Genesis 33
The Book of Genesis
܀ ܒܪܝܬܐ ܠܓ ܀
1 ܘܰܐܪܺܝܡ ܝܰܥܩܽܘܒ ܥܰܝܢܰܘ̈ܗܝ ܘܰܚܙܳܐ: ܘܗܳܐ ܥܺܝܣܽܘ ܐܳܬܶܐ: ܘܥܰܡܶܗ ܐܰܪܒܰܥܡܳܐܐ ܓܰܒܖ̈ܺܝܢ: ܘܦܰܠܶܓ ܛܠܳܝ̈ܶܐ ܥܰܠ ܠܶܝܰܐ: ܘܥܰܠ ܪܳܚܶܝܠ: ܘܥܰܠ ܬܰܪܬܶܝܢ ܐܰܡܗ̈ܳܬܳܐ.
2 ܘܰܐܥܒܰܪ ܠܰܐܡܗ̈ܳܬܳܐ ܘܠܰܒܢܰܝ̈ܗܶܝܢ ܩܰܕܡܳܐܺܝܬ: ܘܰܠܠܶܝܰܐ ܘܠܰܒܢܶܝ̈ܗ̇ ܒܳܬܰܪܗܶܝܢ: ܘܰܠܪܳܚܶܝܠ ܘܰܠܝܰܘܣܶܦ ܒܚܰܪܬܳܐ.
3 ܘܗܽܘ ܥܒܰܪ ܩܕܳܡܰܝܗܽܘܢ: ܘܰܣܓܶܕ ܥܰܠ ܐܰܪܥܳܐ ܫܒܰܥ ܙܰܒܢܺܝ̈ܢ: ܥܕܰܡܳܐ ܕܰܩܪܶܒ ܠܘܳܬ ܐܰܚܽܘܗܝ.
4 ܘܰܪܗܶܛ ܥܺܝܣܽܘ ܠܽܐܘܪܥܶܗ: ܘܥܰܦܩܶܗ ܘܰܢܦܰܠ ܥܰܠ ܨܰܘܪܶܗ ܘܢܰܫܩܶܗ: ܘܰܒܟܰܘ.
5 ܘܰܐܪܺܝܡ ܥܺܝܣܽܘ ܥܰܝܢܰܘ̈ܗܝ: ܘܰܚܙܳܐ ܢܶܫ̈ܶܐ ܘܰܛܠܳܝ̈ܶܐ: ܘܶܐܡܰܪ ܐܰܝܡܶܟܳܐ ܠܳܟ ܗܳܠܶܝܢ: ܘܶܐܡܰܪ ܠܶܗ ܝܰܥܩܽܘܒ: ܛܠܳܝ̈ܶܐ ܐܶܢܽܘܢ ܕܝܰܗܒ ܐܰܠܳܗܳܐ ܠܥܰܒܕܳܟ.
6 ܘܰܩܖ̈ܶܒܝ ܐܰܡܗ̈ܳܬܳܐ ܗܳܢܶܝܢ ܘܰܒܢܰܝ̈ܗܶܝܢ ܘܰܣܓܶܕܘ.
7 ܘܩܶܪܒܰܬ ܐܳܦ ܠܶܝܰܐ ܘܰܒܢܶܝ̈ܗ̇ ܘܰܣܓܶܕܘ: ܘܒܳܬܰܪܟܶܢ ܩܶܪܒܰܬ ܐܳܦ ܪܳܚܶܝܠ ܘܝܰܘܣܶܦ ܘܰܣܓܶܕܘ.
8 ܘܶܐܡܰܪ ܥܺܝܣܽܘ ܠܝܰܥܩܽܘܒ: ܐܰܝܡܶܟܳܐ ܠܳܟ ܗܳܕܶܐ ܟܽܠܳܗ̇ ܡܰܫܪܺܝܬܳܐ ܕܦܶܓܥܰܬ ܒܺܝ: ܘܶܐܡܰܪ ܠܶܗ ܝܰܥܩܽܘܒ: ܡܶܛܽܠ ܕܶܐܫܟܚܶܬ ܖ̈ܰܚܡܶܐ ܒܥܰܝ̈ܢܰܝ ܡܳܪܝ.
9 ܘܶܐܡܰܪ ܠܶܗ ܥܺܝܣܽܘ: ܐܺܝܬ ܠܺܝ ܘܣܰܓܺܝ ܠܺܝ: ܐܳܚܝ ܩܰܕܳܐ ܕܺܝܠܳܟ.
10 ܐܶܡܰܪ ܠܶܗ ܝܰܥܩܽܘܒ: ܐܶܢ ܐܶܫܟܚܶܬ ܖ̈ܰܚܡܶܐ ܒܥܰܝ̈ܢܰܝܟ: ܣܰܒ ܩܽܘܪܒܳܢܝ ܡܶܢ ܐܺܝ̈ܕܰܝ: ܡܶܛܽܠ ܕܗܳܫܳܐ ܚܙܺܝ݀ܬ ܐܰܦܰܝ̈ܟ: ܐܰܝܟ ܚܶܙܘܳܐ ܕܰܐܦܰܝ̈ ܡܰܠܰܐܟܳܐ: ܘܶܐܨܛܒܺܝܬ ܒܺܝ.
11 ܣܰܒ ܒܽܘܪܟܰܬܝ ܕܰܐܝܬܺܝܬ ܠܳܟ: ܡܶܛܽܠ ܕܪܰܚܶܡ ܥܠܰܝ ܐܰܠܳܗܳܐ: ܘܡܶܛܽܠ ܕܺܐܝܬ ܠܺܝ ܟܽܠ: ܘܰܐܠܨܶܗ ܘܩܰܒܶܠ.
12 ܐܶܡܰܪ ܠܶܗ ܥܺܝܣܽܘ: ܢܶܫܩܽܘܠ ܘܢܺܐܙܰܠ: ܘܺܐܙܰܠ ܠܩܽܘܒܠܳܟ.
13 ܐܶܡܰܪ ܠܶܗ ܝܰܥܩܽܘܒ: ܡܳܪܝ ܝܳܕܰܥ ܕܰܛܠܳܝ̈ܶܐ ܛܠܶܝܢ: ܘܥܳܢ̈ܳܐ ܘܬܰܘܖ̈ܶܐ ܡܰܝܢ̈ܩܳܢ ܥܠܰܝ: ܘܶܐܢ ܪܳܕܶܦ ܐ̱ܢܳܐ ܠܗܽܘܢ ܚܰܕ ܝܽܘܡ: ܡܳܝܬܳܐ ܟܽܠܳܗ̇ ܥܳܢ̈ܳܐ.
14 ܢܶܥܒܰܪ ܡܳܪܝ ܩܕܳܡ ܥܰܒܕܶܗ: ܘܶܐܢܳܐ ܐܶܗܰܠܶܟ ܪܰܟܺܝܟܳܐܺܝܬ: ܠܰܪܓܶܠ ܥܒܳܕܬܳܐ ܕܰܩܕܳܡܰܝ: ܘܠܰܪܓܶܠ ܛܠܳܝ̈ܶܐ: ܥܕܰܡܳܐ ܕܺܐܬܶܐ ܠܘܳܬ ܡܳܪܝ ܠܣܳܥܺܝܪ.
15 ܐܳܡܰܪ ܠܶܗ ܥܺܝܣܽܘ: ܐܶܫܒܽܘܩ ܠܘܳܬܳܟ ܡܶܢ ܥܰܡܳܐ ܕܥܰܡܝ: ܘܶܐܡܰܪ ܝܰܥܩܽܘܒ ܠܡܳܢܳܐ ܗܳܘܶܐ ܠܺܝ: ܐܶܫܟܰܚ ܖ̈ܰܚܡܶܐ ܒܥܰܝ̈ܢܰܝ ܡܳܪܝ.
16 ܘܰܗܦܰܟ ܥܺܝܣܽܘ ܒܝܰܘܡܳܐ ܗܰܘ ܠܽܐܘܪܚܶܗ ܠܣܳܥܺܝܪ.
17 ܘܝܰܥܩܽܘܒ ܫܩܰܠ ܠܣܳܟܽܘܬ: ܘܰܒܢܳܐ ܠܶܗ ܒܰܝܬܳܐ: ܘܠܰܒܥܺܝܪܶܗ ܥܒܰܕ ܡܛܰܠ̈ܠܶܐ: ܡܶܛܽܠ ܗܳܢܳܐ ܩܪܳܐ ܫܡܶܗ ܕܰܐܬܪܳܐ ܗܰܘ ܣܳܟܽܘܬ.
18 ܘܶܐܬܳܐ ܝܰܥܩܽܘܒ ܠܫܳܠܺܝܡ ܩܪܺܝܬܳܐ ܕܰܫܟܺܝܡ: ܕܒܰܐܪܥܳܐ ܕܰܟܢܰܥܢ: ܟܰܕ ܐܶܬܳܐ ܡܶܢ ܦܳܕܳܢ ܕܳܐܪܳܡ: ܘܰܫܪܳܐ ܠܩܽܘܒܠܳܗ̇ ܕܰܩܪܺܝܬܳܐ.
19 ܘܰܙܒܰܢ ܡܢܳܬܳܐ ܕܚܰܩܠܳܐ ܡܶܢ ܒܢܰܝ̈ ܚܡܽܘܪ ܐܰܒܽܘܗܝ ܕܰܫܟܺܝܡ ܒܡܳܐܐ ܢܩܰܘ̈ܳܢ.
20 ܘܰܢܩܰܫ ܬܰܡܳܢ ܡܰܫܟܢܶܗ: ܘܰܐܩܺܝܡ ܬܰܡܳܢ ܡܰܕܒܚܳܐ: ܘܰܩܪܳܝܗܝ ܐܺܝܠ ܐܰܠܳܗܳܐ ܕܺܝܣܪܳܐܶܝܠ.