Genesis 12
The Book of Genesis
܀ ܒܪܝܬܐ ܝܒ ܀
1 ܘܶܐܡܰܪ ܡܳܪܝܳܐ ܠܰܐܒܪܰܡ: ܙܶܠ ܠܳܟ ܡܶܢ ܐܰܪܥܳܟ ܘܡܶܢ ܐܰܝܡܶܟܳܐ ܕܶܐܬܺܝܠܶܕܬ: ܘܡܶܢ ܒܶܝܬ ܐܰܒܽܘܟ: ܠܰܐܪܥܳܐ ܕܶܐܚܰܘܶܝܟ.
2 ܘܶܐܥܒܕܳܟ ܠܥܰܡܳܐ ܪܰܒܳܐ: ܘܶܐܒܰܪܟܳܟ ܘܰܐܘܪܶܒ ܫܡܳܟ: ܘܰܗܘܺܝ ܒܪܺܝܟ.
3 ܘܶܐܒܰܪܶܟ ܡܒܰܖ̈ܟܳܢܰܝܟ: ܘܰܡܠܺܝܛܳܢܰܝ̈ܟ ܐܶܠܽܘܛ: ܘܢܶܬܒܰܖ̈ܟܳܢ ܒܳܟ ܟܽܠܗܶܝܢ ܫܰܖ̈ܒܳܬܳܐ ܕܰܐܪܥܳܐ: ܘܰܒܙܰܪܥܳܟ.
4 ܘܰܥܒܰܕ ܐܰܒܪܰܡ ܐܰܝܟ ܕܶܐܡܰܪ ܠܶܗ ܡܳܪܝܳܐ: ܘܶܐܙܰܠ ܥܰܡܶܗ ܠܽܘܛ: ܘܰܐܒܪܰܡ ܒܰܪ ܫܰܒܥܺܝܢ ܗܘܳܐ ܘܚܰܡܶܫ ܫܢܺܝ̈ܢ ܟܰܕ ܢܦܰܩ ܡܶܢ ܚܳܪܳܢ.
5 ܘܰܕܒܰܪ ܐܰܒܪܰܡ ܠܣܰܪܰܝ ܐܰܢ̱ܬܬܶܗ: ܘܰܠܠܽܘܛ ܒܰܪ ܐܰܚܽܘܗܝ: ܘܰܠܟܽܠܶܗ ܩܶܢܝܳܢܗܽܘܢ ܕܰܩܢܰܘ: ܘܢܰܦܫ̈ܳܬܳܐ ܕܰܥܒܰܕܘ ܒܚܳܪܳܢ: ܘܰܢܦܰܩܘ ܠܡܺܐܙܰܠ ܠܰܐܪܥܳܐ ܕܰܟܢܰܥܢ: ܘܶܐܬܰܘ ܠܰܐܪܥܳܐ ܕܰܟܢܰܥܢ.
6 ܘܰܥܒܰܪ ܐܰܒܪܰܡ ܒܰܐܪܥܳܐ: ܥܕܰܡܳܐ ܠܰܐܬܪܳܐ ܕܰܫܟܺܝܡ: ܘܰܥܕܰܡܳܐ ܠܒܰܠܽܘܛܳܐ ܕܡܰܡܖ̈ܶܐ: ܘܰܟܢܰܥܢܳܝ̈ܶܐ ܥܕܰܟܺܝܠ ܝܳܬܒܺܝܢ ܒܰܐܪܥܳܐ.
7 ܘܶܐܬܓܠܺܝ ܡܳܪܝܳܐ ܥܰܠ ܐܰܒܪܰܡ: ܘܶܐܡܰܪ ܠܶܗ : ܠܙܰܪܥܰܟ ܐܶܬܠܺܝܗ̇ ܐܰܪܥܳܐ ܗܳܕܶܐ. ܘܰܒܢܳܐ ܬܰܡܳܢ ܡܰܕܒܚܳܐ ܠܡܳܪܝܳܐ: ܕܶܐܬܓܠܺܝ ܥܠܰܘܗ̱ܝ.
8 ܘܫܰܢܺܝ ܡܶܢ ܬܰܡܳܢ ܠܛܽܘܪܳܐ: ܡܶܢ ܡܰܕܢܚܳܐ ܠܒܶܝܬ ܐܺܝܠ: ܘܰܢܩܰܫ ܡܰܫܟܢܶܗ: ܒܶܝܬ ܐܺܝܠ ܡܶܢ ܡܰܥܪܒܐ: ܘܥܳܝ ܡܶܢ ܡܰܕܢܚܳܐ : ܘܰܒܢܳܐ ܬܰܡܳܢ ܡܰܕܒܚܳܐ ܠܡܳܪܝܳܐ: ܘܰܩܪܳܐ ܒܰܫܡܶܗ ܕܡܳܪܝܳܐ.
9 ܘܰܫܩܰܠ ܐܰܒܪܰܡ ܘܶܐܙܰܠ: ܘܡܰܫܩܠܳܢܶܗ ܠܬܰܝܡܢܳܐ.
10 ܘܰܗܘܳܐ ܟܰܦܢܳܐ ܒܰܐܪܥܳܐ: ܘܰܢܚܶܬ ܐܰܒܪܰܡ ܠܡܶܨܪܶܝܢ ܠܡܶܥܡܰܪ ܬܰܡܳܢ: ܡܶܛܽܠ ܕܰܥܫܶܢ ܟܰܦܢܳܐ ܛܳܒ ܒܰܐܪܥܳܐ.
11 ܘܰܗܘܳܐ ܕܟܰܕ ܩܰܪܺܝܒ ܠܡܶܥܰܠ ܠܡܶܨܪܶܝܢ : ܐܶܡܰܪ ܠܣܰܪܰܝ ܐܰܢ̱ܬܬܶܗ: ܗܳܐ ܝܳܕܰܥ ܐ̱ܢܳܐ ܕܰܐܢ̱ܬܬܳܐ ܫܰܦܺܝܪ ܒܚܶܙܘܳܐ ܐܰܢ̱ܬܝ.
12 ܘܟܰܕ ܢܶܚܙܽܘܢܶܟܝ ܡܶܨܖ̈ܳܝܶܐ: ܢܺܐܡܪܽܘܢ ܐܰܢ̱ܬܬܶܗ ܗܺܝ ܗܳܕܶܐ. ܩܳܛܠܺܝܢ ܠܺܝ. ܘܠܶܟܝ ܡܰܚܶܝܢ.
13 ܐܶܡܰܪܝ ܕܚܳܬܶܗ ܐ̱ܢܳܐ: ܡܶܛܽܠ ܕܢܶܛܐܰܒ ܠܺܝ ܡܶܛܽܠܬܶܟܝ: ܘܬܺܚܶܐ ܢܰܦܫܝ ܡܶܛܽܠܬܶܟܝ.
14 ܘܰܗܘܳܐ ܕܟܰܕ ܥܰܠ ܐܰܒܪܰܡ ܠܡܶܨܪܶܝܢ: ܚܙܰܐܗ̇ ܡܶܨܖ̈ܳܝܶܐ ܠܰܐܢ̱ܬܬܶܗ ܕܫܰܦܺܝܪܳܐ ܗ̱ܝ ܛܳܒ.
15 ܘܰܚܙܰܐܗ̇ ܪܰܘܖ̈ܒܢܰܝ̈ ܦܶܪܥܽܘܢ: ܘܫܰܒܚܽܘܗ̇ ܩܕܳܡ ܦܶܪܥܽܘܢ: ܘܶܐܬܕܰܒܪܰܬ ܐܰܢ̱ܬܬܳܐ ܠܘܳܬ ܦܶܪܥܽܘܢ.
16 ܘܠܰܐܒܪܰܡ ܛܐܶܒ ܡܶܛܽܠܬܳܗ̇: ܘܰܗܘܰܘ ܠܶܗ ܥܳܢ̈ܳܐ: ܘܬܰܘܖ̈ܶܐ: ܘܚܶܡܖ̈ܳܐ : ܘܥܰܒ̈ܕܶܐ: ܘܰܐܡܗ̈ܳܬܳܐ: ܘܰܐܬܳܢ̈ܶܐ: ܘܓܰܡ̈ܠܶܐ.
17 ܘܰܡܚܳܐ ܡܳܪܝܳܐ ܠܦܶܪܥܽܘܢ ܡܰܚ̈ܘܳܬܳܐ ܪܰܘܖ̈ܒܳܬܳܐ: ܠܶܗ ܘܠܰܒܢܰܝ̈ ܒܰܝܬܶܗ: ܡܶܛܽܠ ܣܰܪܰܝ ܐܰܢ̱ܬܬܶܗ ܕܰܐܒܪܰܡ.
18 ܘܰܩܪܳܐ ܦܶܪܥܽܘܢ ܠܰܐܒܪܰܡ ܘܶܐܡܰܪ ܠܶܗ: ܡܳܢܰܘ ܗܳܢܳܐ ܕܰܥܒܰܕܬ ܠܺܝ: ܠܡܳܢܳܐ ܠܳܐ ܚܰܘܺܝܬܳܢܝ ܕܰܐܢ̱ܬܬܳܟ ܗܺܝ.
19 ܘܰܠܡܳܢܳܐ ܐܶܡܰܪܬ ܕܚܳܬܝ ܗܺܝ: ܘܰܢܣܶܒܬܳܗ̇ ܠܺܝ ܐܰܢ̱ܬܬܳܐ: ܗܳܫܳܐ ܗܳܐ ܐܰܢ̱ܬܬܳܟ ܕܒܰܪ ܘܙܶܠ.
20 ܘܰܦܩܰܕ ܥܠܰܘܗܝ ܦܶܪܥܽܘܢ ܓܰܒܖ̈ܶܐ. ܘܫܰܕܪܶܗ ܠܶܗ ܘܠܰܐܢ̱ܬܬܶܗ ܘܰܠܟܽܠ ܕܺܐܝܬ ܠܶܗ.