Genesis 30
The Book of Genesis
܀ ܒܪܝܬܐ ܠ ܀
1 ܘܰܚܙܰܬ ܪܳܚܶܝܠ ܕܠܳܐ ܝܳܠܕܳܐ ܠܝܰܥܩܽܘܒ ܘܛܶܢܰܬ ܒܚܳܬܳܗ̇: ܘܶܐܡܪܰܬ ܠܝܰܥܩܽܘܒ: ܗܰܒ ܠܺܝ ܒܢܰܝ̈ܳܐ: ܘܶܐܢ ܠܳܐ ܡܳܝܬܳܐ ܐ̱ܢܳܐ.
2 ܘܶܐܬܚܰܡܰܬ ܪܽܘܓܙܶܗ ܕܝܰܥܩܽܘܒ ܥܰܠ ܪܳܚܶܝܠ: ܘܶܐܡܰܪ ܠܳܗ̇: ܚܠܳܦ ܐܰܠܳܗܳܐ ܐ̱ܢܳܐ: ܕܰܟܠܳܐ ܡܶܢܶܟܝ ܦܺܐܖ̈ܶܐ ܕܟܰܪܣܳܐ.
3 ܘܶܐܡܪܰܬ ܠܶܗ: ܗܳܐ ܐܰܡܬܝ ܒܰܠܗܳܐ: ܥܽܘܠ ܥܠܶܝܗ̇: ܘܬܺܐܠܰܕ ܥܰܠ ܒܽܘܖ̈ܟܰܝ: ܘܶܐܬܒܰܝܰܐ ܐܳܦ ܐܶܢܳܐ ܡܶܢܳܗ̇.
4 ܘܝܶܗܒܰܬ ܠܶܗ ܠܒܰܠܗܳܐ ܐܰܡܬܳܗ̇ ܐܰܢ̱ܬܬܳܐ: ܘܥܰܠ ܥܠܶܝܗ̇.
5 ܘܒܶܛܢܰܬ ܒܰܠܗܳܐ: ܘܝܶܠܕܰܬ ܠܝܰܥܩܽܘܒ ܒܪܳܐ.
6 ܘܶܐܡܪܰܬ ܪܳܚܶܝܠ: ܕܳܢܰܢܝ ܐܰܠܳܗܳܐ: ܘܳܐܦ ܫܡܰܥ ܒܩܳܠܝ: ܘܝܰܗܒ ܠܺܝ ܒܪܳܐ: ܡܶܛܽܠ ܗܳܢܳܐ ܩܪܳܬ ܫܡܶܗ ܕܳܢ.
7 ܘܒܶܛܢܰܬ ܬܽܘܒ ܒܰܠܗܳܐ ܐܰܡܬܳܐ ܕܪܳܚܶܝܠ: ܘܝܶܠܕܰܬ ܒܪܳܐ ܐ̱ܚܪܺܢܳܐ ܠܝܰܥܩܽܘܒ.
8 ܘܶܐܡܪܰܬ ܪܳܚܶܝܠ: ܒܥܺܝܬ ܡܶܢ ܡܳܪܝܳܐ: ܘܶܐܬܟܰܫܦܶܬ ܥܰܡ ܚܳܬܝ: ܘܳܐܦ ܐܶܫܟܚܶܬ. ܘܰܩܪܳܬ ܫܡܶܗ ܢܰܦܬܳܠܺܝ.
9 ܘܰܚܙܳܬ ܠܶܝܰܐ ܕܩܳܡܰܬ ܡܶܢ ܝܰܠܕܳܐ: ܘܕܶܒܪܰܬ ܠܙܰܠܦܳܐ ܐܰܡܬܳܗ̇: ܘܝܰܗܒܬܳܗ̇ ܐܰܢ̱ܬܬܳܐ ܠܝܰܥܩܽܘܒ.
10 ܘܝܶܠܕܰܬ ܙܰܠܦܳܐ ܐܰܡܬܳܗ̇ ܕܠܶܝܰܐ ܠܝܰܥܩܽܘܒ ܒܪܳܐ.
11 ܘܶܐܡܪܰܬ ܠܶܝܰܐ ܐܶܬܳܐ ܓܰܕܝ: ܘܰܩܪܳܬ ܫܡܶܗ ܓܳܕ.
12 ܘܝܶܠܕܰܬ ܙܰܠܦܳܐ ܐܰܡܬܳܗ̇ ܕܠܶܝܰܐ ܒܪܳܐ ܕܰܬܪܶܝܢ ܠܝܰܥܩܽܘܒ.
13 ܘܶܐܡܪܰܬ ܠܶܝܰܐ: ܒܬܶܫܒܽܘܚܬܝ ܕܫܰܒܚܳܢ̈ܝ ܒ̈ܢܳܬܳܐ: ܘܰܩܪܳܬ ܫܡܶܗ ܐܳܫܺܝܪ.
14 ܘܶܐܙܰܠ ܪܽܘܒܺܝܠ ܒܝܰܘ̈ܡܰܝ ܚܨܳܕܳܐ ܕܚܶܛ̈ܶܐ: ܘܶܐܫܟܰܚ ܝܰܒܖ̈ܽܘܚܶܐ ܒܚܰܩܠܳܐ: ܘܰܐܝܬܺܝ ܐܶܢܽܘܢ ܠܠܶܝܰܐ ܐܶܡܶܗ: ܘܶܐܡܪܰܬ ܪܳܚܶܝܠ ܠܠܶܝܰܐ: ܗܰܒܝ ܠܺܝ ܡܶܢ ܝܰܒܖ̈ܽܘܚܶܐ ܕܰܒܪܶܟܝ.
15 ܘܶܐܡܪܰܬ ܠܳܗ̇ ܠܶܝܰܐ: ܠܳܐ ܟܰܕܽܘ ܠܶܟܝ ܕܰܕܒܰܪܬܝ ܒܰܥܠܝ: ܐܶܠܳܐ ܐܳܦ ܕܬܶܣܒܺܝܢ ܝܰܒܖ̈ܽܘܚܶܐ ܕܒܶܪܝ: ܘܶܐܡܪܰܬ ܪܳܚܶܝܠ: ܡܶܛܽܠ ܗܳܢܳܐ ܢܶܕܡܰܟ ܥܰܡܶܟܝ ܒܠܺܠܝܳܐ ܗܳܢܳܐ ܚܠܳܦ ܝܰܒܖ̈ܽܘܚܶܐ ܕܰܒܪܶܟܝ.
16 ܘܥܰܠ ܝܰܥܩܽܘܒ ܡܶܢ ܚܰܩܠܳܐ ܒܪܰܡܫܳܐ: ܘܢܶܦܩܰܬ ܠܶܝܰܐ ܠܽܐܘܪܥܶܗ: ܘܶܐܡܪܰܬ: ܠܘܳܬܝ ܥܳܐܶܠ ܐܰܢ̱ܬ ܡܶܛܽܠ ܕܡܶܐܓܰܪ ܐܶܓܰܪܬܳܟ ܒܝܰܒܖ̈ܽܘܚܶܐ ܕܒܶܪܝ. ܘܰܕܡܶܟ ܥܰܡܳܗ̇ ܒܠܺܠܝܳܐ ܗܰܘ.
17 ܘܫܰܡܥܳܗ̇ ܐܰܠܳܗܳܐ ܠܠܶܝܰܐ: ܘܒܶܛܢܰܬ ܘܝܶܠܕܰܬ ܠܝܰܥܩܽܘܒ ܒܪܳܐ ܕܚܰܡܫܳܐ.
18 ܘܶܐܡܪܰܬ ܠܶܝܰܐ: ܝܰܗܒ ܐܰܠܳܗܳܐ ܐܰܓܪܝ ܕܝܶܗܒܶܬ ܐܰܡܬܝ ܠܒܰܥܠܝ: ܘܰܩܪܳܬ ܫܡܶܗ ܐܺܝܣܳܟܳܪ.
19 ܘܒܶܛܢܰܬ ܬܽܘܒ ܠܶܝܰܐ: ܘܝܶܠܕܰܬ ܒܪܳܐ ܕܶܫܬܳܐ ܠܝܰܥܩܽܘܒ.
20 ܘܶܐܡܪܰܬ ܠܶܝܰܐ: ܙܰܒܕܰܢܝ ܐܰܠܳܗܳܐ ܙܶܒܕܳܐ ܛܳܒܳܐ: ܙܰܒܢܳܐ ܗܳܢܳܐ ܢܶܬܢܰܩܰܦ ܠܺܝ ܒܰܥܠܝ: ܡܶܛܽܠ ܕܝܶܠܕܶܬ ܠܶܗ ܫܬܳܐ ܒܢܺܝ̈ܢ: ܘܰܩܪܳܬ ܫܡܶܗ ܙܒܽܘܠܽܘܢ.
21 ܘܒܬܪܟܶܢ ܝܶܠܕܰܬ ܒܰܪܬܳܐ: ܘܰܩܪܳܬ ܫܡܳܗ̇ ܕܺܝܢܰܐ.
22 ܘܶܐܬܕܰܟܪܳܗ̇ ܐܰܠܳܗܳܐ ܠܪܳܚܶܝܠ: ܘܫܰܡܥܳܗ̇ ܐܰܠܳܗܳܐ: ܘܰܦܬܰܚ ܡܰܪܒܥܳܗ̇.
23 ܘܒܶܛܢܰܬ ܘܝܶܠܕܰܬ ܒܪܳܐ: ܘܶܐܡܪܰܬ ܐܰܥܒܰܪ ܐܰܠܳܗܳܐ ܚܶܣܕܝ.
24 ܘܰܩܪܳܬ ܫܡܶܗ ܝܰܘܣܶܦ: ܘܶܐܡܪܰܬ : ܢܰܘܣܶܦ ܠܺܝ ܐܰܠܳܗܳܐ ܒܪܳܐ ܐ̱ܚܪܺܢܳܐ.
25ܘܟܰܕ ܝܶܠܕܰܬ ܪܳܚܶܝܠ ܠܝܰܘܣܶܦ: ܐܶܡܰܪ ܝܰܥܩܽܘܒ ܠܠܳܒܳܢ: ܫܰܕܰܪܰܝܢܝ ܐܺܙܰܠ ܠܰܐܬܪܝ ܘܠܰܐܪܥܝ.
26 ܗܰܒܠܺܝ ܢܶܫܰܝ̈ ܘܰܒܢܰܝ̈: ܕܰܦܠܰܚܬܳܟ ܒܗܽܘܢ ܘܺܐܙܰܠ: ܡܶܛܽܠ ܕܰܐܢ̱ܬ ܝܳܕܰܥ ܐܰܢ̱ܬ ܦܽܘܠܚܳܢܳܐ ܕܰܦܠܰܚܬܳܟ.
27 ܘܶܐܡܰܪ ܠܳܒܳܢ ܠܝܰܥܩܽܘܒ: ܐܶܢ ܐܶܫܟܚܶܬ ܖ̈ܰܚܡܶܐ ܒܥܰܝ̈ܢܰܝܟ: ܢܰܣܺܝܬ ܕܒܰܪܟܰܢܝ ܡܳܪܝܳܐ ܡܶܛܽܠܬܳܟ.
28 ܘܶܐܡܰܪ ܦܪܽܘܫ ܐܰܓܪܳܟ ܥܠܰܝ ܘܶܐܬܶܠ: ܐܶܡܰܪ ܠܶܗ ܝܰܥܩܽܘܒ: ܐܰܢ̱ܬ ܝܳܕܰܥ ܐܰܢ̱ܬ ܦܽܘܠܚܳܢܳܐ ܕܰܦܠܰܚܬܳܟ: ܘܕܰܗܘܳܐ ܩܶܢܝܳܢܳܟ ܥܰܡܝ.
29 ܡܶܛܽܠ ܕܩܰܠܺܝܠ ܐܺܝܬ ܗܘܳܐ ܠܳܟ ܩܕܳܡܝ ܘܰܣܓܺܝ ܛܳܒ: ܘܒܰܪܟܳܟ ܡܳܪܝܳܐ ܡܶܛܽܠܳܬܝ.
30 ܘܗܳܫܳܐ ܡܳܢܳܐ ܐܶܥܒܶܕ ܐܳܦ ܐܶܢܳܐ ܠܒܰܝܬܝ.
31 ܐܶܡܰܪ ܠܶܗ ܠܳܒܳܢ: ܡܳܢܳܐ ܐܶܬܶܠ ܠܳܟ. ܐܶܡܰܪ ܠܶܗ ܝܰܥܩܽܘܒ: ܠܳܐ ܬܶܬܶܠ ܠܺܝ ܡܶܕܶܡ: ܐܶܢ ܬܶܥܒܶܕ ܠܺܝ ܦܶܬܓܳܡܳܐ ܕܳܐܡܰܪ ܐ̱ܢܳܐ ܠܳܟ: ܐܶܗܦܽܘܟ ܐܶܪܥܶܐ ܥܰܢ̈ܳܟ ܘܶܐܛܰܪ.
32 ܐܶܥܒܰܪ ܒܟܽܠܳܗ̇ ܥܳܢ̈ܳܟ ܝܰܘܡܳܢܳܐ: ܘܶܐܦܪܽܘܫ ܠܺܝ ܡܶܢ ܬܰܡܳܢ ܟܽܠ ܐܶܡܪܳܐ ܕܰܩܪܳܚ ܘܦܰܝܣܟܳܝ: ܘܟܽܠ ܐܶܡܪܳܐ ܕܳܐܟܶܡ ܒܚܶܘܳܖ̈ܳܬܳܐ: ܘܦܰܝܣܟܳܝ ܘܰܩܪܳܚ ܒܥܶܙ̈ܶܐ ܢܶܗܘܶܐ ܐܰܓܪܝ.
33 ܘܬܶܣܗܰܕ ܥܠܰܝ ܙܳܟܽܘܬܝ ܐܰܝܟ ܕܝܰܘܡܳܢܳܐ: ܕܰܡܚܳܪ ܟܰܕ ܬܶܥܽܘܠ ܥܰܠ ܐܰܓܪܝ ܩܕܳܡܰܝܟ: ܟܽܠ ܕܠܳܐ ܗܘܳܐ ܩܪܳܚ ܘܦܰܝܣܟܳܝ ܒܥܶܙ̈ܶܐ: ܘܳܐܟܳܡ ܒܚܶܘܳܖ̈ܳܬܳܐ: ܓܢܺܝܒܰܐ ܗ̱ܘ ܠܺܝ.
34 ܐܶܡܰܪ ܠܶܗ ܠܳܒܳܢ: ܐܺܝܢ ܢܶܗܘܶܐ ܐܰܝܟ ܡܶܠܬܳܟ.
35 ܘܰܦܪܰܫ ܒܝܰܘܡܳܐ ܗܰܘ ܬܰܝܫ̈ܶܐ ܩܰܖ̈ܚܶܐ ܘܦܰܝܣ̈ܟܳܝܶܐ: ܘܟܽܠܗܶܝܢ ܥܶܙ̈ܶܐ ܩܖ̈ܳܚܳܬܳܐ ܘܦܰܝܣܟܳܝ̈ܳܬܳܐ: ܘܟܽܠ ܕܺܐܝܬ ܒܗܶܝܢ ܚܶܘܳܪܳܐ: ܘܟܽܠ ܕܳܐܟܶܡ ܒܚܶܘܳܖ̈ܳܬܳܐ: ܘܝܰܗܒ ܒܝܰܕ ܒܢܰܘ̈ܗܝ.
36 ܘܰܥܒܰܕ ܡܰܪܕܳܐ ܬܠܳܬܳܐ ܝܰܘܡܺܝ̈ܢ ܒܰܝܢܰܘ̈ܗܝ ܠܠܳܒܳܢ: ܘܝܰܥܩܽܘܒ ܪܳܥܶܐ ܥܳܢ̈ܶܗ ܕܠܳܒܳܢ ܗܳܝ ܕܶܐܫܬܰܚܪܰܬ.
37 ܘܰܢܣܰܒ ܠܶܗ ܝܰܥܩܽܘܒ ܙܶܩ̈ܬܶܐ ܚܶܘܳܖ̈ܳܬܳܐ ܖ̈ܰܛܺܝܒܳܬܳܐ: ܕܠܽܘܙܳܐ ܘܰܕܕܽܘܠܒܳܐ: ܘܰܩܠܰܦ ܒܗܶܝܢ ܩܠܳܦ̈ܶܐ ܚܶܘܳܖ̈ܳܬܳܐ: ܘܡܰܚܘܰܪ ܚܶܘܳܪܳܐ ܕܰܒܙܶܩ̈ܬܶܐ.
38 ܘܰܕܥܰܨ ܐܶܢܶܝܢ ܠܙܶܩ̈ܬܶܐ ܕܰܩܠܰܦ ܒܖ̈ܳܗܛܶܐ ܕܡܰܝ̈ܳܐ: ܒܶܝܬ ܡܰܫܬܝܳܐ: ܟܰܪ ܕܳܐܬܝ̈ܳܢ ܥܳܢ̈ܳܐ ܠܡܶܫܬܳܐ ܠܽܘܩܒܰܠ ܥܳܢ̈ܳܐ: ܘܚܳܡ̈ܳܢ ܡܳܐ ܕܳܐܬܝ̈ܳܢ ܠܡܶܫܬܳܐ.
39 ܘܚܳܡ̈ܳܢ ܥܳܢ̈ܳܐ ܥܰܠ ܙܶܩ̈ܬܶܐ: ܘܝܳܠ̈ܕܳܢ ܥܳܢ̈ܳܐ ܐܶܡܖ̈ܶܐ ܩܰܖ̈ܚܶܐ ܘܦܰܝܣܟܳܝ̈ܶܐ.
40 ܘܰܦܪܰܫ ܝܰܥܩܽܘܒ ܘܝܰܗܒ ܩܕܳܡ ܥܳܢ̈ܳܐ ܐܶܡܖ̈ܶܐ ܩܰܖ̈ܚܶܐ ܘܦܰܝܣܟܳܝ̈ܶܐ ܘܟܽܠ ܕܳܐܟܳܡ ܒܥܳܢ̈ܶܗ ܕܠܳܒܳܢ: ܘܰܥܒܰܕ ܠܶܗ ܓܙܳܪܳܐ ܒܰܠܚܽܘܕܰܘܗܝ: ܘܠܳܐ ܚܠܰܛ ܐܶܢܶܝܢ ܒܥܳܢ̈ܶܗ ܕܠܳܒܳܢ.
41 ܘܰܒܟܽܠ ܫܢܳܐ ܕܚܳܡܳܐ ܥܳܢ̈ܳܐ ܒܟܺܝܪܳܝܬܳܐ: ܣܳܐܶܡ ܝܰܥܩܽܘܒ ܙܶܩ̈ܬܶܐ ܩܕܳܡ ܥܳܢ̈ܳܐ ܒܖ̈ܳܗܛܶܐ ܕܢܶܚܡ̈ܝܳܢ ܒܙܶܩ̈ܬܶܐ.
42 ܘܒܰܠܩܺܝܫܳܝ̈ܶܐ ܕܥܳܢ̈ܳܐ ܠܳܐ ܣܳܐܶܡ ܗܘܳܐ. ܘܗܳܘܶܝܢ ܠܩܺܝܫܳܝ̈ܶܐ ܠܠܳܒܳܢ: ܘܰܒܟܺܝܖ̈ܳܝܶܐ ܠܝܰܥܩܽܘܒ.
43 ܘܰܥܬܰܪ ܓܰܒܪܳܐ ܛܳܒ ܛܳܒ: ܘܰܗܘܳܬ ܠܶܗ ܥܳܢ̈ܳܐ ܣܰܓܺܝܐܬܳܐ: ܘܥܰܒ̈ܕܶܐ: ܘܰܐܡܗ̈ܳܬܳܐ: ܘܰܐܬܳܢ̈ܶܐ: ܘܓܰܡ̈ܠܶܐ: ܘܚܶܡܖ̈ܳܐ.