ܥܠܰܘܗܝ.
22 ܘܡܶܢ ܒܳܬܰܪ ܡܰܘܬܶܗ ܐܶܫܬܰܐܠ. ܘܚܰܘܺܝ ܠܡܰܠܟܳܐ ܐܽܘܪܚܶܗ. ܘܰܐܪܺܝܡ ܡܶܢ ܐܰܪܥܳܐ ܩܳܠܶܗ ܒܰܢܒܺܝܽܘܬܳܐ ܠܰܡܒܰܛܳܠܽܘ ܚܛܳܗ̈ܶܐ.