Genesis 6
The Book of Genesis
܀ ܒܪܝܬܐ ܘ ܀
1 ܘܰܗܘܳܐ ܕܟܰܕ ܫܰܪܺܝܘ ܒܢܰܝ̈ܢܳܫܳܐ ܠܡܶܣܓܳܐ ܥܰܠ ܐܰܦܰܝ̈ ܐܰܪܥܳܐ: ܘܰܒ̈ܢܳܬܳܐ ܐܶܬܺܝܠܶܕ̈ܝ ܠܗܽܘܢ: ܚܙܰܘ ܒܢܰܝ̈ ܐܰܠܽܘܗܺܝܡ ܠܰܒ̈ܢܳܬ ܐ̱ܢܳܫ̈ܳܐ ܕܫܰܦܺܝܖ̈ܳܢ ܐܶܢܶܝܢ.
2 ܘܰܢܣܰܒܘ ܐܶܢܶܝܢ ܠܗܽܘܢ ܢܶܫ̈ܶܐ ܡܶܢ ܟܽܠ ܕܰܓܒܰܘ.
3 ܘܶܐܡܰܪ ܡܳܪܝܳܐ: ܠܳܐ ܬܶܥܡܰܪ ܪܽܘܚܝ ܒܐ̱ܢܳܫ̈ܳܐ ܠܥܳܠܰܡ: ܡܶܛܽܠ ܕܒܶܣܪܳܐ ܗ̱ܘ: ܘܢܶܗܘܽܘܢ ܝܰܘ̈ܡܳܬܶܗ ܡܳܐܐ ܘܥܶܣܪܺܝܢ ܫܢܺܝ̈ܢ.
4 ܘܓܰܢ̱ܒܳܖ̈ܶܐ ܗܘܰܘ ܒܰܐܪܥܳܐ: ܒܝܰܘ̈ܡܳܬܳܐ ܗܳܢܽܘܢ ܘܳܐܦ ܡܶܢ ܒܳܬܰܪܟܶܢ: ܡܶܛܽܠ ܕܥܰܠ ܒܢܰܝ̈ ܐܰܠܽܘܗܺܝܡ ܥܰܠ ܒܢ̈ܳܬ ܐ̱ܢܳܫ̈ܳܐ: ܘܺܝܠܶܕ̈ܝ ܠܗܽܘܢ ܓܰܢ̱ܒܳܖ̈ܶܐ ܕܡܶܢ ܥܳܠܰܡ ܓܰܢ̱ܒܳܖ̈ܶܐ ܕܰܫܡܳܗ̈ܳܬܳܐ.
5 ܘܰܚܙܳܐ ܡܳܪܝܳܐ ܕܣܶܓܝܰܬ ܒܺܝܫܬܳܐ ܒܰܐܪܥܳܐ: ܘܟܽܠ ܝܰܨܪܳܐ ܕܡܰܚܫܰܒܬܳܐ ܕܠܶܒܶܗ ܒܺܝܫ ܒܟܽܠܝܽܘܡ.
6 ܘܶܐܬܬܘܰܚ ܡܳܪܝܳܐ ܥܰܠ ܕܰܥ̣ܒܰܕ ܠܳܐܕܳܡ ܒܰܐܪܥܳܐ: ܘܟܶܪܝܰܬ ܒܠܶܒܶܗ.
7 ܘܶܐܡܰܪ ܡܳܪܝܳܐ ܐܶܥܛܶܐ ܠܰܒܢܰܝ̈ܢܳܫܳܐ ܕܰܒܪܺܝܬ ܡܶܢ ܐܰܦܰܝ̈ ܐܰܪܥܳܐ: ܡܶܢ ܒܢܰܝ̈ܢܳܫܳܐ ܘܰܥܕܰܡܳܐ ܠܰܒܥܺܝܪܳܐ: ܘܰܥܕܰܡܳܐ ܠܪܰܚܫܳܐ: ܘܰܥܕܰܡܳܐ ܠܦܳܪܰܚܬܳܐ ܕܰܫܡܰܝܳܐ: ܡܶܛܽܠ ܕܶܐܬܬܰܘܚܶܬ ܕܥܶܒܕܶܬ ܐܶܢܽܘܢ.
8 ܘܢܽܘܚ ܐܶܫܟܰܚ ܖ̈ܰܚܡܶܐ ܒܥܰܝ̈ܢܰܝ ܡܳܪܝܳܐ.
9 ܘܗܳܠܶܝܢ ܬܰܘܠܕ̈ܳܬܶܗ ܕܢܽܘܚ: ܢܽܘܚ ܓܒܰܪ ܙܰܕܺܝܩ ܘܬܰܡܺܝܡ ܗܘܳܐ ܒܕܳܖ̈ܰܘܗܝ: ܘܰܫܦܰܪ ܢܽܘܚ ܠܰܐܠܳܗܳܐ.
10 ܘܰܐܘܠܶܕ ܢܽܘܚ ܬܠܳܬܳܐ ܒܢܺܝ̈ܢ: ܠܫܺܝܡ: ܘܰܠܚܰܡ: ܘܰܠܝܰܦܬ.
11 ܘܶܐܬܚܰܒܠܰܬ ܐܰܪܥܳܐ ܩܕܳܡ ܐܰܠܳܗܳܐ: ܘܶܐܬܡܰܠܝܰܬ ܐܰܪܥܳܐ ܥܰܘܠܳܐ.
12 ܘܰܚܙܳܐ ܐܰܠܳܗܳܐ ܠܰܐܪܥܳܐ ܕܶܐܬܚܰܒܠܰܬ: ܡܶܛܽܠ ܕܚܰܒܶܠ ܟܽܠ ܒܣܰܪ ܐܽܘܪܚܶܗ ܥܰܠ ܐܰܪܥܳܐ.
13 ܘܶܐܡܰܪ ܐܰܠܳܗܳܐ ܠܢܽܘܚ: ܩܶܨܳܐ ܕܟܽܠ ܒܣܰܪ ܥܰܠ ܩܕܳܡܰܝ: ܡܶܛܽܠ ܕܶܐܬܡܰܠܝܰܬ ܐܰܪܥܳܐ ܥܰܘܠܳܐ ܡܶܢ ܩܕܳܡܰܝܗܽܘܢ: ܗܳܐ ܡܚܰܒܶܠ ܐ̱ܢܳܐ ܠܗܽܘܢ ܥܰܡ ܐܰܪܥܳܐ.
14 ܛܽܘܝܳܒܳܐ: ܥܒܶܕ ܠܳܟ ܩܺܒܽܘܬܳܐ ܕܩܰܝܣܳܐ ܕܥܰܪܩܳܐ: ܡܶܕܝܳܖ̈ܶܐ ܥܒܶܕܶܝܗ̇ ܠܩܺܒܽܘܬܳܐ: ܘܫܽܘܥܶܝܗ̇ ܡܶܢ ܠܒܰܪ ܘܡܶܢ ܠܓܰܘ ܒܟܽܘܦܪܳܐ.
15 ܘܗܳܟܰܢܳܐ ܥܒܶܕܶܝܗ̇: ܬܠܳܬܡܳܐܐ ܐܰܡܺܝ̈ܢ ܐܽܘܪܟܳܗ̇ ܕܩܺܒܽܘܬܳܐ: ܘܚܰܡܫܺܝܢ ܐܰܡܺܝ̈ܢ ܦܬܳܝܳܗ̇: ܘܰܬܠܳܬܺܝܢ ܐܰܡܺܝ̈ܢ ܪܰܘܡܳܗ̇.
16 ܘܰܙܘܺܝܕ̈ܢܶܐ ܥܒܶܕ ܠܩܺܒܽܘܬܳܐ: ܘܥܰܠ ܐܰܡܳܐ ܣܰܝܟܶܝܗ̇ ܡܶܢ ܠܥܶܠ: ܘܬܰܪܥܳܗ̇ ܕܩܺܒܽܘܬܳܐ ܒܣܶܛܪܳܗ̇ ܥܒܶܕ: ܡܶܕܝܳܪܳܐ ܬܰܚܬܳܝܳܐ: ܘܬܶܢܝܳܢܳܐ: ܘܰܬܠܺܝܬܳܝܳܐ: ܥܒܶܕܶܝܗ̇.
17 ܘܶܐܢܳܐ ܗܳܐ ܡܰܝܬܶܐ ܐ̱ܢܳܐ ܛܰܘܦܳܢܳܐ ܕܡܰܝ̈ܳܐ ܥܰܠ ܐܰܪܥܳܐ: ܠܰܡܚܰܒܳܠܽܘ ܟܽܠ ܒܣܰܪ ܕܺܐܝܬ ܒܶܗ ܪܽܘܚܳܐ ܕܚܰܝ̈ܶܐ ܡܶܢ ܬܚܶܝܬ ܫܡܰܝܳܐ: ܘܟܽܠ ܕܒܰܐܪܥܳܐ ܗ̱ܘ ܢܣܽܘܦ.
18 ܘܰܐܩܺܝܡ ܩܝܳܡܝ ܥܰܡܳܟ: ܘܬܶܥܽܘܠ ܠܩܺܒܽܘܬܳܐ ܐܰܢ̱ܬ ܘܰܒܢܰܝ̈ܟ: ܘܰܐܢ̱ܬܬܳܟ: ܘܢܶܫ̈ܶܐ ܕܰܒܢܰܝ̈ܟ ܥܰܡܳܟ.
19 ܘܡܶܢ ܟܽܠ ܕܚܰܝ ܡܶܢ ܟܽܠ ܒܣܰܪ: ܬܪܶܝܢ ܬܪܶܝܢ ܐܰܥܶܠ ܠܩܺܒܽܘܬܳܐ ܠܡܰܚܳܝܽܘ ܥܰܡܳܟ: ܕܶܟܖ̈ܶܐ ܘܢܶܩ̈ܒܳܬܳܐ ܢܶܗܘܽܘܢ.
20 ܘܡܶܢ ܦܳܪܰܚܬܳܐ ܠܓܶܢܣܳܗ̇: ܘܡܶܢ ܒܥܺܝܪܳܐ ܠܓܶܢܣܳܗ̇ ܘܡܶܢ ܟܽܠ ܪܰܚܫܳܐ ܕܰܐܪܥܳܐ ܠܓܶܢܣܰܘ̈ܗܝ: ܬܪܶܝܢ ܬܪܶܝܢ ܡܶܢ ܟܽܠ ܢܶܥܠܽܘܢ ܥܰܡܳܟ ܠܡܶܚܳܐ.
21 ܘܰܐܢ̱ܬ ܣܰܒ ܠܳܟ ܡܶܢ ܟܽܠ ܡܶܐܟܠܳܐ ܕܡܶܬܶܐܟܶܠ: ܘܰܚܡܽܘܠ ܠܘܳܬܳܟ: ܘܢܶܗܘܶܐ ܠܳܟ ܘܰܠܗܽܘܢ ܠܡܶܐܟܽܘܠܬܳܐ.
22 ܘܰܥܒܰܕ ܢܽܘܚ ܟܽܠ ܕܦܰܩܕܶܗ ܐܰܠܳܗܳܐ: ܗܳܟܰܢܳܐ ܥܒܰܕ.