Genesis 19
The Book of Genesis
܀ ܒܪܝܬܐ ܝܛ ܀
1 ܘܶܐܬܰܘ ܬܪܶܝܢ ܡܰܠܰܐܟܺܝ̈ܢ ܠܰܣܕܽܘܡ ܒܪܰܡܫܳܐ: ܘܠܽܘܛ ܝܳܬܶܒ ܒܬܰܪܥܳܐ ܕܰܣܕܽܘܡ: ܘܰܚܙܳܐ ܐܶܢܽܘܢ ܠܽܘܛ ܘܩܳܡ ܠܽܐܘܪܥܗܽܘܢ. ܘܰܣܓܶܕ ܥܰܠ ܐܰܦܰܘ̈ܗܝ ܥܰܠ ܐܰܪܥܳܐ.
2 ܘܶܐܡܰܪ: ܒܳܥܶܐ ܐ̱ܢܳܐ ܡܶܢܟܽܘܢ ܡܳܪܝ: ܣܛܰܘ ܠܒܶܝܬ ܥܰܒܕܟܽܘܢ: ܘܒܽܘܬܘ ܘܰܐܫܺܝܓܘ ܪܶܓܠܰܝܟܽܘܢ: ܘܩܰܕܶܡܘ ܘܙܶܠܘ ܠܽܐܘܪܚܟܽܘܢ. ܘܶܐܡܰܪܘ: ܠܳܐ: ܒܫܽܘܩܳܐ ܢܒܽܘܬ.
3 ܘܶܐܠܰܨ ܐܶܢܽܘܢ ܛܳܒ: ܘܰܣܛܰܘ ܠܘܳܬܶܗ ܘܥ̣ܰܠܘ ܠܒܰܝܬܶܗ: ܘܰܥܒܰܕ ܠܗܽܘܢ ܡܰܫܬܝܳܐ: ܘܦܰܛܺܝܖ̈ܶܐ ܐܶܦܳܐ ܠܗܽܘܢ ܘܰܠܥܶܣܘ.
4 ܘܰܥܕܰܟܺܝܠ ܠܳܐ ܕܡܶܟܘ: ܘܐ̱ܢܳܫܰܝ̈ ܩܪܺܝܬܳܐ ܐ̱ܢܳܫܰܝ̈ ܣܕܽܘܡ ܐܶܬܟܰܪܟܽܘܗܝ ܠܒܰܝܬܳܐ: ܡܶܢ ܥܠܰܝ̈ܡܶܐ ܘܰܥܕܰܡܳܐ ܠܣܳܒ̈ܶܐ: ܘܟܽܠܶܗ ܥܰܡܳܐ ܡܶܢ ܣܳܟܳܐ.
5 ܘܰܩܪܰܘ ܠܠܽܘܛ ܘܶܐܡܰܪܘ ܠܶܗ: ܐܰܝܟܳܐ ܐܶܢܽܘܢ ܓܰܒܖ̈ܶܐ ܕܶܐܬܰܘ ܠܘܳܬܳܟ ܒܠܺܠܝܳܐ: ܐܰܦܶܩ ܐܶܢܽܘܢ ܠܰܢ ܘܢܶܕܰܥ ܐܶܢܽܘܢ.
6 ܘܰܢܦܰܩ ܠܽܘܛ ܠܘܳܬܗܽܘܢ ܠܬܰܪܥܳܐ: ܘܬܰܪܥܳܐ ܐܶܚܰܕܘ ܒܳܬܪܶܗ.
7 ܘܶܐܡܰܪ ܠܗܽܘܢ ܠܽܘܛ: ܠܳܐ ܬܰܒܐܫܽܘܢ ܐܰܚܰܝ̈.
8 ܗܳܐ ܐܺܝܬ ܠܺܝ ܬܰܪܬܶܝܢ ܒܢ̈ܳܢ ܕܠܳܐ ܝܺܕܰܥ ܐܶܢܶܝܢ ܓܒܰܪ: ܐܰܦܶܩ ܐܶܢܶܝܢ ܠܟܽܘܢ: ܘܰܥܒܶܕܘ ܠܗܽܘܢ ܐܰܝܟܰܢܳܐ ܕܫܰܦܺܝܪ ܒܥܰܝ̈ܢܰܝܟܽܘܢ: ܒܰܠܚܽܘܕ ܠܓܰܒܖ̈ܶܐ ܗܳܠܶܝܢ ܠܳܐ ܬܶܥܒܕܽܘܢ ܡܶܕܶܡ: ܡܶܛܽܠ ܕܥܰܠܘ ܠܛܶܠܳܠܳܐ ܕܩܳܖ̈ܝܳܬܝ.
9 ܘܶܐܡܰܪܘ: ܦܪܽܘܩ ܠܗܰܠ: ܘܶܐܡܰܪܘ: ܚܰܕ ܐܶܬܳܐ ܠܡܶܬܬܰܘܬܳܒܽܘ ܥܰܡܰܢ: ܘܗܳܐ ܕܳܐܶܢ ܠܰܢ ܕܺܝܢ̈ܶܐ: ܗܳܫܳܐ ܢܰܒܐܶܫ ܠܳܟ ܡܶܢ ܕܰܠܗܽܘܢ. ܘܶܐܬܟܰܬܰܫ ܥܰܡ ܓܰܒܖ̈ܶܐ ܠܽܘܛ ܛܳܒ: ܘܰܩܪܶܒܘ ܠܡܶܬܒܰܪ ܬܰܪܥܳܐ.
10 ܘܰܐܘܫܶܛܘ ܓܰܒܖ̈ܶܐ ܐܺܝܕܰܝ̈ܗܽܘܢ: ܘܰܐܥܶܠܘ ܠܠܽܘܛ ܠܘܳܬܗܽܘܢ ܠܒܰܝܬܳܐ: ܘܬܰܪܥܳܐ ܐܶܚܰܕܘ.
11 ܘܓܰܒܖ̈ܶܐ ܕܰܒܬܰܪܥܳܐ ܕܒܰܝܬܳܐ: ܒܠܰܥܘ ܒܰܫܪܰܓܖ̈ܳܓܝܳܬܳܐ: ܡܶܢ ܙܥܽܘܪܳܐ ܘܰܥܕܰܡܳܐ ܠܪܰܒܳܐ: ܘܰܠܐܺܝܘ ܠܡܶܫܟܳܚܽܘ ܬܰܪܥܳܐ.
12 ܘܶܐܡܰܪܘ ܓܰܒܖ̈ܶܐ ܠܠܽܘܛ: ܡܳܢܳܐ ܥܳܒܶܕ ܐܰܢ̱ܬ ܗܳܪܟܳܐ: ܚܰܬܢܰܝ̈ܟ ܘܰܒܢܰܝ̈ܟ ܘܰܒܢ̈ܳܬܳܟ ܘܟܽܠ ܕܺܐܝܬ ܠܳܟ ܒܰܩܪܺܝܬܳܐ: ܐܰܦܶܩ ܡܶܢ ܐܰܬܪܳܐ ܗܳܢܳܐ.
13 ܡܶܛܽܠ ܕܰܡܚܰܒܠܺܝܢܰܢ ܠܰܐܬܪܳܐ ܗܳܢܳܐ: ܡܶܛܽܠ ܕܣܶܠܩܰܬ ܓܥܳܬܗܽܘܢ ܩܕܳܡ ܡܳܪܝܳܐ: ܘܫܰܕܪܰܢ ܡܳܪܝܳܐ ܠܰܡܚܰܒܳܠܽܘܬܶܗ.
14 ܘܰܢܦܰܩ ܠܽܘܛ ܘܡܰܠܶܠ ܥܰܡ ܚܰܬܢܰܘ̈ܗܝ ܢܣܰܒ̈ܝ ܒܢ̈ܳܬܶܗ: ܘܶܐܡܰܪ ܠܗܽܘܢ: ܩܽܘܡܘ ܦܽܘܩܘ ܡܶܢ ܐܰܬܪܳܐ ܗܳܢܳܐ: ܡܶܛܽܠ ܕܰܡܚܰܒܶܠ ܠܶܗ ܡܳܪܝܳܐ. ܘܰܗܘܳܐ ܐܰܝܟ ܡܓܰܚܶܟ ܒܥܰܝܢܰܝ̈ ܚܰܬܢܰܘ̈ܗܝ.
15 ܘܟܰܕ ܣܠܶܩ ܫܰܦܪܳܐ: ܐܰܠܨܽܘܗܝ ܡܰܠܰܐܟ̈ܶܐ ܠܠܽܘܛ: ܘܳܐܡܪܺܝܢ ܠܶܗ: ܩܽܘܡ ܕܒܰܪ ܐܰܢ̱ܬܬܳܟ ܘܬܰܪܬܶܝܢ ܒܢ̈ܳܬܳܟ ܕܶܐܫܬܟܰܚ̈ܝ: ܕܰܠܡܳܐ ܬܶܒܠܰܥ ܒܰܚ̈ܛܳܗܶܝܗ̇ ܕܰܩܪܺܝܬܳܐ.
16 ܘܶܐܫܬܰܘܚܰܪ ܠܽܘܛ: ܘܶܐܚܰܕܘ ܡܰܠܰܐܟ̈ܶܐ ܒܺܐܝܕܶܗ ܘܒܺܐܝܕܳܐ ܕܰܐܢ̱ܬܬܶܗ ܘܒܺܐܝܕܳܐ ܕܬܰܪܬܶܝܢ ܒܢ̈ܳܬܶܗ: ܡܶܛܽܠ ܕܚܳܣ ܡܳܪܝܳܐ ܥܠܰܘܗ̱ܝ: ܘܰܐܦܩܽܘܗܝ ܘܰܐܫܪܶܝܘܗܝ ܠܒܰܪ ܡܶܢ ܩܪܺܝܬܳܐ.
17 ܘܟܰܕ ܐܰܦܶܩܘ ܐܶܢܽܘܢ ܠܒܰܪ: ܐܳܡܪܺܝܢ ܠܶܗ: ܦܰܠܶܛ ܢܰܦܫܳܟ: ܠܳܐ ܬܶܬܦܢܶܐ ܠܒܶܣܬܪܳܟ: ܘܠܳܐ ܬܩܽܘܡ ܒܟܽܠܳܗ̇ ܦܩܰܥܬܳܐ: ܠܛܽܘܪܳܐ ܐܶܬܦܰܠܛ ܕܠܳܐ ܬܺܐܒܰܕ.
18 ܘܶܐܡܰܪ ܠܗܽܘܢ ܠܽܘܛ: ܒܳܥܶܐ ܐ̱ܢܳܐ ܡܶܢܟܽܘܢ ܡܳܪܝ.
19 ܗܳܐ ܐܶܫܟܰܚ ܥܰܒܕܳܟ ܖ̈ܰܚܡܶܐ ܒܥܰܝܢܰܝ̈ܟ: ܘܣܰܓܺܝܐܳܐ ܗ̱ܝ ܛܰܝܒܽܘܬܳܟ ܕܰܥܒܰܕܬ ܥܰܡܝ ܠܡܰܚܳܝܽܘ ܢܰܦܫܝ: ܘܶܐܢܳܐ ܠܳܐ ܡܶܫܟܰܚ ܐ̱ܢܳܐ ܠܡܶܬܦܰܠܳܛܽܘ ܠܛܽܘܪܳܐ: ܕܰܠܡܳܐ ܬܰܕܪܟܰܢܝ ܒܺܝܫܬܳܐ ܘܶܐܡܽܘܬ.
20 ܗܳܐ ܩܪܺܝܬܳܐ ܗܳܕܶܐ ܩܰܪܺܝܒܳܐ ܗ̱ܝ ܠܡܶܥܪܰܩ ܠܬܰܡܳܢ: ܗܳܐ ܙܥܽܘܪܝܳܐ ܗܺܝ ܘܬܺܐܚܶܐ ܢܰܦܫܝ.
21 ܘܶܐܡܰܪ ܠܶܗ: ܗܳܐ ܢܶܣܒܶܬ ܒܰܐܦܰܝ̈ܟ ܐܳܦ ܒܦܶܬܓܳܡܳܐ ܗܳܢܳܐ: ܕܠܳܐ ܐܶܗܦܽܘܟ ܩܪܺܝܬܳܐ ܕܶܐܡܰܪܬ.
22 ܒܰܥܓܰܠ ܐܶܬܦܰܠܛ ܠܬܰܡܳܢ: ܡܶܛܽܠ ܕܠܳܐ ܡܶܫܟܰܚ ܐ̱ܢܳܐ ܕܶܐܥܒܶܕ ܡܶܕܶܡ ܥܕܰܡܳܐ ܕܥܳܐܶܠ ܐܰܢ̱ܬ ܠܬܰܡܳܢ: ܡܶܛܽܠ ܗܳܢܳܐ ܩܪܳܐ ܫܡܳܗ̇ ܕܰܩܪܺܝܬܳܐ ܨܳܥܳܪ.
23 ܫܶܡܫܳܐ ܢܦܰܩ ܥܰܠ ܐܰܪܥܳܐ: ܘܠܽܘܛ ܥܰܠ ܠܨܳܥܳܪ.
24 ܘܡܳܪܝܳܐ ܐܰܚܶܬ ܥܰܠ ܣܕܽܘܡ ܘܥܰܠ ܥܳܡܽܘܪܳܐ: ܟܶܒܪܺܝܬܳܐ ܘܢܽܘܪܳܐ ܡܶܢ ܩܕܳܡ ܡܳܪܝܳܐ ܡܶܢ ܫܡܰܝܳܐ.
25 ܘܰܗܦܰܟ ܠܩܽܘܖ̈ܝܳܐ ܗܳܠܶܝܢ ܘܰܠܟܽܠܳܗ̇ ܦܩܰܥܬܳܐ: ܘܰܠܟܽܠܗܽܘܢ ܝܳܬܒܰܝ̈ ܐܰܪܥܳܐ: ܘܰܠܡܰܘܥܺܝܬܳܗ̇ ܕܰܐܪܥܳܐ.
26 ܘܶܐܬܦܰܢܝܰܬ ܐܰܢ̱ܬܬܶܗ ܡܶܢ ܒܶܣܬܪܳܗ̇: ܘܰܗܘܳܬ ܩܳܝܶܡܬܳܐ ܕܡܶܠܚܳܐ.
27 ܘܩܰܕܶܡ ܐܰܒܪܳܗܳܡ ܒܨܰܦܪܳܐ: ܠܰܐܬܪܳܐ ܕܩܳܐܶܡ ܗܘܳܐ ܬܰܡܳܢ ܩܕܳܡ ܡܳܪܝܳܐ.
28 ܘܚܳܪ ܠܰܐܦܰܝ̈ ܣܕܽܘܡ ܘܥܳܡܽܘܪܳܐ ܘܠܰܐܦܰܝ̈ ܟܽܠܳܗ̇ ܐܰܪܥܳܐ ܕܰܦܩܰܥܬܳܐ: ܘܰܚܙܳܐ ܘܗܳܐ ܣܳܠܶܩ ܬܶܢܳܢܳܗ̇ ܕܰܐܪܥܳܐ ܐܰܝܟ ܬܶܢܳܢܳܐ ܕܰܐܬܽܘܢܳܐ.
29 ܘܰܗܘܳܐ ܕܟܰܕ ܚܰܒܶܠ ܐܰܠܳܗܳܐ ܩܽܘܖ̈ܝܳܐ ܕܰܦܩܰܥܬܳܐ. ܐܶܬܕܟܰܪ ܐܰܠܳܗܳܐ ܠܰܐܒܪܳܗܳܡ: ܘܫܰܕܰܪ ܠܠܽܘܛ ܡܶܢ ܓܰܘ ܗܦܺܝܟܬܳܐ: ܟܰܕ ܗܦܰܟ ܩܽܘܖ̈ܝܳܐ ܕܺܝܬܶܒ ܗܘܳܐ ܒܗܶܝܢ ܠܽܘܛ.
30 ܘܰܣܠܶܩ ܠܽܘܛ ܡܶܢ ܨܳܥܳܪ ܘܺܝܬܶܒ ܒܛܽܘܪܳܐ: ܗܽܘ ܘܬܰܪܬܶܝܢ ܒܢ̈ܳܬܶܗ ܥܰܡܶܗ: ܡܶܛܽܠ ܕܰܕܚܶܠ ܠܡܶܬܰܒ ܒܨܳܥܳܪ: ܘܺܝܬܶܒ ܒܰܡܥܰܪܬܳܐ: ܗܽܘ ܘܬܰܪܬܶܝܢ ܒܢ̈ܳܬܶܗ.
31 ܘܶܐܡܪܰܬ ܩܰܫܺܝܫܬܳܐ ܠܰܙܥܽܘܪܬܳܐ: ܗܳܐ ܐܰܒܽܘܢ ܣܐܶܒ. ܘܓܰܒܪܳܐ ܠܰܝܬ ܒܰܐܪܥܳܐ. ܕܢܶܥܽܘܠ ܥܠܰܝܢ ܐܰܝܟ ܐܽܘܪܚܳܐ ܕܟܽܠܳܗ̇ ܐܰܪܥܳܐ.
32 ܬܳܝ ܢܰܫܩܶܐ ܠܰܐܒܽܘܢ ܚܰܡܪܳܐ ܘܢܶܕܡܰܟ ܥܰܡܶܗ: ܘܰܢܩܺܝܡ ܡܶܢ ܐܰܒܽܘܢ ܙܰܪܥܳܐ.
33 ܘܰܐܫܩܺܝ̈ ܒܠܺܠܝܳܐ ܗܰܘ ܠܰܐܒܽܘܗܶܝܢ ܚܰܡܪܳܐ: ܘܥܶܠܰܬ ܩܰܫܺܝܫܬܳܐ ܘܕܶܡܟܰܬ ܥܰܡ ܐܰܒܽܘܗ̇: ܘܠܳܐ ܝܺܕܰܥ ܒܡܰܕܡܟܳܗ̇ ܘܒܰܡܩܳܡܳܗ̇.
34 ܘܰܗܘܳܐ ܠܒܳܬܰܪ ܝܰܘܡܳܐ: ܘܶܐܡܪܰܬ ܩܰܫܺܝܫܬܳܐ ܠܰܙܥܽܘܪܬܳܐ: ܗܳܐ ܕܶܡܟܶܬ ܒܪܰܡܫܳܐ ܥܰܡ ܐܳܒܝ. ܢܰܫܩܶܝܘܗܝ ܚܰܡܪܳܐ ܐܳܦ ܒܠܺܠܝܳܐ ܗܳܢܳܐ: ܘܥܽܘܠܝ ܕܡܰܟܝ ܥܰܡܶܗ: ܘܰܢܩܺܝܡ ܡܶܢ ܐܰܒܽܘܢ ܙܰܪܥܳܐ.
35 ܘܰܐܫܩ̈ܝܳܝܗܝ ܐܳܦ ܒܠܺܠܝܳܐ ܗܰܘ ܠܰܐܒܽܘܗܶܝܢ ܚܰܡܪܳܐ: ܘܥܶܠܰܬ ܙܥܽܘܪܬܳܐ ܘܕܶܡܟܰܬ ܥܰܡܶܗ: ܘܠܳܐ ܝܺܕܰܥ ܒܡܰܕܡܟܳܗ̇ ܘܒܰܡܩܳܡܳܗ̇.
36 ܘܰܒܛܶܢ̈ܝ ܬܰܖ̈ܬܰܝܗܶܝܢ ܒܢ̈ܳܬܶܗ ܕܠܽܘܛ ܡܶܢ ܐܰܒܽܘܗܶܝܢ.
37 ܘܝܶܠܕܰܬ ܩܰܫܺܝܫܬܳܐ ܒܪܳܐ: ܘܰܩܪܳܬ ܫܡܶܗ ܡܽܘܐܳܒ: ܗܽܘܝܽܘ ܐܰܒܽܘܗܽܘܢ ܕܡܽܘܐܳܒܳܝ̈ܶܐ ܥܕܰܡܳܐ ܠܝܰܘܡܳܢܳܐ.
38 ܘܰܙܥܽܘܪܬܳܐ ܐܳܦ ܗܺܝ ܝܶܠܕܰܬ ܒܪܳܐ: ܘܰܩܪܳܬ ܫܡܶܗ ܒܰܪ ܥܰܡܝ. ܗܽܘܝܽܘ ܐܰܒܽܘܗܽܘܢ ܕܰܒܢܰܝ̈ ܥܰܡܽܘܢ ܥܕܰܡܳܐ ܠܝܰܘܡܳܢܳܐ.