Genesis 46
The Book of Genesis
܀ ܒܪܝܬܐ ܡܘ ܀
1 ܘܰܫܩܰܠ ܝܺܣܪܳܐܶܝܠ ܗܽܘ ܘܟܽܠ ܕܺܐܝܬ ܠܶܗ: ܘܶܐܬܳܐ ܠܒܺܪ ܫܒܰܥ: ܘܕܰܒܰܚ ܕܶܒܚܬܳܐ ܠܰܐܠܳܗܳܐ ܕܰܐܒܽܘܗܝ ܐܺܝܣܚܳܩ.
2 ܘܶܐܡܰܪ ܐܰܠܳܗܳܐ ܠܺܝܣܪܳܐܶܝܠ ܒܚܶܙܘܳܐ ܕܠܺܠܝܳܐ: ܘܶܐܡܰܪ: ܝܰܥܩܽܘܒ: ܝܰܥܩܽܘܒ: ܘܶܐܡܰܪ ܗܳܐ ܐܶܢܳܐ.
3 ܘܶܐܡܰܪ ܠܶܗ: ܐܶܢܳܐ ܐ̱ܢܳܐ ܐܰܠܳܗܶܗ ܕܰܐܒܽܘܟ: ܠܳܐ ܬܶܕܚܰܠ ܠܡܶܚܰܬ ܠܡܶܨܪܶܝܢ: ܡܶܛܽܠ ܕܰܠܥܰܡܳܐ ܪܰܒܳܐ ܐܶܥܒܕܳܟ ܬܰܡܳܢ.
4 ܐܶܢܳܐ ܐܶܚܽܘܬ ܥܰܡܳܟ: ܘܶܐܢܳܐ ܐܰܣܩܳܟ: ܘܝܰܘܣܶܦ ܢܣܺܝܡ ܐܺܝܕܰܘ̈ܗܝ ܥܰܠ ܥܰܝ̈ܢܰܟ.
5 ܘܩܳܡ ܝܰܥܩܽܘܒ ܡܶܢ ܒܺܪ ܫܒܰܥ: ܘܰܫܩܰܠܘ ܒܢܰܝ̈ ܝܺܣܪܳܐܶܝܠ ܠܝܰܥܩܽܘܒ ܐܰܒܽܘܗܽܘܢ: ܘܠܺܝܩܰܪܬܗܽܘܢ ܘܰܠܢܶܫܰܝ̈ܗܽܘܢ: ܒܥܶܓ̈ܠܳܬܳܐ ܕܫܰܕܰܪ ܦܶܪܥܽܘܢ ܠܡܶܫܩܠܶܗ.
6 ܘܰܕܒܰܪܘ ܒܥܺܝܪܗܽܘܢ ܘܩܶܢܝܳܢܗܽܘܢ: ܕܰܩܢܰܘ ܒܰܐܪܥܳܐ ܕܰܟܢܰܥܢ: ܘܶܐܬܰܘ ܠܡܶܨܪܶܝܢ: ܝܰܥܩܽܘܒ ܘܟܽܠܶܗ ܙܰܪܥܶܗ ܥܰܡܶܗ.
7 ܒܢܰܘ̈ܗܝ: ܘܰܒܢܰܝ̈ ܒܢܰܘ̈ܗܝ ܥܰܡܶܗ: ܒܢ̈ܳܬܶܗ ܘܰܒܢ̈ܳܬ ܒܢ̈ܳܬܶܗ: ܘܟܽܠܶܗ ܙܰܪܥܶܗ ܐܰܥܶܠ ܥܰܡܶܗ ܠܡܶܨܪܶܝܢ.
8 ܘܗܳܠܶܝܢ ܫܡܳܗ̈ܶܐ ܕܰܒܢܰܝ̈ ܝܺܣܪܳܐܶܝܠ ܕܥܰܠܘ ܠܡܶܨܪܶܝܢ: ܝܰܥܩܽܘܒ ܘܰܒܢܰܘ̈ܗܝ: ܒܽܘܟܪܶܗ ܕܝܰܥܩܽܘܒ ܪܽܘܒܺܝܠ.
9 ܒܢܰܝ̈ ܪܽܘܒܺܝܠ: ܚܢܽܘܟ ܘܦܰܠܽܘ: ܘܚܶܨܪܽܘܢ ܘܟܰܪܡܺܝ.
10 ܘܰܒܢܰܝ̈ ܫܡܶܥܽܘܢ: ܝܰܡܽܘܐܶܝܠ ܘܝܳܡܶܝܢ: ܘܳܐܗܳܪ ܘܝܳܟܺܝܢ ܘܨܳܚܳܪ: ܘܫܳܐܘܳܠ ܒܰܪ ܟܢܰܥܝܳܢܬܳܐ.
11 ܘܰܒܢܰܝ̈ ܠܶܘܺܝ: ܓܶܪܫܽܘܢ: ܘܩܳܗܰܬ: ܘܰܡܪܳܪܺܝ.
12 ܘܰܒܢܰܝ̈ ܝܺܗܽܘܕܳܐ: ܥܺܝܪ ܐܘܢܳܢ ܘܫܶܠܳܐ: ܘܦܰܪܨ ܘܙܰܪܰܚ: ܘܡܺܝܬܘ ܥܺܝܪ ܐܘܢܳܢ ܒܰܐܪܥܳܐ ܕܰܟܢܰܥܢ: ܘܰܗܘܰܘ ܒܢܰܝ̈ ܦܰܪܨ: ܚܶܨܪܽܘܢ ܘܚܳܡܽܘܠ.
13 ܘܰܒܢܰܝ̈ ܐܺܝܣܳܟܳܪ: ܬܽܘܠܳܥ: ܘܦܽܘܐܳܐ: ܐܘܝܳܒ: ܘܫܶܡܪܽܘܢ.
14 ܘܰܒܢܰܝ̈ ܙܒܽܘܠܽܘܢ: ܣܳܕܳܪ: ܘܰܐܠܽܘܢ: ܘܢܰܚܠܳܐܶܝܠ.
15 ܗܳܠܶܝܢ ܒܢܶܝ̈ܗ̇ ܕܠܶܝܰܐ: ܕܝܶܠܕܰܬ ܠܝܰܥܩܽܘܒ ܒܦܳܕܳܢ ܕܳܐܪܳܡ: ܘܰܠܕܺܝܢܰܐ ܒܰܪܬܶܗ: ܟܽܠ ܢܰܦܫ̈ܳܬܳܐ ܕܰܒܢܰܘ̈ܗܝ ܘܕܰܒܢ̈ܳܬܶܗ: ܬܠܳܬܺܝܢ ܘܰܬܠܳܬ.
16 ܘܰܒܢܰܝ̈ ܓܳܕ: ܨܶܦܝܽܘܢ: ܘܚܰܓܺܝ: ܘܫܽܘܢܺܝ: ܘܰܐܨܒܥܽܘܢ: ܘܥܰܕܰܝ: ܘܳܐܪܽܘܕ: ܘܰܐܕܪܺܝ.
17 ܘܰܒܢܰܝ̈ ܐܳܫܺܝܪ: ܝܰܡܢܳܐ: ܘܝܰܫܒܳܐ: ܘܝܰܫܘܺܝ: ܘܰܒܪܺܝܥܳܐ: ܘܣܰܪܰܚ ܚܳܬܗܽܘܢ: ܘܰܒܢܰܝ̈ ܒܪܺܝܥܳܐ: ܚܳܒܰܪ ܘܡܰܠܟܺܝܠ.
18 ܗܳܠܶܝܢ ܒܢܶܝ̈ܗ̇ ܕܙܰܠܦܳܐ ܕܝܰܗܒ ܠܳܒܳܢ ܠܠܶܝܰܐ ܒܰܪܬܶܗ: ܘܝܶܠܕܰܬ ܗܳܠܶܝܢ ܠܝܰܥܩܽܘܒ ܢܰܦܫ̈ܳܬܳܐ ܫܬܳܬܰܥܶܣܖ̈ܶܐ.
19 ܘܰܒܢܶܝ̈ܗ̇ ܕܪܳܚܶܝܠ ܐܰܢ̱ܬܬܶܗ ܕܝܰܥܩܽܘܒ: ܝܰܘܣܶܦ ܘܒܶܢܝܳܡܶܝܢ.
20 ܘܶܐܬܺܝܠܶܕܘ ܠܝܰܘܣܶܦ ܒܰܐܪܥܳܐ ܕܡܶܨܪܶܝܢ ܕܝܶܠܕܰܬ ܠܶܗ ܐܰܣܝܰܬ ܒܰܪܬ ܦܽܘܛܺܝܦܰܪ ܟܽܘܡܪܳܐ ܕܽܐܘܢ: ܠܰܡܢܰܫܶܐ ܘܠܰܐܦܪܶܝܡ.
21 ܘܰܒܢܰܝ̈ ܒܶܢܝܳܡܶܝܢ: ܒܳܠܰܥ ܘܰܐܟܒܰܪ: ܘܰܐܫܒܶܠ: ܘܓܳܪܳܐ: ܘܢܰܥܡܳܢ: ܘܰܐܚܺܝ: ܘܳܐܪܽܘܫ: ܘܡܰܦܺܝܡ: ܘܚܰܦܺܝܡ: ܘܳܐܕܳܪ.
22 ܗܳܠܶܝܢ ܒܢܶܝ̈ܗ̇ ܕܪܳܚܶܝܠ ܕܝܶܠܕܰܬ ܠܝܰܥܩܽܘܒ: ܟܽܠ ܢܰܦܫ̈ܳܬܳܐ ܐܰܪܒܰܥܶܣܖ̈ܶܐ.
23 ܘܰܒܢܰܝ̈ ܕܳܢ: ܚܽܘܫܺܝܡ.
24 ܘܰܒܢܝ ܢܰܦܬܳܠܺܝ: ܢܰܚܨܳܐܶܝܠ: ܘܓܽܘܢܺܝ: ܘܝܳܨܳܪ: ܘܫܳܠܺܝܡ.
25 ܗܳܠܶܝܢ ܒܢܶܝ̈ܗ̇ ܕܒܰܠܗܳܐ: ܕܝܰܗܒ ܠܳܒܳܢ ܠܪܳܚܶܝܠ ܒܰܪܬܶܗ: ܘܝܶܠܕܰܬ ܠܝܰܥܩܽܘܒ: ܟܽܠ ܢܰܦܫ̈ܳܬܳܐ ܫܒܰܥ.
26 ܟܽܠܗܶܝܢ ܢܰܦܫ̈ܳܬܳܐ ܕܥܰܠܝ̈ ܥܰܡ ܝܰܥܩܽܘܒ ܠܡܶܨܪܶܝܢ: ܕܰܢܦܰܩ̈ܝ ܡܶܢ ܚܰܨܶܗ: ܣܛܰܪ ܡܶܢ ܢܶܫ̈ܶܐ ܕܰܒܢܰܘ̈ܗܝ ܕܝܰܥܩܽܘܒ: ܟܽܠ ܢܰܦܫ̈ܳܬܳܐ ܫܬܺܝܢ ܘܫܶܬ.
27 ܘܰܒܢܰܝ̈ ܝܰܘܣܶܦ ܕܶܐܬܺܝܠܶܕܘ ܠܶܗ ܒܡܶܨܪܶܝܢ: ܢܰܦܫ̈ܳܬܳܐ ܬܰܪܬܶܝܢ: ܟܽܠܗܶܝܢ ܢܰܦܫ̈ܳܬܳܐ ܕܒܶܝܬ ܝܰܥܩܽܘܒ ܕܥܰܠܝ̈ ܠܡܶܨܪܶܝܢ ܫܰܒܥܺܝܢ.
28 ܘܠܺܝܗܽܘܕܳܐ ܫܰܕܰܪ ܩܕܳܡܰܘܗܝ ܠܘܳܬ ܝܰܘܣܶܦ: ܠܡܶܬܚܙܳܝܽܘ ܩܕܳܡܰܘܗܝ ܠܓܶܫܳܢ: ܘܶܐܬܰܘ ܠܰܐܪܥܳܐ ܕܓܶܫܳܢ.
29 ܘܦܰܓܶܕ ܝܰܘܣܶܦ ܡܰܪܟܰܒܬܶܗ: ܘܰܣܠܶܩ ܠܽܐܘܪܥܳܐ ܕܺܝܣܪܳܐܶܝܠ ܐܰܒܽܘܗܝ ܠܓܶܫܳܢ: ܘܶܐܬܚܙܺܝ ܠܶܗ ܘܰܢܦܰܠ ܥܰܠ ܨܰܘܪܶܗ: ܘܰܒܟܳܐ ܥܰܠ ܨܰܘܪܶܗ ܬܽܘܒ.
30 ܘܶܐܡܰܪ ܝܺܣܪܳܐܶܝܠ ܠܝܰܘܣܶܦ: ܐܶܡܽܘܬ ܡܶܟܺܝܠ ܡܶܢ ܒܳܬܰܪ ܕܰܚܙܺܝ݀ܬ ܐܰܦܰܝ̈ܟ ܒܶܪܝ: ܕܰܥܕܰܟܺܝܠ ܚܰܝ ܐܰܢ̱ܬ.
31 ܘܶܐܡܰܪ ܝܰܘܣܶܦ ܠܰܐܚܰܘ̈ܗܝ ܘܰܠܒܶܝܬ ܐܰܒܽܘܗܝ: ܐܶܣܰܩ ܐܶܚܰܘܶܐ ܠܦܶܪܥܽܘܢ ܘܺܐܡܰܪ ܠܶܗ: ܐܰܚܰܝ̈ ܘܒܶܝܬ ܐܳܒܝ ܕܒܰܐܪܥܳܐ ܕܰܟܢܰܥܢ: ܐܶܬܰܘ ܠܘܳܬܝ.
32 ܘܓܰܒܖ̈ܶܐ ܖ̈ܳܥܝܰܝ ܥܳܢ̈ܳܐ ܐܶܢܽܘܢ: ܡܶܛܽܠ ܕܓܰܒܖ̈ܶܐ ܩܳܢ̈ܝܰܝ ܩܶܢܝܳܢܳܐ ܐܶܢܽܘܢ: ܘܥܳܢ̈ܗܽܘܢ ܘܬܰܘܖ̈ܰܝܗܽܘܢ ܘܟܽܠ ܕܺܐܝܬ ܠܗܽܘܢ ܐܰܝܬܺܝܘ.
33 ܘܟܰܕ ܢܶܩܪܶܝܟܽܘܢ ܦܶܪܥܽܘܢ: ܘܢܺܐܡܰܪ ܠܟܽܘܢ ܡܳܢܰܘ ܥܒܳܕܟܽܘܢ.
34 ܐܶܡܰܪܘ ܠܶܗ: ܡܳܖ̈ܰܝ ܩܶܢܝܳܢܳܐ ܗܘܰܘ ܥܰܒܕܰܝ̈ܟ: ܡܶܢ ܛܰܠܝܽܘܬܗܽܘܢ ܘܰܥܕܰܡܳܐ ܠܗܳܫܳܐ: ܘܳܐܦ ܚܢܰܢ ܘܳܐܦ ܐܰܒܳܗܰܝ̈ܢ: ܡܶܛܽܠ ܕܬܶܬܒܽܘܢ ܒܰܐܪܥܳܐ ܕܓܶܫܳܢ: ܡܶܛܽܠ ܕܡܰܣܠܶܝܢ ܐܶܢܽܘܢ ܠܡܶܨܖ̈ܳܝܶܐ ܟܽܠ ܖ̈ܳܥܝܰܝ ܥܳܢ̈ܳܐ.