Genesis 32
The Book of Genesis
܀ ܒܪܝܬܐ ܠܒ ܀
1 ܘܳܐܦ ܝܰܥܩܽܘܒ ܐܶܙܰܠ ܠܽܐܘܪܚܶܗ: ܘܰܦܓܰܥܘ ܒܶܗ ܡܰܠܰܐܟܰܘ̈ܗܝ ܕܰܐܠܳܗܳܐ.
2 ܘܶܐܡܰܪ ܝܰܥܩܽܘܒ ܟܰܕ ܚܙܳܐ ܐܶܢܽܘܢ: ܡܰܫܪܺܝܬܳܐ ܗܺܝ ܕܰܐܠܳܗܳܐ ܗܳܕܶܐ: ܘܰܩܪܳܐ ܫܡܶܗ ܕܰܐܬܪܳܐ ܗܰܘ ܡܰܚܢܺܝܡ.
3 ܘܫܰܕܰܪ ܝܰܥܩܽܘܒ ܐܺܝܙܓܰܕ̈ܶܐ ܩܕܳܡܰܘܗܝ ܠܘܳܬ ܥܺܝܣܽܘ ܐܰܚܽܘܗܝ: ܠܰܐܪܥܳܐ ܕܣܳܥܺܝܪ: ܠܚܰܩܠܳܐ ܕܰܐܕܽܘܡ.
4 ܘܰܦܩܰܕ ܐܶܢܽܘܢ ܘܶܐܡܰܪ ܠܗܽܘܢ: ܗܳܟܰܢܳܐ ܬܺܐܡܪܽܘܢ ܠܡܳܪܝ ܥܺܝܣܽܘ: ܗܳܟܰܢܳܐ ܐܳܡܰܪ ܥܰܒܕܳܟ ܝܰܥܩܽܘܒ: ܥܰܡ ܠܳܒܳܢ ܥܶܡܪܶܬ: ܘܰܐܘܚܪܶܬ ܥܕܰܡܳܐ ܠܝܰܘܡܳܢܳܐ.
5 ܘܰܗܘܰܘ ܠܺܝ ܬܰܘܖ̈ܶܐ: ܘܚܶܡܖ̈ܳܐ: ܘܥܳܢ̈ܳܐ ܘܥܰܒ̈ܕܶܐ: ܘܰܐܡ̈ܗ̈ܳܬܳܐ: ܘܫܰܕܪܶܬ ܠܰܡܚܰܘܳܝܽܘ ܠܡܳܪܝ ܕܶܐܫܟܰܚ ܖ̈ܰܚܡܶܐ ܒܥܰܝ̈ܢܰܝܟ.
6 ܘܰܗܦܰܟܘ ܐܺܝܙܓܰܕ̈ܶܐ ܠܘܳܬ ܝܰܥܩܽܘܒ: ܘܶܐܡܰܪܘ ܠܶܗ: ܐܶܙܰܠܢ ܠܘܳܬ ܥܺܝܣܽܘ ܐܰܚܽܘܟ: ܘܗܳܐ ܐܳܦ ܗܽܘ ܐܳܬܶܐ ܠܽܐܘܪܥܳܟ: ܘܰܐܪܒܰܥܡܳܐܐ ܓܰܒܖ̈ܺܝܢ ܥܰܡܶܗ.
7 ܘܰܕܚܶܠ ܝܰܥܩܽܘܒ: ܘܥܳܩܰܬ ܠܶܗ ܛܳܒ: ܘܦܰܠܶܓ ܥܰܡܳܐ ܕܥܰܡܶܗ: ܘܥܳܢ̈ܳܐ : ܘܬܰܘܖ̈ܶܐ: ܘܓܰܡ̈ܠܶܐ: ܠܬܰܪܬܶܝܢ ܡܰܫܖ̈ܝܳܢ.
8 ܘܶܐܡܰܪ ܝܰܥܩܽܘܒ: ܐܶܢ ܢܺܐܬܶܐ ܥܺܝܣܽܘ ܐܳܚܝ ܥܰܠ ܡܰܫܪܺܝܬܳܐ ܚܕܳܐ ܘܢܶܚܪܒܺܝܗ̇: ܡܰܫܪܺܝܬܳܐ ܕܡܶܫܬܰܚܪܳܐ ܡܶܬܦܰܠܛܳܐ.
9 ܘܨܰܠܺܝ ܝܰܥܩܽܘܒ ܘܶܐܡܰܪ: ܐܰܠܳܗܶܗ ܕܳܐܒܝ ܐܰܒܪܳܗܳܡ: ܐܰܠܳܗܶܗ ܕܳܐܒܝ ܐܺܝܣܚܳܩ: ܡܳܪܝܳܐ ܕܶܐܡܰܪ ܠܺܝ ܗܦܽܘܟ ܠܰܐܪܥܳܐ ܕܰܐܒܗܰܝ̈ܟ: ܘܰܠܬܰܘ̈ܠܕܳܬܳܟ: ܘܰܐܛܐܶܒ ܠܳܟ.
10 ܒܨܺܝܪ ܐ̱ܢܳܐ ܡܶܢ ܟܽܠܗܶܝܢ ܛܰܝܒܽܘ̈ܳܬܳܟ: ܘܡܶܢ ܟܽܠܳܗ̇ ܩܽܘܫܬܳܐ ܕܰܥܒܰܕܬ ܥܰܡ ܥܰܒܕܳܟ: ܡܶܛܽܠ ܕܰܒܚܽܘܛܪܝ ܥܶܒܪܶܬ ܝܽܘܪܕܢܳܢ ܗܳܢܳܐ: ܘܗܳܫܳܐ ܗܘܺܝܬ ܠܬܰܪܬܶܝܢ ܡܰܫܖ̈ܝܳܢ.
11 ܦܰܨܳܢܝ ܡܶܢ ܐܺܝܕܰܘ̈ܗܝ ܕܥܺܝܣܽܘ ܐܳܚܝ: ܡܶܛܽܠ ܕܕܳܚܶܠ ܐ̱ܢܳܐ ܡܶܢܶܗ: ܕܰܠܡܳܐ ܢܺܐܬܶܐ ܘܢܶܡܚܶܝܢܝ: ܐܶܡܳܐ ܥܰܡ ܒܢܶܝ̈ܗ̇.
12 ܘܰܐܢ̱ܬ ܐܶܡܰܪܬ ܕܡܰܛܐܳܒܽܘ ܐܰܛܐܶܒ ܠܳܟ: ܘܶܐܥܒܶܕ ܙܰܪܥܳܟ ܐܰܝܟ ܚܳܠܳܐ ܕܝܰܡܳܐ ܕܠܳܐ ܡܶܬܡܢܶܐ ܡܶܢ ܣܽܘܓܶܐܗ.
13 ܘܒܳܬ ܬܰܡܳܢ ܒܠܺܠܝܳܐ ܗܰܘ: ܘܰܢܣܰܒ ܡܶܢ ܡܶܕܶܡ ܕܰܐܝܬܺܝ ܒܺܐܝܕܶܗ ܩܽܘܪܒܳܢܳܐ ܠܥܺܝܣܽܘ ܐܰܚܽܘܗܝ.
14 ܥܶܙ̈ܶܐ ܡܰܐܬܶܝܢ: ܘܬܰܝܫ̈ܶܐ ܥܶܣܪܺܝܢ: ܢܩܰܘ̈ܳܬܳܐ ܡܰܐܬܶܝܢ: ܘܕܶܟܖ̈ܶܐ ܥܶܣܪܺܝܢ.
15 ܓܰܡ̈ܠܶܐ ܡܰܝܢ̈ܩܳܬܳܐ ܘܰܒܢܰܝ̈ܗܶܝܢ ܬܠܳܬܺܝܢ: ܬܰܘܖ̈ܳܬܳܐ ܐܰܪܒܥܺܝܢ: ܘܬܰܘܖ̈ܶܐ ܥܶܣܪܳܐ: ܐܰܬܳܢ̈ܶܐ ܥܶܣܪܺܝܢ: ܘܥܺܝ̈ܠܶܐ ܥܶܣܪܳܐ.
16 ܘܝܰܗ̱ܒ ܒܺܐܝܕܳܐ ܕܥܰܒܕܰܘ̈ܗܝ: ܓܙܳܪܳܐ ܓܙܳܪܳܐ ܒܰܠܚܽܘܕ: ܘܶܐܡܰܪ ܠܥܰܒܕܰܘ̈ܗܝ: ܥܒܰܪܘ ܩܕܳܡܰܝ: ܘܰܪܘܰܚܬܳܐ ܥܒܶܕܘ ܒܶܝܬ ܓܙܳܪܳܐ ܠܰܓܙܳܪܳܐ.
17 ܘܰܦܩܰܕ ܠܩܰܕܡܳܝܳܐ ܘܶܐܡܰܪ ܠܶܗ: ܕܟܰܕ ܢܶܦܓܰܥ ܒܳܟ ܥܺܝܣܽܘ ܐܳܚܝ: ܘܰܢܫܰܐܠܳܟ ܘܢܺܐܡܰܪ ܠܳܟ: ܕܡܰܢ ܐܰܢ̱ܬ: ܘܠܰܐܝܟܳܐ ܐܳܙܶܠ ܐܰܢ̱ܬ: ܘܰܕܡܰܢ ܗܳܠܶܝܢ ܕܰܩܕܳܡܰܝܟ.
18 ܐܶܡܰܪ ܠܶܗ ܕܥܰܒܕܳܟ ܝܰܥܩܽܘܒ: ܩܽܘܪܒܳܢܳܐ ܕܫܰܕܰܪ ܠܡܳܪܝ ܥܺܝܣܽܘ: ܘܗܳܐ ܐܳܦ ܗܽܘ ܐܳܬܶܐ ܒܳܬܪܰܢ.
19 ܘܰܦܩܰܕ ܠܬܶܢܝܳܢܳܐ: ܘܳܐܦ ܠܰܬܠܺܝܬܳܝܳܐ: ܘܳܐܦ ܠܟܽܠ ܕܳܐܙܺܠܝܢ ܒܳܬܰܪ ܓܙܳܪܳܐ ܠܡܺܐܡܰܪ: ܐܰܝܟ ܦܶܬܓܳܡܳܐ ܗܳܢܳܐ: ܬܺܐܡܪܽܘܢ ܠܥܺܝܣܽܘ ܡܳܐ ܕܶܐܫܟܰܚܬܽܘܢܳܝܗܝ.
20 ܘܬܺܐܡܪܽܘܢ ܠܶܗ: ܕܗܳܐ ܐܳܦ ܥܰܒܕܳܟ ܝܰܥܩܽܘܒ ܒܳܬܪܰܢ: ܡܶܛܽܠ ܕܶܐܡܰܪ ܕܰܐܢܺܝܚ ܪܽܘܓܙܶܗ ܒܩܽܘܪܒܳܢܳܐ ܕܳܐܙܶܠ ܩܕܳܡܰܝ: ܘܒܳܬܰܪܟܶܢ ܐܶܚܙܶܐ ܐܰܦܰܘ̈ܗܝ: ܟܒܰܪ ܢܶܣܰܒ ܒܰܐܦܰܝ̈.
21 ܘܰܥܒܰܪ ܩܽܘܪܒܳܢܳܐ ܩܕܳܡܰܘܗܝ: ܘܗܽܘ ܒܳܬ ܒܠܺܠܝܳܐ ܗܰܘ ܒܡܰܫܪܺܝܬܳܐ.
22 ܘܩܰܕܶܡ ܒܠܺܠܝܳܐ: ܘܰܕܒܰܪ ܬܰܪܬܶܝܢ ܢܶܫܰܘ̈ܗܝ ܘܬܰܪܬܶܝܢ ܐܰܡܗ̈ܳܬܶܗ: ܘܰܚܕܰܥܣܰܪ ܒܢܰܘ̈ܗܝ: ܘܰܐܥܒܰܪ ܐܶܢܽܘܢ ܠܡܰܕܒܪܳܐ ܕܝܳܒܳܩ.
23 ܘܰܕܒܰܪ ܐܶܢܽܘܢ ܘܰܐܥܒܰܪ ܐܶܢܽܘܢ ܢܰܚܠܳܐ: ܘܰܐܥܒܰܪ ܟܽܠ ܕܺܐܝܬ ܠܶܗ.
24 ܘܦܳܫ ܝܰܥܩܽܘܒ ܒܰܠܚܽܘܕܰܘܗܝ: ܘܶܐܬܟܰܬܰܫ ܓܰܒܪܳܐ ܥܰܡܶܗ: ܥܕܰܡܳܐ ܕܰܣܠܶܩ ܫܰܦܪܳܐ.
25 ܘܰܚܙܳܐ ܕܠܳܐ ܡܶܬܡܨܶܐ ܚܰܝܠܶܗ: ܘܰܩܪܶܒ ܠܰܚܪܽܘܬܶܗ: ܘܰܫܢܳܬ ܚܪܽܘܬܶܗ ܕܝܰܥܩܽܘܒ ܟܰܕ ܐܶܬܟܰܬܰܫ ܥܰܡܶܗ.
26 ܘܶܐܡܰܪ ܠܶܗ: ܫܰܕܰܪܰܝܢܝ ܡܶܛܽܠ ܕܰܣܠܶܩ ܫܰܦܪܳܐ: ܘܶܐܡܰܪ ܠܳܐ ܐܶܫܰܕܪܳܟ: ܐܶܠܳܐ ܐܶܢ ܒܰܪܶܟܬܳܢܝ.
27 ܘܶܐܡܰܪ ܠܶܗ: ܐܰܝܟܰܢܳܐ ܫܡܳܟ: ܘܶܐܡܰܪ: ܝܰܥܩܽܘܒ.
28 ܐܶܡܰܪ ܠܶܗ: ܠܳܐ ܢܶܬܩܪܶܐ ܬܽܘܒ ܫܡܳܟ ܝܰܥܩܽܘܒ: ܐܶܠܳܐ ܝܺܣܪܳܐܶܝܠ: ܡܶܛܽܠ ܕܶܐܫܬܰܪܰܪܬ ܥܰܡ ܡܰܠܰܐܟܳܐ: ܘܥܰܡ ܓܰܒܪܳܐ: ܘܶܐܬܡܨܺܝܬ ܚܰܝܠܳܐ.
29 ܘܫܰܐܠܶܗ ܝܰܥܩܽܘܒ ܘܶܐܡܰܪ: ܚܰܘܳܢܝ ܫܡܳܟ: ܐܶܡܰܪ ܠܶܗ: ܠܡܳܢܳܐ ܫܳܐܶܠ ܐܰܢ̱ܬ ܥܰܠ ܫܶܡܝ: ܘܒܰܪܟܶܗ ܬܰܡܳܢ.
30 ܘܰܩܪܳܐ ܝܰܥܩܽܘܒ ܫܡܶܗ ܕܰܐܬܪܳܐ ܗܰܘ ܦܢܽܘܐܶܝܠ: ܡܶܛܽܠ ܕܰܚܙܺܝ݀ܬ ܡܰܠܰܐܟܳܐ ܐܰܦܺܝ̈ܢ ܠܽܘܩܒܰܠ ܐܰܦܺܝ̈ܢ: ܘܶܐܬܦܰܨܝܰܬ ܢܰܦܫܝ.
31 ܘܕܶܢܚܶܬ ܠܶܗ ܫܶܡܫܳܐ ܟܰܕ ܥܒܰܪ ܠܰܦܢܽܘܐܶܝܠ: ܘܗܽܘ ܡܰܣܡܶܐ ܗܘܳܐ ܡܶܢ ܚܪܽܘܬܶܗ.
32 ܡܶܛܽܠ ܗܳܢܳܐ ܠܳܐ ܐܳܟܠܺܝܢ ܒܢܰܝ̈ ܝܺܣܪܳܐܶܝܠ ܓܝܳܕܳܐ ܕܓܶܢܫܝܳܐ ܕܒܰܚܪܽܘܬܳܐ ܕܥܰܛܡܳܐ ܥܕܰܡܳܐ ܠܝܰܘܡܳܢܳܐ: ܡܶܛܽܠ ܕܰܐܩܪܶܒ ܠܰܚܪܽܘܬܳܐ ܕܥܰܛܡܶܗ ܕܝܰܥܩܽܘܒ ܠܓܶܢܫܝܳܐ.