Genesis 34
The Book of Genesis
܀ ܒܪܝܬܐ ܠܕ ܀
1 ܘܢܶܦܩܰܬ ܕܺܝܢܰܐ ܒܰܪܬ ܠܶܝܰܐ ܕܶܐܬܝܰܠܕܰܬ ܠܝܰܥܩܽܘܒ: ܠܡܶܚܙܳܐ ܒܢ̈ܳܬ ܐܰܬܪܳܐ.
2 ܘܰܚܙܳܗ̇ ܫܟܺܝܡ ܒܰܪ ܚܡܽܘܪ ܚܰܘܳܝܳܐ ܪܰܒܳܐ ܕܰܐܪܥܳܐ ܘܕܰܒܪܳܗ̇ ܘܰܕܡܶܟ ܥܰܡܳܗ̇ ܘܨܰܥܪܳܗ̇.
3 ܘܢܶܦܩܰܬ ܢܰܦܫܶܗ ܒܳܬܰܪ ܕܺܝܢܰܐ ܒܰܪܬ ܝܰܥܩܽܘܒ: ܘܪܰܚܡܳܗ̇ ܠܰܛܠܺܝܬܳܐ: ܘܰܡܠܳܐ ܒܠܶܒܳܗ̇ ܕܰܛܠܺܝܬܳܐ.
4 ܘܶܐܡܰܪ ܫܟܺܝܡ ܠܰܚܡܽܘܪ ܐܰܒܽܘܗܝ: ܣܰܒ ܠܺܝ ܛܠܺܝܬܳܐ ܗܳܕܶܐ ܐܰܢ̱ܬܬܳܐ.
5 ܘܝܰܥܩܽܘܒ ܫܡܰܥ ܕܛܰܡܰܐܘ ܠܕܺܝܢܰܐ ܒܰܪܬܶܗ: ܘܰܒܢܰܘ̈ܗܝ ܥܰܡ ܒܥܺܝܪܳܐ ܗܘܰܘ ܒܚܰܩܠܳܐ: ܘܰܫܬܶܩ ܝܰܥܩܽܘܒ ܥܕܰܡܳܐ ܕܶܐܬܰܘ.
6 ܘܰܢܦܰܩ ܚܡܽܘܪ ܐܰܒܽܘܗܝ ܕܰܫܟܺܝܡ: ܠܘܳܬ ܝܰܥܩܽܘܒ ܠܰܡܡܰܠܳܠܽܘ ܥܰܡܶܗ.
7 ܘܰܒܢܰܝ̈ ܝܰܥܩܽܘܒ ܐܶܬܰܘ ܡܶܢ ܚܰܩܠܳܐ: ܘܟܰܕ ܫܡܰܥܘ ܟܶܪܝܰܬ ܠܗܽܘܢ ܠܓܰܒܖ̈ܶܐ: ܘܶܐܬܒܐܶܫ ܠܗܽܘܢ ܛܳܒ: ܡܶܛܽܠ ܕܰܥܒܰܕܘ ܛܰܡܐܽܘܬܳܐ ܒܺܝܣܪܳܐܶܝܠ: ܘܨܰܥܰܪܘ ܠܒܰܪܬ ܝܰܥܩܽܘܒ: ܘܗܳܟܰܢܳܐ ܠܳܐ ܡܶܬܥܒܶܕ.
8 ܘܡܰܠܶܠ ܚܡܽܘܪ ܥܰܡܗܽܘܢ ܘܶܐܡܰܪ ܠܗܽܘܢ: ܫܟܺܝܡ ܒܶܪܝ ܨܒܳܬ ܢܰܦܫܶܗ ܒܒܰܪܬܟܽܘܢ: ܗܰܒܽܘܗ̇ ܠܶܗ ܐܰܢ̱ܬܬܳܐ.
9 ܘܶܐܬܚܰܬܰܢܘ ܥܰܡܰܢ: ܒܢ̈ܳܬܟܽܘܢ ܗܰܒܘ ܠܰܢ: ܘܰܒܢ̈ܳܬܰܢ ܣܰܒܘ ܠܟܽܘܢ.
10 ܘܥܰܡܰܢ ܬܶܒܘ: ܘܰܐܪܥܳܐ ܗܳܐ ܩܕܳܡܰܝܟܽܘܢ: ܬܶܒܘ ܘܶܐܬܬܰܓܰܪܘ ܘܺܝܪܰܬܘ ܒܳܗ̇.
11 ܘܶܐܡܰܪ ܫܟܺܝܡ ܠܰܐܒܽܘܗ̇ ܘܠܰܐܚܶܝ̈ܗ̇: ܐܶܫܟܰܚ ܖ̈ܰܚܡܶܐ ܒܥܰܝ̈ܢܰܝܟܽܘܢ: ܘܟܽܠ ܕܬܺܐܡܪܽܘܢ ܠܺܝ ܐܶܬܶܠ.
12 ܐܰܣܓܰܘ ܥܠܰܝ ܛܳܒ ܡܰܗܪܳܐ ܘܡܰܘܗ̈ܒܳܬܳܐ: ܘܶܐܬܶܠ ܐܰܝܟܰܢܳܐ ܕܬܺܐܡܪܽܘܢ ܠܺܝ: ܘܗܰܒܘ ܠܺܝ ܛܠܺܝܬܳܐ ܗܳܕܶܐ ܐܰܢ̱ܬܬܳܐ.
13 ܘܰܥܢܰܘ ܒܢܰܝ̈ ܝܰܥܩܽܘܒ ܠܰܫܟܺܝܡ ܘܠܰܚܡܽܘܪ ܐܰܒܽܘܗܝ: ܘܶܐܡܰܪܘ ܠܶܗ ܒܢܶܟܠܳܐ: ܥܰܠ ܕܛܰܡܰܐܘ ܠܕܺܝܢܰܐ ܚܳܬܗܽܘܢ.
14 ܘܶܐܡܰܪܘ: ܠܳܐ ܡܶܫܟܚܺܝܢܰܢ ܠܡܶܥܒܰܕ ܦܶܬܓܳܡܳܐ ܗܳܢܳܐ: ܠܡܶܬܰܠ ܚܳܬܰܢ ܠܓܰܒܪܳܐ ܕܺܐܝܬ ܠܶܗ ܥܽܘܪܠܽܘܬܳܐ: ܡܶܛܽܠ ܕܚܶܣܕܰܐ ܗ̱ܘ ܠܰܢ.
15 ܒܪܰܡ ܒܗܳܕܶܐ ܢܶܬܛܦܺܝܣ ܠܟܽܘܢ ܐܶܢ ܗܽܘ ܕܬܶܗܘܢ ܐܰܟܘܳܬܰܢ: ܘܬܶܓܙܪܽܘܢ ܟܽܠ ܕܶܟܪܳܐ ܐܰܝܟܰܢܳܐ ܕܰܚܢܰܢ ܓܙܺܝܪܺܝܢ.
16 ܢܶܬܶܠ ܠܟܽܘܢ ܒܢ̈ܳܬܰܢ: ܘܰܒܢ̈ܳܬܟܽܘܢ ܢܶܣܰܒ ܠܰܢ: ܘܢܶܬܶܒ ܥܰܡܟܽܘܢ: ܘܢܶܗܘܶܐ ܥܰܡܳܐ ܚܰܕ.
17 ܘܶܐܢ ܠܳܐ ܬܶܫܡܥܽܘܢܳܢ ܠܡܶܓܙܰܪ: ܢܶܕܒܰܪ ܒܰܪܬܰܢ ܘܢܺܐܙܰܠ.
18 ܘܰܫܦܰܖ̈ܝ ܡܶܠܰܝ̈ܗܽܘܢ ܒܥܰܝ̈ܢܰܝ ܚܡܽܘܪ ܘܰܒܥܰܝ̈ܢܰܝ ܫܟܺܝܡ ܒܪܶܗ.
19 ܘܠܳܐ ܫܰܘܚܰܪ ܛܰܠܝܳܐ ܠܡܶܥܒܕܳܗ̇ ܠܰܥܒܺܝܕܬܳܐ: ܡܶܛܽܠ ܕܶܐܨܛܒܺܝ ܗܘܳܐ ܒܒܰܪܬ ܝܰܥܩܽܘܒ: ܘܗܽܘ ܝܰܩܺܝܪ ܗܘܳܐ ܡܶܢ ܟܽܠܶܗ ܒܶܝܬ ܐܰܒܽܘܗܝ.
20 ܘܶܐܬܳܐ ܚܡܽܘܪ ܘܰܫܟܺܝܡ ܒܪܶܗ ܠܬܰܪܥܳܐ ܕܰܩܪܺܝܬܗܽܘܢ: ܘܡܰܠܶܠܘ ܥܰܡ ܐ̱ܢܳܫ̈ܳܐ ܕܰܩܪܺܝܬܗܽܘܢ: ܘܶܐܡܰܪܘ ܠܗܽܘܢ.
21 ܓܰܒܖ̈ܶܐ ܗܳܠܶܝܢ ܫܳܠܡܺܝܢ ܐܶܢܽܘܢ ܥܰܡܰܢ: ܢܶܬܒܽܘܢ ܒܰܐܪܥܳܐ ܘܢܶܬܬܰܓܪܽܘܢ ܒܳܗ̇: ܘܰܐܪܥܳܐ ܗܳܐ ܪܘܰܚܬܳܐ ܕܺܐܝܕܰܝ̈ܳܐ ܩܕܳܡܝܗܽܘܢ: ܒܢ̈ܳܬܗܽܘܢ ܢܶܣܰܒ ܠܰܢ ܢܶܫ̈ܶܐ: ܘܰܒܢ̈ܳܬܰܢ ܢܶܬܶܠ ܠܗܽܘܢ.
22 ܒܪܰܡ ܒܗܳܕܶܐ ܡܶܬܛܦܺܝܣܺܝܢ ܠܰܢ ܓܰܒܖ̈ܶܐ ܕܢܶܬܒܽܘܢ ܥܰܡܰܢ: ܘܢܶܗܘܶܐ ܥܰܡܳܐ ܚܰܕ: ܡܳܐ ܕܰܓܙܰܪܢ ܟܽܠ ܕܶܟܪܳܐ ܐܰܝܟܰܢܳܐ ܕܗܶܢܽܘܢ ܓܙܺܝܪܺܝܢ.
23 ܢܶܟܣܰܝ̈ܗܽܘܢ ܘܩܶܢܝܳܢܗܽܘܢ ܘܟܽܠܳܗ̇ ܒܥܺܝܪܗܽܘܢ: ܗܳܐ ܕܺܝܠܰܢ ܐܶܢܽܘܢ: ܒܪܰܡ ܢܶܬܛܦܺܝܣ ܠܗܽܘܢ: ܘܢܶܬܒܽܘܢ ܥܰܡܰܢ.
24 ܘܰܫܡܰܥܘ ܡܶܢ ܫܟܺܝܡ ܘܡܶܢ ܚܡܽܘܪ ܐܰܒܽܘܗܝ: ܟܽܠ ܢܳܦ̈ܩܰܝ ܬܰܪܥܳܐ ܕܰܩܪܺܝܬܶܗ: ܘܰܓܙܰܪܘ ܟܽܠ ܕܶܟܪܳܐ ܟܽܠ ܢܳܦ̈ܩܰܝ ܬܰܪܥܳܐ ܕܰܩܪܺܝܬܶܗ:
25 ܘܰܗܘܳܐ ܒܝܰܘܡܳܐ ܬܠܺܝܬܝܳܐ ܟܰܕ ܚܣܰܢܘ ܟܺܐܒܰܝ̈ܗܽܘܢ: ܢܣܰܒܘ ܬܪܶܝܢ ܒܢܰܘ̈ܗܝ ܕܝܰܥܩܽܘܒ: ܫܶܡܥܽܘܢ ܘܠܶܘܺܝ ܐܰܚܶܝ̈ܗ̇ ܕܕܺܝܢܰܐ: ܓܒܰܪ ܚܰܪܒܶܗ: ܘܥ̣ܰܠܘ ܥܰܠ ܩܪܺܝܬܳܐ ܒܫܶܠܝܳܐ: ܘܩܰܛܶܠܘ ܟܽܠ ܕܶܟܪܳܐ.
26 ܘܠܰܚܡܽܘܪ ܘܠܰܫܟܺܝܡ ܒܪܶܗ ܩܛܰܠܘ ܒܦܽܘܡܳܐ ܕܚܰܪܒܳܐ: ܘܕܰܒܪܽܘܗ̇ ܠܕܺܝܢܰܐ ܚܳܬܗܽܘܢ ܡܶܢ ܒܶܝܬ ܫܟܺܝܡ: ܘܰܢܦܰܩܘ.
27 ܘܰܒܢܰܝ̈ ܝܰܥܩܽܘܒ ܥ̣ܰܠܘ ܥܰܠ ܩܛܺܝ̈ܠܶܐ: ܘܒܰܙܘ ܠܰܩܪܺܝܬܳܐ: ܥܰܠ ܕܛܰܡܰܐܘ ܠܕܺܝܢܰܐ ܚܳܬܗܽܘܢ.
28 ܘܥܳܢ̈ܗܽܘܢ: ܘܬܰܘܖ̈ܰܝܗܽܘܢ: ܘܚܶܡܖ̈ܗܽܘܢ ܕܒܰܩܪܺܝܬܳܐ ܘܕܰܒܚܰܩܠܳܐ ܕܒܰܪܘ.
29 ܘܟܽܠܗܽܘܢ ܢܶܟܣܰܝ̈ܗܽܘܢ ܘܟܽܠܳܗ̇ ܝܺܩܰܪܬܗܽܘܢ: ܘܰܠܢܶܫܰܝ̈ܗܽܘܢ ܫܒܰܘ: ܘܒܰܙܘ ܟܽܠ ܕܺܐܝܬ ܒܰܩܪܺܝܬܳܐ.
30 ܘܶܐܡܰܪ ܝܰܥܩܽܘܒ ܠܫܶܡܥܽܘܢ ܘܰܠܠܶܘܺܝ: ܐܰܗܰܪܬܽܘܢܳܢܝ: ܕܬܰܒܐܫܽܘܢ ܠܺܝ ܒܶܝܬ ܥܳܡܽܘܖ̈ܶܝܗ̇ ܕܰܐܪܥܳܐ: ܒܶܝܬ ܟܢܰܥܢܳܝ̈ܶܐ ܘܒܶܝܬ ܦܰܖ̈ܙܳܝܶܐ: ܘܶܐܢܳܐ ܩܰܠܺܝܠ ܐ̱ܢܳܐ ܒܡܶܢܝܳܢܳܐ: ܘܡܶܬܟܰܢܫܺܝܢ ܥܠܰܝ ܘܡܳܚܶܝܢ ܠܺܝ: ܘܳܐܒܶܕ ܐ̱ܢܳܐ ܐܶܢܳܐ ܘܒܰܝܬܝ.
31 ܘܶܐܡܰܪܘ ܐܰܝܟ ܙܳܢܺܝܬܳܐ ܐܶܬܥܒܶܕ ܠܚܳܬܰܢ.