Genesis 40
The Book of Genesis
܀ ܒܪܝܬܐ ܡ ܀
1 ܘܰܗܘܳܐ ܡܶܢ ܒܳܬܰܪ ܦܶܬܓܳܡ̈ܶܐ ܗܳܠܶܝܢ: ܚܛܰܘ ܪܰܒ ܫܳܩܰܘ̈ܳܬܳܐ ܕܡܰܠܟܳܐ ܕܡܶܨܪܶܝܢ ܘܪܰܒ ܢܰܚܬܽܘ̈ܡܶܐ ܠܡܳܪܗܽܘܢ ܡܰܠܟܳܐ ܕܡܶܨܪܶܝܢ.
2 ܘܰܪܓܶܙ ܦܶܪܥܽܘܢ ܥܰܠ ܬܪܶܝܢ ܡܗܰܝܡ̈ܢܰܘܗܝ: ܥܰܠ ܪܰܒ ܫܳܩܰܘ̈ܳܬܳܐ: ܘܥܰܠ ܪܰܒ ܢܰܚܬܽܘ̈ܡܶܐ.
3 ܘܰܐܪܡܺܝ ܐܶܢܽܘܢ ܒܶܝܬ ܐܰܣܺܝܖ̈ܶܐ ܒܶܝܬ ܪܰܒ ܕܰܚ̈ܫܶܐ: ܒܰܐܬܪܳܐ ܕܝܰܘܣܶܦ ܐܰܣܺܝܪ ܬܰܡܳܢ.
4 ܘܰܐܫܠܶܛ ܪܰܒ ܕܰܚ̈ܫܶܐ ܠܝܰܘܣܶܦ ܥܠܰܝܗܽܘܢ: ܘܫܰܡܶܫ ܐܶܢܽܘܢ: ܘܰܗܘܰܘ ܝܰܘ̈ܡܳܬܳܐ ܒܶܝܬ ܐܰܣܺܝܖ̈ܶܐ.
5 ܘܰܚܠܰܡܘ ܚܶܠ̈ܡܶܐ ܬܖ̈ܰܝܗܽܘܢ: ܓܒܰܪ ܚܶܠܡܶܗ ܒܠܺܠܝܳܐ ܚܰܕ: ܓܒܰܪ ܐܰܝܟ ܦܫܳܪ ܚܶܠܡܶܗ: ܫܳܩܝܳܐ ܘܢܰܚܬܽܘܡܳܐ ܕܡܰܠܟܳܐ ܕܡܶܨܪܶܝܢ: ܕܰܐܣܺܝܪܺܝܢ ܒܶܝܬ ܐܰܣܺܝܖ̈ܶܐ.
6 ܘܥܰܠ ܠܘܳܬܗܽܘܢ ܝܰܘܣܶܦ ܒܨܰܦܪܳܐ: ܘܰܚܙܳܐ ܐܶܢܽܘܢ ܘܗܳܐ ܟܡܺܝܪܺܝܢ.
7 ܘܫܰܐܶܠ ܠܰܡܗܰܝܡ̈ܢܰܝ ܦܶܪܥܽܘܢ ܕܥܰܡܶܗ ܒܰܚܒܽܘܫܝܳܐ ܒܶܝܬ ܡܳܪܶܗ: ܘܶܐܡܰܪ ܠܗܽܘܢ: ܠܡܳܢܳܐ ܟܡܺܝܖ̈ܳܢ ܐܰܦܰܝ̈ܟܽܘܢ ܝܰܘܡܳܢܳܐ.
8 ܘܶܐܡܰܪܘ ܠܶܗ: ܚܶܠܡܳܐ ܚܠܰܡܢ: ܘܦܳܫܽܘܪܳܐ ܠܰܝܬ ܠܶܗ: ܐܶܡܰܪ ܠܗܽܘܢ ܝܰܘܣܶܦ: ܗܳܐ ܕܰܐܠܳܗܳܐ ܐܶܢܽܘܢ ܦܫܳܖ̈ܶܐ: ܐܶܫܬܰܥܰܘ ܠܺܝ.
9 ܘܶܐܫܬܰܥܺܝ ܪܰܒ ܫܳܩܰܘ̈ܳܬܳܐ ܚܶܠܡܶܗ ܠܝܰܘܣܶܦ: ܘܶܐܡܰܪ ܠܶܗ: ܒܚܶܠܡܝ: ܗܳܐ ܓܦܶܬܳܐ ܩܕܳܡܰܝ.
10 ܘܒܰܓܦܶܬܳܐ ܬܠܳܬ ܫܒܺܫ̈ܬܺܝܢ: ܘܗܺܝ ܟܰܕ ܦܶܪܥܰܬ: ܝܺܥܰܘ ܛܰܖ̈ܦܶܝܗ̇: ܘܰܒܫܶܠܘ ܣܓܽܘ̈ܠܶܝܗ̇ ܘܰܗܘܰܘ ܥܶܢ̈ܒܶܐ.
11 ܘܟܳܣܳܐ ܕܦܶܪܥܽܘܢ ܒܺܐܝ̈ܕܰܝ: ܘܢܶܣܒܶܬ ܥܶܢ̈ܒܶܐ ܘܥܶܨܪܶܬ ܐܶܢܶܝܢ ܒܟܳܣܶܗ ܕܦܶܪܥܽܘܢ: ܘܝܶܗܒܶܬ ܟܳܣܳܐ ܠܺܐܝ̈ܕܰܝ ܦܶܪܥܽܘܢ.
12 ܐܶܡܰܪ ܠܶܗ ܝܰܘܣܶܦ: ܗܳܢܰܘ ܦܫܳܪܶܗ ܕܚܶܠܡܳܟ: ܬܠܳܬ ܫܒܺܫ̈ܬܺܝܢ: ܬܠܳܬܳܐ ܐܶܢܽܘܢ ܝܰܘܡܺܝ̈ܢ.
13 ܘܡܶܢ ܒܳܬܰܪ ܬܠܳܬܳܐ ܝܰܘܡܺܝ̈ܢ: ܢܶܬܕܰܟܪܳܟ ܦܶܪܥܽܘܢ ܘܢܰܗܦܟܳܟ ܥܰܠ ܫܶܕܬܳܟ: ܘܬܶܬܶܠ ܟܳܣܳܐ ܠܦܶܪܥܽܘܢ ܒܺܐܝܕܶܗ: ܐܰܝܟ ܢܳܡܽܘܣܳܐ ܩܰܕܡܳܝܳܐ ܕܡܰܫܩܶܐ ܗ̱ܘܰܝܬ ܠܶܗ.
14 ܐܶܠܳܐ ܐܶܬܕܰܟܪܰܝܢܝ ܥܰܡܳܟ ܟܰܕ ܢܰܛܐܰܒ ܠܳܟ: ܘܰܥܒܶܕ ܥܰܡܝ ܛܰܝܒܽܘܬܳܐ ܘܩܽܘܫܬܳܐ: ܘܶܐܬܕܰܟܪܰܝܢܝ ܩܕܳܡ ܦܶܪܥܽܘܢ: ܘܰܐܦܶܩܰܝܢܝ ܡܶܢ ܒܶܝܬ ܐܰܣܺܝܖ̈ܶܐ ܗܳܢܳܐ.
15 ܡܶܛܽܠ ܕܡܶܓܢܰܒ ܓܢܺܝܒ ܐ̱ܢܳܐ ܡܶܢ ܐܰܪܥܳܐ ܕܥܶܒܖ̈ܳܝܶܐ: ܘܳܐܦ ܗܳܪܟܳܐ ܡܶܕܶܡ ܠܳܐ ܥܶܒܕܶܬ ܕܰܐܪܡܝܽܘܢܝ ܒܶܝܬ ܐܰܣܺܝܖ̈ܶܐ.
16 ܘܰܚܙܳܐ ܪܰܒ ܢܰܚܬܽܘ̈ܡܶܐ ܕܫܰܦܺܝܪ ܦܫܰܪ: ܘܶܐܡܰܪ ܠܝܰܘܣܶܦ: ܘܳܐܦ ܐܶܢܳܐ ܒܚܶܠܡܝ: ܘܗܳܐ ܬܠܳܬܳܐ ܣ̈ܰܠܶܐ ܕܚܶܘܳܖ̈ܳܬܳܐ ܥܰܠ ܪܺܫܝ.
17 ܘܰܒܣܰܠܳܐ ܥܶܠܳܝܳܐ ܡܶܢ ܟܽܠ ܡܶܐܟܠܶܗ ܕܦܶܪܥܽܘܢ: ܥܒܳܕܳܐ ܕܢܰܚܬܽܘܡܳܐ: ܘܚܰܝܘܰܬ ܟܶܢܦܳܐ ܐܳܟܠܳܐ ܠܗܽܘܢ ܡܶܢ ܣܰܠܳܐ ܡܶܢ ܠܥܶܠ ܡܶܢ ܪܺܫܝ.
18 ܥܢܳܐ ܝܰܘܣܶܦ ܘܶܐܡܰܪ ܠܶܗ: ܗܳܢܰܘ ܦܫܳܪܶܗ ܕܚܶܠܡܳܟ: ܬܠܳܬܳܐ ܣܰܠܺܝ̈ܢ ܬܠܳܬܳܐ ܐܶܢܽܘܢ ܝܰܘܡܺܝ̈ܢ.
19 ܒܳܬܰܪ ܬܠܳܬܳܐ ܝܰܘܡܺܝ̈ܢ ܢܶܣܰܒ ܦܶܪܥܽܘܢ ܪܺܝܫܳܟ ܡܶܢܳܟ: ܘܢܶܙܩܦܳܟ ܥܰܠ ܩܰܝܣܳܐ: ܘܬܶܐܟܽܘܠ ܦܳܪܰܚܬܳܐ ܒܶܣܪܳܟ ܡܶܢܳܟ.
20 ܘܰܗܘܳܐ ܒܝܰܘܡܳܐ ܬܠܺܝܬܳܝܳܐ: ܒܝܰܘܡܳܐ ܕܒܶܝܬ ܝܰܠܕܶܗ ܕܦܶܪܥܽܘܢ: ܥܒܰܕ ܦܶܪܥܽܘܢ ܡܰܫܬܝܳܐ ܠܟܽܠܗܽܘܢ ܥܰܒܕܰܘ̈ܗܝ.
21 ܘܶܐܬܕܟܰܪ ܠܪܰܒ ܫܳܩܰܘ̈ܳܬܳܐ ܘܰܠܪܰܒ ܢܰܚܬܽܘ̈ܡܶܐ ܒܓܰܘ ܥܰܒܕܰܘ̈ܗܝ: ܘܰܐܩܺܝܡ ܠܪܰܒ ܫܳܩܰܘ̈ܳܬܳܐ ܥܰܠ ܫܶܕܬܶܗ: ܘܝܰܗܒ ܟܳܣܳܐ ܥܰܠ ܐܺܝܕܰܝ̈ ܦܶܪܥܽܘܢ.
22 ܘܰܠܪܰܒ ܢܰܚܬܽܘ̈ܡܶܐ ܙܩܰܦ: ܐܰܝܟ ܕܰܦܫܰܪ ܠܗܽܘܢ ܝܰܘܣܶܦ.
23 ܘܠܳܐ ܐܶܬܕܟܰܪ ܪܰܒ ܫܳܩܰܘ̈ܳܬܳܐ ܠܝܰܘܣܶܦ: ܘܰܛܥܳܝܗܝ.