Genesis 31
The Book of Genesis
܀ ܒܪܝܬܐ ܠܐ ܀
1 ܘܰܫܡܰܥ ܝܰܥܩܽܘܒ ܡܶܠܰܝ̈ܗܽܘܢ ܕܰܒܢܰܝ̈ ܠܳܒܳܢ ܕܳܐܡܪܺܝܢ: ܢܣܰܒ ܝܰܥܩܽܘܒ ܟܽܠ ܕܺܐܝܬ ܗܘܳܐ ܠܰܐܒܽܘܢ: ܘܡܶܢ ܕܰܐܒܽܘܢ ܩ̣ܢܳܐ ܗܳܢܳܐ ܩܶܢܝܳܢܳܐ ܟܽܠܶܗ.
2 ܘܰܚܙܳܐ ܝܰܥܩܽܘܒ ܐܰܦܰܘ̈ܗܝ ܕܠܳܒܳܢ: ܕܠܳܐ ܗܘܰܝ̈ ܥܰܡܶܗ ܐܰܝܟ ܕܶܐܬܡܳܠܝ ܘܰܐܝܟ ܕܰܡܢܳܬܡܳܠܝ.
3 ܘܶܐܡܰܪ ܡܳܪܝܳܐ ܠܝܰܥܩܽܘܒ: ܗܦܽܘܟ ܠܰܐܪܥܳܐ ܕܰܐܒܗܰܝ̈ܟ ܘܰܠܬܰܘܠܕ̈ܳܬܳܟ: ܘܶܐܗܘܶܐ ܥܰܡܳܟ.
4 ܘܫܰܕܰܪ ܝܰܥܩܽܘܒ ܩܪܳܐ ܠܪܳܚܶܝܠ ܘܰܠܠܶܝܰܐ ܠܚܰܩܠܳܐ: ܠܘܳܬ ܥܳܢ̈ܶܗ.
5 ܘܶܐܡܰܪ ܠܗܶܝܢ: ܚܳܙܶܐ ܐ̱ܢܳܐ ܐܰܦܰܘ̈ܗܝ ܕܰܐܒܽܘܟܶܝܢ: ܕܠܳܐ ܗܘܰܝ̈ ܠܘܳܬܝ ܐܰܝܟ ܕܶܐܬܡܳܠܝ ܘܰܐܝܟ ܕܰܡܢܳܬܡܳܠܝ: ܘܰܐܠܳܗܶܗ ܕܳܐܒܝ ܗܘܳܐ ܥܰܡܝ.
6 ܘܰܐܢ̱ܬܶܝܢ ܝܳܕ̈ܥܳܢ ܐܢ̱ܬܶܝܢ: ܕܰܒܟܽܠܶܗ ܚܰܝܠܝ ܦܶܠܚܶܬ ܠܰܐܒܽܘܟܶܝܢ.
7 ܘܰܐܒܽܘܟܶܝܢ ܕܰܓܶܠ ܒܺܝ: ܘܚܰܠܶܦ ܐܰܓܪܝ ܥܣܰܪ ܙܰܒܢܺܝ̈ܢ: ܘܠܳܐ ܫܰܒܩܶܗ ܐܰܠܳܗܳܐ ܕܢܰܒܐܶܫ ܠܺܝ.
8 ܐܶܢ ܗܳܟܰܢܳܐ ܢܺܐܡܰܪ ܕܰܩܖ̈ܳܚܶܐ ܢܶܗܘܶܐ ܐܰܓܪܳܟ: ܝܳܠ̈ܕܳܢ ܟܽܠܗܶܝܢ ܥܳܢ̈ܳܐ ܩܰܖ̈ܚܶܐ: ܘܶܐܢ ܢܺܐܡܰܪ ܕܦܰܝܣܟܳܝ̈ܶܐ ܢܶܗܘܶܐ ܐܰܓܪܳܟ: ܝܳܠ̈ܕܳܢ ܟܽܠܗܶܝܢ ܥܳܢ̈ܳܐ ܦܰܝܣܟܳܝ̈ܶܐ.
9 ܘܰܦܪܰܫ ܐܰܠܳܗܳܐ ܡܶܢ ܩܶܢܝܳܢܳܐ ܕܰܐܒܽܘܟܶܝܢ: ܘܝܰܗܒ ܠܺܝ.
10 ܘܰܒܙܰܒܢܳܐ ܕܚܳܡܳܐ ܥܳܢ̈ܳܐ: ܐܰܪܺܝܡܶܬ ܥܰܝ̈ܢܰܝ ܘܰܚܙܺܝ݀ܬ ܒܚܶܠܡܳܐ: ܘܗܳܐ ܬܰܝܫ̈ܶܐ ܣܳܠܩܺܝܢ ܥܰܠ ܥܳܢ̈ܳܐ: ܩܰܖ̈ܚܶܐ: ܘܦܰܝܣܟܳܝ̈ܶܐ: ܘܒܳܖ̈ܕܶܐ.
11 ܘܶܐܡܰܪ ܠܺܝ ܡܰܠܰܐܟܶܗ ܕܰܐܠܳܗܳܐ ܒܚܶܠܡܳܐ: ܝܰܥܩܽܘܒ: ܘܶܐܡܪܶܬ ܗܳܐ ܐܶܢܳܐ.
12 ܘܶܐܡܰܪ ܠܺܝ: ܐܰܪܺܝܡ ܥܰܝ̈ܢܰܝܟ ܘܰܚܙܺܝ ܟܽܠ ܬܰܝܫ̈ܶܐ ܕܣܳܠܩܺܝܢ ܥܰܠ ܥܳܢ̈ܳܐ: ܩܰܖ̈ܚܶܐ: ܘܦܰܝܣܟܳܝ̈ܶܐ: ܘܒܳܖ̈ܕܶܐ: ܡܶܛܽܠ ܕܰܚܙܺܝ݀ܬ ܟܽܠ ܕܰܥ̣ܒܰܕ ܠܳܟ ܠܳܒܳܢ.
13 ܐܶܢܳܐ ܐ̱ܢܳܐ ܐܰܠܳܗܳܐ ܕܒܶܝܬ ܐܺܝܠ: ܕܰܡܫܰܚܬ ܠܺܝ ܬܰܡܳܢ ܩܳܝܶܡܬܳܐ: ܘܰܢܕܰܪܬ ܠܺܝ ܬܰܡܳܢ ܢܶܕܪܳܐ: ܗܳܫܳܐ ܩܽܘܡ ܦܽܘܩ ܡܶܢ ܐܰܪܥܳܐ ܗܳܕܶܐ: ܘܰܗܦܽܘܟ ܠܰܐܪܥܳܐ ܕܬܰܘܠܕ̈ܳܬܳܟ.
14 ܘܰܥܢܰܝ̈ ܪܳܚܶܝܠ ܘܠܶܝܰܐ ܘܳܐܡܖ̈ܳܢ ܠܶܗ: ܬܽܘܒ ܠܰܝܬܠܰܢ ܡܢܳܬܳܐ ܘܝܳܪܬܽܘܬܳܐ ܒܶܝܬ ܐܰܒܽܘܢ.
15 ܗܳܐ ܐܰܝܟ ܢܽܘܟܖ̈ܳܝܳܬܳܐ ܚܫܺܝ̈ܒܳܢ ܚܢܰܢ ܠܶܗ: ܡܶܛܽܠ ܕܙܰܒܢܰܢ ܘܳܐܦ ܐܶܟܰܠ ܟܶܣܦܰܢ.
16 ܡܶܛܽܠ ܕܟܽܠܶܗ ܥܽܘܬܪܳܐ ܕܰܦܪܰܫ ܐܰܠܳܗܳܐ ܡܶܢ ܕܰܐܒܽܘܢ: ܕܺܝܠܰܢ ܗܽܘ ܘܕܰܒܢܰܝ̈ܢ: ܘܗܳܫܳܐ ܟܽܠ ܕܳܐܡܰܪ ܠܳܟ ܡܳܪܝܳܐ ܥܒܶܕ.
17 ܘܩܳܡ ܝܰܥܩܽܘܒ ܘܰܫܩܰܠ ܠܰܒܢܰܘ̈ܗܝ: ܘܰܠܢܶܫܰܘ̈ܗܝ ܥܰܠ ܓܰܡ̈ܠܶܐ.
18 ܘܰܕܒܰܪ ܟܽܠܶܗ ܒܥܺܝܪܶܗ ܘܟܽܠܶܗ ܩܶܢܝܳܢܶܗ ܕܰܩܢܳܐ ܒܦܳܕܳܢ ܕܳܐܪܳܡ: ܠܡܶܐܬܳܐ ܠܘܳܬ ܐܺܝܣܚܳܩ ܐܰܒܽܘܗܝ: ܠܰܐܪܥܳܐ ܕܰܟܢܰܥܢ.
19 ܘܠܳܒܳܢ ܐܶܙܰܠ ܠܡܶܓܰܙ ܥܳܢ̈ܶܗ: ܘܓܶܢܒܰܬ ܪܳܚܶܝܠ ܨܰܠ̈ܡܶܐ ܕܰܐܒܽܘܗ̇.
20 ܘܰܓܢܰܒ ܝܰܥܩܽܘܒ ܠܶܒܶܗ ܕܠܳܒܳܢ ܐܳܪܳܡܳܝܳܐ: ܡܶܛܽܠ ܕܠܳܐ ܚܰܘܝܶܗ ܕܳܐܙܶܠ.
21 ܘܰܥܪܰܩ ܗܽܘ ܘܟܽܠ ܕܺܐܝܬ ܠܶܗ: ܘܩܳܡ ܘܰܥܒܰܪ ܢܰܗܪܳܐ: ܘܣܳܡ ܐܰܦܰܘ̈ܗܝ ܠܛܽܘܪ ܓܶܠܥܳܕ.
22 ܘܶܐܬܶܐܡܰܪ ܠܠܳܒܳܢ ܒܝܰܘܡܳܐ ܕܰܬܠܳܬܳܐ: ܕܰܥܪܰܩ ܠܶܗ ܝܰܥܩܽܘܒ.
23 ܘܰܕܒܰܪ ܠܰܐܚܰܘ̈ܗܝ ܥܰܡܶܗ: ܘܰܪܕܰܦ ܒܳܬܪܶܗ ܡܰܪܕܶܐ ܫܰܒܥܳܐ ܝܰܘܡܺܝ̈ܢ: ܘܰܐܕܪܟܶܗ ܒܛܽܘܪܳܐ ܕܓܶܠܥܳܕ.
24 ܘܶܐܬܳܐ ܐܰܠܳܗܳܐ ܥܰܠ ܠܳܒܳܢ ܐܳܪܳܡܳܝܳܐ ܒܚܶܠܡܳܐ ܕܠܺܠܝܳܐ: ܘܶܐܡܰܪ ܠܶܗ: ܐܶܙܕܰܗܰܪ ܠܳܟ ܕܰܠܡܳܐ ܬܡܰܠܶܠ ܥܰܡ ܝܰܥܩܽܘܒ ܡܶܢ ܛܳܒܬܳܐ ܘܰܥܕܰܡܳܐ ܠܒܺܝܫܬܳܐ.
25 ܘܰܐܕܪܶܟ ܠܳܒܳܢ ܠܝܰܥܩܽܘܒ: ܘܝܰܥܩܽܘܒ ܢܩܰܫ ܡܰܫܟܢܶܗ ܒܛܽܘܪܳܐ: ܘܠܳܒܳܢ ܐܰܫܪܺܝ ܐܰܚܰܘ̈ܗܝ ܒܛܽܘܪܳܐ ܕܓܶܠܥܳܕ.
26 ܘܶܐܡܰܪ ܠܳܒܳܢ ܠܝܰܥܩܽܘܒ: ܡܳܢܳܐ ܥܶܒܕܶܬ ܠܳܟ ܕܰܓܢܰܒܬ ܠܰܒܢܰܝ̈: ܘܰܕܒܰܪܬ ܠܰܒ̈ܢܳܬܝ ܐܰܝܟ ܫܒܺܝܬܳܐ ܕܚܰܪܒܳܐ.
27 ܠܡܳܢܳܐ ܐܶܬܛܰܫܺܝܬ ܠܡܶܥܪܰܩ: ܘܶܐܬܓܢܶܒܬ ܡܶܢܝ ܘܠܳܐ ܚܰܘܺܝܬܳܢܝ: ܫܰܕܰܪܬܳܟ ܕܶܝܢ ܒܚܰܕܽܘܬܳܐ: ܘܒܰܙܡܳܪܳܐ: ܘܰܒܟܶܢܳܖ̈ܶܐ: ܘܒܰܦܠܰܓ̈ܶܐ.
28 ܘܠܳܐ ܫܒܰܩܬܳܢܝ ܠܰܡܢܰܫܳܩܽܘ ܠܰܒܢܰܝ̈ ܘܠܰܒ̈ܢܳܬܝ: ܗܳܫܳܐ ܐܰܣܟܶܠܬ ܒܡܶܕܶܡ ܕܰܥܒܰܕܬ.
29 ܡܳܛܶܐ ܗܘܳܐ ܒܺܐܝ̈ܕܰܝ ܕܶܐܥܒܶܕ ܠܟܽܘܢ ܒܺܝܫܬܳܐ: ܘܰܐܠܳܗܳܐ ܕܰܐܒܽܘܟܽܘܢ ܒܪܰܡܫܳܐ ܐܶܡܰܪ ܠܺܝ: ܐܶܙܕܰܗܪ ܠܳܟ ܕܰܠܡܳܐ ܬܡܰܠܶܠ ܥܰܡ ܝܰܥܩܽܘܒ ܡܶܢ ܛܳܒܬܳܐ ܘܰܥܕܰܡܳܐ ܠܒܺܝܫܬܳܐ.
30 ܘܗܳܫܳܐ ܡܺܐܙܰܠ ܐܳܙܶܠ ܐܰܢ̱ܬ: ܡܶܛܽܠ ܕܡܶܬܪܰܓܪܳܓܽܘ ܐܶܬܪܰܓܪܰܓܬ ܠܒܶܝܬ ܐܰܒܽܘܟ: ܠܡܳܢܳܐ ܓܢܰܒܬ ܐܰܠܳܗܰܝ̈.
31 ܘܰܥܢܳܐ ܝܰܥܩܽܘܒ ܘܶܐܡܰܪ ܠܠܳܒܳܢ: ܡܶܛܽܠ ܕܕܶܚܠܶܬ ܘܶܐܡܪܶܬ ܕܕܰܠܡܳܐ ܬܶܕܒܰܪ ܒܢ̈ܳܬܳܟ ܡܶܢܝ.
32 ܠܘܳܬ ܡܰܢ ܕܢܶܫܬܰܟܚܽܘܢ ܐܰܠܳܗܰܝ̈ܟ ܠܳܐ ܢܺܚܶܐ: ܩܕܳܡ ܐܰܚܰܝ̈ܢ ܐܶܫܬܰܘܕܰܥ ܕܺܝܠܳܟ: ܡܳܢܳܐ ܐܺܝܬ ܠܘܳܬܝ ܘܣܰܒ ܠܳܟ: ܘܠܳܐ ܝܺܕܰܥ ܝܰܥܩܽܘܒ ܕܪܳܚܶܝܠ ܓܶܢܒܰܬ ܐܶܢܶܝܢ.
33 ܘܥܰܠ ܠܳܒܳܢ ܠܡܰܫܟܢܳܐ ܕܝܰܥܩܽܘܒ ܘܰܠܡܰܫܟܢܳܐ ܕܠܶܝܰܐ ܘܰܠܡܰܫܟܢܳܐ ܕܬܰܪܬܶܝܢ ܐܰܡܗ̈ܳܬܳܐ: ܘܠܳܐ ܐܶܫܟܰܚ: ܘܰܢܦܰܩ ܡܶܢ ܡܰܫܟܢܳܐ ܕܠܶܝܰܐ ܘܥܰܠ ܠܡܰܫܟܢܳܐ ܕܪܳܚܶܝܠ.
34 ܘܪܳܚܶܝܠ ܢܶܣܒܰܬ ܨܰܠ̈ܡܶܐ: ܘܣܳܡܰܬ ܐܶܢܽܘܢ ܒܰܥܒܺܝܛܳܐ ܕܓܰܡܠܳܐ: ܘܝܶܬܒܰܬ ܥܠܰܝܗܽܘܢ: ܘܡܳܫ ܠܳܒܳܢ ܟܽܠܶܗ ܡܰܫܟܢܳܐ ܘܠܳܐ ܐܶܫܟܰܚ.
35 ܘܶܐܡܪܰܬ ܪܳܚܶܝܠ ܠܰܐܒܽܘܗ̇: ܠܳܐ ܢܶܬܒܐܶܫ ܒܥܰܝ̈ܢܰܝ ܡܳܪܝ ܡܶܛܽܠ ܕܠܳܐ ܡܶܫܟܚܳܐ ܐ̱ܢܳܐ ܠܰܡܩܳܡ ܡܶܢ ܩܕܳܡܰܝܟ: ܡܶܛܽܠ ܕܽܐܘܪܚܳܐ ܠܺܝ ܕܢܶܫ̈ܶܐ: ܘܰܒܨܳܐ ܘܠܳܐ ܐܶܫܟܰܚ ܨܰܠ̈ܡܶܐ.
36 ܘܶܐܬܒܐܶܫ ܠܝܰܥܩܽܘܒ ܘܰܢܨܳܐ ܥܰܡ ܠܳܒܳܢ: ܘܰܥܢܳܐ ܝܰܥܩܽܘܒ ܘܶܐܡܰܪ ܠܠܳܒܳܢ: ܡܳܢܳܐ ܗܺܝ ܣܰܟܠܽܘܬܝ ܘܡܳܢܰܘ ܣܽܘܪܚܳܢܝ ܕܰܪܕܰܦܬ ܒܳܬܰܪܝ.
37 ܗܳܐ ܡܳܫܬ ܟܽܠܗܽܘܢ ܡܳܐܢܰܝ̈: ܡܳܢܳܐ ܐܶܫܟܰܚܬ ܡܶܢ ܟܽܠܗܽܘܢ ܡܳܐܢܰܝ̈ ܒܰܝܬܳܟ: ܣܺܝܡ ܗܳܪܟܳܐ ܩܕܳܡ ܐܰܚܰܝ̈ ܘܰܐܚܰܝ̈ܟ: ܘܢܰܟܣܽܘܢ ܒܶܝܬ ܬܪܰܝܢ.
38 ܗܳܐ ܥܶܣܪܺܝܢ ܫܢܺܝ̈ܢ ܥܰܡܳܟ ܐ̱ܢܳܐ: ܢܩܰܘ̈ܳܬܳܟ ܘܥܶܙܰܝ̈ܟ ܠܳܐ ܓܰܝܶܙ̈ܝ: ܘܕܶܟܖ̈ܶܐ ܕܥܳܢ̈ܳܟ ܠܳܐ ܐܶܟܠܶܬ.
39 ܘܕܰܬܒܺܝܪܳܐ ܠܳܐ ܐܰܝܬܺܝܬ ܠܳܟ: ܐܶܢܳܐ ܡܢܰܛܰܪ ܗ̱ܘܺܝܬ ܠܳܗ̇ ܕܡܶܢ ܐܺܝ̈ܕܰܝ ܬܳܒܰܥ ܗ̱ܘܰܝܬ ܠܳܗ̇: ܕܡܶܬܓܢܶܒ ܒܺܐܝܡܳܡܳܐ ܘܰܕܡܶܬܓܢܶܒ ܒܠܺܠܝܳܐ.
40 ܗܘܺܝܬ ܒܺܐܝܡܳܡܳܐ ܐܰܟܠܰܢܝ ܫܰܘܒܳܐ: ܘܰܓܠܺܝܕܳܐ ܒܠܺܠܝܳܐ: ܦܶܪܕܰܬ ܫܶܢܰܬܝ ܡܶܢ ܥܰܝ̈ܢܰܝ.
41 ܗܳܐ ܥܶܣܪܺܝܢ ܠܺܝ ܫܢܺܝ̈ܢ ܒܒܰܝܬܳܟ: ܦܶܠܚܶܬ ܠܳܟ ܐܰܪܒܰܥܶܣܖ̈ܶܐ ܫܢܺܝ̈ܢ ܒܬܰܪܬܶܝܢ ܒ̈ܢܳܬܳܟ: ܘܫܶܬ ܫܢܺܝ̈ܢ ܒܥܳܢ̈ܳܟ: ܘܚܰܠܶܦܬ ܐܰܓܪܝ ܥܣܰܪ ܙܰܒܢܺܝ̈ܢ.
42 ܘܶܐܠܽܘܠܳܐ ܐܰܠܳܗܶܗ ܕܳܐܒܝ: ܐܰܠܳܗܶܗ ܕܰܐܒܪܳܗܳܡ: ܘܕܶܚܠܬܶܗ ܕܺܐܝܣܚܳܩ ܩܳܡ ܠܺܝ: ܗܳܫܳܐ ܣܪܺܝܩܳܐܺܝܬ ܡܫܰܕܰܪ ܗ̱ܘܰܝܬ ܠܺܝ: ܥܰܡܠܝ ܘܠܶܐܘܬܳܐ ܕܺܐܝ̈ܕܰܝ ܚܙܳܐ ܐܰܠܳܗܳܐ: ܘܰܐܟܣܳܟ ܒܪܰܡܫܳܐ.
43 ܘܰܥܢܳܐ ܠܳܒܳܢ ܘܶܐܡܰܪ ܠܝܰܥܩܽܘܒ: ܒܢ̈ܳܬܳܐ ܒܢ̈ܳܬܝ: ܘܰܒܢܰܝ̈ܐ ܒܢܰܝ̈: ܘܥܳܢ̈ܳܐ ܥܳܢ̈ܝ: ܘܟܽܠ ܕܚܳܙܶܐ ܐܰܢ̱ܬ ܕܺܝܠܝ ܗܽܘ: ܘܠܰܒܢ̈ܳܬܝ ܗܳܠܶܝܢ: ܡܳܢܳܐ ܐܶܥܒܶܕ ܠܗܶܝܢ ܝܰܘܡܳܢܳܐ ܐܰܘ ܠܰܒܢܰܝ̈ܗܶܝܢ ܕܺܝܠܶܕ̈ܝ.
44 ܘܗܳܫܳܐ ܗܳܐ ܢܩܺܝܡ ܩܝܳܡܳܐ ܐܶܢܳܐ ܘܰܐܢ̱ܬ: ܘܢܶܗܘܶܐ ܣܳܗܕܳܐ ܒܰܝ̈ܢܰܝ ܘܠܳܟ.
45 ܘܰܢܣܰܒ ܝܰܥܩܽܘܒ ܟܺܐܦܳܐ: ܘܰܐܪܺܝܡܳܗ̇ ܩܳܝܶܡܬܳܐ.
46 ܘܶܐܡܰܪ ܝܰܥܩܽܘܒ ܠܰܐܚܰܘ̈ܗܝ: ܠܰܩܶܛܘ ܟܺܐܦ̈ܶܐ: ܘܰܢܣܰܒܘ ܟܺܐܦ̈ܶܐ ܘܰܥܒܰܕܘ ܝܰܓܪܳܐ: ܘܶܐܟܰܠܘ ܬܰܡܳܢ ܥܰܠ ܝܰܓܪܳܐ.
47 ܘܰܩܪܳܝܗܝ ܠܳܒܳܢ ܝܰܓܪܳܐ ܕܣܳܗܕܽܘܬܳܐ: ܘܝܰܥܩܽܘܒ ܩܪܳܝܗܝ ܓܶܠܥܳܕ.
48 ܘܶܐܡܰܪ ܠܳܒܳܢ: ܝܰܓܪܳܐ ܗܳܢܳܐ ܣܳܗܶܕ ܒܰܝ̈ܢܰܝ ܘܠܳܟ ܝܰܘܡܳܢܳܐ: ܡܶܛܽܠ ܗܳܢܳܐ ܩܪܳܐ ܫܡܶܗ ܓܶܠܥܳܕ.
49 ܘܕܰܘܩܳܐ: ܕܶܐܡܰܪ ܢܶܚܙܶܐ ܡܳܪܝܳܐ ܒܰܝ̈ܢܰܝ ܘܠܳܟ: ܡܶܛܽܠ ܕܦܳܪܫܺܝܢܰܢ ܓܒܰܪ ܡܶܢ ܐܰܚܽܘܗܝ.
50 ܐܶܢ ܬܨܰܥܰܪ ܠܰܒܢ̈ܳܬܝ: ܘܶܐܢ ܬܶܣܰܒ ܢܶܫ̈ܶܐ ܥܰܠ ܒܢ̈ܳܬܝ: ܠܰܝܬ ܐ̱ܢܳܫ ܥܰܡܰܢ: ܚܙܺܝ ܕܰܐܠܳܗܳܐ ܣܳܗܶܕ ܒܰܝ̈ܢܰܝ ܘܠܳܟ.
51 ܘܶܐܡܰܪ ܠܳܒܳܢ ܠܝܰܥܩܽܘܒ: ܗܳܐ ܝܰܓܪܳܐ ܗܳܢܳܐ: ܘܗܳܐ ܩܳܝܶܡܬܳܐ ܗܳܕܶܐ ܕܰܐܩܺܝܡܶܬ ܒܰܝ̈ܢܰܝ ܘܠܳܟ.
52 ܣܳܗܶܕ ܝܰܓܪܳܐ ܗܳܢܳܐ: ܘܣܳܗܕܳܐ ܩܳܝܶܡܬܳܐ ܗܳܕܶܐ: ܕܶܐܢܳܐ ܠܳܐ ܐܶܥܒܰܪ ܥܠܰܝܟ ܝܰܓܪܳܐ ܗܳܢܳܐ: ܘܳܐܦ ܐܰܢ̱ܬ ܠܳܐ ܬܶܥܒܰܪ ܥܠܰܝ ܝܰܓܪܳܐ ܗܳܢܳܐ: ܘܩܳܝܶܡܬܳܐ ܗܳܕܶܐ ܠܒܺܝܫܬܳܐ.
53 ܐܰܠܳܗܶܗ ܕܰܐܒܪܳܗܳܡ: ܐܰܠܳܗܶܗ ܕܢܳܚܽܘܪ ܢܕܽܘܢ ܒܰܝܢܳܬܰܢ: ܐܰܠܳܗܳܐ ܕܰܐܒܗ̈ܳܬܰܢ: ܘܺܝܡܳܐ ܝܰܥܩܽܘܒ ܒܕܶܚܠܬܳܐ ܕܰܐܒܽܘܗܝ ܐܺܝܣܚܳܩ.
54 ܘܕܰܒܰܚ ܝܰܥܩܽܘܒ ܕܶܒܚܬܳܐ ܒܛܽܘܪܳܐ: ܘܰܩܪܳܐ ܠܰܐܚܰܘ̈ܗܝ ܠܡܶܐܟܰܠ ܠܰܚܡܳܐ: ܘܶܐܟܰܠܘ ܠܰܚܡܳܐ ܘܒܳܬܘ ܒܛܽܘܪܳܐ.
55 ܘܩܰܕܶܡ ܠܳܒܳܢ ܒܫܰܦܪܳܐ: ܘܢܰܫܶܩ ܠܰܒܢܰܘ̈ܗܝ ܘܠܰܒܢ̈ܳܬܶܗ: ܘܒܰܪܶܟ ܐܶܢܽܘܢ: ܘܰܗܦܰܟ ܠܳܒܳܢ ܘܶܐܙܰܠ ܠܰܐܬܪܶܗ.