Jesus Sirach 45
The Book of Jesus Sirach
܀ ܝܫܘܥ ܒܪ ܐܣܝܪܐ ܡܗ ܀
1 ܡܽܘܫܶܐ ܕܽܘܟܪܳܢܶܗ ܠܒܽܘܪܟܬܳܐ.
2 ܘܪܰܒܝܶܗ ܒܒܽܘܪ̈ܟܳܬܳܐ. ܘܬܰܩܦܶܗ ܠܕܰܚܠܽܘ̈ܠܺܝܢ.
3 ܘܰܐܩܺܝܡ ܩܕܳܡ ܡܰܠܟܳܐ. ܘܦܰܩܕܶܗ ܥܰܠ ܥܰܡܳܐ. ܘܚܰܘܝܶܗ ܐܺܝܩܳܪܶܗ. ܘܰܐܫܡܥܶܗ ܩܳܠܶܗ.
4 ܒܗܰܝܡܳܢܽܘܬܳܐ ܘܰܒܡܰܟܺܝܟܽܘܬܳܐ ܓܒܳܝܗܝ ܡܶܢ ܟܽܠܗܽܘܢ ܒܢܰܝ̈ܢܳܫܳܐ.
5 ܘܩܰܪܒܶܗ ܠܥܰܪܦܶܠܶܗ.
6 ܘܰܣܕܰܪ ܩܕܳܡܰܘܗܝ ܢܳܡܽܘܣܳܐ ܕܚܰܝ̈ܶܐ ܘܒܽܘܪ̈ܟܳܬܳܐ. ܠܡܰܠܳܦܽܘ ܠܰܕܒܶܝܬ ܝܺܣܪܳܐܶܝܠ ܢܳܡܽܘܣܰܘ̈ܗܝ ܘܰܩܝܳܡܰܘ̈ܗܝ ܘܕܺܝܢܰܘ̈ܗܝ ܠܝܰܥܩܽܘܒ.
7 ܘܰܐܪܺܝܡ ܐܰܟܘܳܬܶܗ ܩܰܕܺܝܫܳܐ ܠܰܐܗܪܽܘܢ ܡܶܢ ܫܰܒܛܳܐ ܕܠܶܘܺܝ.
8 ܘܣܳܡܶܗ ܠܰܫܪܳܪܳܐ ܕܥܰܡܳܐ. ܘܝܰܗܒ ܥܠܰܘܗܝ ܡܶܢ ܐܺܝܩܳܪܶܗ ܘܫܽܘܒܚܶܗ.
9 ܘܰܓܒܳܝܗܝ ܒܪܰܘܡܳܐ ܐܺܝܩܳܪܶܗ. ܘܰܐܠܒܫܶܗ ܢܰܚ̈ܬܶܐ ܕܬܶܟܠܬܳܐ.
10 ܘܝܰܩܪܶܗ ܒܡܳܐܢ̈ܶܐ ܕܬܽܘܩܦܳܐ.
11 ܘܣܳܡ ܥܠܰܘܗܝ ܐܺܝܕܶܗ ܡܽܘܫܶܐ. ܘܡܰܫܚܶܗ ܡܶܫܚܳܐ ܕܩܽܘܕܫܳܐ.
12 ܘܰܗܘܳܬ ܠܶܗ ܠܰܩܝܳܡܳܐ ܕܰܠܥܳܠܰܡ. ܘܰܠܙܰܪܥܶܗ ܐܰܝܟ ܝܰܘ̈ܡܳܬܳܐ ܕܰܫܡܰܝܳܐ. ܠܰܡܫܰܡܳܫܽܘ ܘܠܰܡܒܰܪܳܟܽܘ ܠܥܰܡܶܗ ܒܰܫܡܶܗ.
13 ܘܰܓܒܳܝܗܝ ܡܶܢ ܟܽܠܗܽܘܢ ܚܰܝ̈ܶܐ: ܠܰܡܩܰܪܳܒܽܘ ܥܠܰܘ̈ܳܬܳܐ ܘܕܶܒܚ̈ܶܐ ܘܒܶܣ̈ܡܶܐ: ܘܠܰܡܚܰܣܳܝܽܘ ܥܰܠ ܟܽܠܶܗ ܝܺܣܪܳܐܶܝܠ.
14 ܘܝܰܗܒ ܠܶܗ ܦܽܘ̈ܩܕܳܢܶܐ. ܘܰܐܫܠܛܶܗ ܒܰܩܝ̈ܳܡܶܐ ܘܕܺܝ̈ܢܶܐ.
15 ܘܶܐܬܚܪܺܝܘ ܥܰܡܶܗ ܢܽܘܟܪ̈ܳܝܶܐ. ܘܛܰܢܘ ܒܶܗ ܒܡܰܕܒܪܳܐ: ܐ̱ܢܳܫܰܝ̈ ܕܳܐܬܳܢ ܘܰܐܒܺܝܪܰܡ. ܘܰܟܢܽܘܫܬܳܐ ܕܩܽܘܪܰܚ ܒܬܽܘܩܦܳܐ.
16 ܘܰܚܙܳܐ ܐܰܠܳܗܳܐ ܘܰܪܓܶܙ. ܘܰܐܘܩܶܕ ܐܶܢܽܘܢ ܒܢܽܘܪܳܐ.
17 ܘܰܒܪܳܐ ܠܗܽܘܢ ܡܚܽܘܬܳܐ. ܘܰܐܣܺܝܦ ܐܶܢܽܘܢ ܒܬܽܘܩܦܳܐ ܕܪܽܘܓܙܶܗ.
18 ܘܣܳܡ ܥܰܠ ܐܰܗܪܽܘܢ ܐܺܝܩܳܪܳܐ.
19 ܘܝܰܗܒ ܠܗܽܘܢ ܝܽܘܪܬܳܢܶܗ. ܪ̈ܺܝܫܝܳܬܳܐ ܕܩܽܘܕܫܳܐ ܘܣܶܕܖ̈ܶܐ ܕܠܰܚܡܳܐ: ܠܶܗ ܘܰܠܙܰܪܥܶܗ.
20 ܒܰܠܚܽܘܕ ܒܰܐܪܥܗܽܘܢ ܠܳܐ ܝܺܪܶܬ ܝܽܘܪܬܳܢܳܐ. ܘܠܳܐ ܦܠܰܓ ܦܳܠܓܽܘܬܳܐ ܥܰܡܗܽܘܢ. ܡܶܛܽܠ ܕܡܳܪܝܳܐ ܡܢܳܬܶܗ ܘܝܳܪܬܽܘܬܶܗ: ܒܶܝܬ ܝܺܣܪܳܐܶܝܠ.
21 ܘܳܐܦ ܦܺܝܢܚܶܣ ܒܰܪ ܐܶܠܺܝܥܳܙܰܪ: ܒܓܰܢ̱ܒܳܪܽܘܬܶܗ ܢܣܰܒ ܬܠܳܬܳܐ ܐܺܝܩܳܪ̈ܺܝܢ: ܒܰܛܢܳܢܳܐ ܕܛܰܢ ܒܡܶܕܝܰܢܳܝܬܳܐ ܘܰܒܒܰܪ ܝܺܣܪܳܐܶܝܠ. ܘܰܕܩܳܡ ܒܬܽܘܪܰܥܬܳܐ ܕܥܰܡܶܗ: ܘܰܒܥܳܐ ܥܰܠ ܝܺܣܪܳܐܶܝܠ.
22 ܡܶܛܽܠܗܳܢܳܐ ܝܺܡܳܐ ܠܶܗ ܐܰܠܳܗܳܐ ܕܢܶܒܢܶܐ ܠܶܗ ܡܰܕܒܚܳܐ. ܘܬܶܗܘܶܐ ܠܶܗ ܘܰܠܙܰܪܥܶܗ ܟܳܗܢܽܘܬܳܐ ܪܰܒܬܳܐ ܠܥܳܠܰܡ.
23 ܘܳܐܦ ܕܰܘܺܝܕ ܒܰܪ ܐܺܝܫܰܝ: ܝܽܘܪܬܳܢܳܐ ܕܡܰܠܟ̈ܶܐ ܒܰܠܚܽܘܕܰܘܗܝ ܝܺܪܶܬ: ܘܝܽܘܪܬܳܢܳܐ ܕܰܐܗܪܽܘܢ ܠܶܗ ܘܰܠܙܰܪܥܶܗ. ܡܶܟܺܝܠ ܒܰܪܶܟܘ ܠܰܐܠܳܗܳܐ. ܕܝܰܗܒ ܠܟܽܘܢ ܚܶܟܡܬܳܐ ܕܠܶܒܳܐ. ܠܰܡܕܳܢ ܠܥܰܡܶܗ ܒܰܫܡܶܗ. ܡܶܛܽܠ ܕܠܳܐ ܢܶܬܛܥܶܐ ܛܽܘܒܗܽܘܢ: ܘܫܽܘܠܛܳܢܗܽܘܢ ܠܟܽܠ ܕܳܖ̈ܶܐ ܕܥܳܠܡܳܐ.