Genesis 17
The Book of Genesis
܀ ܒܪܝܬܐ ܝܙ ܀
1 ܘܰܗܘܳܐ ܐܰܒܪܰܡ ܒܰܪ ܬܶܫܥܺܝܢ ܘܰܬܫܰܥ ܫܢܺܝ̈ܢ: ܘܶܐܬܓܠܺܝ ܡܳܪܝܳܐ ܠܰܐܒܪܰܡ ܘܶܐܡܰܪ ܠܶܗ: ܐܶܢܳܐ ܐ̱ܢܳܐ ܐܺܝܠܫܰܕܰܝ ܐܰܠܳܗܳܐ: ܫܦܰܪ ܩܕܳܡܰܝ : ܘܰܗܘܺܝ ܕܠܳܐ ܡܽܘܡ.
2 ܘܶܐܬܶܠ ܩܝܳܡܝ ܒܰܝ̈ܢܰܝ ܘܠܳܟ: ܘܰܐܣܓܶܝܟ ܛܳܒ ܛܳܒ.
3 ܘܰܢܦܰܠ ܐܰܒܪܰܡ ܥܰܠ ܐܰܦܰܘ̈ܗܝ: ܘܡܰܠܶܠ ܥܰܡܶܗ ܐܰܠܳܗܳܐ ܘܶܐܡܰܪ ܠܶܗ.
4 ܐܶܢܳܐ ܗܳܐ ܡܩܺܝܡ ܐ̱ܢܳܐ ܩܝܳܡܝ ܥܰܡܳܟ: ܘܬܶܗܘܶܐ ܐܰܒܐ ܠܣܽܘܓܳܐܐ ܕܥܰܡ̈ܡܶܐ.
5 ܘܠܳܐ ܢܶܬܩܪܶܐ ܬܽܘܒ ܫܡܳܟ ܐܰܒܪܰܡ: ܐܶܠܳܐ ܢܶܗܘܶܐ ܫܡܳܟ ܐܰܒܪܳܗܳܡ: ܡܶܛܽܠ ܕܰܐܒܳܐ ܠܣܽܘܓܳܐܐ ܕܥܰܡ̈ܡܶܐ ܝܰܗܒܬܳܟ.
6 ܘܰܐܦܪܶܝܟ ܘܰܐܣܓܶܝܟ ܛܳܒ ܛܳܒ: ܘܶܐܬܠܳܟ ܠܥܰܡ̈ܡܶܐ. ܘܡܰܠܟ̈ܶܐ ܡܶܢ ܚܰܨܳܟ ܢܶܦܩܽܘܢ.
7 ܘܰܐܩܺܝܡ ܩܝܳܡܝ ܒܰܝ̈ܢܰܝ ܘܠܳܟ: ܘܒܶܝܬ ܙܰܪܥܳܟ ܡܶܢ ܒܳܬܪܳܟ ܠܕܳܖ̈ܰܝܗܽܘܢ ܠܰܩܝܳܡܳܐ ܕܰܠܥܳܠܰܡ: ܘܶܐܗܘܶܐ ܠܳܟ ܐܰܠܳܗܳܐ ܘܰܠܙܰܪܥܳܟ ܡܶܢ ܒܳܬܪܳܟ.
8 ܘܶܐܬܶܠ ܠܳܟ ܘܰܠܙܰܪܥܳܟ ܡܶܢ ܒܳܬܪܳܟ ܐܰܪܥܳܐ ܕܡܰܥܡܪܳܟ: ܟܽܠܳܗ̇ ܐܰܪܥܳܐ ܕܰܟܢܰܥܢ ܠܝܽܘܪܬܳܢܳܐ ܕܰܠܥܳܠܰܡ. ܘܶܐܗܘܶܐ ܠܗܽܘܢ ܐܰܠܳܗܳܐ.
9 ܘܶܐܡܰܪ ܐܰܠܳܗܳܐ ܠܰܐܒܪܳܗܳܡ: ܐܰܢ̱ܬ ܩܝܳܡܝ ܛܰܪ: ܐܰܢ̱ܬ ܘܙܰܪܥܳܟ ܡܶܢ ܒܳܬܪܳܟ ܠܕܳܖ̈ܰܝܗܽܘܢ.
10 ܗܳܢܰܘ ܩܝܳܡܝ ܕܬܶܛܪܽܘܢ ܒܰܝ̈ܢܰܝ ܘܰܠܟܽܘܢ: ܘܒܶܝܬ ܙܰܪܥܳܟ ܡܶܢ ܒܳܬܪܳܟ: ܕܬܶܓܙܪܽܘܢ ܟܽܠ ܕܶܟܪܳܐ.
11 ܘܬܶܓܙܪܽܘܢ ܒܶܣܪܳܐ ܕܥܽܘܪܠܽܘܬܟܽܘܢ: ܘܬܶܗܘܶܐ ܐܳܬܳܐ ܕܰܩܝܳܡܳܐ ܒܰܝ̈ܢܰܝ ܘܰܠܟܽܘܢ.
12 ܘܒܰܪ ܬܡܳܢܝܳܐ ܝܰܘܡܺܝ̈ܢ ܢܶܓܙܽܘܪ ܡܶܢܟܽܘܢ ܟܽܠ ܕܶܟܪܳܐ ܠܕܳܖ̈ܰܝܟܽܘܢ: ܝܺܠܺܝܕ ܒܰܝܬܳܐ: ܘܰܙܒܺܝܢ ܟܶܣܦܳܐ: ܡܶܢ ܟܽܠ ܒܰܪ ܢܽܘܟܖ̈ܳܝܶܐ ܕܠܳܐ ܗܘܳܐ ܡܶܢ ܙܰܪܥܳܟ.
13 ܡܶܓܙܰܪ ܢܶܓܙܽܘܪ ܝܺܠܺܝܕ ܒܰܝܬܳܟ ܘܰܙܒܺܝܢ ܟܶܣܦܳܟ: ܘܢܶܗܘܶܐ ܩܝܳܡܝ ܒܒܶܣܪܟܽܘܢ ܠܰܩܝܳܡܳܐ ܕܰܠܥܳܠܰܡ.
14 ܘܥܽܘܪܠܳܐ ܕܶܟܪܳܐ ܕܠܳܐ ܢܶܓܙܽܘܪ ܒܶܣܪܳܐ ܕܥܽܘܪܠܽܘܬܶܗ: ܬܺܐܒܰܕ ܢܰܦܫܳܐ ܗܳܝ ܡܶܢ ܥܰܡܳܗ̇: ܩܝܳܡܝ ܒܰܛܠܰܬ.
15 ܘܶܐܡܰܪ ܐܰܠܳܗܳܐ ܠܰܐܒܪܳܗܳܡ: ܣܰܪܰܝ ܐܰܢ̱ܬܬܳܟ ܠܳܐ ܬܶܩܪܶܐ ܫܡܳܗ̇ ܣܰܪܰܝ: ܡܶܛܽܠ ܕܣܰܪܳܐ ܫܡܳܗ̇.
16 ܘܶܐܒܰܪܟܺܝܗ̇ ܘܳܐܦ ܐܶܬܶܠ ܠܳܟ ܒܪܳܐ ܡܶܢܳܗ̇: ܘܶܐܒܰܪܟܺܝܘܗܝ ܘܢܶܗܘܶܐ ܠܥܰܡ̈ܡܶܐ: ܘܡܰܠܟ̈ܶܐ ܕܥܰܡ̈ܡܶܐ ܡܶܢܶܗ ܢܶܗܘܽܘܢ.
17 ܘܰܢܦܰܠ ܐܰܒܪܳܗܳܡ ܥܰܠ ܐܰܦܰܘ̈ܗܝ ܘܰܓܚܶܟ: ܘܶܐܡܰܪ ܒܠܶܒܶܗ: ܠܒܰܪ ܡܳܐܐ ܫܢܺܝ̈ܢ ܢܶܬܺܝܠܶܕ ܒܪܳܐ: ܐܰܘ ܣܰܪܳܐ ܒܰܪܬ ܬܶܫܥܺܝܢ ܫܢܺܝ̈ܢ ܬܺܐܠܰܕ.
18 ܘܶܐܡܰܪ ܐܰܒܪܳܗܳܡ ܠܰܐܠܳܗܳܐ: ܐܶܫܬܽܘܦ ܕܶܝܢ ܐܺܝܫܡܳܥܺܝܠ ܢܺܚܶܐ ܩܕܳܡܰܝܟ.
19 ܘܶܐܡܰܪ ܐܰܠܳܗܳܐ ܠܰܐܒܪܳܗܳܡ: ܫܰܪܺܝܪܳܐܺܝܬ ܣܰܪܳܐ ܐܰܢ̱ܬܬܳܟ ܝܳܠܕܳܐ ܠܳܟ ܒܪܳܐ: ܘܩܳܪܶܐ ܐܰܢ̱ܬ ܫܡܶܗ ܐܺܝܣܚܳܩ: ܘܰܐܩܺܝܡ ܩܝܳܡܝ ܥܰܡܶܗ ܠܰܩܝܳܡܳܐ ܕܰܠܥܳܠܰܡ: ܘܰܠܙܰܪܥܶܗ ܡܶܢ ܒܳܬܪܶܗ.
20 ܘܥܰܠ ܐܺܝܫܡܳܥܺܝܠ ܫܡܰܥܬܳܟ: ܗܳܐ ܒܰܪܶܟܬܶܗ ܘܰܐܣܓܺܝܬܶܗ: ܘܰܐܟܒܰܪܬܶܗ ܛܳܒ ܛܳܒ: ܬܪܶܥܣܰܪ ܪܰܘܖ̈ܒܳܢܺܝܢ ܢܰܘܠܶܕ: ܘܶܐܬܠܺܝܘܗܝ ܠܥܰܡܳܐ ܪܰܒܳܐ.
21 ܘܰܩܝܳܡܝ ܐܰܩܺܝܡ ܥܰܡ ܐܺܝܣܚܳܩ ܕܬܺܐܠܰܕ ܠܳܟ ܣܰܪܳܐ: ܠܙܰܒܢܳܐ ܗܳܢܳܐ ܠܫܰܢ̱ܬܳܐ ܐ̱ܚܪܺܬܳܐ.
22 ܘܟܰܕ ܫܰܠܶܡ ܠܰܡܡܰܠܳܠܽܘ ܥܰܡܶܗ: ܐܶܬܬܪܺܝܡ ܐܰܠܳܗܳܐ ܡܶܢ ܐܰܒܪܳܗܳܡ.
23 ܘܰܕܒܰܪ ܐܰܒܪܳܗܳܡ ܠܺܐܝܫܡܳܥܺܝܠ ܒܪܶܗ ܘܰܠܟܽܠ ܝܺܠܺܝ̈ܕܰܝ ܒܰܝܬܶܗ ܘܰܠܟܽܠ ܙܒܺܝ̈ܢܰܝ ܟܶܣܦܶܗ: ܟܽܠ ܕܶܟܪܳܐ ܒܐ̱ܢܳܫܰܝ̈ ܒܶܝܬ ܐܰܒܪܳܗܳܡ: ܘܰܓܙܰܪ ܒܶܣܪܳܐ ܕܥܽܘܪܠܽܘܬܗܽܘܢ ܒܶܗ ܒܝܰܘܡܳܐ ܗܳܢܳܐ: ܐܰܝܟ ܕܡܰܠܶܠ ܥܰܡܶܗ ܐܰܠܳܗܳܐ.
24 ܘܰܐܒܪܳܗܳܡ ܒܰܪ ܬܶܫܥܺܝܢ ܗܘܳܐ ܘܰܬܫܰܥ ܫܢܺܝ̈ܢ ܟܰܕ ܓܙܰܪ ܒܶܣܪܳܐ ܕܥܽܘܪܠܽܘܬܶܗ.
25 ܘܺܐܝܫܡܳܥܺܝܠ ܒܪܶܗ ܒܰܪ ܬܠܳܬܰܥܶܣܖ̈ܶܐ ܗܘܳܐ ܫܢܺܝ̈ܢ ܟܰܕ ܓܙܰܪ ܒܶܣܪܳܐ ܕܥܽܘܪܠܽܘܬܶܗ.
26 ܒܶܗ ܒܝܰܘܡܳܐ ܗܳܢܳܐ ܓܙܰܪ ܐܰܒܪܳܗܳܡ ܠܺܐܝܫܡܳܥܺܝܠ ܒܪܶܗ.
27 ܘܰܠܟܽܠܗܽܘܢ ܐ̱ܢܳܫܰܝ̈ ܒܰܝܬܶܗ: ܝܺܠܺܝ̈ܕܰܝ ܒܰܝܬܶܗ ܘܰܙܒܺܝ̈ܢܰܝ ܟܶܣܦܶܗ: ܘܳܐܦ ܒܢܰܝ̈ ܢܽܘܟܖ̈ܳܝܶܐ ܓܙܰܪ ܥܰܡܶܗ.