Genesis 18
The Book of Genesis
܀ ܒܪܝܬܐ ܝܚ ܀
1 ܘܶܐܬܓܠܺܝ ܥܠܰܘܗ̱ܝ ܡܳܪܝܳܐ ܒܶܝܬ ܒܰܠܽܘܛܳܐ ܕܡܰܡܪܶܐ: ܘܗܽܘ ܝܳܬܶܒ ܒܬܰܪܥܳܐ ܕܡܰܫܟܢܳܐ ܟܰܕ ܚܰܡ ܝܰܘܡܳܐ.
2 ܘܰܐܪܺܝܡ ܥܰܝܢܰܘ̈ܗܝ ܘܰܚܙܳܐ: ܘܗܳܐ ܬܠܳܬܳܐ ܓܰܒܖ̈ܺܝܢ ܩܳܝܡܺܝܢ ܠܥܶܠ ܡܶܢܶܗ: ܘܰܚܙܳܐ ܐܶܢܽܘܢ ܘܰܪܗܶܛ ܠܽܐܘܪܥܗܽܘܢ ܡܶܢ ܬܰܪܥܳܐ ܕܡܰܫܟܢܳܐ: ܘܰܣܓܶܕ ܥܰܠ ܐܰܪܥܳܐ.
3 ܘܶܐܡܰܪ ܡܳܪܝ: ܐܶܢ ܐܶܫܟܚܶܬ ܖ̈ܰܚܡܶܐ ܒܥܰܝ̈ܢܰܝܟ: ܠܳܐ ܬܶܥܒܰܪ ܡܶܢ ܥܰܒܕܳܟ.
4 ܐܶܣܰܒ ܩܰܠܺܝܠ ܡܰܝ̈ܳܐ ܘܰܐܫܺܝܓܘ ܖ̈ܶܓܠܰܝܟܽܘܢ: ܘܶܐܣܬܰܡܟܘ ܬܚܶܝܬ ܐܺܝܠܳܢܳܐ.
5 ܘܣܰܒܘ ܦܶܬܬܳܐ ܕܠܰܚܡܳܐ ܘܰܣܡܽܘܟܘ ܠܶܒܟܽܘܢ: ܘܒܳܬܰܪܟܶܢ ܬܶܥܒܪܽܘܢ: ܡܶܛܽܠ ܕܗܳܟܰܢܳܐ ܥܒܰܪܬܽܘܢ ܥܰܠ ܥܰܒܕܟܽܘܢ: ܘܶܐܡܰܪܘ ܗܳܟܰܢܳܐ ܬܶܥܒܶܕ ܐܰܝܟ ܕܶܐܡܰܪܬ.
6 ܘܶܐܣܬܰܪܗܰܒ ܐܰܒܪܳܗܳܡ: ܘܰܪܗܶܛ ܠܡܰܫܟܢܳܐ ܠܘܳܬ ܣܰܪܳܐ: ܘܶܐܡܰܪ: ܒܰܥܓܰܠ ܬܠܳܬ ܣܳܐܺܝ̈ܢ ܩܰܡܚܳܐ ܢܰܫܺܝܦܳܐ: ܠܽܘܫܝ ܘܰܥܒܶܕܝ ܪܰܥܦܳܐ.
7 ܘܰܠܒܰܩܪܳܐ ܪܗܶܛ ܐܰܒܪܳܗܳܡ: ܘܰܢܣܰܒ ܥܶܓܠܳܐ ܚܰܕ ܕܫܰܡܺܝܢ ܘܛܳܒ: ܘܝܰܗܒܶܗ ܠܛܰܠܝܳܐ ܘܣܰܪܗܶܒ ܕܢܶܥܒܕܺܝܘܗܝ.
8 ܘܰܢܣܰܒ ܚܶܐܘܬܳܐ ܘܚܰܠܒܳܐ ܘܥܶܓܠܳܐ ܕܰܥܒܰܕ: ܘܣܳܡ ܩܕܳܡܝܗܽܘܢ: ܘܗܽܘ ܩܳܐܶܡ ܗܘܳܐ ܠܥܶܠ ܡܶܢܗܽܘܢ ܬܚܶܝܬ ܐܺܝܠܳܢܳܐ: ܘܶܐܟܰܠܘ.
9 ܘܶܐܡܰܪܘ ܠܶܗ: ܐܰܝܟܳܐ ܗ̱ܝ ܣܰܪܳܐ ܐܰܢ̱ܬܬܳܟ: ܘܶܐܡܰܪ ܗܳܐ ܒܡܰܫܟܢܳܐ.
10 ܘܶܐܡܰܪ ܠܶܗ ܡܶܗܦܰܟ ܐܶܗܦܽܘܟ ܠܘܳܬܳܟ ܠܙܰܒܢܳܐ ܗܳܢܳܐ ܟܰܕ ܗܺܝ ܚܰܝܳܐ: ܘܢܶܗܘܶܐ ܒܪܳܐ ܠܣܰܪܳܐ ܐܰܢ̱ܬܬܳܟ: ܘܣܰܪܳܐ ܫܶܡܥܰܬ ܒܬܰܪܥܳܐ ܕܡܰܫܟܢܳܐ: ܘܗܽܘ ܒܶܣܬܪܳܗ̇.
11 ܘܰܐܒܪܳܗܳܡ ܘܣܰܪܳܐ ܣܐܶܒܘ ܘܥܰܠܘ ܒܰܫܢܰܝ̈ܳܐ: ܥܒܰܪ ܡܶܢ ܕܰܠܡܶܗܘܳܐ ܠܣܰܪܳܐ ܐܽܘܪܚܳܐ ܕܢܶܫ̈ܶܐ.
12 ܘܓܶܚܟܰܬ ܣܰܪܳܐ ܒܠܶܒܳܗ̇ ܘܶܐܡܪܰܬ: ܡܶܢ ܒܳܬܰܪ ܕܰܒܠܺܝܬ ܗܳܘܝܳܐ ܠܺܝ ܥܠܰܝܡܽܘܬܳܐ: ܘܡܳܪܝ ܣܐܶܒ.
13 ܘܶܐܡܰܪ ܡܳܪܝܳܐ ܠܰܐܒܪܳܗܳܡ: ܠܡܳܢܳܐ ܓܶܚܟܰܬ ܣܰܪܳܐ ܘܶܐܡܪܰܬ: ܫܰܪܺܝܪܳܐܺܝܬ ܐܺܠܰܕ ܐܶܢܳܐ ܕܣܶܐܒܶܬ.
14 ܪܰܒܳܐ ܗ̱ܝ ܨܒܽܘܬܳܐ ܡܶܢ ܡܳܪܝܳܐ: ܕܰܠܙܰܒܢܳܐ ܗܳܢܳܐ ܐܶܗܦܽܘܟ ܠܘܳܬܳܟ ܟܰܕ ܗܺܝ ܚܰܝܳܐ: ܘܢܶܗܘܶܐ ܒܪܳܐ ܠܣܰܪܳܐ ܐܰܢ̱ܬܬܳܟ.
15 ܘܟܶܦܪܰܬ ܣܰܪܳܐ ܘܶܐܡܪܰܬ ܠܳܐ ܓܶܚܟܶܬ: ܡܶܛܽܠ ܕܕܶܚܠܰܬ: ܘܶܐܡܰܪ ܠܳܐ: ܒܪܰܡ ܓܚܶܟܬܝ.
16 ܘܩܳܡܘ ܡܶܢ ܬܰܡܳܢ ܓܰܒܖ̈ܶܐ ܘܚܳܪܘ ܠܰܐܦܰܝ̈ ܣܕܽܘܡ: ܘܰܐܒܪܳܗܳܡ ܐܶܙܰܠ ܥܰܡܗܽܘܢ ܕܰܢܠܰܘܶܐ ܐܶܢܽܘܢ.
17 ܘܡܳܪܝܳܐ ܐܶܡܰܪ: ܡܟܰܣܶܐ ܐ̱ܢܳܐ ܡܶܢ ܥܰܒܕܰܝ ܐܰܒܪܳܗܳܡ ܡܶܕܶܡ ܕܥܳܒܶܕ ܐ̱ܢܳܐ.
18 ܘܰܐܒܪܳܗܳܡ ܡܶܗܘܳܐ ܢܶܗܘܶܐ ܠܥܰܡܳܐ ܪܰܒܳܐ ܘܣܰܓܺܝܐܳܐ: ܘܢܶܬܒܰܪܟܽܘܢ ܒܶܗ ܟܽܠܗܽܘܢ ܥܰܡ̈ܡܶܐ ܕܰܐܪܥܳܐ.
19 ܡܶܛܽܠ ܕܝܳܕܰܥ ܐ̱ܢܳܐ ܠܶܗ: ܕܰܡܦܰܩܶܕ ܠܰܒܢܰܘ̈ܗܝ ܘܠܰܒܢܰܝ̈ ܒܰܝܬܶܗ ܡܶܢ ܒܳܬܪܶܗ: ܕܢܶܛܪܽܘܢ ܐܽܘܖ̈ܚܳܬܶܗ ܕܡܳܪܝܳܐ: ܠܡܶܥܒܰܕ ܙܰܕܺܝܩܽܘܬܳܐ ܘܕܺܝܢܳܐ ܡܶܛܽܠ ܕܢܰܝܬܶܐ ܡܳܪܝܳܐ ܥܰܠ ܐܰܒܪܳܗܳܡ ܡܶܕܶܡ ܕܶܐܡܰܪ ܥܠܰܘܗ̱ܝ.
20 ܘܶܐܡܰܪ ܡܳܪܝܳܐ: ܓܥܳܬܳܐ ܕܰܣܕܽܘܡ ܘܰܕܥܳܡܽܘܪܳܐ ܥܶܠܰܬ ܩܕܳܡܝ: ܘܰܚܛܳܗܰܝ̈ܗܽܘܢ ܛܳܒ ܥܫܶܢܘ.
21 ܐܶܚܽܘܬ ܘܶܐܚܙܶܐ: ܐܶܢ ܐܰܝܟ ܓܥܳܬܳܐ ܕܥܶܠܰܬ ܠܘܳܬܝ ܥܒܰܕܘ ܘܫܰܡܠܺܝܘ. ܘܶܐܢ ܠܳܐ: ܐܶܕܰܥ.
22 ܘܶܐܬܦܢܺܝܘ ܡܶܢ ܬܰܡܳܢ ܓܰܒܖ̈ܶܐ ܘܶܐܙܰܠܘ ܠܰܣܕܽܘܡ: ܘܰܐܒܪܳܗܳܡ ܥܕܰܟܺܝܠ ܩܳܐܶܡ ܗܘܳܐ ܩܕܳܡ ܡܳܪܝܳܐ.
23 ܘܰܩܪܶܒ ܐܰܒܪܳܗܳܡ ܘܶܐܡܰܪ: ܒܚܰܕ ܪܽܘܓܙܳܐ ܡܰܘܒܶܕ ܐܰܢ̱ܬ ܙܰܕܺܝ̈ܩܶܐ ܥܰܡ ܚܰܛܳܝ̈ܶܐ.
24 ܐܶܢ ܐܺܝܬ ܚܰܡܫܺܝܢ ܙܰܕܺܝ̈ܩܺܝܢ ܒܓܰܘ ܩܪܺܝܬܳܐ: ܒܪܽܘܓܙܳܐ ܚܰܕ ܡܰܘܒܶܕ ܐܰܢ̱ܬ: ܘܠܳܐ ܫܳܒܶܩ ܐܰܢ̱ܬ ܠܰܐܬܪܳܐ: ܡܶܛܽܠ ܚܰܡܫܺܝܢ ܙܰܕܺܝ̈ܩܺܝܢ ܕܰܒܓܰܘܳܗ̇.
25 ܚܳܣ ܠܳܟ ܕܬܶܥܒܶܕ ܦܶܬܓܳܡܳܐ ܗܳܢܳܐ: ܕܬܶܩܛܽܘܠ ܙܰܟܳܝܳܐ ܥܰܡ ܚܰܝܳܒܳܐ: ܘܢܶܗܘܶܐ ܙܰܟܳܝܳܐ ܐܰܝܟ ܚܰܝܳܒܳܐ: ܚܳܣ ܠܳܟ ܕܰܝܳܢܳܐ ܕܟܽܠܳܗ̇ ܐܰܪܥܳܐ : ܠܳܐ ܢܶܬܥܒܶܕ ܕܺܝܢܳܐ ܗܳܢܳܐ.
26 ܘܶܐܡܰܪ ܡܳܪܝܳܐ: ܐܶܢ ܐܶܫܟܰܚ ܒܰܣܕܽܘܡ ܚܰܡܫܺܝܢ ܙܰܕܺܝ̈ܩܺܝܢ ܒܓܰܘ ܩܪܺܝܬܳܐ: ܐܶܫܒܽܘܩ ܠܟܽܠܶܗ ܐܰܬܪܳܐ ܡܶܛܽܠܬܗܽܘܢ.
27 ܘܰܥܢܳܐ ܐܰܒܪܳܗܳܡ ܘܶܐܡܰܪ: ܗܳܐ ܫܰܪܺܝܬ ܠܰܡܡܰܠܳܠܽܘ ܩܕܳܡ ܡܳܪܝܳܐ: ܘܶܐܢܳܐ ܥܰܦܪܳܐ ܐ̱ܢܳܐ ܘܩܶܛܡܳܐ.
28 ܘܶܐܢ ܚܰܣܺܝܪܺܝܢ ܡܶܢ ܚܰܡܫܺܝܢ ܙܰܕܺܝ̈ܩܺܝܢ ܚܰܡܫܳܐ: ܡܚܰܒܶܠ ܐܰܢ̱ܬ ܡܶܛܽܠ ܚܰܡܫܳܐ ܟܽܠܳܗ̇ ܩܪܺܝܬܳܐ: ܘܶܐܡܰܪ ܠܳܐ ܐܶܚܰܒܶܠ ܐܶܢ ܐܶܫܟܰܚ ܬܰܡܳܢ ܐܰܪܒܥܺܝܢ ܘܚܰܡܫܳܐ.
29 ܘܰܐܘܣܶܦ ܬܒ ܐܰܒܪܳܗܳܡ ܠܡܺܐܡܰܪ ܠܶܗ: ܘܶܐܢ ܡܶܫܬܰܟܚܺܝܢ ܬܰܡܳܢ ܐܰܪܒܥܺܝܢ: ܘܶܐܡܰܪ ܠܳܐ ܐܶܚܰܒܶܠ ܐܶܢ ܐܶܫܟܰܚ ܬܰܡܳܢ ܐܰܪܒܥܺܝܢ.
30 ܘܶܐܡܰܪ ܠܳܐ ܢܶܬܒܐܶܫ ܠܡܳܪܝܳܐ ܘܶܐܡܰܠܶܠ: ܘܶܐܢ ܡܶܫܬܰܟܚܺܝܢ ܬܰܡܳܢ ܬܠܳܬܺܝܢ: ܘܶܐܡܰܪ ܠܳܐ ܐܶܚܰܒܶܠ ܐܶܢ ܐܶܫܟܰܚ ܬܰܡܳܢ ܬܠܳܬܺܝܢ.
31 ܘܶܐܡܰܪ ܗܳܐ ܫܰܪܺܝܬ ܠܰܡܡܰܠܳܠܽܘ ܩܕܳܡ ܡܳܪܝܳܐ: ܘܶܐܢ ܡܶܫܬܰܟܚܺܝܢ ܬܰܡܳܢ ܥܶܣܪܺܝܢ: ܘܶܐܡܰܪ ܠܳܐ ܐܶܚܰܒܶܠ ܡܶܛܽܠ ܥܶܣܪܺܝܢ.
32 ܘܶܐܡܰܪ: ܠܳܐ ܢܶܬܒܐܶܫ ܠܡܳܪܝܳܐ ܘܶܐܡܰܠܶܠ. ܒܰܠܚܽܘܕ ܙܒܰܢ̱ܬܳܐ ܗܳܕܶܐ: ܘܶܐܢ ܡܶܫܬܰܟܚܺܝܢ ܬܰܡܳܢ ܥܶܣܪܳܐ. ܘܶܐܡܰܪ ܠܳܐ ܐܶܚܰܒܶܠ ܡܶܛܽܠ ܥܶܣܪܳܐ.
33 ܘܶܐܙܰܠ ܡܳܪܝܳܐ ܟܰܕ ܫܰܠܶܡ ܠܰܡܡܰܠܳܠܽܘ ܥܰܡ ܐܰܒܪܳܗܳܡ: ܘܰܐܒܪܳܗܳܡ ܗܦܰܟ ܠܰܐܬܪܶܗ.