Genesis 43
The Book of Genesis
܀ ܒܪܝܬܐ ܡܓ ܀
1 ܘܟܰܦܢܳܐ ܥܫܶܢ ܒܰܐܪܥܳܐ.
2 ܘܟܰܕ ܓܰܡܰܪܘ ܠܡܶܐܟܰܠ ܥܒܽܘܪܳܐ ܕܰܐܝܬܺܝܘ ܡܶܢ ܡܶܨܪܶܝܢ: ܐܶܡܰܪ ܠܗܽܘܢ ܝܰܥܩܽܘܒ ܐܰܒܽܘܗܽܘܢ: ܚܽܘܬܘ ܡܽܘܪܘ ܠܰܢ ܩܰܠܺܝܠ ܥܒܽܘܪܳܐ.
3 ܐܶܡܰܪ ܠܶܗ ܝܺܗܽܘܕܳܐ ܡܣܰܗܳܕܽܘ ܣܰܗܶܕ ܒܰܢ ܓܰܒܪܳܐ ܘܶܐܡܰܪ: ܠܳܐ ܬܶܚܙܽܘܢ ܐܰܦܰܝ̈: ܐܶܠܳܐ ܟܰܕ ܐܰܚܽܘܟܽܘܢ ܥܰܡܟܽܘܢ.
4 ܕܶܐܢ ܡܫܰܕܰܪ ܐܰܢ̱ܬ ܠܰܐܚܽܘܢ ܥܰܡܰܢ: ܢܶܚܽܘܬ ܘܰܢܡܽܘܪ ܠܰܢ ܥܒܽܘܪܳܐ.
5 ܘܶܐܢ ܠܳܐ ܡܫܰܕܰܪ ܐܰܢ̱ܬ: ܠܳܐ ܢܳܚܬܺܝܢܰܢ: ܡܶܛܽܠ ܕܓܰܒܪܳܐ ܐܶܡܰܪ ܠܰܢ: ܕܠܳܐ ܬܶܚܙܽܘܢ ܐܰܦܰܝ̈: ܐܶܠܳܐ ܟܰܕ ܐܰܚܽܘܟܽܘܢ ܥܰܡܟܽܘܢ.
6 ܐܶܡܰܪ ܠܗܽܘܢ ܝܺܣܪܳܐܶܝܠ ܐܰܒܽܘܗܽܘܢ: ܠܡܳܢܳܐ ܐܰܒܐܶܫܬܽܘܢ ܠܺܝ: ܘܚܰܘܺܝܬܽܘܢ: ܠܓܰܒܪܳܐ ܐܶܢ ܐܺܝܬ ܠܟܽܘܢ ܐܰܚܳܐ.
7 ܘܶܐܡܰܪܘ: ܡܫܰܐܳܠܽܘ ܫܰܐܶܠ ܓܰܒܪܳܐ ܥܠܰܝܢ ܘܥܰܠ ܫܰܪܒܬܰܢ ܘܶܐܡܰܪ: ܥܕܰܟܺܝܠ ܐܰܒܽܘܟܽܘܢ ܚܰܝ: ܘܺܐܝܬ ܠܟܽܘܢ ܐܰܚܳܐ: ܘܚܰܘܺܝܢܳܝܗܝ ܡܶܛܽܠ ܡ̈ܶܠܶܐ ܗܳܠܶܝܢ: ܡܶܕܰܥ ܝܳܕܥܺܝܢ ܗܘܰܝܢ ܕܳܐܡܰܪ ܠܰܢ ܐܰܚܶܬܘ ܠܰܐܚܽܘܟܽܘܢ.
8 ܘܶܐܡܰܪ ܝܺܗܽܘܕܳܐ ܠܺܝܣܪܳܐܶܝܠ ܐܰܒܽܘܗܝ: ܫܰܕܰܪ ܛܰܠܝܳܐ ܥܰܡܰܢ: ܘܰܢܩܽܘܡ ܘܢܺܐܙܰܠ ܘܢܺܚܶܐ ܘܠܳܐ ܢܡܽܘܬ: ܐܳܦ ܚܢܰܢ: ܐܳܦ ܐܰܢ̱ܬ: ܐܳܦ ܝܺܩܰܪܬܰܢ.
9 ܐܶܢܳܐ ܥܳܪܶܒ ܐ̱ܢܳܐ ܒܶܗ: ܡܶܢ ܐܺܝ̈ܕܰܝ ܬܒܰܥܳܝܗܝ: ܐܶܢ ܠܳܐ ܐܰܝܬܶܝܘܗܝ ܠܳܟ: ܘܰܐܩܺܝܡܺܝܘܗܝ ܩܕܳܡܰܝܟ: ܐܶܚܛܶܐ ܠܳܐܒܝ ܟܽܠܗܽܘܢ ܝܰܘ̈ܡܳܬܳܐ.
10 ܘܳܐܦ ܐܶܠܽܘܠܳܐ ܐܶܫܬܰܘܚܰܪܢ: ܟܒܰܪ ܕܶܝܢ ܗܦܰܟܢ ܕܬܰܪܬܶܝܢ ܙܰܒܢܺܝ̈ܢ.
11 ܘܶܐܡܰܪ ܠܗܽܘܢ ܝܺܣܪܳܐܶܝܠ ܐܰܒܽܘܗܽܘܢ: ܐܶܢ ܗܳܟܰܢܳܐ ܗܽܘ: ܗܳܕܶܐ ܥܒܶܕܘ: ܣܰܒܘ ܡܶܢ ܛܽܘܒܳܗ̇ ܕܰܐܪܥܳܐ ܒܡܳܐܢܰܝ̈ܟܽܘܢ: ܘܰܐܚܶܬܘ ܠܓܰܒܪܳܐ ܩܽܘܪܒܳܢܳܐ: ܩܰܠܺܝܠ ܨܰܪܘܳܐ: ܘܩܰܠܺܝܠ ܕܶܒܫܳܐ: ܘܰܖ̈ܗܶܛܢܶܐ: ܘܠܳܛܡ̈ܶܐ: ܘܒܶܛܡ̈ܶܐ: ܘܫܶܓܖ̈ܶܐ.
12 ܘܟܶܣܦܳܐ ܐܰܥܦܳܐ ܣܰܒܘ ܒܺܐܝ̈ܕܰܝܟܽܘܢ: ܘܟܶܣܦܳܐ ܕܰܗܦܰܟ ܒܦܽܘܡ ܛܰܥܢܰܝ̈ܟܽܘܢ: ܐܰܗܦܶܟܘ ܒܺܐܝ̈ܕܰܝܟܽܘܢ: ܕܰܠܡܳܐ ܛܽܘܥܝܰܝ ܗܺܝ.
13 ܘܠܰܐܚܽܘܟܽܘܢ ܕܒܰܪܘ: ܘܩܽܘܡܘ ܘܰܗܦܽܘܟܘ ܠܘܳܬ ܓܰܒܪܳܐ.
14 ܘܺܐܝܠܫܰܕܰܝ ܢܶܬܶܠܟܽܘܢ ܠܖ̈ܰܚܡܶܐ ܩܕܳܡ ܓܰܒܪܳܐ: ܘܰܢܫܰܕܰܪ ܥܰܡܟܽܘܢ ܠܰܐܚܽܘܟܽܘܢ ܐ̱ܚܪܺܢܳܐ ܘܰܠܒܶܢܝܳܡܶܝܢ: ܘܶܐܢܳܐ ܐܰܝܟ ܕܓܰܙܺܝܬ ܓܰܙܺܝܬ.
15 ܘܰܢܣܰܒܘ ܓܰܒܖ̈ܶܐ ܩܽܘܪܒܳܢܳܐ ܗܳܢܳܐ: ܘܰܐܥܦܳܐ ܕܟܶܣܦܳܐ ܢܣܰܒܘ ܒܺܐܝ̈ܕܰܝܗܽܘܢ: ܘܰܕܒܰܪܘ ܥܰܡܗܽܘܢ ܠܒܶܢܝܳܡܶܝܢ: ܘܩܳܡܘ ܘܰܢܚܶܬܘ ܠܡܶܨܪܶܝܢ: ܘܩܳܡܘ ܩܕܳܡ ܝܰܘܣܶܦ.
16 ܘܰܚܙܳܐ ܝܰܘܣܶܦ ܥܰܡܗܽܘܢ ܠܒܶܢܝܳܡܶܝܢ: ܘܶܐܡܰܪ ܠܪܰܒ ܒܰܝܬܶܗ: ܐܰܥܶܠ ܓܰܒܖ̈ܶܐ ܠܒܰܝܬܳܐ: ܘܟܽܘܣ ܢܶܟܣܬܳܐ ܘܬܰܩܶܢ: ܡܶܛܽܠ ܕܥܰܡܝ ܐܳܟܠܺܝܢ ܓܰܒܖ̈ܶܐ ܒܛܰܗܪܳܐ.
17 ܘܰܥܒܰܕ ܥܰܒܕܳܐ ܐܰܝܟ ܕܶܐܡܰܪ ܝܰܘܣܶܦ: ܘܰܐܥܶܠ ܐܶܢܽܘܢ ܠܓܰܒܖ̈ܶܐ ܠܒܶܝܬ ܝܰܘܣܶܦ.
18 ܘܰܕܚܶܠܘ ܟܰܕ ܡܰܥܠܺܝܢ ܠܗܽܘܢ ܠܒܶܝܬ ܝܰܘܣܶܦ: ܘܶܐܡܰܪܘ: ܡܶܛܽܠ ܟܶܣܦܳܐ ܕܰܗܦܰܟ ܒܛܰܥ̈ܢܰܝܢ ܒܩܰܕܡܳܝܬܳܐ ܡܰܥܠܺܝܢ ܠܰܢ: ܠܡܶܬܪܰܘܪܳܒܽܘ ܥܠܰܝܢ: ܘܰܠܡܶܬܢܟܳܠܽܘ ܥܠܰܝܢ: ܕܢܶܥܒܕܽܘܢܳܢ ܥܰܒ̈ܕܶܐ: ܘܰܠܚܶܡܖ̈ܰܢ.
19 ܘܰܩܪܶܒܘ ܠܘܳܬ ܓܰܒܪܳܐ ܪܰܒ ܒܰܝܬܶܗ ܕܝܰܘܣܶܦ: ܘܡܰܠܶܠܘ ܥܰܡܶܗ ܒܬܰܪܥܳܐ ܕܒܰܝܬܳܐ.
20 ܘܶܐܡܰܪܘ ܠܶܗ: ܒܳܥܶܝܢܰܢ ܡܳܪܰܢ: ܡܶܚܰܬ ܢܚܶܬܢ ܒܩܰܕܡܳܝܬܳܐ ܠܰܡܡܳܪ ܥܒܽܘܪܳܐ.
21 ܘܟܰܕ ܐܶܙܰܠܢ ܠܒܶܝܬ ܒܰܘܬܳܐ: ܦܬܰܚܢ ܛܰܥܢܰܝ̈ܢ: ܘܗܳܐ ܟܶܣܦܶܗ ܕܓܰܒܪܳܐ ܒܦܽܘܡ ܛܰܥܢܶܗ: ܟܶܣܦܰܢ ܒܡܰܬܩܳܠܶܗ ܐܰܗܦܶܟܢܳܝܗܝ ܒܺܐܝܕܰܢ.
22 ܘܟܶܣܦܳܐ ܐ̱ܚܪܺܢܳܐ ܐܰܚܶܬܢ ܒܺܐܝܕܰܢ ܠܰܡܡܳܪ ܥܒܽܘܪܳܐ: ܘܠܳܐ ܝܺܕܰܥܢ ܡܰܢܽܘ ܣܳܡ ܟܶܣܦܰܢ ܒܦܽܘܡ ܛܰܥܢܰܝ̈ܢ.
23 ܐܳܡܰܪ ܠܗܽܘܢ: ܫܠܳܡ ܠܟܽܘܢ: ܠܳܐ ܬܶܕܚܠܽܘܢ: ܐܰܠܳܗܟܽܘܢ ܐܰܠܳܗܳܐ ܕܰܐܒܽܘܟܽܘܢ ܣܳܡ ܠܟܽܘܢ ܣܺܝܡܬܳܐ ܒܛܰܥܢܰܝ̈ܟܽܘܢ: ܟܶܣܦܟܽܘܢ ܥ̣ܰܠ ܠܘܳܬܝ: ܘܰܐܦܶܩ ܠܘܳܬܗܽܘܢ ܠܫܶܡܥܽܘܢ.
24 ܘܰܐܥܶܠ ܥܰܒܕܳܐ ܓܰܒܖ̈ܶܐ ܠܒܶܝܬ ܝܰܘܣܶܦ: ܘܝܰܗܒ ܡܰܝ̈ܳܐ ܘܰܐܫܺܝܓܘ ܖ̈ܶܓܠܰܝܗܽܘܢ: ܘܰܐܪܡܺܝ ܟܶܣܬܳܐ ܠܰܒܥܺܝܪܗܽܘܢ.
25 ܘܬܰܩܶܢܘ ܓܰܒܖ̈ܶܐ ܩܽܘܪܒܳܢܳܐ: ܟܰܕ ܥܳܐܶܠ ܝܰܘܣܶܦ ܒܛܰܗܪܳܐ: ܡܶܛܽܠ ܕܰܫܡܰܥ ܕܬܰܡܳܢ ܐܳܟܠܺܝܢ ܠܰܚܡܳܐ.
26 ܘܥ̣ܰܠ ܝܰܘܣܶܦ ܠܒܰܝܬܳܐ: ܘܰܐܝܬܺܝܘ ܠܶܗ ܩܽܘܪܒܳܢܳܐ ܕܒܺܐܝ̈ܕܰܝܗܽܘܢ ܠܒܰܝܬܳܐ: ܘܰܣܓܶܕܘ ܠܶܗ ܥܰܠ ܐܰܪܥܳܐ.
27 ܘܫܰܐܶܠ ܒܰܫܠܡܗܽܘܢ ܘܶܐܡܰܪ ܠܗܽܘܢ: ܫܠܳܡ ܗܽܘ ܐܰܒܽܘܟܽܘܢ ܣܳܒܳܐ ܕܶܐܡܰܪܬܽܘܢ ܠܺܝ : ܥܕܰܟܺܝܠ ܚܰܝ ܗܽܘ.
28 ܘܶܐܡܰܪܘ ܫܠܳܡ ܗܽܘ ܥܰܒܕܳܟ ܐܰܒܽܘܢ: ܘܶܐܡܰܪܘ ܠܶܗ ܥܕܰܟܺܝܠ ܚܰܝ ܗܽܘ: ܘܰܩܥܶܕܘ ܘܰܣܓܶܕܘ.
29 ܘܰܐܪܺܝܡ ܥܰܝ̈ܢܰܘܗܝ ܘܰܚܙܳܐ ܠܒܶܢܝܳܡܶܝܢ ܐܰܚܽܘܗܝ ܒܰܪ ܐܶܡܶܗ: ܘܶܐܡܰܪ ܠܗܽܘܢ: ܗܳܢܰܘ ܐܰܚܽܘܟܽܘܢ ܙܥܽܘܪܳܐ: ܕܶܐܡܰܪܬܽܘܢ ܠܺܝ: ܘܶܐܡܰܪ: ܐܰܠܳܗܳܐ ܢܪܰܚܶܡ ܥܠܰܝܟ ܒܶܪܝ.
30 ܘܶܐܣܬܰܪܗܰܒ ܝܰܘܣܶܦ ܡܶܛܽܠ ܕܓܳܠܘ ܖ̈ܰܚܡܰܘܗܝ ܥܰܠ ܐܰܚܽܘܗܝ: ܘܰܒܥܳܐ ܠܡܶܒܟܳܐ: ܘܥܰܠ ܠܬܰܘܳܢܳܐ ܘܰܒܟܳܐ ܬܰܡܳܢ.
31 ܘܰܐܫܺܝܓ ܐܰܦܰܘ̈ܗܝ: ܘܰܢܦܰܩ ܘܚܰܡܣܶܢ: ܘܶܐܡܰܪ ܕܰܢܣܺܝܡܽܘܢ ܠܰܚܡܳܐ.
32 ܘܣܳܡܘ ܠܶܗ ܒܰܠܚܽܘܕܰܘܗܝ: ܘܰܠܗܽܘܢ ܒܰܠܚܽܘܕܰܝܗܽܘܢ: ܘܰܠܡܶܨܖ̈ܳܝܶܐ ܕܳܐܟܠܺܝܢ ܥܰܡܶܗ ܒܰܠܚܽܘܕܰܝܗܽܘܢ: ܡܶܛܽܠ ܕܠܳܐ ܡܶܫܟܚܺܝܢ ܡܶܨܖ̈ܳܝܶܐ ܠܡܶܐܟܰܠ ܠܰܚܡܳܐ ܥܰܡ ܥܶܒܖ̈ܳܝܶܐ: ܡܶܛܽܠ ܕܛܰܡܽܐܘܬܳܐ ܗ̱ܝ ܠܡܶܨܖ̈ܳܝܶܐ.
33 ܘܶܐܣܬܡܶܟܘ ܩܕܳܡܰܘܗܝ: ܩܰܫܺܝܫܳܐ ܐܰܝܟ ܩܰܫܺܝܫܽܘܬܶܗ: ܘܰܙܥܽܘܪܳܐ ܐܰܝܟ ܙܥܽܘܪܽܘܬܶܗ: ܘܰܬܡܰܗܘ ܓܰܒܖ̈ܶܐ ܓܒܰܪ ܒܚܰܒܪܶܗ.
34 ܘܰܫܩܰܠܘ ܠܗܽܘܢ ܫܩ̈ܳܠܶܐ ܡܶܢ ܩܕܳܡܰܘܗܝ: ܘܰܣܓܺܝ ܫܩܳܠܶܗ ܕܒܶܢܝܳܡܶܝܢ ܡܶܢ ܫܩ̈ܳܠܶܐ ܕܟܽܠܗܽܘܢ: ܚܰܡܶܫ ܡܢܰܘ̈ܳܢ: ܘܶܐܫܬܺܝܘ ܘܰܪܘܺܝܘ ܥܰܡܶܗ.