Genesis 27
The Book of Genesis
܀ ܒܪܝܬܐ ܟܙ ܀
1 ܘܰܗܘܳܐ ܕܟܰܕ ܣܐܶܒ ܐܺܝܣܚܳܩ: ܘܺܝܩܰܪ ܥܰܝܢܰܘ̈ܗܝ ܠܡܶܚܙܳܐ: ܩܪܳܐ ܠܥܺܝܣܽܘ ܒܪܶܗ ܪܰܒܳܐ ܘܶܐܡܰܪ ܠܶܗ: ܒܶܪܝ: ܘܶܐܡܰܪ ܗܳܐ ܐܶܢܳܐ.
2 ܐܶܡܰܪ ܠܶܗ ܐܺܝܣܚܳܩ: ܗܳܐ ܐܶܢܳܐ ܣܶܐܒܶܬ: ܘܠܳܐ ܝܳܕܰܥ ܐ̱ܢܳܐ ܝܰܘܡܳܐ ܕܡܳܐܶܬ ܐ̱ܢܳܐ ܒܶܗ.
3 ܗܳܫܳܐ ܣܰܒ ܡܳܐܢܰܝ̈ܟ ܣܰܝܦܳܟ ܘܩܶܫܬܳܟ.
4 ܘܦܽܘܩ ܠܕܰܒܪܳܐ: ܘܨܽܘܕ ܨܰܝܕܳܐ: ܘܰܥܒܶܕ ܒܽܘܫܳܠܳܐ ܐܰܝܟ ܕܪܶܚܡܶܬ: ܘܰܐܝܬܳܐ ܠܺܝ ܐܶܟܽܘܠ: ܡܶܛܽܠ ܕܰܬܒܰܪܟܳܟ ܢܰܦܫܝ ܥܰܕܠܳܐ ܐܶܡܽܘܬ.
5 ܘܪܰܦܩܰܐ ܫܶܡܥܰܬ: ܟܰܕ ܐܳܡܰܪ ܐܺܝܣܚܳܩ ܠܥܺܝܣܽܘ ܒܪܶܗ: ܘܶܐܙܰܠ ܥܺܝܣܽܘ ܠܚܰܩܠܳܐ ܠܰܡܨܳܕ ܨܰܝܕܳܐ ܠܡܰܝܬܳܝܽܘ.
6 ܘܪܰܦܩܰܐ ܐܶܡܪܰܬ ܠܝܰܥܩܽܘܒ ܒܪܳܗ̇: ܗܳܐ ܫܶܡܥܶܬ ܠܰܐܒܽܘܟ ܕܶܐܡܰܪ ܠܥܺܝܣܽܘ ܐܰܚܽܘܟ.
7 ܐܰܝܬܳܐ ܠܺܝ ܨܰܝܕܳܐ: ܘܰܥܒܶܕ ܠܺܝ ܒܽܘܫܳܠܳܐ: ܘܶܐܟܽܘܠ ܘܶܐܒܰܪܟܳܟ ܩܕܳܡ ܡܳܪܝܳܐ ܩܕܳܡ ܡܰܘܬܝ.
8 ܘܗܳܫܳܐ ܒܶܪܝ ܫܡܰܥ ܒܩܳܠܝ: ܠܡܶܕܶܡ ܕܰܡܦܰܩܕܳܐ ܐ̱ܢܳܐ ܠܳܟ.
9 ܙܶܠ ܠܥܳܢ̈ܳܐ: ܘܣܰܒ ܠܺܝ ܡܶܢ ܬܰܡܳܢ ܬܪܶܝܢ ܓܕܰܝ̈ܳܐ ܕܥܶܙ̈ܶܐ ܕܛܳܒܺܝܢ: ܘܶܐܥܒܶܕ ܐܶܢܽܘܢ ܒܽܘܫܳܠܳܐ ܠܰܐܒܽܘܟ ܐܰܝܟ ܕܪܳܚܶܡ.
10 ܘܰܐܥܶܠ ܠܰܐܒܽܘܟ ܘܢܶܐܟܽܘܠ: ܘܰܢܒܰܪܟܳܟ ܩܕܳܡ ܡܳܪܝܳܐ ܡܶܢ ܩܕܳܡ ܡܰܘܬܶܗ.
11 ܘܶܐܡܰܪ ܝܰܥܩܽܘܒ ܠܪܰܦܩܰܐ ܐܶܡܶܗ: ܗܳܐ ܥܺܝܣܽܘ ܐܳܚܝ ܓܒܰܪ ܣܥܰܪ. ܘܶܐܢܳܐ ܓܒܰܪ ܫܥܳܥ.
12 ܕܰܠܡܳܐ ܢܡܽܘܫܰܢܝ ܐܳܒܝ ܘܶܐܗܘܶܐ ܒܥܰܝܢܰܘ̈ܗܝ ܐܰܝܟ ܡܒܰܙܚܳܢܳܐ: ܘܬܰܝܬܶܝܢ ܥܠܰܝ ܠܰܘ̈ܛܳܬܳܐ ܘܠܳܐ ܒܽܘܖ̈ܟܳܬܳܐ.
13 ܘܶܐܡܪܰܬ ܠܶܗ ܐܶܡܶܗ: ܥܠܰܝ ܠܰܘ̈ܛܳܬܳܟ ܒܶܪܝ: ܒܰܠܚܽܘܕ ܫܡܰܥ ܒܩܳܠܝ: ܘܙܶܠ ܣܰܒ ܠܺܝ.
14 ܘܶܐܙܰܠ ܢܣܰܒ ܘܰܐܝܬܺܝ ܠܶܐܡܶܗ: ܘܥܶܒܕܰܬ ܒܽܘܫܳܠܳܐ ܐܰܝܟܰܢܳܐ ܕܪܳܚܶܡ ܐܰܒܽܘܗܝ.
15 ܘܢܶܣܒܰܬ ܪܰܦܩܰܐ ܡܳܐܢ̈ܶܐ ܕܥܺܝܣܽܘ ܒܪܳܗ̇ ܪܰܒܳܐ ܖ̈ܓܺܝܓܶܐ ܕܺܐܝܬ ܥܰܡܶܗ ܒܒܰܝܬܳܐ: ܘܰܐܠܒܫܰܬ ܠܝܰܥܩܽܘܒ ܒܪܳܗ̇ ܙܥܽܘܪܳܐ.
16 ܘܡܶܫܟܳܐ ܕܰܓܕܰܝ̈ܳܐ ܕܥܶܙ̈ܶܐ: ܐܰܠܒܫܰܬ ܥܰܠ ܐܺܝܕܰܘ̈ܗܝ ܘܥܰܠ ܫܥܳܥܽܘܬܳܐ ܕܨܰܘܪܶܗ.
17 ܘܝܶܗܒܰܬ ܒܽܘܫܳܠܳܐ ܘܠܰܚܡܳܐ ܕܥܶܒܕܰܬ ܠܝܰܥܩܽܘܒ ܒܪܳܗ̇.
18 ܘܰܐܥܶܠ ܠܰܐܒܽܘܗܝ: ܘܶܐܡܰܪ: ܐܳܒܝ: ܘܶܐܡܰܪ ܗܳܐ ܐܶܢܳܐ: ܘܶܐܡܰܪ: ܡܰܢ ܐܰܢ̱ܬ ܒܶܪܝ.
19 ܘܶܐܡܰܪ ܝܰܥܩܽܘܒ ܠܰܐܒܽܘܗܝ: ܐܶܢܳܐ ܗ̱ܘ ܒܪܳܟ ܒܽܘܟܪܳܟ ܥܺܝܣܽܘ: ܥܶܒܕܶܬ ܐܰܝܟ ܕܶܐܡܰܪܬ ܠܺܝ: ܩܽܘܡ ܬܶܒ ܐܰܟܽܘܠ ܡܶܢ ܨܰܝܕܝ: ܡܶܛܽܠ ܕܰܬܒܰܪܟܰܢܝ ܢܰܦܫܳܟ.
20 ܘܶܐܡܰܪ ܐܺܝܣܚܳܩ ܠܰܒܪܶܗ: ܡܳܢܰܐ ܗ̱ܘ ܗܳܢܳܐ ܕܒܰܥܓܰܠ ܐܶܫܟܰܚܬ ܒܶܪܝ: ܘܶܐܡܰܪ ܡܶܕܶܡ ܕܛܰܝܶܒ ܡܳܪܝܳܐ ܐܰܠܳܗܳܟ ܩܕܳܡܰܝ.
21 ܘܶܐܡܰܪ ܐܺܝܣܚܳܩ ܠܝܰܥܩܽܘܒ ܒܪܶܗ: ܩܪܽܘܒ ܢܺܐ ܐܶܡܽܘܫܳܟ ܒܶܪܝ: ܐܶܢ ܐܰܢ̱ܬܽ ܗ̱ܘ ܒܶܪܝ ܥܺܝܣܽܘ ܐܰܘ ܠܳܐ.
22 ܘܰܩܪܶܒ ܝܰܥܩܽܘܒ ܠܘܳܬ ܐܺܝܣܚܳܩ ܐܰܒܽܘܗܝ: ܘܡܳܫܶܗ ܘܶܐܡܰܪ: ܩܳܠܳܐ ܕܝܰܥܩܽܘܒ : ܘܓܶܫܰܬ ܐܺܝܕܰܝ̈ܳܐ ܕܥܺܝܣܽܘ.
23 ܘܠܳܐ ܐܶܫܬܰܘܕܥܶܗ: ܡܶܛܽܠ ܕܰܗ̈ܘܰܝ ܐܺܝܕܰܘ̈ܗܝ ܐܰܝܟ ܐܺܝ̈ܕܰܝ ܥܺܝܣܽܘ ܐܰܚܽܘܗܝ ܣܰܥܖ̈ܳܢ: ܘܒܰܪܟܶܗ.
24 ܘܶܐܡܰܪ: ܐܰܢ̱ܬ ܗܽܘ ܗܳܢܳܐ ܒܶܪܝ ܥܺܝܣܽܘ: ܘܶܐܡܰܪ ܐܶܢܳܐ ܗܽܘ.
25 ܘܶܐܡܰܪ ܠܶܗ: ܩܰܪܶܒ ܠܺܝ ܐܶܟܽܘܠ ܡܶܢ ܨܰܝܕܳܐ ܕܒܶܪܝ: ܡܶܛܽܠ ܕܰܬܒܰܪܟܳܟ ܢܰܦܫܝ: ܘܩܰܪܶܒ ܠܶܗ ܘܰܠܥܶܣ: ܘܰܐܥܶܠ ܠܶܗ ܚܰܡܪܳܐ ܘܶܐܫܬܺܝ.
26 ܘܶܐܡܰܪ ܠܶܗ ܐܺܝܣܚܳܩ ܐܰܒܽܘܗܝ: ܩܪܽܘܒ ܘܫܽܘܩܰܝܢܝ ܒܶܪܝ: ܘܰܩܪܶܒ ܘܢܰܫܩܶܗ.
27 ܘܰܐܪܺܝܚ ܪܺܝܚܳܐ ܕܡܰܐܢܽܘ̈ܗܝ: ܘܒܰܪܟܶܗ ܘܶܐܡܰܪ: ܚܙܰܘ ܪܺܝܚܶܗ ܕܒܶܪܝ: ܐܰܝܟ ܪܺܝܚܳܐ ܕܚܰܩܠܳܐ ܕܒܰܪܟܶܗ ܡܳܪܝܳܐ.
28 ܢܶܬܶܠ ܠܳܟ ܐܰܠܳܗܳܐ ܡܶܢ ܛܰܠܳܐ ܕܰܫܡܰܝܳܐ: ܘܡܶܢ ܫܽܘܡܢܳܗ̇ ܕܰܐܪܥܳܐ: ܘܣܽܘܓܳܐܐ ܕܰܥܒܽܘܪܳܐ ܘܰܕܚܰܡܪܳܐ.
29 ܢܶܦܠܚܽܘܢܳܟ ܥܰܡ̈ܡܶܐ: ܘܢܶܣܓ̈ܕܳܢ ܠܳܟ ܐܶܡܘ̈ܳܬܳܐ: ܗܘܺܝ ܪܺܫܳܐ ܠܰܐܚܰܝ̈ܟ: ܘܢܶܣܓܕܽܘܢ ܠܳܟ ܒܢܰܝ̈ ܐܶܡܳܟ. ܠܺܝ̈ܛܰܝܟ ܠܺܝܛܺܝܢ: ܘܰܒܖ̈ܺܝܟܰܝܟ ܒܪܺܝܟܺܝܢ.
30 ܘܟܰܕ ܫܰܠܶܡ ܐܺܝܣܚܳܩ ܠܰܡܒܰܪܳܟܽܘܬܶܗ ܠܝܰܥܩܽܘܒ: ܘܰܢܦܰܩ ܝܰܥܩܽܘܒ ܡܶܢ ܠܘܳܬ ܐܺܝܣܚܳܩ ܐܰܒܽܘܗܝ: ܘܗܳܐ ܥܺܝܣܽܘ ܐܰܚܽܘܗܝ ܐܶܬܳܐ ܡܶܢ ܨܰܝܕܶܗ.
31 ܘܰܥܒܰܕ ܐܳܦ ܗܽܘ ܒܽܘܫܳܠܳܐ: ܘܰܐܥܶܠ ܠܰܐܒܽܘܗܝ. ܘܶܐܡܰܪ ܠܰܐܒܽܘܗܝ: ܢܩܽܘܡ ܐܳܒܝ ܘܢܶܠܥܰܣ ܡܶܢ ܨܰܝܕܳܐ ܕܰܒܪܶܗ: ܡܶܛܽܠ ܕܰܬܒܰܪܟܰܢܝ ܢܰܦܫܳܟ.
32 ܐܶܡܰܪ ܠܶܗ ܐܺܝܣܚܳܩ ܐܰܒܽܘܗܝ ܡܰܢ ܐܰܢ̱ܬ: ܘܶܐܡܰܪ ܐܶܢܳܐ ܗ̱ܘ ܒܪܳܟ ܒܽܘܟܪܳܟ ܥܺܝܣܽܘ.
33 ܘܰܬܘܰܗ ܐܺܝܣܚܳܩ ܬܰܘܗܬܳܐ ܪܰܒܬܳܐ ܘܥܰܫܺܝܢܬܳܐ ܕܛܳܒ. ܘܶܐܡܰܪ ܡܰܢܽܘ ܟܰܝ ܗܰܘ ܕܨܳܕ ܨܰܝܕܳܐ ܘܰܐܝܬܺܝ ܠܺܝ: ܘܠܶܥܣܶܬ ܡܶܢ ܟܽܠ ܥܰܕܠܳܐ ܬܺܐܬܶܐ ܘܒܰܪܶܟܬܶܗ ܘܳܐܦ ܒܪܺܝܟ ܢܶܗܘܶܐ.
34 ܘܟܰܕ ܫܡܰܥ ܥܺܝܣܽܘ ܡܶܠܰܘ̈ܗܝ ܕܰܐܒܽܘܗܝ: ܐܰܝܠܶܠ ܐܺܝܠܰܠܬܳܐ ܪܰܒܬܳܐ ܘܡܰܪܺܝܪܬܳܐ ܕܛܳܒ: ܘܶܐܡܰܪ ܠܰܐܒܽܘܗܝ: ܒܰܪܟܰܝܢܝ ܐܳܦ ܠܺܝ ܐܳܒܝ.
35 ܐܶܡܰܪ ܠܶܗ ܐܰܒܽܘܗܝ: ܥ̣ܰܠ ܐܰܚܽܘܟ ܒܢܶܟܠܳܐ: ܘܩܰܒܶܠ ܐܶܢܶܝܢ ܒܽܘܖ̈ܟܳܬܳܟ.
36 ܘܶܐܡܰܪ ܥܺܝܣܽܘ: ܫܰܪܺܝܪܳܐܺܝܬ ܐܶܬܩܪܺܝ ܫܡܶܗ ܝܰܥܩܽܘܒ: ܕܢܰܟܠܰܢܝ ܗܳܐ ܬܰܪܬܶܝܢ ܙܰܒܢܺܝ̈ܢ: ܘܒܽܘܟܪܽܘܬܝ ܢܣܰܒ: ܘܗܳܫܳܐ ܗܳܐ ܩܰܒܶܠ ܒܽܘܖ̈ܟܳܬܝ: ܘܶܐܡܰܪ ܥܺܝܣܽܘ ܠܰܐܒܽܘܗܝ: ܠܺܝ ܠܳܐ ܫܒܰܩܬ ܒܽܘܪܟܬܳܐ.
37 ܥܢܳܐ ܐܺܝܣܚܳܩ ܘܶܐܡܰܪ ܠܥܺܝܣܽܘ: ܗܳܐ ܪܺܝܫܳܐ ܥܒܰܕܬܶܗ ܠܳܟ: ܘܳܐܦ ܟܽܠܗܽܘܢ ܐܰܚܰܘ̈ܗܝ ܝܶܗܒܶܬ ܠܶܗ ܥܰܒ̈ܕܶܐ: ܘܒܰܥܒܽܘܪܳܐ ܘܰܒܚܰܡܪܳܐ ܣܰܡܶܟܬܶܗ: ܘܠܳܟ ܗܳܟܺܝܠ ܡܳܢܳܐ ܐܶܥܒܶܕ ܒܶܪܝ.
38 ܘܶܐܡܰܪ ܥܺܝܣܽܘ ܠܰܐܒܽܘܗܝ: ܒܽܘܪܟܬܳܐ ܚܕܳܐ ܗ̱ܝ ܠܳܟ ܐܳܒܝ: ܒܰܪܟܰܝܢܝ ܐܳܦ ܠܺܝ ܐܳܒܝ: ܘܰܐܪܺܝܡ ܥܺܝܣܽܘ ܩܳܠܶܗ ܘܰܒܟܳܐ.
39 ܥܢܳܐ ܐܺܝܣܚܳܩ ܐܰܒܽܘܗܝ ܘܶܐܡܰܪ ܠܶܗ: ܗܳܐ ܒܫܽܘܡܢܳܗ̇ ܕܰܐܪܥܳܐ ܢܶܗܘܶܐ ܡܰܘܬܒܳܟ: ܘܡܶܢ ܛܰܠܳܐ ܕܰܫܡܰܝܳܐ ܡܶܢ ܠܥܶܠ.
40 ܘܥܰܠ ܚܰܪܒܳܟ ܬܺܚܶܐ: ܘܠܰܐܚܽܘܟ ܬܶܦܠܽܘܚ. ܘܶܐܢ ܬܬܽܘܒ: ܢܶܥܒܰܪ ܢܺܝܪܶܗ ܡܶܢ ܨܰܘܪܳܟ.
41 ܘܰܣܩܰܪ ܥܺܝܣܽܘ ܠܝܰܥܩܽܘܒ ܥܰܠ ܒܽܘܖ̈ܟܳܬܳܐ ܕܒܰܪܟܶܗ ܐܰܒܽܘܗܝ. ܘܶܐܡܰܪ ܥܺܝܣܽܘ ܒܠܶܒܶܗ: ܢܶܩܪܒܽܘܢ ܝܰܘ̈ܡܳܬܳܐ ܕܒܶܝܬ ܒܳܟܰܘ̈ܗܝ ܕܳܐܒܝ: ܘܶܐܩܛܠܺܝܘܗܝ ܠܝܰܥܩܽܘܒ ܐܳܚܝ.
42 ܘܶܐܬܶܐܡܰܪ ܠܪܰܦܩܰܐ ܡܶܠܰܘ̈ܗܝ ܕܥܺܝܣܽܘ ܒܪܳܗ̇ ܩܰܫܺܝܫܳܐ: ܘܫܰܕܪܰܬ ܩܪܳܬ ܠܝܰܥܩܽܘܒ ܒܪܳܗ̇ ܙܥܽܘܪܳܐ: ܘܶܐܡܪܰܬ ܠܶܗ: ܗܳܐ ܥܺܝܣܽܘ ܐܰܚܽܘܟ ܡܶܬܠܰܚܰܡ ܠܳܟ ܠܡܶܩܛܠܳܟ.
43 ܗܳܫܳܐ ܒܶܪܝ ܫܡܰܥ ܒܩܳܠܝ: ܘܩܽܘܡ ܙܶܠ ܠܳܟ ܠܘܳܬ ܠܳܒܳܢ ܐܳܚܝ ܠܚܳܪܳܢ. ܘܬܶܒ ܬܰܡܳܢ ܝܰܘ̈ܡܳܬܳܐ ܙܥܽܘܖ̈ܶܐ ܥܕܰܡܳܐ ܕܢܶܬܬܢܺܝܚ ܪܽܘܓܙܶܗ ܕܰܐܚܽܘܟ.
44 ܘܰܥܕܰܡܳܐ ܕܢܶܥܒܰܪ ܪܽܘܓܙܶܗ ܕܰܐܚܽܘܟ ܡܶܢܳܟ: ܘܢܶܛܥܶܐ ܡܶܕܶܡ ܕܰܥܒܰܕܬ ܠܶܗ: ܘܶܐܫܰܕܰܪ ܘܶܐܕܒܪܳܟ ܡܶܢ ܬܰܡܳܢ: ܕܠܳܐ ܐܶܬܓܰܙܶܐ ܐܳܦ ܡܶܢ ܬܖ̈ܰܝܟܽܘܢ ܒܝܰܘܡܳܐ ܚܰܕ.
45 ܘܶܐܡܪܰܬ ܪܰܦܩܰܐ ܠܺܐܝܣܚܳܩ. ܥܳܩܰܬ ܠܺܝ ܒܚܰܝܰܝ̈ ܡܶܢ ܩܕܳܡ ܒܢ̈ܳܬ ܚܺܝܬ. ܐܶܢ ܢܶܣܰܒ ܝܰܥܩܽܘܒ ܐܰܢ̱ܬܬܳܐ ܡܶܢ ܒܢ̈ܳܬ ܚܺܝܬ ܐܰܝܟ ܗܳܠܶܝܢ ܒܢ̈ܳܬ ܐܰܪܥܳܐ: ܠܡܳܢܳܐ ܐܳܙܺܠܝܢ ܠܺܝ ܚܰܝ̈ܶܐ.