Genesis 41
The Book of Genesis
܀ ܒܪܝܬܐ ܡܐ ܀
1 ܘܰܗܘܳܐ ܡܶܢ ܒܳܬܰܪ ܬܰܪܬܶܝܢ ܫܢܺܝ̈ܢ: ܘܦܶܪܥܽܘܢ ܚܠܰܡ ܚܶܠܡܳܐ: ܘܗܳܐ ܩܳܐܶܡ ܥܰܠ ܢܰܗܪܳܐ.
2 ܘܗܳܐ ܡܶܢ ܢܰܗܪܳܐ ܣܳܠ̈ܩܰܢ ܫܒܰܥ ܬܰܘܖ̈ܳܢ: ܫܰܦܺܝܖ̈ܳܢ ܒܚܶܙܘܗܶܝܢ: ܘܫܰܡܺܝ̈ܢܰܢ ܒܒܶܣܪܗܶܝܢ: ܘܖ̈ܳܥܝܳܢ ܒܡܰܪܓܳܐ.
3 ܘܗܳܐ ܫܒܰܥ ܬܰܘܖ̈ܳܬܳܐ ܐ̱ܚܖ̈ܳܢܝܳܬܳܐ ܣܳܠ̈ܩܳܢ ܒܳܬܰܪܗܶܝܢ ܡܶܢ ܢܰܗܪܳܐ: ܒܺܝ̈ܫܳܢ ܒܚܶܙܘܗܶܝܢ ܘܰܡܚܺܝ̈ܠܰܢ ܒܒܶܣܪܗܶܝܢ: ܘܩܳܡܶܝ̈ܢ ܥܰܠ ܓܶܢ̱ܒ ܬܰܘܖ̈ܳܬܳܐ ܥܰܠ ܣܶܦܰܬ ܢܰܗܪܳܐ.
4 ܘܶܐܟܰܠܝ̈ ܬܰܘܖ̈ܳܬܳܐ ܕܒܺܝ̈ܫܳܢ ܒܚܶܙܘܗܶܝܢ ܘܰܡܚܺܝ̈ܠܰܢ ܒܒܶܣܪܗܶܝܢ: ܠܰܫܒܰܥ ܬܰܘܖ̈ܳܬܳܐ ܕܫܰܦܺܝܖ̈ܳܢ ܒܚܶܙܘܗܶܝܢ ܘܫܰܡܺܝ̈ܢܰܢ ܒܒܶܣܪܗܶܝܢ: ܘܶܐܬܬܥܺܝܪ ܦܶܪܥܽܘܢ.
5 ܘܰܕܡܶܟ ܘܰܚܠܰܡ ܕܬܰܪܬܶܝܢ ܙܰܒܢܺܝ̈ܢ: ܘܗܳܐ ܫܒܰܥ ܫܶܒ̈ܠܺܝܢ ܣܳܠ̈ܩܳܢ ܒܩܰܢܝܳܐ ܚܰܕ: ܡܰܠ̈ܝܳܢ ܘܛܳܒ̈ܳܢ.
6 ܘܗܳܐ ܫܒܰܥ ܫܶܒ̈ܠܺܝܢ ܩܰܛܺܝ̈ܢܳܢ ܘܰܫܩܺܝ̈ܦܳܢ ܠܪܽܘܚܳܐ ܕܫܰܘܒܳܐ: ܝܳܥ̈ܝܳܢ ܒܳܬܰܪܗܶܝܢ.
7 ܘܰܒܠܰܥ̈ܝ ܫܶܒ̈ܠܶܐ ܩܰܛܺܝ̈ܢܳܬܳܐ: ܠܰܫܒܰܥ ܫܶܒ̈ܠܶܐ ܫܰܡܺܝ̈ܢܳܬܳܐ ܘܡܰܠ̈ܝܳܬܳܐ: ܘܶܐܬܬܥܺܝܪ ܦܶܪܥܽܘܢ ܘܗܳܐ ܚܶܠܡܳܐ ܗܽܘ.
8 ܘܰܗܘܳܐ ܒܨܰܦܪܳܐ: ܘܶܐܬܛܰܪܦܰܬ ܪܽܘܚܶܗ ܕܦܶܪܥܽܘܢ: ܘܫܰܕܰܪ ܩܪܳܐ ܠܟܽܠܗܽܘܢ ܚܰܖ̈ܳܫܶܐ: ܘܰܠܟܽܠܗܽܘܢ ܚܰܟܺܝ̈ܡܶܝܗ̇ ܕܡܶܨܪܶܝܢ: ܘܶܐܫܬܰܥܺܝ ܠܗܽܘܢ ܦܶܪܥܽܘܢ ܚܶܠܡܰܘ̈ܗܝ: ܘܠܰܝܬ ܐ̱ܢܳܫ ܕܦܳܫܰܪ ܠܗܽܘܢ ܠܦܶܪܥܽܘܢ.
9 ܘܡܰܠܶܠ ܪܰܒ ܫܳܩܰܘ̈ܳܬܳܐ ܩܕܳܡ ܦܶܪܥܽܘܢ ܘܶܐܡܰܪ: ܣܽܘܪܚܳܢܝ ܡܰܕܟܰܪ ܐ̱ܢܳܐ ܝܰܘܡܳܢܳܐ.
10 ܦܶܪܥܽܘܢ ܪܓܶܙ ܥܰܠ ܥܰܒܕܰܘ̈ܗܝ: ܘܰܐܪܡܝܰܢܝ ܒܶܝܬ ܐܰܣܺܝܖ̈ܶܐ ܒܶܝܬ ܪܰܒ ܕܰܚ̈ܫܶܐ: ܠܺܝ ܘܰܠܪܰܒ ܢܰܚܬܽܘ̈ܡܶܐ.
11 ܘܰܚܠܰܡܢ ܚܶܠ̈ܡܶܐ ܒܠܺܠܝܳܐ ܚܰܕ ܐܶܢܳܐ ܘܗܰܘ: ܓܒܰܪ ܐܰܝܟ ܦܫܳܪ ܚܶܠܡܶܗ ܚܠܰܡܢ.
12 ܘܬܰܡܳܢ ܥܰܡܰܢ ܥܠܰܝܡܳܐ ܥܶܒܪܳܝܳܐ: ܥܰܒܕܳܐ ܕܪܰܒ ܕܰܚ̈ܫܶܐ: ܘܶܐܫܬܰܥܺܝܢ ܠܶܗ ܘܰܦܫܰܪ ܠܰܢ ܚܶܠܡܰܝ̈ܢ: ܐ̱ܢܳܫ ܐܰܝܟ ܚܶܠܡܶܗ ܦܫܰܪ.
13 ܘܰܐܝܟ ܕܰܦܫܰܪ ܠܰܢ: ܗܳܟܰܢܳܐ ܗܘܳܐ ܠܰܢ: ܠܺܝ ܐܰܗܦܶܟ ܥܰܠ ܫܶܕܬܝ: ܘܰܠܗܰܘ ܙܩܰܦ.
14 ܘܫܰܕܰܪ ܦܶܪܥܽܘܢ ܘܰܩܪܳܝܗܝ ܠܝܰܘܣܶܦ: ܘܰܐܪܗܛܽܘܗܝ ܡܶܢ ܓܽܘܒܳܐ: ܘܰܓܪܰܥ ܘܚܰܠܶܦ ܢܰܚܬܰܘ̈ܗܝ: ܘܥܰܠ ܩܕܳܡ ܦܶܪܥܽܘܢ.
15 ܘܶܐܡܰܪ ܦܶܪܥܽܘܢ ܠܝܰܘܣܶܦ: ܚܶܠܡܳܐ ܚܶܠܡܶܬ ܘܦܳܫܽܘܪܳܐ ܠܰܝܬ ܠܶܗ: ܘܶܐܢܳܐ ܫܶܡܥܶ݀ܬ ܥܠܰܝܟ: ܕܫܳܡܰܥ ܐܰܢ̱ܬ ܚܶܠ̈ܡܶܐ ܘܦܳܫܰܪ ܐܰܢ̱ܬ ܠܶܗ.
16 ܥܢܳܐ ܝܰܘܣܶܦ ܘܶܐܡܰܪ ܠܦܶܪܥܽܘܢ: ܕܰܠܡܳܐ ܣܳܒܰܪ ܐܰܢ̱ܬ ܕܒܶܠܥܳܕ ܐܰܠܳܗܳܐ. ܢܶܥܢܶܐ ܫܠܳܡܳܐ ܠܦܶܪܥܽܘܢ.
17 ܘܶܐܡܰܪ ܦܶܪܥܽܘܢ ܠܝܰܘܣܶܦ: ܒܚܶܠܡܝ: ܗܳܐ ܩܳܐܶܡ ܐ̱ܢܳܐ ܥܰܠ ܣܶܦܰܬ ܢܰܗܪܳܐ.
18 ܘܗܳܐ ܡܶܢ ܢܰܗܪܳܐ ܣܳܠ̈ܩܳܢ ܫܒܰܥ ܬܰܘܖ̈ܳܬܳܐ ܫܰܡܺܝ̈ܢܰܢ ܒܒܶܣܪܗܶܝܢ: ܘܫܰܦܺܝܪ ܚܶܙܘܗܶܝܢ: ܘܖ̈ܳܥܝܳܢ ܒܡܰܪܓܳܐ.
19 ܘܗܳܐ ܫܒܰܥ ܬܰܘܖ̈ܳܢ ܐ̱ܚܖ̈ܳܢܝܳܢ ܣܳܠ̈ܩܳܢ ܒܳܬܰܪܗܶܝܢ: ܒܨܺܝܖ̈ܳܢ ܘܒܺܝܫ ܚܶܙܘܗܶܝܢ: ܘܰܡܚܺܝܠ ܒܶܣܪܗܶܝܢ ܛܳܒ: ܘܠܳܐ ܚܙܺܝ݀ܬ ܕܒܺܝ̈ܫܳܢ ܐܰܟܘܳܬܗܶܝܢ ܒܟܽܠܳܗ̇ ܐܰܪܥܳܐ ܕܡܶܨܪܶܝܢ.
20 ܘܶܐܟܰܠܝ̈ ܬܰܘܖ̈ܳܬܳܐ ܡܚܺܝ̈ܠܳܬܳܐ ܘܒܺܝ̈ܫܳܬܳܐ: ܠܰܫܒܰܥ ܬܰܘܖ̈ܳܬܳܐ ܩܰܕܡܳܝ̈ܳܬܳܐ ܫܰܡܺܝ̈ܢܳܬܳܐ.
21 ܘܥ̣ܰܠܝ̈ ܠܓܰܘܗܶܝܢ: ܘܠܳܐ ܐܶܬܺܝܕܰܥ ܕܥܰܠܝ̈ ܠܓܰܘܗܶܝܢ: ܘܚܶܙܘܗܶܝܢ ܒܺܝܫ ܐܰܝܟ ܕܰܒܩܰܕܡܳܝܬܳܐ: ܘܶܐܬܬܥܺܝܪܶܬ.
22 ܘܬܽܘܒ ܚܙܺܝ݀ܬ ܒܚܶܠܡܝ: ܘܗܳܐ ܫܒܰܥ ܫܶܒܠܺܝܢ ܣܳܠ̈ܩܳܢ ܒܩܰܢܝܳܐ ܚܰܕ: ܡܰܠ̈ܝܳܢ ܘܛܳܒ̈ܳܢ.
23 ܘܗܳܐ ܫܒܰܥ ܫܶܒ̈ܠܺܝܢ ܩܰܛܺܝ̈ܢܳܢ ܘܰܫܩܺܝ̈ܦܳܢ ܠܪܽܘܚܳܐ ܕܫܰܘܒܳܐ ܝܳܥܝ̈ܳܢ ܒܳܬܰܪܗܶܝܢ.
24 ܘܰܒܠܰܥܝ̈ ܫܶܒ̈ܠܶܐ ܩܰܛܺܝ̈ܢܳܬܳܐ ܠܰܫܒܰܥ ܫܶܒ̈ܠܶܐ ܛܳܒ̈ܳܬܳܐ: ܘܶܐܡܪܶܬ ܠܚܰܖ̈ܳܫܶܐ ܘܠܰܝܬ ܕܰܡܚܰܘܶܐ ܠܺܝ.
25 ܘܶܐܡܰܪ ܝܰܘܣܶܦ ܠܦܶܪܥܽܘܢ: ܚܶܠܡܳܐ ܦܶܪܥܽܘܢ ܚܰܕ ܗܽܘ: ܡܶܕܶܡ ܕܰܐܠܳܗܳܐ ܥܳܒܶܕ ܚܰܘܺܝ ܠܦܶܪܥܽܘܢ.
26 ܫܒܰܥ ܬܰܘܖ̈ܳܬܳܐ ܛܳܒ̈ܳܬܳܐ ܫܒܰܥ ܐܶܢܶܝܢ ܫܢܺܝ̈ܢ: ܘܰܫܒܰܥ ܫܶܒ̈ܠܶܐ ܛܳܒ̈ܳܬܳܐ ܫܒܰܥ ܐܶܢܶܝܢ ܫܢܺܝ̈ܢ: ܚܶܠܡܳܐ ܚܰܕ ܗܽܘ.
27 ܘܰܫܒܰܥ ܬܰܘܖ̈ܳܬܳܐ ܡܚܺܝ̈ܠܳܬܳܐ ܘܒܺܝ̈ܫܳܬܳܐ: ܕܣܳܠ̈ܩܳܢ ܒܳܬܰܪܗܶܝܢ: ܫܒܰܥ ܐܶܢܶܝܢ ܫܢܺܝ̈ܢ: ܘܰܫܒܰܥ ܫܶܒ̈ܠܶܐ ܩܰܛܺܝ̈ܢܳܬܳܐ ܕܰܫܩܺܝ̈ܦܳܢ ܠܪܽܘܚܳܐ ܕܫܰܘܒܳܐ: ܢܶܗܘ̈ܝܳܢ ܫܒܰܥ ܫܢܺܝ̈ܢ ܟܰܦܢܳܐ.
28 ܗܽܘ ܦܶܬܓܳܡܳܐ ܕܶܐܡܪܶܬ ܠܦܶܪܥܽܘܢ: ܐܰܝܠܶܝܢ ܕܰܐܠܳܗܳܐ ܥܳܒܶܕ: ܚܰܘܺܝ ܠܦܶܪܥܽܘܢ.
29 ܘܗܳܐ ܫܒܰܥ ܫܢܺܝ̈ܢ ܐܳܬܝ̈ܳܢ: ܣܰܒܥܳܐ ܪܰܒܳܐ ܒܟܽܠܳܗ̇ ܐܰܪܥܳܐ ܕܡܶܨܪܶܝܢ.
30 ܘܰܢܩܽܘ̈ܡܳܢ ܫܒܰܥ ܫܢܺܝ̈ܢ ܕܟܰܦܢܳܐ ܒܳܬܰܪܗܶܝܢ: ܘܢܶܬܛܥܶܐ ܟܽܠܶܗ ܣܰܒܥܳܐ ܕܰܗܘܳܐ ܒܟܽܠܳܗ̇ ܐܰܪܥܳܐ ܕܡܶܨܪܶܝܢ: ܘܰܢܣܺܝܦ ܟܰܦܢܳܐ ܠܰܐܪܥܳܐ.
31 ܘܠܳܐ ܢܶܬܺܝܕܰܥ ܣܰܒܥܳܐ ܒܰܐܪܥܳܐ: ܡܶܛܽܠ ܟܰܦܢܳܐ ܗܰܘ ܕܡܶܢ ܒܳܬܰܪܟܶܢ ܕܥܰܫܺܝܢ ܗܽܘ ܛܳܒ.
32 ܘܕܶܐܬܬܢܺܝ ܚܶܠܡܳܐ ܠܦܶܪܥܽܘܢ ܕܬܰܪܬܶܝܢ ܙܰܒܢܺܝ̈ܢ: ܕܰܡܛܰܝܰܒ ܦܶܬܓܳܡܳܐ ܡܶܢ ܩܕܳܡ ܐܰܠܳܗܳܐ: ܘܰܡܣܰܪܗܶܒ ܐܰܠܳܗܳܐ ܠܡܶܥܒܕܶܗ.
33 ܗܳܫܳܐ ܢܶܚܙܶܐ ܦܶܪܥܽܘܢ ܓܰܒܪܳܐ ܚܰܟܺܝܡܳܐ ܘܣܰܟܽܘܠܬܳܢܳܐ: ܘܰܢܩܺܝܡܺܝܘܗܝ ܥܰܠ ܐܰܪܥܳܐ ܕܡܶܨܪܶܝܢ.
34 ܘܢܶܥܒܶܕ ܦܶܪܥܽܘܢ ܘܰܢܩܺܝܡ ܫܰܠܺܝ̈ܛܶܐ ܥܰܠ ܐܰܪܥܳܐ ܕܡܶܨܪܶܝܢ: ܘܢܶܣܒܽܘܢ ܚܰܕ ܡܶܢ ܚܰܡܫܳܐ ܒܰܐܪܥܳܐ ܕܡܶܨܪܶܝܢ: ܒܰܫܒܰܥ ܫܢܰܝ̈ܳܐ ܕܣܰܒܥܳܐ.
35 ܘܰܢܟܰܢܫܽܘܢ ܥܒܽܘܪܳܐ ܕܰܫܢܰܝ̈ܳܐ ܗܳܠܶܝܢ ܛܳܒ̈ܳܬܳܐ ܕܳܐܬܝ̈ܳܢ: ܘܢܶܚܡܠܽܘܢ ܥܒܽܘܪܳܐ ܬܚܶܝܬ ܐܺܝܕܳܐ ܕܦܶܪܥܽܘܢ: ܥܒܽܘܪܳܐ ܒܩܽܘܖ̈ܝܳܐ ܢܶܛܪܽܘܢ.
36 ܘܢܶܗܘܶܐ ܥܒܽܘܪܳܐ ܢܛܺܝܪ ܠܰܐܪܥܳܐ: ܠܰܫܒܰܥ ܫܢܰܝ̈ܳܐ ܕܟܰܦܢܳܐ ܕܗܳܘܝ̈ܳܢ ܒܰܐܪܥܳܐ ܕܡܶܨܪܶܝܢ: ܘܠܳܐ ܬܣܽܘܦ ܐܰܪܥܳܐ ܒܟܰܦܢܳܐ.
37 ܘܰܫܦܰܪ ܦܶܬܓܳܡܳܐ ܒܥܰܝ̈ܢܰܝ ܦܶܪܥܽܘܢ: ܘܰܒܥܰܝ̈ܢܰܝ ܥܰܒܕܰܘ̈ܗܝ.
38 ܘܶܐܡܰܪ ܦܶܪܥܽܘܢ ܠܥܰܒܕܰܘ̈ܗܝ: ܡܶܫܬܟܰܚ ܐܰܝܟ ܓܰܒܪܳܐ ܗܳܢܳܐ ܕܪܽܘܚܳܐ ܕܰܐܠܳܗܳܐ ܐܺܝܬ ܒܶܗ.
39 ܘܶܐܡܰܪ ܦܶܪܥܽܘܢ ܠܝܰܘܣܶܦ: ܡܶܢ ܒܳܬܰܪ ܕܰܐܘܕܥܳܟ ܐܰܠܳܗܳܐ ܗܳܕܶܐ ܟܽܠܳܗ̇: ܠܰܝܬ ܕܚܰܟܺܝܡ ܘܣܰܟܽܘܠܬܳܢ ܐܰܟܘܳܬܳܟ.
40 ܐܰܢ̱ܬ ܬܶܗܘܶܐ ܥܰܠ ܒܰܝܬܝ: ܘܥܰܠ ܡܶܠܰܬ ܦܽܘܡܳܟ ܢܶܣܰܒ ܕܺܝܢܳܐ ܟܽܠܶܗ ܥܰܡܝ: ܒܰܠܚܽܘܕ ܟܽܘܪܣܝܳܐ ܐܺܪܰܒ ܡܶܢܳܟ.
41 ܘܶܐܡܰܪ ܦܶܪܥܽܘܢ ܠܝܰܘܣܶܦ: ܚܙܺܝ ܕܰܐܫܠܶܛܬܳܟ ܥܰܠ ܟܽܠܳܗ̇ ܐܰܪܥܳܐ ܕܡܶܨܪܶܝܢ.
42 ܘܰܫܩܰܠ ܦܶܪܥܽܘܢ ܥܶܙܰܩܬܳܐ ܡܶܢ ܐܺܝܕܶܗ: ܘܣܳܡܳܗ̇ ܒܺܐܝܕܶܗ ܕܝܰܘܣܶܦ: ܘܰܐܠܒܫܶܗ ܠܒܽܘܫܳܐ ܕܒܽܘܨܳܐ: ܘܰܐܪܡܺܝ ܗܰܡܢܺܝܟܳܐ ܕܕܰܗܒܳܐ ܒܨܰܘܪܶܗ.
43 ܘܰܐܘܬܒܶܗ ܒܡܰܪܟܰܒܬܳܐ ܐ̱ܚܪܺܬܳܐ ܕܺܝܠܶܗ: ܘܰܩܪܳܐ ܩܕܳܡܰܘܗܝ ܐܰܒܳܐ ܘܫܰܠܺܝܛܳܐ: ܘܰܐܫܠܛܶܗ ܥܰܠ ܟܽܠܳܗ̇ ܐܰܪܥܳܐ ܕܡܶܨܪܶܝܢ.
44 ܘܶܐܡܰܪ ܦܶܪܥܽܘܢ ܠܝܰܘܣܶܦ: ܐܶܢܳܐ ܦܶܪܥܽܘܢ ܦܶܩܕܶܬ: ܕܒܶܠܥܳܕܰܝܟ ܐ̱ܢܳܫ ܠܳܐ ܢܪܺܝܡ ܐܺܝܕܶܗ ܐܰܘ ܪܶܓܠܶܗ ܒܟܽܠܳܗ̇ ܐܰܪܥܳܐ ܕܡܶܨܪܶܝܢ.
45 ܘܰܩܪܳܐ ܦܶܪܥܽܘܢ ܫܡܶܗ ܕܝܰܘܣܶܦ: ܨܰܦܢܰܬ ܦܰܥܢܰܚ: ܕܟܰܣ̈ܝܳܬܳܐ ܓܰܠܝ̈ܳܢ ܠܶܗ: ܘܝܰܗܒ ܠܶܗ ܠܰܐܣܝܰܬ ܒܰܪܬ ܦܽܘܛܺܝܦܰܪ ܟܽܘܡܪܳܐ ܕܽܐܘܢ: ܐܰܢ̱ܬܬܳܐ: ܘܰܢܦܰܩ ܝܰܘܣܶܦ ܥܰܠ ܟܽܠܳܗ̇ ܐܰܪܥܳܐ ܕܡܶܨܪܶܝܢ.
46 ܘܝܰܘܣܶܦ ܒܰܪ ܬܠܳܬܺܝܢ ܗܘܳܐ ܫܢܺܝ̈ܢ: ܟܰܕ ܩܳܡ ܩܕܳܡ ܦܶܪܥܽܘܢ ܡܰܠܟܳܐ ܕܡܶܨܪܶܝܢ: ܘܰܢܦܰܩ ܝܰܘܣܶܦ ܡܶܢ ܩܕܳܡ ܦܶܪܥܽܘܢ: ܘܰܥܒܰܪ ܒܟܽܠܳܗ̇ ܐܰܪܥܳܐ ܕܡܶܨܪܶܝܢ.
47 ܘܚܶܡܠܰܬ ܐܰܪܥܳܐ ܒܰܫܒܰܥ ܫܢܰܝ̈ܳܐ ܕܣܰܒܥܳܐ ܒܰܐܘܨܖ̈ܶܐ.
48 ܘܰܚܡܰܠ ܟܽܠܶܗ ܥܒܽܘܪܳܐ ܕܰܫܒܰܥ ܫܢܰܝ̈ܳܐ ܕܣܰܒܥܳܐ ܕܰܗܘܰܝ̈ ܒܰܐܪܥܳܐ ܕܡܶܨܪܶܝܢ: ܘܝܰܗܒ ܥܒܽܘܪܳܐ ܒܩܽܘܖ̈ܝܳܐ: ܥܒܽܘܪܳܐ ܕܚܰܩ̈ܠܳܬܳܐ ܕܰܩܪܺܝܬܳܐ ܘܕܰܚܕܳܖ̈ܶܝܗ̇ ܚܡܰܠ ܒܓܰܘܳܗ̇.
49 ܘܰܚܡܰܠ ܝܰܘܣܶܦ ܥܒܽܘܪܳܐ: ܐܰܝܟ ܚܳܠܳܐ ܕܝܰܡܳܐ ܣܽܘܓܳܐܐ ܕܛܳܒ: ܥܕܰܡܳܐ ܕܰܠܐܺܝ ܠܡܶܡܢܳܐ ܕܠܳܐ ܡܶܢܝܳܢܳܐ.
50 ܘܰܠܝܰܘܣܶܦ ܐܶܬܺܝܠܶܕܘ ܠܶܗ ܬܪܶܝܢ ܒܢܺܝ̈ܢ: ܥܰܕܠܳܐ ܬܶܥܽܘܠ ܫܰܢ̱ܬܳܐ ܕܟܰܦܢܳܐ: ܕܝܶܠܕܰܬ ܠܶܗ ܐܰܣܝܰܬ ܒܰܪܬ ܦܽܘܛܺܝܦܰܪ ܟܽܘܡܪܳܐ ܕܽܐܘܢ.
51 ܘܰܩܪܳܐ ܝܰܘܣܶܦ ܫܶܡ ܒܪܶܗ ܒܽܘܟܪܶܗ ܡܢܰܫܶܐ: ܡܶܛܽܠ ܕܰܐܢܫܝܰܢܝ ܐܰܠܳܗܳܐ ܟܽܠܶܗ ܥܰܡܠܝ ܘܟܽܠܶܗ ܒܶܝܬ ܐܳܒܝ.
52 ܘܰܫܡܶܗ ܕܰܐ̱ܚܪܺܢܳܐ ܩܪܳܐ ܐܰܦܪܶܝܡ: ܡܶܛܽܠ ܕܰܐܦܪܝܰܢܝ ܐܰܠܳܗܳܐ ܒܰܐܪܥܳܐ ܕܫܽܘܥܒܳܕܝ.
53 ܘܰܓܡܰܖ̈ܝ ܫܒܰܥ ܫܢܰܝ̈ܳܐ ܕܣܰܒܥܳܐ ܕܰܗܘܰܝ̈ ܒܰܐܪܥܳܐ ܕܡܶܨܪܶܝܢ.
54 ܘܫܰܖ̈ܺܝ ܫܒܰܥ ܫܢܰܝ̈ܳܐ ܕܟܰܦܢܳܐ ܠܡܶܐܬܳܐ ܐܰܝܟ ܕܶܐܡܰܪ ܝܰܘܣܶܦ: ܘܰܗܘܳܐ ܟܰܦܢܳܐ ܒܟܽܠܗܶܝܢ ܐܰܖ̈ܥܳܬܳܐ: ܘܰܒܟܽܠܳܗ̇ ܐܰܪܥܳܐ ܕܡܶܨܪܶܝܢ ܠܳܐ ܗܘܳܐ ܠܰܚܡܳܐ.
55 ܘܟܶܦܢܰܬ ܟܽܠܳܗ̇ ܐܰܪܥܳܐ ܕܡܶܨܪܶܝܢ: ܘܰܡܒܰܓܢܺܝܢ ܥܰܡܳܐ ܥܰܠ ܦܶܪܥܽܘܢ ܥܰܠ ܠܰܚܡܳܐ: ܘܶܐܡܰܪ ܦܶܪܥܽܘܢ ܠܟܽܠܗܽܘܢ ܡܶܨܖ̈ܳܝܶܐ: ܙܶܠܘ ܠܘܳܬ ܝܰܘܣܶܦ: ܘܡܶܕܶܡ ܕܳܐܡܰܪ ܠܟܽܘܢ ܬܶܥܒܕܽܘܢ.
56 ܘܟܰܦܢܳܐ ܗܘܳܐ ܥܰܠ ܐܰܦܰܝ̈ ܟܽܠܳܗ̇ ܐܰܪܥܳܐ: ܘܰܦܬܰܚ ܝܰܘܣܶܦ ܐܰܘܨܖ̈ܶܐ: ܘܙܰܒܶܢ ܠܡܶܨܖ̈ܳܝܶܐ.
57 ܘܰܥܫܶܢ ܟܰܦܢܳܐ ܒܰܐܪܥܳܐ ܕܡܶܨܪܶܝܢ: ܘܟܽܠܳܗ̇ ܐܰܪܥܳܐ ܐܶܬܰܘ ܠܡܶܨܪܶܝܢ ܠܰܡܡܳܪ ܡܶܢ ܝܰܘܣܶܦ: ܡܶܛܽܠ ܕܰܥܫܶܢ ܟܰܦܢܳܐ ܒܟܽܠܳܗ̇ ܐܰܪܥܳܐ ܕܡܶܨܪܶܝܢ.