Genesis 29
The Book of Genesis
܀ ܒܪܝܬܐ ܟܛ ܀
1 ܘܰܐܪܺܝܡ ܝܰܥܩܽܘܒ ܖ̈ܶܓܠܰܘܗܝ: ܘܶܐܙܰܠ ܠܰܐܪܥܳܐ ܕܰܒܢܰܝ̈ ܡܰܕܢܚܳܐ.
2 ܘܰܚܙܳܐ ܘܗܳܐ ܒܺܪܳܐ ܒܚܰܩܠܳܐ: ܘܬܰܡܳܢ ܬܠܳܬܳܐ ܓܙܳܖ̈ܺܝܢ ܕܥܳܢ̈ܳܐ ܖ̈ܰܒܺܝܥܺܝܢ ܥܠܶܝܗ̇: ܡܶܛܽܠ ܕܡܶܢ ܒܺܪܳܐ ܗܳܝ ܫܳܬܶܝܢ ܓܙܳܖ̈ܶܐ: ܘܟܺܐܦܳܐ ܪܰܒܬܳܐ ܥܰܠ ܦܽܘܡܳܗ̇ ܕܒܺܪܳܐ.
3 ܘܡܶܬܟܰܢܫܺܝܢ ܠܬܰܡܳܢ ܟܽܠܗܽܘܢ ܓܙܳܖ̈ܶܐ: ܘܰܡܥܰܓܠܺܝܢ ܟܺܐܦܳܐ ܡܶܢ ܦܽܘܡܳܗ̇ ܕܒܺܪܳܐ: ܘܡܰܫܩܶܝܢ ܥܳܢ̈ܳܐ: ܘܡܰܗܦܟܺܝܢ ܟܺܐܦܳܐ ܠܦܽܘܡܳܗ̇ ܕܒܺܪܳܐ ܠܕܽܘܟܬܳܗ̇.
4 ܐܶܡܰܪ ܠܗܽܘܢ ܝܰܥܩܽܘܒ: ܐܰܚܰܝ̈ ܐܰܝܡܶܟܳܐ ܐܰܢ̱ܬܽܘܢ: ܐܳܡܪܺܝܢ ܠܶܗ ܡܶܢ ܚܳܪܳܢ ܚܢܰܢ.
5 ܐܶܡܰܪ ܠܗܽܘܢ: ܝܳܕܥܺܝܢ ܐܰܢ̱ܬܽܘܢ ܠܠܳܒܳܢ ܒܰܪ ܢܳܚܽܘܪ: ܐܳܡܪܺܝܢ ܠܶܗ ܝܳܕܥܺܝܢܰܢ.
6 ܐܶܡܰܪ ܠܗܽܘܢ: ܫܠܳܡ ܗܽܘ: ܐܳܡܪܺܝܢ ܠܶܗ ܫܠܳܡ. ܘܗܳܐ ܪܳܚܶܝܠ ܒܰܪܬܶܗ ܐܳܬܝܳܐ ܥܰܡ ܥܳܢ̈ܳܐ.
7 ܐܶܡܰܪ ܠܗܽܘܢ ܝܰܥܩܽܘܒ ܗܳܐ ܥܕܰܟܺܝܠ ܝܰܘܡܳܐ ܩܰܝܳܡ: ܠܳܐ ܗܘܳܐ ܙܰܒܢܳܐ ܠܡܶܟܢܰܫ ܒܥܺܝܪܳܐ: ܐܰܫܩܰܘ ܥܳܢ̈ܳܐ ܘܙܶܠܘ ܪܥܰܘ.
8 ܐܳܡܪܺܝܢ ܠܶܗ. ܠܳܐ ܡܶܫܟܚܺܝܢܰܢ ܥܕܰܡܳܐ ܕܡܶܬܟܰܢܫܺܝܢ ܟܽܠܗܽܘܢ ܓܙܳܖ̈ܶܐ: ܘܰܡܥܰܓܠܺܝܢ ܟܺܐܦܳܐ ܡܶܢ ܦܽܘܡܳܗ̇ ܕܒܺܪܳܐ: ܘܡܰܫܩܶܝܢܰܢ ܥܳܢ̈ܳܐ.
9 ܘܥܰܕ ܗܽܘ ܡܡܰܠܶܠ ܥܰܡܗܽܘܢ: ܪܳܚܶܝܠ ܐܶܬܳܬ ܥܰܡ ܥܳܢ̈ܳܐ ܕܰܐܒܽܘܗ̇: ܡܶܛܽܠ ܕܪܳܥܺܝܬܳܐ ܗ̱ܝ.
10 ܘܟܰܕ ܚܙܳܗ̇ ܝܰܥܩܽܘܒ ܠܪܳܚܶܝܠ ܒܰܪܬ ܠܳܒܳܢ ܐܰܚܽܘܗ̇ ܕܶܐܡܶܗ: ܘܰܠܥܳܢ̈ܳܐ ܕܠܳܒܳܢ ܐܰܚܽܘܗ̇ ܕܶܐܡܶܗ: ܩܪܶܒ ܝܰܥܩܽܘܒ ܘܥܰܓܶܠ ܟܺܐܦܳܐ ܡܶܢ ܦܽܘܡܳܗ̇ ܕܒܺܪܳܐ: ܘܰܐܫܩܺܝ ܠܥܳܢ̈ܳܐ ܕܠܳܒܳܢ ܐܰܚܽܘܗ̇ ܕܶܐܡܶܗ.
11 ܘܢܰܫܩܳܗ̇ ܝܰܥܩܽܘܒ ܠܪܳܚܶܝܠ: ܘܰܐܪܺܝܡ ܩܳܠܶܗ ܘܰܒܟܳܐ.
12 ܘܚܰܘܺܝ ܝܰܥܩܽܘܒ ܠܪܳܚܶܝܠ: ܕܰܐܚܳܐ ܗܽܘ ܕܰܐܒܽܘܗ̇: ܘܰܕܒܰܪ ܪܰܦܩܰܐ ܗܽܘ: ܘܪܶܗܛܰܬ ܘܚܰܘܝܰܬ ܠܰܐܒܽܘܗ̇.
13 ܘܟܰܕ ܫܡܰܥ ܠܳܒܳܢ ܫܶܡܥܳܐ ܕܝܰܥܩܽܘܒ ܒܰܪ ܚܳܬܶܗ: ܪܗܶܛ ܠܽܐܘܪܥܶܗ ܘܥܰܦܩܶܗ ܘܢܰܫܩܶܗ: ܘܰܐܝܬܝܶܗ ܠܒܰܝܬܶܗ: ܘܶܐܫܬܰܥܺܝ ܠܠܳܒܳܢ ܟܽܠܗܶܝܢ ܡ̈ܶܠܶܐ ܗܳܠܶܝܢ.
14 ܐܶܡܰܪ ܠܶܗ ܠܳܒܳܢ: ܫܰܪܺܝܪܳܐܺܝܬ ܓܰܪܡܝ ܐܰܢ̱ܬ ܘܒܶܣܪܝ. ܘܺܝܬܶܒ ܠܘܳܬܶܗ ܝܺܪܰܚ ܝܰܘܡܺܝ̈ܢ.
15 ܘܶܐܡܰܪ ܠܳܒܳܢ ܠܝܰܥܩܽܘܒ: ܫܰܪܺܝܪܳܐܺܝܬ ܐܳܚܝ ܐܰܢ̱ܬ: ܬܶܦܠܚܰܢܝ ܡܰܓܳܢ: ܚܰܘܳܢܝ ܡܰܢܽܘ ܐܰܓܪܳܟ.
16 ܘܰܠܠܳܒܳܢ ܐܺܝܬ ܗ̱ܘ̈ܰܝ ܬܰܪܬܶܝܢ ܒܢ̈ܳܢ: ܫܡܳܗ̇ ܕܩܰܫܺܝܫܬܳܐ ܠܶܝܰܐ: ܘܰܫܡܳܗ̇ ܕܰܙܥܽܘܪܬܳܐ ܪܳܚܶܝܠ.
17 ܘܥܰܝ̈ܢܶܝܗ̇ ܕܠܶܝܰܐ ܖ̈ܰܟܺܝܟܳܢ ܗ̱ܘܰܝ̈: ܘܪܳܚܶܝܠ ܫܰܦܺܝܪܳܐ ܗܘܳܬ ܒܚܶܙܘܳܗ̇ ܘܝܳܐܶܐ ܩܽܘܒܠܠܳܗ̇.
18 ܘܰܪܚܶܡ ܝܰܥܩܽܘܒ ܠܪܳܚܶܝܠ: ܘܶܐܡܰܪ: ܐܶܦܠܚܳܟ ܫܒܰܥ ܫܢܺܝ̈ܢ ܒܪܳܚܶܝܠ ܒܰܪܬܳܟ ܙܥܽܘܪܬܳܐ.
19 ܐܶܡܰܪ ܠܶܗ ܠܳܒܳܢ: ܦܰܩܳܚ ܕܶܐܬܠܺܝܗ̇ ܠܳܟ ܡܶܢ ܕܶܐܬܠܺܝܗ̇ ܠܐ̱ܢܳܫ ܐ̱ܚܪܺܝܢ: ܬܶܒ ܥܰܡܝ.
20 ܘܰܦܠܰܚ ܝܰܥܩܽܘܒ ܒܪܳܚܶܝܠ ܫܒܰܥ ܫܢܺܝ̈ܢ: ܘܰܗܘ̈ܝ ܒܥܰܝܢܰܘ̈ܗܝ ܐܰܝܟ ܝܰܘ̈ܡܳܬܳܐ ܙܥܽܘܖ̈ܶܐ: ܡܶܛܽܠ ܕܪܳܚܶܡ ܗܘܳܐ ܠܳܗ̇.
21 ܘܶܐܡܰܪ ܝܰܥܩܽܘܒ ܠܠܳܒܳܢ: ܗܰܒ ܠܺܝ ܐܰܢ̱ܬܰܬܝ: ܡܶܛܽܠ ܕܰܫܠܶܡܘ ܝܰܘ̈ܡܳܬܳܐ ܘܶܐܥܽܘܠ ܠܘܳܬܳܗ̇.
22 ܘܟܰܢܶܫ ܠܳܒܳܢ ܠܟܽܠܗܽܘܢ ܐ̱ܢܳܫܰܝ̈ ܐܰܬܪܳܐ: ܘܰܥܒܰܕ ܡܰܫܬܝܳܐ.
23 ܘܟܰܕ ܗܘܳܐ ܪܰܡܫܳܐ: ܕܒܰܪ ܠܠܶܝܰܐ ܒܰܪܬܶܗ ܘܰܐܥܠܳܗ̇ ܠܘܳܬܶܗ: ܘܥܰܠ ܥܠܶܝܗ̇.
24 ܘܝܰܗܒ ܠܶܗ ܠܳܒܳܢ ܠܠܶܝܰܐ ܒܰܪܬܶܗ: ܠܙܰܠܦܳܐ ܐܰܡܬܶܗ ܐܰܡܬܳܐ.
25 ܘܟܰܕ ܗܘܳܐ ܨܰܦܪܳܐ: ܘܰܚܙܳܐ ܕܠܶܝܰܐ ܗܺܝ: ܐܶܡܰܪ ܠܠܳܒܳܢ: ܡܳܢܰܘ ܗܳܢܳܐ ܕܰܥܒܰܕܬ ܠܺܝ: ܗܳܐ ܒܪܳܚܶܝܠ ܦܶܠܚܶܬ ܥܰܡܳܟ: ܠܡܳܢܳܐ ܢܟܰܠܬܳܢܝ.
26 ܘܶܐܡܰܪ ܠܳܒܳܢ ܠܝܰܥܩܽܘܒ: ܠܳܐ ܡܶܬܥܒܶܕ ܗܳܟܰܢܳܐ ܒܰܐܬܪܰܢ: ܠܡܶܬܰܠ ܙܥܽܘܪܬܳܐ ܩܕܳܡ ܩܰܫܺܝܫܬܳܐ.
27 ܫܰܠܶܡ ܡܶܫܬܽܘܬܳܗ̇ ܕܗܳܕܶܐ: ܘܶܐܬܶܠ ܠܳܟ ܐܳܦ ܗܺܝ: ܒܦܽܘܠܚܳܢܳܐ ܕܬܶܦܠܽܘܚ ܥܰܡܝ ܬܽܘܒ ܫܒܰܥ ܫܢܺܝ̈ܢ ܐ̱ܚܖ̈ܳܢܝܳܢ.
28 ܘܰܥܒܰܕ ܝܰܥܩܽܘܒ ܗܳܟܰܢܳܐ: ܘܡܰܠܺܝ ܡܶܫܬܽܘܬܳܐ ܕܗܳܝ: ܘܝܰܗܒ ܠܶܗ ܠܪܳܚܶܝܠ ܒܰܪܬܶܗ ܐܰܢ̱ܬܬܳܐ.
29 ܘܝܰܗܒ ܠܳܒܳܢ ܠܪܳܚܶܝܠ ܒܰܪܬܶܗ ܠܒܰܠܗܳܐ ܐܰܡܬܶܗ ܐܰܡܬܳܐ.
30 ܘܥ̣ܰܠ ܐܳܦ ܥܰܠ ܪܳܚܶܝܠ: ܘܪܰܚܡܳܗ̇ ܐܳܦ ܠܪܳܚܶܝܠ ܡܶܢ ܠܶܝܰܐ: ܘܰܦܠܰܚ ܥܰܡܶܗ ܬܽܘܒ ܫܒܰܥ ܫܢܺܝ̈ܢ ܐ̱ܚܖ̈ܳܢܝܳܢ
31ܘܰܚܙܳܐ ܡܳܪܝܳܐ ܕܣܰܢܝܳܐ ܗܺܝ ܠܶܝܰܐ: ܘܰܦܬܰܚ ܡܰܪܒܥܳܗ̇. ܘܪܳܚܶܝܠ ܥܩܰܪܬܳܐ.
32 ܘܒܶܛܢܰܬ ܠܶܝܰܐ: ܘܝܶܠܕܰܬ ܒܪܳܐ: ܘܰܩܪܳܬ ܫܡܶܗ ܪܽܘܒܺܝܠ: ܘܶܐܡܪܰܬ: ܡܶܛܽܠ ܕܰܚܙܳܐ ܐܰܠܳܗܳܐ ܫܽܘܥܒܳܕܝ: ܗܳܫܳܐ ܢܶܪܚܡܰܢܝ ܒܰܥܠܝ.
33 ܘܒܶܛܢܰܬ ܬܽܘܒ ܘܝܶܠܕܰܬ ܒܪܳܐ. ܘܶܐܡܪܰܬ: ܡܶܛܽܠ ܕܰܫܡܰܥ ܡܳܪܝܳܐ ܕܣܰܢܝܳܐ ܐ̱ܢܳܐ. ܝܰܗܒ ܠܺܝ ܐܳܦ ܗܳܢܳܐ: ܘܰܩܪܳܬ ܫܡܶܗ ܫܶܡܥܽܘܢ.
34 ܘܒܶܛܢܰܬ ܬܽܘܒ ܘܝܶܠܕܰܬ ܒܪܳܐ: ܘܶܐܡܪܰܬ: ܙܒܰܢ̱ܬܳܐ ܗܳܕܶܐ ܢܶܬܠܰܘܶܐ ܠܺܝ ܒܰܥܠܝ: ܡܶܛܽܠ ܕܝܶܠܕܶܬ ܠܶܗ ܬܠܳܬܳܐ ܒܢܺܝ̈ܢ: ܡܶܛܽܠ ܗܳܢܳܐ ܩܪܳܬ ܫܡܶܗ ܠܶܘܺܝ.
35 ܘܒܶܛܢܰܬ ܬܽܘܒ ܘܝܶܠܕܰܬ ܒܪܳܐ: ܘܶܐܡܪܰܬ: ܙܰܒܢܳܐ ܗܳܢܳܐ ܐܰܘܕܶܐ ܠܡܳܪܝܳܐ: ܡܶܛܽܠ ܗܳܢܳܐ ܩܪܳܬ ܫܡܶܗ ܝܺܗܽܘܕܳܐ. ܘܩܳܡܰܬ ܡܶܢ ܝܰܠܕܳܐ.