Genesis 26
The Book of Genesis
܀ ܒܪܝܬܐ ܟܘ ܀
1 ܘܰܗܘܳܐ ܟܰܦܢܳܐ ܒܰܐܪܥܳܐ: ܣܛܰܪ ܡܶܢ ܟܰܦܢܳܐ ܩܰܕܡܳܝܳܐ ܕܰܗܘܳܐ ܒܝܰܘ̈ܡܰܝ ܐܰܒܪܳܗܳܡ: ܘܶܐܙܰܠ ܐܺܝܣܚܳܩ ܠܘܳܬ ܐܰܒܝܡܰܠܟ ܡܰܠܟܳܐ ܕܰܦܠܶܫܬܳܝ̈ܶܐ ܠܓܳܕܳܪ.
2 ܘܶܐܬܚܙܺܝ ܠܶܗ ܡܳܪܝܳܐ ܘܶܐܡܰܪ ܠܶܗ: ܠܳܐ ܬܶܚܽܘܬ ܠܡܶܨܪܶܝܢ: ܫܪܺܝ ܒܰܐܪܥܳܐ ܕܺܐܡܰܪ ܠܳܟ.
3 ܥܡܰܪ ܒܰܐܪܥܳܐ ܗܳܕܶܐ: ܘܶܐܗܘܶܐ ܥܰܡܳܟ ܘܶܐܒܰܪܟܳܟ: ܡܶܛܽܠ ܕܠܳܟ ܘܰܠܙܰܪܥܳܟ ܐܶܬܶܠ ܟܽܠܗܶܝܢ ܡܰܠܟܘ̈ܳܬܳܐ ܗܳܠܶܝܢ: ܘܰܐܩܺܝܡ ܡܰܘܡܳܬܳܐ ܕܺܝܡܺܝܬ ܠܰܐܒܪܳܗܳܡ ܐܰܒܘܟ.
4 ܘܰܐܣܓܶܐ ܙܰܪܥܳܟ ܐܰܝܟ ܟܰܘܟܒܰܝ̈ ܫܡܰܝܳܐ: ܘܶܐܬܶܠ ܠܙܰܪܥܳܟ ܟܽܠܗܶܝܢ ܐܰܖ̈ܥܳܬܳܐ ܗܳܠܶܝܢ: ܘܢܶܬܒܰܪܟܽܘܢ ܒܙܰܪܥܳܟ ܟܽܠܗܽܘܢ ܥܰܡ̈ܡܶܐ ܕܰܐܪܥܳܐ.
5 ܚܠܳܦ ܕܰܫܡܰܥ ܐܰܒܪܳܗܳܡ ܒܩܳܠܝ: ܘܰܢܛܰܪ ܢܛܽܘܖ̈ܳܬܝ ܘܦܽܘܩܕܳܢܰܝ̈ ܘܰܩܝܳܡܰܝ̈ ܘܢܳܡܽܘܣܰܝ̈.
6 ܘܺܝܬܶܒ ܐܺܝܣܚܳܩ ܒܓܳܕܳܪ.
7 ܘܫܰܐܠܽܘܗܝ ܐ̱ܢܳܫܰܝ̈ ܐܰܬܪܳܐ ܥܰܠ ܐܰܢ̱ܬܬܶܗ: ܘܶܐܡܰܪ ܚܳܬܝ ܗ̱ܝ: ܡܶܛܽܠ ܕܰܕܚܶܠ ܕܢܺܐܡܰܪ ܕܰܐܢ̱ܬܰܬܝ ܗ̱ܝ : ܕܰܠܡܳܐ ܢܶܩܛܠܽܘܢܶܗ ܐ̱ܢܳܫܰܝ̈ ܐܰܬܪܳܐ: ܡܶܛܽܠ ܪܰܦܩܰܐ ܕܫܰܦܺܝܪܳܐ ܗ̱ܝ ܒܚܶܙܘܳܗ̇.
8 ܘܰܗܘܳܐ ܕܟܰܕ ܢܓܰܪܘ ܠܶܗ ܬܰܡܳܢ ܝܰܘ̈ܡܳܬܳܐ: ܐܰܕܺܝܩ ܐܰܒܝܡܰܠܟ ܡܰܠܟܳܐ ܕܰܦܠܶܫܬܳܝ̈ܶܐ ܡܶܢ ܟܰܘܬܳܐ: ܘܰܚܙܳܝܗܝ ܠܺܐܝܣܚܳܩ ܟܰܕ ܡܓܰܚܶܟ ܥܰܡ ܪܰܦܩܰܐ ܐܰܢ̱ܬܬܶܗ.
9 ܘܰܩܪܳܐ ܐܰܒܝܡܰܠܟ ܠܺܐܝܣܚܳܩ ܘܶܐܡܰܪ ܠܶܗ: ܗܳܐ ܐܰܢ̱ܬܬܳܟ ܗ̱ܝ: ܘܰܐܝܟܰܢܳܐ ܐܳܡܰܪ ܗ̱ܘܰܝܬ ܕܚܳܬܝ ܗ̱ܝ: ܐܶܡܰܪ ܠܶܗ ܐܺܝܣܚܳܩ ܡܶܛܽܠ ܕܶܐܡܪܶܬ ܕܰܠܡܳܐ ܐܶܡܽܘܬ ܡܶܛܽܠܬܳܗ̇.
10 ܘܶܐܡܰܪ ܠܶܗ ܐܰܒܝܡܰܠܟ: ܡܳܢܰܘ ܗܳܢܳܐ ܕܰܥܒܰܕܬ ܠܰܢ: ܥܰܕ ܩܰܠܺܝܠ ܕܳܡܶܟ ܗܘܳܐ ܚܰܕ ܡܶܢ ܥܰܡܳܐ ܥܰܡ ܐܰܢ̱ܬܬܳܟ: ܘܡܰܝܬܶܐ ܗ̱ܘܰܝܬ ܠܰܢ ܚܛܳܗܳܐ.
11 ܘܦܰܩܶܕ ܐܰܒܝܡܰܠܟ ܠܟܽܠܶܗ ܥܰܡܳܐ ܘܶܐܡܰܪ: ܡܰܢ ܕܡܰܗܰܪ ܠܓܰܒܪܳܐ ܗܳܢܳܐ ܘܠܰܐܢ̱ܬܬܶܗ: ܡܶܬܩܛܳܠܽܘ ܢܶܬܩܛܶܠ.
12 ܘܰܙܪܰܥ ܐܺܝܣܚܳܩ ܒܰܐܪܥܳܐ: ܘܶܐܫܟܰܚ ܒܫܰܢ̱ܬܳܐ ܗܳܝ ܡܳܐܐ ܕܰܣܥܳܖ̈ܶܐ: ܘܒܰܪܟܶܗ ܡܳܪܝܳܐ ܘܺܝܪܶܒ ܓܰܒܪܳܐ.
13 ܘܳܐܙܶܠ ܡܶܐܙܰܠ ܥܕܰܡܳܐ ܕܺܝܪܶܒ ܛܳܒ.
14 ܘܰܗܘܳܐ ܠܶܗ ܩܶܢܝܳܢܳܐ ܕܥܳܢ̈ܳܐ: ܘܩܶܢܝܳܢܳܐ ܕܬܰܘܖ̈ܶܐ: ܘܰܥܒܳܕܬܳܐ ܪܰܒܬܳܐ: ܘܛܰܢܘ ܒܶܗ ܦܠܶܫܬܳܝ̈ܶܐ.
15 ܘܟܽܠܗܶܝܢ ܒܺܖ̈ܶܐ ܕܰܚܦܰܪܘ ܥܰܒ̈ܕܰܝ ܐܰܒܽܘܗܝ ܒܝܰܘ̈ܡܰܘܗܝ ܕܰܐܒܪܳܗܳܡ ܐܰܒܽܘܗܝ: ܛܰܡܶܡܘ ܐܶܢܶܝܢ ܦܠܶܫܬܳܝ̈ܶܐ: ܘܰܡܠܰܘ ܐܶܢܶܝܢ ܥܰܦܪܳܐ.
16 ܘܶܐܡܰܪ ܐܰܒܝܡܰܠܟ ܠܺܐܝܣܚܳܩ: ܙܶܠ ܠܳܟ ܡܶܢ ܠܘܳܬܰܢ: ܡܶܛܽܠ ܕܰܥܫܶܢܬ ܛܳܒ ܡܶܢܰܢ.
17 ܘܶܐܙܰܠ ܡܶܢ ܬܰܡܳܢ ܐܺܝܣܚܳܩ: ܘܰܫܪܳܐ ܒܢܰܚܠܳܐ ܕܓܳܕܳܪ: ܘܺܝܬܶܒ ܬܰܡܳܢ.
18 ܘܰܗܦܰܟ ܐܺܝܣܚܳܩ ܘܰܚܦܰܪ ܒܺܪܳܐ ܕܡܰܝ̈ܳܐ: ܕܰܚܦܰܪܘ ܥܰܒܕܰܝ̈ ܐܰܒܽܘܗܝ ܒܝܰܘܡܰܘ̈ܗܝ ܕܰܐܒܪܳܗܳܡ ܐܰܒܽܘܗܝ: ܘܛܰܡܶܡܘ ܐܶܢܶܝܢ ܦܠܶܫܬܳܝ̈ܶܐ ܡܶܢ ܒܳܬܰܪ ܕܡܺܝܬ ܐܰܒܪܳܗܳܡ: ܘܰܩܪܳܐ ܠܗܶܝܢ ܫܡܳܗ̈ܶܐ ܐܰܝܟ ܫܡܳܗ̈ܶܐ ܕܰܩܪܳܐ ܗܘܳܐ ܠܗܶܝܢ ܐܰܒܽܘܗܝ.
19 ܘܰܚܦܰܪܘ ܥܰܒܕܰܘ̈ܗܝ ܕܺܐܝܣܚܳܩ ܒܢܰܚܠܳܐ: ܘܶܐܫܟܰܚܘ ܬܰܡܳܢ ܒܺܪܳܐ ܕܡܰܝ̈ܳܐ ܚܰܝ̈ܶܐ.
20 ܘܰܢܨܰܘ ܖ̈ܳܥܰܘܳܬܳܐ ܕܓܳܕܳܪ ܥܰܡ ܖ̈ܳܥܰܘܳܬܳܐ ܕܺܐܝܣܚܳܩ: ܘܶܐܡܰܪܘ ܕܺܝܠܰܢ ܐܶܢܶܝܢ ܡܰܝ̈ܳܐ: ܘܰܩܪܰܘ ܫܡܳܗ̇ ܕܒܺܪܳܐ ܥܰܣܩܳܐ: ܡܶܛܽܠ ܕܶܐܬܥܣܶܩܘ ܥܰܡܶܗ.
21 ܘܰܚܦܰܪܘ ܒܺܪܳܐ ܐ̱ܚܪܺܬܳܐ: ܘܰܢܨܰܘ ܐܳܦ ܥܠܶܝܗ̇: ܘܰܩܪܳܐ ܫܡܶܗ ܣܳܛܳܢܳܐ.
22 ܘܫܰܢܺܝ ܡܶܢ ܬܰܡܳܢ: ܘܰܚܦܰܪܘ ܒܺܪܳܐ ܐ̱ܚܪܺܬܳܐ: ܘܠܳܐ ܢܨܰܘ ܥܠܶܝܗ̇: ܘܰܩܪܳܐ ܫܡܳܗ̇ ܪܰܚܒܽܘܬ: ܘܶܐܡܰܪ: ܗܳܫܳܐ ܐܰܪܘܰܚ ܠܰܢ ܡܳܪܝܳܐ: ܘܰܣܓܺܝܢ ܒܰܐܪܥܳܐ.
23 ܘܰܣܠܶܩ ܡܶܢ ܬܰܡܳܢ ܠܒܺܪ ܫܒܰܥ.
24 ܘܶܐܬܓܠܺܝ ܥܠܰܘܗ̱ܝ ܡܳܪܝܳܐ ܒܠܺܠܝܳܐ ܗܰܘ ܘܶܐܡܰܪ ܠܶܗ: ܐܶܢܳܐ ܐ̱ܢܳܐ ܐܰܠܳܗܶܗ ܕܰܐܒܪܳܗܳܡ ܐܰܒܽܘܟ: ܠܳܐ ܬܶܕܚܰܠ ܡܶܛܽܠ ܕܥܰܡܳܟ ܐ̱ܢܳܐ: ܘܶܐܒܰܪܟܳܟ ܘܰܐܣܓܶܐ ܙܰܪܥܳܟ ܡܶܛܽܠ ܐܰܒܪܳܗܳܡ ܥܰܒ̈ܕܰܝ.
25 ܘܰܒܢܳܐ ܬܰܡܳܢ ܡܰܕܒܚܳܐ: ܘܰܩܪܳܐ ܒܰܫܡܶܗ ܕܡܳܪܝܳܐ: ܘܰܢܩܰܫ ܬܰܡܳܢ ܡܰܫܟܢܶܗ: ܘܰܚܦܰܪܘ ܬܰܡܳܢ ܥܰܒܕܰܘ̈ܗܝ ܕܺܐܝܣܚܳܩ ܒܺܪܳܐ.
26 ܘܰܐܒܺܝܡܰܠܟ ܐܶܬܳܐ ܠܘܳܬܶܗ ܡܶܢ ܓܳܕܳܪ: ܘܰܐܚܙܽܘܬ ܪܳܚܡܶܗ: ܘܦܺܝܟܽܠ ܪܰܒ ܚܰܝܠܶܗ.
27 ܘܶܐܡܰܪ ܠܗܽܘܢ ܐܺܝܣܚܳܩ: ܠܡܳܢܳܐ ܐܶܬܰܝܬܽܘܢ ܠܘܳܬܝ: ܐܰܢ̱ܬܽܘܢ ܣܢܰܝܬܽܘܢܳܢܝ ܘܫܰܕܰܪܬܽܘܢܳܢܝ ܡܶܢ ܠܘܳܬܟܽܘܢ.
28 ܘܶܐܡܰܪܘ ܠܶܗ: ܡܶܚܙܳܐ ܚܙܰܝܢ ܕܰܗܘܳܐ ܡܳܪܝܳܐ ܥܰܡܳܟ. ܘܶܐܡܰܪܢ ܕܬܶܗܘܶܐ ܡܰܘܡܳܬܳܐ ܒܰܝ̈ܢܰܝܢ ܘܠܳܟ: ܘܰܢܩܺܝܡ ܩܝܳܡܳܐ ܥܰܡܳܟ.
29 ܕܠܳܐ ܬܶܥܒܶܕ ܠܰܢ ܒܺܝܫܬܳܐ: ܐܰܝܟܰܢܳܐ ܕܠܳܐ ܐܰܗܰܪܢܳܟ: ܘܰܐܝܟܰܢܳܐ ܕܰܥܒܰܕܢ ܠܘܳܬܳܟ ܫܰܦܺܝܪܬܳܐ ܘܫܰܕܰܪܢܳܟ ܒܰܫܠܳܡܳܐ: ܐܰܢ̱ܬ ܗ̱ܘ ܗܳܫܳܐ ܒܪܺܝܟܶܗ ܕܡܳܪܝܳܐ.
30 ܘܰܥܒܰܕ ܠܗܽܘܢ ܡܰܫܬܝܳܐ: ܘܰܠܥܶܣܘ ܘܶܐܫܬܺܝܘ.
31 ܘܩܰܕܶܡܘ ܒܨܰܦܪܳܐ ܘܺܝܡܰܘ ܓܒܰܪ ܠܰܐܚܽܘܗܝ: ܘܫܰܕܰܪ ܐܶܢܽܘܢ ܐܺܝܣܚܳܩ: ܘܶܐܙܰܠܘ ܡܶܢ ܠܘܳܬܶܗ ܒܰܫܠܳܡܳܐ.
32 ܘܰܗܘܳܐ ܒܝܰܘܡܳܐ ܗܰܘ ܘܶܐܬܰܘ ܥܰܒܕܰܘ̈ܗܝ ܕܺܐܝܣܚܳܩ: ܘܚܰܘܝܽܘܗܝ ܥܰܠ ܨܒܽܘܬܳܐ ܕܒܺܪܳܐ ܕܰܚܦܰܪܘ: ܘܶܐܡܰܪܘ ܠܶܗ ܐܶܫܟܰܚܢ ܡܰܝ̈ܳܐ.
33 ܘܰܩܪܳܐ ܫܡܳܗ̇ ܣܰܒܥܳܐ: ܡܶܛܽܠ ܗܳܢܳܐ ܩܪܳܐ ܫܡܳܗ̇ ܕܰܩܪܺܝܬܳܐ ܒܺܪ ܣܒܰܥ ܥܕܰܡܳܐ ܠܝܰܘܡܳܢܳܐ.
34 ܘܰܗܘܳܐ ܥܺܝܣܽܘ ܒܰܪ ܐܰܪܒܥܺܝܢ ܫܢܺܝ̈ܢ: ܘܰܢܣܰܒ ܐܰܢ̱ܬܬܳܐ: ܠܺܝܗܽܘܕܺܝܬ ܒܰܪܬ ܒܪܝ ܚܺܝܬܳܝܳܐ: ܘܰܠܒܶܣܡܰܬ ܒܰܪܬ ܐܰܠܽܘܢ ܚܳܘܳܝܳܐ.
35 ܘܰܗ̈ܘܰܝ ܡܰܡܖ̈ܳܢ ܠܪܽܘܚܶܗ ܕܺܐܝܣܚܳܩ ܘܰܕܪܰܦܩܰܐ.