Genesis 25
The Book of Genesis
܀ ܒܪܝܬܐ ܟܗ ܀
1 ܘܰܐܘܣܶܦ ܐܰܒܪܳܗܳܡ ܘܰܢܣܰܒ ܐܰܢ̱ܬܬܳܐ: ܘܰܫܡܳܗ̇ ܩܶܢܛܽܘܪܳܐ.
2 ܘܝܶܠܕܰܬ ܠܶܗ ܠܙܰܡܪܳܢ: ܘܝܰܩܫܳܢ: ܘܡܳܕܳܢ: ܘܡܶܕܝܰܢ: ܘܰܐܫܒܳܩ: ܘܰܫܘܳܚ.
3 ܘܝܰܩܫܳܢ ܐܰܘܠܶܕ ܠܰܫܒܳܐ ܘܰܠܕܳܪܳܢ: ܘܰܒܢܰܝ̈ ܕܳܪܳܢ ܗܘܰܘ ܐܰܫܽܘܕܺܝܡ : ܘܠܰܛܫܺܝܡ: ܘܰܐܡܺܝܡ.
4 ܘܰܒܢܰܝ̈ ܡܶܕܝܰܢ: ܥܦܳܐ: ܘܚܳܦܳܪ: ܘܰܚܢܽܘܟ: ܘܰܐܒܺܝܕܰܥ: ܘܰܐܠܕܰܥܳܐ: ܟܽܠܗܽܘܢ ܗܳܠܶܝܢ ܒܢܰܝ̈ ܩܶܢܛܽܘܪܳܐ.
5 ܘܝܰܗܒ ܐܰܒܪܳܗܳܡ ܟܽܠܡܶܕܶܡ ܕܺܐܝܬ ܠܶܗ ܠܺܐܝܣܚܳܩ ܒܪܶܗ.
6 ܘܠܰܒܢܰܝ̈ ܕܪܽܘܟܬܶܗ ܕܰܐܒܪܳܗܳܡ: ܝܰܗܒ ܐܰܒܪܳܗܳܡ ܡܰܘܗ̈ܒܳܬܳܐ: ܘܫܰܕܰܪ ܐܶܢܽܘܢ ܡܶܢ ܠܘܳܬ ܐܺܝܣܚܳܩ ܒܪܶܗ: ܥܰܕ ܗܽܘ ܚܰܝ: ܩܰܕܡܳܝܰܬ ܠܰܐܪܥܳܐ ܕܡܰܕܢܚܳܐ.
7 ܘܗܳܠܶܝܢ ܝܰܘ̈ܡܰܝ ܫܢܰܝ̈ ܚܰܝܰܘ̈ܗܝ ܕܰܐܒܪܳܗܳܡ ܕܰܚܝܳܐ: ܡܳܐܐ ܘܫܰܒܥܺܝܢ ܘܚܰܡܶܫ ܫܢܺܝ̈ܢ.
8 ܘܶܐܬܟܪܰܗ ܘܡܺܝܬ ܐܰܒܪܳܗܳܡ ܒܣܰܝܒܽܘܬܳܐ ܛܳܒܬܳܐ: ܣܐܶܒ ܘܰܣܒܰܥ ܝܰܘ̈ܡܳܬܶܗ: ܘܶܐܬܟܰܢܰܫ ܠܘܳܬ ܥܰܡܶܗ.
9 ܘܩܰܒܪܽܘܗܝ ܐܺܝܣܚܳܩ ܘܺܐܝܫܡܳܥܺܝܠ ܒܢܰܘ̈ܗܝ: ܒܰܡܥܰܪܬܳܐ ܐܰܥܺܝܦܬܳܐ ܕܰܒܚܰܩܠܳܐ ܕܥܶܦܪܽܘܢ ܒܰܪ ܨܳܚܳܪ ܚܺܝܬܳܝܳܐ ܕܰܩܕܳܡ ܡܰܡܪܶܐ.
10 ܚܰܩܠܳܐ ܕܰܙܒܰܢ ܐܰܒܪܳܗܳܡ ܡܶܢ ܒܢܰܝ̈ ܚܺܝܬ ܠܝܽܘܪܬܳܢܳܐ ܕܩܰܒܪܳܐ: ܬܰܡܳܢ ܐܶܬܩܒܰܪ ܐܰܒܪܳܗܳܡ ܘܣܰܪܳܐ ܐܰܢ̱ܬܬܶܗ.
11 ܘܰܗܘܳܐ ܡܶܢ ܒܳܬܰܪ ܕܡܺܝܬ ܐܰܒܪܳܗܳܡ: ܒܰܪܶܟ ܐܰܠܳܗܳܐ ܠܺܐܝܣܚܳܩ ܒܪܶܗ: ܘܺܝܬܶܒ ܐܺܝܣܚܳܩ ܥܰܠ ܓܶܢ̱ܒ ܒܺܪܳܐ ܕܚܰܝܳܐ ܚܙܳܢܝ.
12 ܘܗܳܠܶܝܢ ܬܰܘ̈ܠܕܳܬܶܗ ܕܺܐܝܫܡܳܥܺܝܠ ܒܰܪ ܐܰܒܪܳܗܳܡ: ܕܝܶܠܕܰܬ ܗܳܓܳܪ ܡܶܨܪܳܝܬܳܐ ܐܰܡܬܳܗ̇ ܕܣܰܪܳܐ ܠܰܐܒܪܳܗܳܡ.
13 ܘܗܳܠܶܝܢ ܫܡܳܗ̈ܶܐ ܕܰܒܢܰܝ̈ ܐܺܝܫܡܳܥܺܝܠ ܒܰܫܡܳܗܰܝ̈ܗܽܘܢ ܠܬܰܘ̈ܠܕܳܬܗܽܘܢ: ܒܽܘܟܪܶܗ ܕܺܐܝܫܡܳܥܺܝܠ ܢܒܺܝܽܘܬ: ܘܩܶܕܳܪ: ܘܰܐܪܒܳܠ: ܘܡܰܒܣܰܡ.
14 ܘܡܰܫܡܰܥ: ܘܪܰܘܡܳܐ: ܘܡܰܣܳܐ.
15 ܘܚܳܕܳܪ: ܘܬܰܝܡܳܐ: ܘܢܳܛܽܘܪ: ܘܰܢܦܶܫ: ܘܰܩܕܶܡ.
16 ܗܳܠܶܝܢ ܐܶܢܽܘܢ ܒܢܰܘ̈ܗܝ ܕܺܐܝܫܡܳܥܺܝܠ: ܘܗܳܠܶܝܢ ܫܡܳܗܰܝ̈ܗܽܘܢ ܒܕܳܖ̈ܰܝܗܽܘܢ ܘܒܰܛܝܳܖ̈ܰܝܗܽܘܢ: ܬܪܶܥܣܰܪ ܪܰܘܖ̈ܒܳܢܺܝܢ ܠܶܐܡܘ̈ܳܬܗܽܘܢ.
17 ܘܗܳܠܶܝܢ ܫܢܰܝ̈ ܚܰܝܰܘ̈ܗܝ ܕܺܐܝܫܡܳܥܺܝܠ: ܡܳܐܐ ܘܰܬܠܳܬܺܝܢ ܘܰܫܒܰܥ ܫܢܺܝ̈ܢ: ܘܶܐܬܟܪܰܗ ܘܡܺܝܬ ܘܶܐܬܟܰܢܰܫ ܠܘܳܬ ܥܰܡܶܗ.
18 ܘܰܫܪܰܘ ܡܶܢ ܚܘܺܝܠܳܐ: ܘܰܥܕܰܡܳܐ ܠܫܽܘܕ ܕܰܩܕܳܡ ܡܶܨܪܶܝܢ ܕܰܒܡܰܥܠܳܢܳܐ ܕܳܐܬܽܘܪ: ܥܰܠ ܬܚܽܘܡܳܐ ܕܟܽܠܗܽܘܢ ܐܰܚܰܘ̈ܗܝ ܫܪܳܐ.
19 ܘܗܳܠܶܝܢ ܬܰܘ̈ܠܕܳܬܶܗ ܕܺܐܝܣܚܳܩ ܒܰܪ ܐܰܒܪܳܗܳܡ. ܐܰܒܪܳܗܳܡ ܐܰܘܠܶܕ ܠܺܐܝܣܚܳܩ.
20 ܘܰܗܘܳܐ ܐܺܝܣܚܳܩ ܒܰܪ ܐܰܪܒܥܺܝܢ ܫܢܺܝ̈ܢ: ܟܰܕ ܢܣܰܒ ܠܪܰܦܩܰܐ ܒܰܪܬ ܒܬܽܘܐܶܝܠ ܐܳܪܳܡܳܝܳܐ ܡܶܢ ܦܳܕܳܢ ܕܳܐܪܳܡ: ܚܳܬܶܗ ܕܠܳܒܳܢ ܐܳܪܳܡܳܝܳܐ ܠܶܗ ܐܰܢ̱ܬܬܳܐ.
21 ܘܨܰܠܺܝ ܐܺܝܣܚܳܩ ܩܕܳܡ ܡܳܪܝܳܐ ܡܶܛܽܠ ܐܰܢ̱ܬܬܶܗ ܕܰܥܩܰܪܬܳܐ ܗ̱ܝ: ܘܰܥܢܳܝܗܝ ܡܳܪܝܳܐ: ܘܒܶܛܢܰܬ ܪܰܦܩܰܐ ܐܰܢ̱ܬܬܶܗ.
22 ܘܳܐܠܨܺܝܢ ܒܢܶܝ̈ܗ̇ ܒܟܰܪܣܳܐ: ܘܶܐܡܪܰܬ. ܐܶܢ ܗܳܟܰܢܳܐ ܗܽܘ: ܠܡܳܢܳܐ ܚܰܝܳܐ ܐ̱ܢܳܐ. ܘܶܐܙܰܠ̱ܬ ܠܡܶܫܐܰܠ ܡܶܢ ܡܳܪܝܳܐ.
23 ܘܶܐܡܰܪ ܠܳܗ̇ ܡܳܪܝܳܐ: ܬܪܶܝܢ ܥܰܡܡܺܝ̈ܢ ܒܰܡܥܰܝ̈ܟܝ: ܘܬܰܪܬܶܝܢ ܐܶܡ̈ܘܳܢ ܡܶܢ ܡܥܰܝ̈ܟܝ ܢܶܬܦܰܖ̈ܫܳܢ: ܐܽܘܡܬܳܐ ܡܶܢ ܐܽܘܡܬܳܐ ܬܶܥܫܰܢ: ܘܪܰܒܳܐ ܢܶܫܬܰܥܒܰܕ ܠܰܙܥܽܘܪܳܐ.
24 ܘܰܫܠܶܡܘ ܝܰܘ̈ܡܳܬܳܗ̇ ܠܡܺܐܠܰܕ: ܘܗܳܐ ܬܳܐܡ̈ܶܐ ܒܟܰܪܣܳܗ̇.
25 ܘܰܢܦܰܩ ܩܰܕܡܳܝܳܐ ܣܡܰܩܪܳܝ: ܘܟܽܠܶܗ ܥܶܙ̈ܩܳܬܳܐ ܕܣܰܥܪܳܐ: ܘܰܩܪܳܐ ܫܡܶܗ ܥܺܝܣܽܘ.
26 ܘܒܳܬܪܶܗ ܢܦܰܩ ܐܰܚܽܘܗܝ: ܘܺܐܝܕܶܗ ܐܰܚܺܝܕܳܐ ܒܥܶܩܒܶܗ ܕܥܺܝܣܽܘ: ܘܰܩܪܳܐ ܫܡܶܗ ܝܰܥܩܽܘܒ. ܘܺܐܝܣܚܳܩ ܒܰܪ ܫܬܺܝܢ ܗܘܳܐ ܫܢܺܝ̈ܢ ܟܰܕ ܝܶܠܕܰܬ ܐܶܢܽܘܢ.
27 ܘܰܪܒܰܘ ܛܠܳܝ̈ܶܐ: ܘܰܗܘܳܐ ܥܺܝܣܽܘ ܓܰܒܪܳܐ ܝܳܕܰܥ ܨܰܝܕܳܐ ܓܰܒܪܳܐ ܕܒܰܪܳܐ: ܘܝܰܥܩܽܘܒ ܓܒܰܪ ܬܰܡܺܝܡ ܘܥܳܡܰܪ ܒܡܰܫܟܢܳܐ.
28 ܘܰܪܚܶܡ ܐܺܝܣܚܳܩ ܠܥܺܝܣܽܘ: ܡܶܛܽܠ ܕܨܰܝܕܶܗ ܒܦܽܘܡܶܗ: ܘܪܰܦܩܰܐ ܪܶܚܡܰܬ ܠܝܰܥܩܽܘܒ.
29 ܘܒܰܫܶܠ ܝܰܥܩܽܘܒ ܒܽܘܫܳܠܳܐ: ܘܗܳܐ ܥܺܝܣܽܘ ܐܰܚܽܘܗܝ ܐܶܬܳܐ ܡܶܢ ܚܰܩܠܳܐ: ܘܗܽܘ ܡܛܰܪܰܦ.
30 ܘܶܐܡܰܪ ܥܺܝܣܽܘ ܠܝܰܥܩܽܘܒ: ܐܰܛܥܶܡܰܝܢܝ ܡܶܢ ܣܽܘܡܳܩ̈ܶܐ ܣܽܘܡܳܩܳܐ ܗܳܢܳܐ: ܡܶܛܽܠ ܕܰܡܛܰܪܰܦ ܐ̱ܢܳܐ: ܡܶܛܽܠ ܗܳܢܳܐ ܩܪܳܐ ܫܡܶܗ ܐܰܕܽܘܡ.
31 ܐܶܡܰܪ ܠܶܗ ܝܰܥܩܽܘܒ: ܙܰܒܶܢ ܠܺܝ ܝܰܘܡܳܢܳܐ ܒܽܘܟܪܽܘܬܳܟ.
32 ܘܶܐܡܰܪ ܥܺܝܣܽܘ ܒܠܶܒܶܗ: ܗܳܐ ܐܶܢܳܐ ܐܳܙܶܠ ܐ̱ܢܳܐ ܠܰܡܡܳܬ: ܠܡܳܢܳܐ ܐܳܙܳܠܐ ܠܺܝ ܒܽܘܟܪܽܘܬܳܐ.
33 ܐܶܡܰܪ ܠܶܗ ܝܰܥܩܽܘܒ: ܝܺܡܰܝ ܠܺܝ ܝܰܘܡܳܢܳܐ: ܘܺܝܡܳܐ ܠܶܗ: ܘܙܰܒܶܢ ܒܽܘܟܪܽܘܬܶܗ ܠܝܰܥܩܽܘܒ.
34 ܘܝܰܥܩܽܘܒ ܝܰܗܒ ܠܥܺܝܣܽܘ ܠܡܶܠܥܰܣ: ܠܰܚܡܳܐ ܘܒܽܘܫܳܠܳܐ ܕܰܛܠܰܦܚ̈ܶܐ: ܘܰܠܥܶܣ ܘܶܐܫܬܺܝ ܘܩܳܡ ܘܶܐܙܰܠ. ܘܒܰܣܰܪ ܥܺܝܣܽܘ ܥܰܠ ܒܽܘܟܪܽܘܬܳܐ.