Genesis 8
The Book of Genesis
܀ ܒܪܝܬܐ ܚ ܀
1 ܘܶܐܬܕܟܰܪ ܐܰܠܳܗܳܐ ܠܢܽܘܚ. ܘܰܠܟܽܠܳܗ̇ ܚܰܝܽܘܬܳܐ: ܘܰܠܟܽܠܳܗ̇ ܒܥܺܝܪܳܐ: ܘܰܠܟܽܠܳܗ̇ ܦܳܪܰܚܬܳܐ ܕܥܰܡܶܗ ܒܩܺܒܽܘܬܳܐ: ܘܰܐܥܒܰܪ ܐܰܠܳܗܳܐ ܪܽܘܚܳܐ ܥܰܠ ܐܰܪܥܳܐ: ܘܶܐܬܬܢܺܝܚܘ ܡܰܝ̈ܳܐ.
2 ܘܶܐܣܬܟܰܪܘ ܡܰܒܽܘ̈ܥܶܐ ܕܰܬܗܽܘܡܳܐ: ܘܢܳܣ̈ܟܶܐ ܕܰܫܡܰܝܳܐ: ܘܶܐܬܟܠܺܝ ܡܶܛܪܳܐ ܡܶܢ ܫܡܰܝܳܐ.
3 ܘܰܗܦܰܟܘ ܡܰܝ̈ܳܐ ܡܶܢ ܐܰܪܥܳܐ: ܐܳܙܺܠܝܢ ܘܗܳܦܟܺܝܢ: ܘܰܚܣܰܪܘ ܡܰܝ̈ܳܐ ܡܶܢ ܒܳܬܰܪ ܡܳܐܐ ܘܚܰܡܫܺܝܢ ܝܰܘܡܺܝ̈ܢ.
4 ܘܶܐܬܬܢܺܝܚܰܬ ܩܺܒܽܘܬܳܐ ܒܝܰܪܚܳܐ ܫܒܝܥܳܝܳܐ: ܒܰܫܒܰܥܶܣܖ̈ܶܐ ܒܶܗ ܒܝܰܪܚܳܐ ܥܰܠ ܛܽܘܖ̈ܰܝ ܩܰܪܕܽܘ.
5 ܘܡܰܝ̈ܳܐ ܐܳܙܺܠܝܢ ܗܘܰܘ ܘܚܳܣܪܺܝܢ: ܥܕܰܡܳܐ ܠܝܰܪܚܳܐ ܥܣܺܝܪܳܝܳܐ: ܒܚܰܕ ܒܝܰܪܚܳܐ ܥܣܺܝܪܳܝܳܐ ܐܶܬܚܙܺܝܘ ܖ̈ܺܝܫܰܝ ܛܽܘܖ̈ܶܐ.
6 ܘܰܗܘܳܐ ܡܶܢ ܒܳܬܰܪ ܐܰܪܒܥܺܝܢ ܝܰܘܡܺܝ̈ܢ: ܦܬܰܚ ܢܽܘܚ ܟܰܘܬܳܐ ܕܩܺܒܽܘܬܳܐ ܕܰܥܒܰܕ.
7 ܘܫܰܕܰܪ ܠܥܽܘܪܒܳܐ ܘܰܢܦܰܩ ܡܶܦܰܩ: ܘܠܳܐ ܗܦܰܟ: ܥܕܰܡܳܐ ܕܺܝܒܶܫܘ ܡܰܝ̈ܳܐ ܡܶܢ ܐܰܦܰܝ̈ ܐܰܪܥܳܐ.
8 ܘܫܰܕܰܪ ܠܝܰܘܢܳܐ ܡܶܢ ܠܘܳܬܶܗ: ܕܢܶܚܙܶܐ ܐܶܢ ܩܰܠܘ ܡܰܝ̈ܳܐ ܡܶܢ ܐܰܦܰܝ̈ ܐܰܪܥܳܐ.
9 ܘܠܳܐ ܐܶܫܟܚܰܬ ܠܳܗ̇ ܝܰܘܢܳܐ ܢܝܳܚܳܐ ܠܦܰܣܰܬ ܪܶܓܠܳܗ̇: ܘܗܶܦܟܰܬ ܠܘܳܬܶܗ ܠܩܺܒܽܘܬܳܐ: ܡܶܛܽܠ ܕܡܰܝ̈ܳܐ ܐܺܝܬ ܗܘܰܘ ܥܰܠ ܐܰܦܰܝ̈ ܟܽܠܳܗ̇ ܐܰܪܥܳܐ: ܘܰܐܘܫܶܛ ܐܺܝܕܶܗ ܘܢܰܣܒܳܗ: ܘܰܐܥܠܳܗ̇ ܠܘܳܬܶܗ ܠܩܺܒܽܘܬܳܐ.
10 ܘܦܳܫ ܬܽܘܒ ܫܰܒܥܳܐ ܝܰܘܡܺܝ̈ܢ ܐ̱ܚܖ̈ܳܢܺܝܢ: ܘܰܗܦܰܟ ܘܫܰܕܪܳܗ̇ ܠܝܰܘܢܳܐ ܡܶܢ ܩܺܒܽܘܬܳܐ.
11 ܘܶܐܬܳܬ ܠܘܳܬܶܗ ܝܰܘܢܳܐ ܠܥܶܕܳܢ ܪܰܡܫܳܐ: ܘܗܳܐ ܛܰܪܦܳܐ ܕܙܰܝܬܳܐ ܐܰܚܺܝܕܳܐ ܒܦܽܘܡܳܗ̇: ܘܺܝܕܰܥ ܢܽܘܚ ܕܩܰܠܘ ܡܰܝ̈ܳܐ ܡܶܢ ܐܰܦܰܝ̈ ܐܰܪܥܳܐ.
12 ܘܦܳܫ ܬܽܘܒ ܫܰܒܥܳܐ ܝܰܘܡܺܝ̈ܢ ܐ̱ܚܖ̈ܳܢܺܝܢ: ܘܫܰܕܪܳܗ̇ ܠܝܰܘܢܳܐ، ܘܠܳܐ ܐܰܘܣܦܰܬ ܬܽܘܒ ܝܰܘܢܳܐ ܠܡܶܗܦܰܟ ܠܘܳܬܶܗ.
13 ܘܰܗܘܳܐ ܒܰܫܢܰܬ ܫܶܬܡܳܐܐ ܘܰܚܕܳܐ ܒܚܰܕ ܒܝܰܪܚܳܐ ܩܰܕܡܳܝܳܐ: ܝܺܒܶܫܘ ܡܰܝ̈ܳܐ ܡܶܢ ܐܰܪܥܳܐ: ܘܰܐܥܒܰܪ ܢܽܘܚ ܟܣܳܝܳܐ ܕܩܺܒܽܘܬܳܐ: ܘܰܚܙܳܐ: ܘܗܳܐ ܝܺܒܶܫ̈ܝ ܐܰܦܰܝ̈ ܐܰܪܥܳܐ.
14 ܘܰܒܝܰܪܚܳܐ ܕܰܬܪܶܝܢ: ܒܫܰܒܥܳܐ ܘܥܶܣܪܺܝܢ ܒܶܗ ܒܝܰܪܚܳܐ ܝܶܒܫܰܬ ܐܰܪܥܳܐ.
15 ܘܡܰܠܶܠ ܐܰܠܳܗܳܐ ܥܰܡ ܢܽܘܚ: ܘܶܐܡܰܪ ܠܶܗ.
16 ܦܽܘܩ ܡܶܢ ܩܺܒܽܘܬܳܐ: ܐܰܢ̱ܬ: ܘܰܐܢ̱ܬܬܳܟ: ܘܰܒܢܰܝ̈ܟ: ܘܢܶܫ̈ܶܐ ܕܰܒܢܰܝ̈ܟ ܥܰܡܳܟ.
17 ܘܟܽܠܳܗ̇ ܚܰܝܽܘܬܳܐ ܕܥܰܡܳܟ ܡܶܢ ܟܽܠ ܒܣܰܪ: ܘܦܳܪܰܚܬܳܐ: ܘܰܒܥܺܝܪܳܐ: ܘܟܽܠܶܗ ܪܰܚܫܳܐ ܕܪܳܚܶܫ ܥܰܠ ܐܰܪܥܳܐ: ܐܰܦܶܩ ܥܰܡܳܟ: ܘܢܰܘܠܕܽܘܢ ܒܰܐܪܥܳܐ: ܘܢܶܦܪܽܘܢ ܘܢܶܣܓܽܘܢ ܥܰܠ ܐܰܪܥܳܐ.
18 ܘܰܢܦܰܩ ܢܽܘܚ: ܘܰܒܢܰܘ̈ܗܝ: ܘܰܐܢ̱ܬܬܶܗ: ܘܢܶܫ̈ܶܐ ܕܰܒܢܰܘ̈ܗܝ ܥܰܡܶܗ.
19 ܘܟܽܠܳܗ̇ ܚܰܝܽܘܬܳܐ: ܘܟܽܠܳܗ̇ ܒܥܺܝܪܳܐ: ܘܟܽܠܳܗ̇ ܦܳܪܰܚܬܳܐ: ܘܟܽܠ ܕܪܳܚܶܫ ܥܰܠ ܐܰܪܥܳܐ ܠܫܰܖ̈ܒܳܬܗܽܘܢ: ܢܦܰܩܘ ܡܶܢ ܩܺܒܽܘܬܳܐ.
20 ܘܰܒܢܳܐ ܢܽܘܚ ܡܰܕܒܚܳܐ ܠܡܳܪܝܳܐ: ܘܰܢܣܰܒ ܡܶܢ ܟܽܠܳܗ̇ ܚܰܝܽܘܬܳܐ ܕܟܺܝܬܳܐ: ܘܡܶܢ ܟܽܠܳܗ̇ ܦܳܪܰܚܬܳܐ ܕܟܺܝܬܳܐ: ܘܰܐܣܶܩ ܝܰܩܕܳܐ ܥܰܠ ܡܰܕܒܚܳܐ.
21 ܘܰܐܪܺܝܚ ܡܳܪܝܳܐ ܪܺܝܚܳܐ ܕܰܣܘܳܬܳܐ: ܪܺܝܚܳܐ ܕܰܢܝܳܚܳܐ: ܘܶܐܡܰܪ ܡܳܪܝܳܐ ܒܠܶܒܶܗ: ܕܠܳܐ ܐܰܘܣܶܦ ܬܽܘܒ ܠܰܡܠܳܛܳܗ̇ ܠܰܐܪܥܳܐ ܡܶܛܽܠ ܒܰܪܢܳܫܳܐ: ܡܶܛܽܠ ܕܝܰܨܪܳܐ ܕܠܶܒܶܗ ܕܰܒܪܢܳܫܳܐ ܒܺܝܫ ܡܶܢ ܛܰܠܝܽܘܬܶܗ: ܘܠܳܐ ܐܰܘܣܶܦ ܬܽܘܒ ܠܡܶܡܚܳܐ ܠܟܽܠ ܕܚܰܝ ܐܰܝܟ ܕܥܶܒܕܶܬ.
22 ܘܡܶܟܺܝܠ ܟܽܠܗܽܘܢ ܝܰܘ̈ܡܳܬܳܐ ܕܰܐܪܥܳܐ: ܙܪܳܥܳܐ ܘܰܚܨܳܕܳܐ: ܥܰܪܝܳܐ ܘܚܽܘܡܳܐ: ܩܰܝܛܳܐ ܘܣܰܬܘܳܐ: ܐܺܝܡܳܡܳܐ ܘܠܺܠܝܳܐ: ܠܳܐ ܢܶܒܛܠܽܘܢ