Genesis 3
The Book of Genesis
܀ ܒܪܝܬܐ ܓ ܀
1 ܘܚܶܘܝܳܐ ܥܪܺܝܡ ܗܘܳܐ ܡܶܢ ܟܽܠܳܗ̇ ܚܰܝܽܘܬܳܐ ܕܕܰܒܪܳܐ ܕܰܥ̣ܒܰܕ ܡܳܪܝܳܐ ܐܰܠܳܗܳܐ. ܘܶܐܡܰܪ ܚܶܘܝܳܐ ܠܰܐܢ̱ܬܬܳܐ: ܫܰܪܺܝܪܳܐܺܝܬ ܐܶܡܰܪ ܐܰܠܳܗܳܐ: ܕܠܳܐ ܬܶܐܟܠܽܘܢ ܡܶܢ ܐܺܝܠܳܢܰܝ̈ ܦܰܪܕܰܝܣܳܐ.
2 ܘܶܐܡܪܰܬ ܐܰܢ̱ܬܬܳܐ ܠܚܶܘܝܳܐ: ܕܡܶܢ ܦܺܐܖ̈ܰܝ ܐܺܝ̈ܠܳܢܶܐ ܕܰܒܦܰܪܕܰܝܣܳܐ ܟܽܠܗܽܘܢ ܢܶܐܟܽܘܠ.
3 ܘܡܶܢ ܦܺܐܖ̈ܰܝ ܐܺܝܠܳܢܳܐ ܕܒܰܡܨܰܥܬܶܗ ܕܦܰܪܕܰܝܣܳܐ: ܐܶܡܰܪ ܐܰܠܳܗܳܐ ܕܠܳܐ ܬܶܐܟܠܽܘܢ ܡܶܢܶܗ: ܘܠܳܐ ܬܶܬܩܰܪܒܽܘܢ ܠܶܗ: ܕܠܳܐ ܬܡܽܘܬܽܘܢ.
4 ܘܶܐܡܰܪ ܚܶܘܝܳܐ ܠܰܐܢ̱ܬܬܳܐ: ܠܳܐ ܡܡܳܬ ܬܡܽܘܬܽܘܢ.
5 ܡܶܛܽܠ ܕܝܳܕܰܥ ܐܰܠܳܗܳܐ ܕܰܒܝܰܘܡܳܐ ܕܳܐܟܠܺܝܢ ܐܰܢ̱ܬܽܘܢ ܡܶܢܶܗ: ܡܶܬܦ̈ܰܬܚܳܢ ܥܰܝܢܰܝ̈ܟܽܘܢ: ܘܗܳܘܶܝܢ ܐܢ̱ܬܽܘܢ ܐܰܝܟ ܐܰܠܳܗ̈ܶܐ: ܝܳܕܥܰܝ̈ ܛܳܒܬܳܐ ܘܒܺܝܫܬܳܐ.
6 ܘܰܚܙܳܬ ܐܰܢ̱ܬܬܳܐ ܕܫܰܦܺܝܪ ܐܺܝܠܳܢܳܐ ܠܡܶܐܟܰܠ: ܘܪܶܓܬܳܐ ܗ̱ܘ ܠܥܰܝ̈ܢܶܐ: ܘܰܪܓܺܝܓ ܐܺܝܠܳܢܳܐ ܠܰܡܚܳܪ ܒܶܗ. ܘܢܶܣܒܰܬ ܡܶܢ ܦܺܐܖ̈ܰܘܗܝ ܘܶܐܟܠܰܬ: ܘܝܶܗܒܰܬ ܐܳܦ ܠܒܰܥܠܳܗ̇ ܥܰܡܳܗ̇ ܘܶܐܟܰܠ.
7 ܘܶܐܬܦܬܰܚ̈ܝ ܥܰܝ̈ܢܶܐ ܕܰܬܖ̈ܰܝܗܽܘܢ: ܘܺܝܕܰܥܘ ܕܥܶܖ̈ܛܶܠܳܝܺܝܢ ܐܶܢܽܘܢ. ܘܕܰܒܶܩܘ ܛܰܖ̈ܦܶܐ ܕܬܺܐܢ̈ܶܐ: ܘܰܥܒܰܕܘ ܠܗܽܘܢ ܦܖ̈ܳܙܽܘܡܶܐ.
8 ܘܰܫܡܰܥܘ ܩܳܠܶܗ ܕܡܳܪܝܳܐ ܐܰܠܳܗܳܐ: ܕܰܡܗܰܠܶܟ ܒܦܰܪܕܰܝܣܳܐ ܠܦܳܢܝܶܗ ܕܝܰܘܡܳܐ. ܘܶܐܬܛܰܫܺܝܘ ܐܳܕܳܡ ܘܰܐܢ̱ܬܬܶܗ ܡܶܢ ܩܕܳܡ ܡܳܪܝܳܐ ܐܰܠܳܗܳܐ ܒܓܰܘ ܐܺܝ̈ܠܳܢܶܐ ܕܦܰܪܕܰܝܣܳܐ.
9 ܘܰܩܪܳܐ ܡܳܪܝܳܐ ܐܰܠܳܗܳܐ ܠܳܐܕܳܡ: ܘܶܐܡܰܪ ܠܶܗ: ܐܰܝܟܳܐ ܐܰܢ̱ܬ ܐܳܕܳܡ.
10 ܘܶܐܡܰܪ: ܩܳܠܳܟ ܫܶܡܥܶ݀ܬ ܒܦܰܪܕܰܝܣܳܐ: ܘܰܚܙܺܝ݀ܬ ܕܥܰܪܛܶܠܳܝ ܐ̱ܢܳܐ: ܘܶܐܬܛܰܫܺܝܬ.
11 ܘܶܐܡܰܪ ܠܶܗ ܡܳܪܝܳܐ: ܡܰܢܽܘ ܚܰܘܝܳܟ ܕܥܰܪܛܶܠܳܝ ܐܰܢ̱ܬ: ܗܳܐ ܡܶܢ ܐܺܝܠܳܢܳܐ ܕܦܰܩܶܕܬܳܟ ܕܠܳܐ ܬܶܐܟܽܘܠ ܡܶܢܶܗ ܐܶܟܠܶܬ.
12 ܘܶܐܡܰܪ ܐܳܕܳܡ: ܐܰܢ̱ܬܬܳܐ ܕܝܰܗܒܬ ܥܰܡܝ: ܗܺܝ ܝܶܗܒܰܬ ܠܺܝ ܡܶܢ ܐܺܝܠܳܢܳܐ: ܘܶܐܟܠܰܬ.
13 ܘܶܐܡܰܪ ܡܳܪܝܳܐ ܐܰܠܳܗܳܐ ܠܰܐܢ̱ܬܬܳܐ: ܡܳܢܰܘ ܗܳܢܳܐ ܕܰܥܒܰܕܬܝ: ܘܶܐܡܪܰܬ ܐܰܢ̱ܬܬܳܐ: ܚܶܘܝܳܐ ܐܰܛܥܝܰܢܝ ܘܶܐܟܠܶܬ.
14 ܘܶܐܡܰܪ ܡܳܪܝܳܐ ܐܰܠܳܗܳܐ ܠܚܶܘܝܳܐ: ܥܰܠ ܕܰܥܒܰܕܬ ܗܳܕܶܐ: ܠܺܝܛ ܐܰܢ̱ܬ ܡܶܢ ܟܽܠܳܗ̇ ܒܥܺܝܪܳܐ: ܘܡܶܢ ܟܽܠܳܗ̇ ܚܰܝܽܘܬܳܐ ܕܕܰܒܪܳܐ: ܘܥܰܠ ܟܰܪܣܳܟ ܬܗܰܠܶܟ: ܘܥܰܦܪܳܐ ܬܶܐܟܽܘܠ ܟܽܠ ܝܰܘܡܰܝ̈ ܚܰܝܰܝ̈ܟ.
15 ܘܰܒܥܶܠܕܒܳܒܽܘܬܳܐ ܐܶܣܺܝܡ ܒܰܝܢܰܝ̈ܟ ܠܰܐܢ̱ܬܬܳܐ: ܘܒܶܝܬ ܙܰܪܥܳܟ ܠܙܰܪܥܶܗ: ܗܽܘ ܢܕܽܘܫ ܪܺܝܫܳܟ: ܘܰܐܢ̱ܬ ܬܶܡܚܶܝܘܗܝ ܒܥܶܩܒܶܗ.
16 ܘܠܰܐܢ̱ܬܬܳܐ ܐܶܡܰܪ: ܡܰܣܓܳܝܽܘ ܐܰܣܓܶܐ ܟܺܐܒܰܝ̈ܟܝ ܘܒܰܛܢܰܝ̈ܟܝ: ܘܰܒܟܺܐܒ̈ܶܐ ܬܺܐܠܕܺܝܢ ܒܢܰܝ̈ܳܐ: ܘܥܰܠ ܒܰܥܠܶܟܝ ܬܶܬܦܢܺܝܢ: ܘܗܽܘ ܢܶܫܬܰܠܰܛ ܒܶܟܝ.
17 ܘܠܳܐܕܳܡ ܐܶܡܰܪ: ܥܰܠ ܕܰܫܡܰܥܬ ܒܩܳܠܳܐ ܕܰܐܢ̱ܬܬܳܟ: ܘܶܐܟܰܠܬ ܡܶܢ ܐܺܝܠܳܢܳܐ ܕܦܰܩܶܕܬܳܟ ܘܶܐܡܪܶܬ ܠܳܟ: ܕܠܳܐ ܬܶܐܟܽܘܠ ܡܶܢܶܗ: ܠܺܝܛܳܐ ܐܰܪܥܳܐ ܡܶܛܽܠܬܳܟ. ܒܟܺܐܒ̈ܶܐ ܬܶܐܟܠܺܝܗ̇ ܟܽܠ ܝܰܘ̈ܡܰܝ ܚܰܝܰܝ̈ܟ.
18 ܘܟܽܘ̈ܒܶܐ ܘܕܰܪܕܖ̈ܶܐ ܬܰܘܥܶܐ ܠܳܟ: ܘܬܶܐܟܽܘܠ ܥܶܣܒܳܐ ܕܚܰܩܠܳܐ.
19 ܘܰܒܕܽܘܥܬܳܐ ܕܰܐܦܰܝ̈ܟ ܬܶܐܟܽܘܠ ܠܰܚܡܳܐ: ܥܕܰܡܳܐ ܕܬܶܗܦܽܘܟ ܠܰܐܪܥܳܐ ܕܡܶܢܳܗ̇ ܐܶܬܢܣܶܒܬ. ܡܶܛܽܠ ܕܥܰܦܪܳܐ ܐܰܢ̱ܬ: ܘܰܠܥܰܦܪܳܐ ܬܶܗܦܽܘܟ.
20 ܘܰܩܪܳܐ ܐܳܕܳܡ ܫܡܳܐ ܕܰܐܢ̱ܬܬܶܗ ܚܰܘܳܐ: ܡܶܛܽܠ ܕܗܺܝ ܗܘܳܬ ܐܶܡܳܐ ܕܟܽܠ ܕܚܰܝ.
21 ܘܰܥܒܰܕ ܡܳܪܝܳܐ ܐܰܠܳܗܳܐ ܠܳܐܕܳܡ ܘܠܰܐܢ̱ܬܬܶܗ ܟܽܘܬܺܝܢ̈ܝܳܬܳܐ ܕܡܶܫܟܳܐ ܘܰܐܠܒܶܫ ܐܶܢܽܘܢ.
22 ܘܶܐܡܰܪ ܡܳܪܝܳܐ ܐܰܠܳܗܳܐ: ܗܳܐ ܐܳܕܳܡ ܗܘܳܐ ܐܰܝܟ ܚܰܕ ܡܶܢܰܢ: ܠܡܶܕܰܥ ܛܳܒܬܳܐ ܘܒܺܝܫܬܳܐ: ܗܳܫܳܐ ܕܰܠܡܳܐ ܢܰܘܫܶܛ ܐܺܝܕܶܗ ܘܢܶܣܰܒ ܐܳܦ ܡܶܢ ܐܺܝܠܳܢܳܐ ܕܚܰܝ̈ܶܐ ܘܢܶܐܟܽܘܠ ܘܢܺܚܶܐ ܠܥܳܠܰܡ.
23 ܘܫܰܕܪܶܗ ܡܳܪܝܳܐ ܐܰܠܳܗܳܐ ܡܶܢ ܦܰܪܕܰܝܣܳܐ ܕܰܥܕܶܢ: ܠܡܶܦܠܰܚ ܐܰܪܥܳܐ ܕܶܐܬܢܣܶܒ ܡܶܢ ܬܰܡܳܢ.
24 ܘܰܐܦܩܶܗ ܡܳܪܝܳܐ ܐܰܠܳܗܳܐ: ܘܰܐܟܪܶܟ ܡܶܢ ܡܰܕܢܳܚܰܝ̈ ܦܰܪܕܰܝܣܳܐ ܟܪܽܘܒܳܐ: ܘܰܫܢܳܢܳܐ ܕܚܰܪܒܳܐ: ܕܡܶܬܗܰܦܟܳܐ ܠܡܶܛܰܪ ܐܽܘܪܚܳܐ ܕܺܐܝܠܳܢܳܐ ܕܚܰܝ̈ܶܐ.