Genesis 20
The Book of Genesis
܀ ܒܪܝܬܐ ܟ ܀
1 ܘܰܫܩܰܠ ܐܰܒܪܳܗܳܡ ܡܶܢ ܬܰܡܳܢ ܠܰܐܪܥܳܐ ܕܬܰܝܡܢܳܐ: ܘܺܝܬܶܒ ܒܶܝܬ ܪܩܶܡ ܠܒܶܝܬ ܓܳܕܳܪ: ܘܰܥܡܰܪ ܐܰܒܪܳܗܳܡ ܒܓܳܕܳܪ.
2 ܘܶܐܡܰܪ ܐܰܒܪܳܗܳܡ ܥܰܠ ܣܰܪܳܐ ܐܰܢ̱ܬܬܶܗ ܕܚܳܬܝ ܗ̱ܝ. ܘܫܰܕܰܪ ܐܰܒܝܡܰܠܟ ܡܰܠܟܳܐ ܕܓܳܕܳܪ ܘܕܰܒܪܳܗ̇ ܠܣܰܪܳܐ.
3 ܘܶܐܬܳܐ ܐܰܠܳܗܳܐ ܥܰܠ ܐܰܒܝܡܰܠܟ ܒܚܶܠܡܳܐ ܕܠܺܠܝܳܐ ܘܶܐܡܰܪ ܠܶܗ: ܗܳܐ ܡܳܐܶܬ ܐܰܢ̱ܬ ܥܰܠ ܐܰܦܰܝ̈ ܐܰܢ̱ܬܬܳܐ ܕܰܕܒܰܪܬ: ܡܶܛܽܠ ܕܰܐܢ̱ܬܰܬ ܓܰܒܪܳܐ ܗ̱ܝ̣.
4 ܘܰܐܒܺܝܡܰܠܟ ܠܳܐ ܩܪܶܒ ܠܳܗ̇. ܘܶܐܡܰܪ ܐܰܒܝܡܰܠܟ: ܡܳܪܝܳܐ ܐܳܦ ܥܰܡܳܐ ܙܰܟܳܝܳܐ ܩܳܛܶܠ ܐܰܢ̱ܬ.
5 ܗܳܐ ܗܽܘ ܐܶܡܰܪ ܕܚܳܬܝ ܗ̱ܝ̣: ܘܳܐܦ ܗܺܝ ܐܶܡܪܰܬ ܕܳܐܚܝ ܗܽܘ. ܒܬܰܡܺܝܡܽܘܬ ܠܶܒܝ ܘܰܒܕܰܟܝܽܘܬܳܐ ܕܺܐܝܕܰܝ̈ ܥܶܒܕܶܬ ܗܳܕܶܐ.
6 ܘܶܐܡܰܪ ܠܶܗ ܐܰܠܳܗܳܐ ܒܚܶܠܡܳܐ: ܐܳܦ ܐܶܢܳܐ ܝܳܕܰܥ ܐ̱ܢܳܐ ܕܰܒܬܰܡܺܝܡܽܘܬ ܠܶܒܳܟ ܥܒܰܕܬ ܗܳܕܶܐ ܘܰܚܣܰܟܬܳܟ ܐܳܦ ܐܶܢܳܐ ܕܠܳܐ ܬܶܚܛܶܐ ܠܺܝ : ܡܶܛܽܠ ܗܳܢܳܐ ܠܳܐ ܫܒܰܩܬܳܟ ܠܡܶܩܪܰܒ ܠܳܗ̇.
7 ܗܳܫܳܐ ܐܰܗܦܶܟ ܐܰܢ̱ܬܰܬ ܓܰܒܪܳܐ: ܡܶܛܽܠ ܕܰܢܒܝܰܐ ܗ̱ܘ: ܘܰܢܨܰܠܶܐ ܥܠܰܝܟ ܘܬܺܐܚܶܐ. ܘܶܐܢ ܠܳܐ ܡܰܗܦܶܟ ܐܰܢ̱ܬ: ܕܰܥ ܕܰܡܡܳܬ ܡܳܐܶܬ ܐܰܢ̱ܬ: ܐܰܢ̱ܬ ܘܟܽܠ ܕܺܐܝܬ ܠܳܟ.
8 ܘܩܰܕܶܡ ܐܰܒܝܡܰܠܟ ܒܫܰܦܪܳܐ ܘܰܩܪܳܐ ܠܟܽܠܗܽܘܢ ܥܰܒܕܰܘ̈ܗܝ: ܘܡܰܠܶܠ ܟܽܠܗܶܝܢ ܡ̈ܶܠܶܐ ܗܳܠܶܝܢ ܒܶܐܕܢܰܝ̈ܗܽܘܢ: ܘܰܕܚܶܠܘ ܐ̱ܢܳܫ̈ܳܐ ܛܳܒ.
9 ܘܰܩܪܳܐ ܐܰܒܝܡܰܠܟ ܠܰܐܒܪܳܗܳܡ ܘܶܐܡܰܪ ܠܶܗ: ܡܳܢܳܐ ܥܶܒܕܶܬ ܠܳܟ: ܘܡܳܢܳܐ ܚܛܺܝܬ ܠܳܟ ܕܰܐܝܬܺܝܬ ܥܠܰܝ ܘܥܰܠ ܡܰܠܟܽܘܬܝ ܚܛܳܗܳܐ ܪܰܒܳܐ: ܥܒܳܕ̈ܶܐ ܕܠܳܐ ܡܶܬܥܰܒܕܺܝܢ ܥܒܰܕܬ ܥܰܡܝ.
10 ܘܶܐܡܰܪ ܐܰܒܝܡܰܠܟ ܠܰܐܒܪܳܗܳܡ: ܡܳܢܳܐ ܚܙܰܝܬ ܕܰܥܒܰܕܬ ܦܶܬܓܳܡܳܐ ܗܳܢܳܐ.
11 ܘܶܐܡܰܪ ܐܰܒܪܳܗܳܡ. ܡܶܛܽܠ ܕܶܐܡܪܶܬ: ܕܰܠܡܳܐ ܠܰܝܬ ܕܶܚܠܬܶܗ ܕܰܐܠܳܗܳܐ ܒܰܐܬܪܳܐ ܗܳܢܳܐ: ܘܢܶܩܛܠܽܘܢܳܢܝ ܥܰܠ ܐܰܦܰܝ̈ ܐܰܢ̱ܬܰܬܝ.
12 ܒܪܰܡ ܫܰܪܺܝܪܳܐܺܝܬ ܚܳܬܝ ܗܺܝ: ܒܰܪܬ ܐܳܒܝ ܘܠܳܐ ܒܰܪܬ ܐܶܡܝ: ܘܰܗܘܳܬ ܠܺܝ ܐܰܢ̱ܬܬܳܐ.
13 ܘܰܗܘܳܐ ܕܟܰܕ ܐܰܦܩܰܢܝ ܐܰܠܳܗܳܐ ܡܶܢ ܒܶܝܬ ܐܳܒܝ: ܐܶܡܪܶܬ ܠܳܗ̇: ܗܳܕܶܐ ܛܰܝܒܽܘܬܳܐ ܕܬܶܥܒܕܺܝܢ ܥܰܡܝ. ܒܟܽܠ ܐܰܬܰܪ ܕܳܐܙܺܠܝܢ ܚ̱ܢܰܢ ܠܬܰܡܳܢ : ܐܶܡܰܪ ܥܠܰܝ ܕܳܐܚܝ ܗܽܘ.
14 ܘܰܕܒܰܪ ܐܰܒܝܡܰܠܟ ܥܳܢ̈ܳܐ ܘܬܰܘܖ̈ܶܐ ܘܥܰܒ̈ܕܶܐ ܘܰܐܡ̈ܗܳܬܳܐ ܘܝܰܗܒ ܠܰܐܒܪܳܗܳܡ: ܘܦܰܢܺܝ ܠܶܗ ܠܣܰܪܳܐ ܐܰܢ̱ܬܬܶܗ.
15 ܘܶܐܡܰܪ ܐܰܒܝܡܰܠܟ ܠܰܐܒܪܳܗܳܡ. ܗܳܐ ܐܰܪܥܝ ܩܕܳܡܰܝܟ. ܟܰܪ ܕܫܰܦܺܝܪ ܒܥܰܝ̈ܢܰܝܟ ܬܶܒ.
16 ܘܰܠܣܰܪܳܐ ܐܶܡܰܪ. ܗܳܐ ܝܶܗܒܶܬ ܐܳܠܶܦ ܕܰܟܣܶܦ ܠܰܐܚܽܘܟܝ. ܘܗܳܐ ܐܳܦ ܗܽܘ ܝܺܗܺܝܒ ܠܶܟܝ. ܚܠܳܦ ܕܚܰܦܺܝܬܝ ܥܰܝ̈ܢܶܐ ܕܟܽܠ ܕܥܰܡܝ: ܘܥܰܠ ܟܽܠܡܶܕܶܡ ܐܰܟܶܣܬܺܝܢܝ.
17 ܘܨܰܠܺܝ ܐܰܒܪܳܗܳܡ ܩܕܳܡ ܐܰܠܳܗܳܐ: ܘܰܐܣܺܝ ܐܰܠܳܗܳܐ ܠܰܐܒܺܝܡܰܠܟ ܘܠܰܐܢ̱ܬܬܶܗ ܘܠܰܐܡ̈ܗܳܬܶܗ ܘܺܝܠܶܕ̈ܝ.
18 ܡܶܛܽܠ ܕܡܶܐܚܰܕ ܐܶܚܰܕ ܡܳܪܝܳܐ ܒܰܐܦܰܝ̈ ܟܽܠ ܡܰܪܒܥܳܐ ܕܒܶܝܬ ܐܰܒܝܡܰܠܟ: ܡܶܛܽܠ ܣܰܪܳܐ ܐܰܢ̱ܬܬܶܗ ܕܰܐܒܪܳܗܳܡ.