Genesis 24
The Book of Genesis
܀ ܒܪܝܬܐ ܟܕ ܀
1 ܘܰܐܒܪܳܗܳܡ ܣܐܶܒ ܘܥܰܠ ܒܰܫܢܰܝ̈ܳܐ: ܘܡܳܪܝܳܐ ܒܰܪܶܟ ܠܰܐܒܪܳܗܳܡ ܒܟܽܠ.
2 ܘܰܩܪܳܐ ܐܰܒܪܳܗܳܡ ܠܥܰܒܕܶܗ ܣܳܒܳܐ ܪܰܒ ܒܰܝܬܶܗ ܕܫܰܠܺܝܛ ܒܟܽܠ ܕܺܐܝܬ ܠܶܗ: ܘܶܐܡܰܪ ܠܶܗ: ܣܺܝܡ ܐܺܝܕܳܟ ܬܚܶܝܬ ܚܰܨܝ.
3 ܘܰܐܘܡܶܝܟ ܒܡܳܪܝܳܐ ܐܰܠܳܗܳܐ ܕܰܫܡܰܝܳܐ ܘܰܐܠܳܗܳܐ ܕܰܐܪܥܳܐ: ܕܠܳܐ ܬܶܣܰܒ ܐܰܢ̱ܬܬܳܐ ܠܒܶܪܝ ܡܶܢ ܒܢ̈ܳܬ ܟܢܰܥܢܳܝ̈ܶܐ ܕܝܳܬܶܒ ܐ̱ܢܳܐ ܒܰܝܢܳܬܗܽܘܢ.
4 ܐܶܠܳܐ ܠܰܐܪܥܝ ܘܰܠܬܰܘ̈ܠܕܳܬܝ ܙܶܠ: ܘܣܰܒ ܐܰܢ̱ܬܬܳܐ ܠܒܶܪܝ ܐܺܝܣܚܳܩ.
5 ܘܶܐܡܰܪ ܠܶܗ ܥܰܒܕܳܐ: ܘܶܐܢ ܠܳܐ ܬܶܨܒܶܐ ܐܰܢ̱ܬܬܳܐ ܠܡܶܐܬܳܐ ܒܳܬܪܝ ܠܰܐܪܥܳܐ ܗܳܕܶܐ: ܡܰܗܦܳܟܽܘ ܐܰܗܦܟܺܝܘܗܝ ܠܰܒܪܳܟ ܠܰܐܪܥܳܐ ܕܰܢܦܰܩܬ ܡܶܢ ܬܰܡܳܢ.
6 ܘܶܐܡܰܪ ܠܶܗ ܐܰܒܪܳܗܳܡ: ܐܶܙܕܰܗܪ ܠܳܟ ܕܰܠܡܳܐ ܬܰܗܦܶܟ ܠܒܶܪܝ ܠܬܰܡܳܢ.
7 ܡܳܪܝܳܐ ܐܰܠܳܗܳܐ ܕܰܫܡܰܝܳܐ ܕܕܰܒܪܰܢܝ ܡܶܢ ܬܰܡܳܢ: ܡܶܢ ܒܶܝܬ ܐܳܒܝ: ܘܡܶܢ ܐܰܪܥܳܐ ܕܬܰܘ̈ܠܕܳܬܝ: ܘܕܶܐܡܰܪ ܠܺܝ: ܘܕܰܐܩܺܝܡ ܠܺܝ: ܕܰܠܙܰܪܥܳܟ ܐܶܬܠܺܝܗ̇ ܐܰܪܥܳܐ ܗܳܕܶܐ : ܗܽܘ ܢܫܰܕܰܪ ܡܰܠܰܐܟܶܗ ܩܕܳܡܰܝܟ: ܘܬܶܣܰܒ ܐܰܢ̱ܬܬܳܐ ܠܒܶܪܝ ܡܶܢ ܬܰܡܳܢ.
8 ܘܶܐܢ ܠܳܐ ܬܶܬܛܦܺܝܣ ܐܰܢ̱ܬܬܳܐ ܠܡܶܐܬܳܐ ܥܰܡܳܟ: ܗܘܺܝܬ ܙܰܟܳܝ ܡܶܢ ܡܰܘܡܬܝ ܗܳܕܶܐ: ܒܰܠܚܽܘܕ ܠܒܶܪܝ ܠܳܐ ܬܰܗܦܶܟ ܠܬܰܡܳܢ.
9 ܘܣܳܡ ܥܰܒܕܳܐ ܐܺܝܕܶܗ ܬܚܶܝܬ ܚܰܨܶܗ ܕܰܐܒܪܳܗܳܡ ܡܳܪܶܗ: ܘܺܝܡܳܐ ܠܶܗ ܥܰܠ ܦܶܬܓܳܡܳܐ ܗܳܢܳܐ.
10 ܘܰܕܒܰܪ ܥܰܒܕܳܐ ܥܶܣܪܳܐ ܓܰܡ̈ܠܺܝܢ ܡܶܢ ܓܰܡ̈ܠܶܐ ܕܡܳܪܶܗ ܘܶܐܙܰܠ: ܘܡܶܢ ܟܽܠ ܛܽܘܒܳܐ ܕܡܳܪܶܗ ܒܺܐܝܕܶܗ: ܘܩܳܡ ܐܶܙܰܠ ܠܳܐܪܳܡ ܢܰܗܖ̈ܺܝܢ ܠܰܩܪܺܝܬܳܐ ܕܢܳܚܽܘܪ.
11 ܘܰܐܒܪܶܟ ܓܰܡ̈ܠܰܘܗܝ ܠܒܰܪ ܡܶܢ ܩܪܺܝܬܳܐ: ܥܰܠ ܒܺܪܳܐ ܕܡܰܝ̈ܳܐ ܠܥܶܕܳܢ ܪܰܡܫܳܐ: ܠܥܶܕܳܢ ܕܢܳܦ̈ܩܳܢ ܡܳܠ̈ܝܳܬ ܡܰܝ̈ܳܐ.
12 ܘܨܰܠܺܝ ܘܶܐܡܰܪ: ܡܳܪܝܳܐ ܐܰܠܳܗܶܗ ܕܡܳܪܝ ܐܰܒܪܳܗܳܡ: ܛܰܝܶܒ ܩܕܳܡܰܝ ܝܰܘܡܳܢܳܐ: ܘܰܥܒܶܕ ܛܰܝܒܽܘܬܳܐ ܥܰܡ ܡܳܪܝ ܐܰܒܪܳܗܳܡ.
13 ܗܳܐ ܐܶܢܳܐ ܩܳܐܶܡ ܐ̱ܢܳܐ ܥܰܠ ܒܺܪܳܐ ܕܡܰܝ̈ܳܐ: ܘܰܒܢ̈ܳܬ ܐ̱ܢܳܫܰܝ̈ ܩܪܺܝܬܳܐ ܢܳܦ̈ܩܳܢ ܠܡܶܡܠܳܐ ܡܰܝ̈ܳܐ.
14 ܘܰܥܠܰܝܡܬܳܐ ܕܺܐܡܰܪ ܠܳܗ̇: ܐܰܪܟܶܢ ܠܺܝ ܩܽܘܠܬܶܟܝ ܕܶܐܫܬܶܐ: ܘܬܺܐܡܰܪ ܠܺܝ ܐܶܫܬܰܝ ܘܳܐܦ ܠܓܰܡ̈ܠܰܝܟ ܐܰܫܩܳܐ: ܗܺܝ ܗܺܝ ܕܛܰܝܶܒܬ ܠܥܰܒܕܳܟ ܐܺܝܣܚܳܩ: ܘܰܒܗܳܕܶܐ ܐܶܕܰܥ ܕܥܳܒܶܕ ܐܰܢ̱ܬ ܛܰܝܒܽܘܬܳܐ ܘܩܽܘܫܬܳܐ ܥܰܡ ܡܳܪܝ.
15 ܘܗܽܘ ܥܕܰܟܺܝܠ ܠܳܐ ܫܰܠܶܡ ܠܰܡܡܰܠܳܠܽܘ: ܘܗܳܐ ܪܰܦܩܰܐ ܢܶܦܩܰܬ ܕܶܐܬܺܝܠܕܰܬ ܠܰܒܬܽܘܐܶܝܠ ܒܰܪ ܡܶܠܟܳܐ ܐܰܢ̱ܬܰܬ ܢܳܚܽܘܪ ܐܰܚܽܘܗܝ ܕܰܐܒܪܳܗܳܡ: ܘܩܽܘܠܬܳܐ ܥܰܠ ܟܰܬܦܳܗ̇.
16 ܘܰܥܠܰܝܡܬܳܐ ܫܰܦܺܝܪܳܐ ܗܘܳܬ ܒܚܶܙܘܳܐ ܛܳܒ: ܒܬܽܘܠܬܳܐ ܕܓܰܒܪܳܐ ܠܳܐ ܝܰܕܥܳܗ̇: ܘܢܶܚܬܰܬ ܠܒܺܪܳܐ: ܘܰܡܠܳܬ ܩܽܘܠܬܳܐ ܘܣܶܠܩܰܬ.
17 ܘܰܪܗܶܛ ܥܰܒܕܳܐ ܠܽܐܘܪܥܳܗ̇: ܘܶܐܡܰܪ ܠܳܗ̇: ܐܰܫܩܳܐܺܝܢܝ ܩܰܠܺܝܠ ܡܰܝ̈ܳܐ ܡܶܢ ܩܽܘܠܬܶܟܝ.
18 ܘܶܐܡܪܰܬ ܠܶܗ: ܐܶܫܬܰܝ ܡܳܪܝ: ܘܶܐܣܬܰܪܗܒܰܬ ܘܰܐܚܬܰܬ ܩܽܘܠܬܳܐ ܥܰܠ ܐܺܝ̈ܕܶܝܗ̇: ܘܰܐܫܩܝܰܬܶܗ.
19 ܘܓܰܡܪܰܬ ܠܡܰܫܩܳܝܽܘܬܶܗ: ܘܶܐܡܪܰܬ: ܐܳܦ ܠܓܰܡ̈ܠܰܝܟ ܐܶܡܠܶܐ ܥܕܰܡܳܐ ܕܢܶܫܠܡܽܘܢ ܠܡܶܫܬܳܐ.
20 ܘܶܐܣܬܰܪܗܒܰܬ ܘܢܶܦܨܰܬ ܩܽܘܠܬܳܗ̇ ܠܫܶܩܝܳܐ: ܘܪܶܗܛܰܬ ܬܽܘܒ ܠܒܺܪܳܐ ܠܡܶܡܠܳܐ: ܘܰܡܠܳܬ ܠܟܽܠܗܽܘܢ ܓܰܡܠܰܘ̈ܗܝ.
21 ܘܓܰܒܪܳܐ ܡܰܫܩܶܐ ܘܡܶܬܒܰܩܶܐ ܒܳܗ̇: ܘܰܡܟܰܬܰܪ ܠܡܶܕܰܥ: ܐܶܢ ܐܰܨܠܰܚ ܡܳܪܝܳܐ ܐܽܘܪܚܶܗ: ܐܰܘ ܠܳܐ.
22 ܘܟܰܕ ܓܡܰܪܘ ܓܰܡ̈ܠܶܐ ܠܡܶܫܬܳܐ: ܢܣܰܒ ܥܰܒܕܳܐ ܩܕܳܫܳܐ ܕܕܰܗܒܳܐ ܡܰܬܩܳܠܳܐ ܡܰܬܩܳܠܶܗ: ܘܰܬܪܶܝܢ ܫܶܐܖ̈ܺܝܢ ܥܰܠ ܐܺܝܕܶܝ̈ܗ̇: ܡܶܢ ܥܶܣܪܳܐ ܕܕܰܗܒܳܐ ܡܰܬܩܳܠܗܽܘܢ.
23 ܘܶܐܡܰܪ ܠܳܗ̇: ܒܰܪܬ ܡܰܢ ܐܰܢ̱ܬܝ: ܚܰܘܳܐܺܝܢܝ ܐܶܢ ܐܺܝܬ ܠܰܢ ܐܰܬܪܳܐ ܒܶܝܬ ܐܰܒܽܘܟܝ ܠܰܡܒܳܬ.
24 ܘܶܐܡܪܰܬ ܠܶܗ: ܒܰܪܬ ܒܬܽܘܐܶܝܠ ܐ̱ܢܳܐ ܒܰܪ ܡܶܠܟܳܐ ܕܝܶܠܕܰܬ ܠܢܳܚܽܘܪ.
25 ܘܶܐܡܪܰܬ ܠܶܗ : ܘܳܐܦ ܬܶܒܢܳܐ ܘܳܐܦ ܟܶܣܬܳܐ ܣܰܓܺܝ ܠܰܢ: ܘܳܐܦ ܐܰܬܪܳܐ ܠܰܡܒܳܬ.
26 ܘܰܒܪܶܟ ܓܰܒܪܳܐ ܥܰܠ ܐܰܪܥܳܐ: ܘܰܣܓܶܕ ܠܡܳܪܝܳܐ.
27 ܘܶܐܡܰܪ: ܒܪܺܝܟ ܗ̱ܘ̣ ܡܳܪܝܳܐ ܐܰܠܳܗܶܗ ܕܡܳܪܝ ܐܰܒܪܳܗܳܡ: ܕܠܳܐ ܟܠܳܐ ܛܰܝܒܽܘܬܶܗ ܘܩܽܘܫܬܶܗ ܡܶܢ ܡܳܪܝ: ܐܶܠܳܐ ܒܽܐܘܪܚܳܐ ܕܰܒܪܰܢܝ ܡܳܪܝܳܐ ܠܒܶܝܬ ܐܰܚܽܘܗ̇ ܕܡܳܪܝ: ܠܡܶܣܰܒ ܒܰܪܬ ܐܰܚܽܘܗܝ ܕܡܳܪܝ ܠܰܒܪܶܗ.
28 ܘܪܶܗܛܰܬ ܛܠܺܝܬܳܐ ܘܚܰܘܝܰܬ ܠܒܶܝܬ ܐܰܒܽܘܗܝ ܡ̈ܶܠܶܐ ܗܳܠܶܝܢ.
29 ܘܰܠܪܰܦܩܰܐ ܐܺܝܬ ܗܘܳܐ ܐܰܚܳܐ ܘܰܫܡܶܗ ܠܳܒܳܢ: ܘܰܪܗܶܛ ܠܳܒܳܢ ܠܘܳܬ ܓܰܒܪܳܐ ܠܒܰܪ ܠܘܳܬ ܒܺܪܳܐ.
30 ܟܰܕ ܚܙܳܐ ܩܕܳܫ̈ܶܐ ܘܫܶܐܖ̈ܶܐ ܒܺܐܝ̈ܕܰܝ ܚܳܬܶܗ: ܘܟܰܕ ܫܡܰܥ ܡܶܠܶܝ̈ܗ̇ ܕܪܰܦܩܰܐ ܚܳܬܶܗ: ܕܶܐܡܪܰܬ ܕܗܳܟܰܢܳܐ ܐܶܡܰܪ ܠܺܝ ܓܰܒܪܳܐ: ܘܶܐܬܳܐ ܠܘܳܬ ܓܰܒܪܳܐ: ܘܗܳܐ ܩܳܐܶܡ ܠܘܳܬ ܓܰܡ̈ܠܶܐ ܥܰܠ ܒܺܪܳܐ.
31 ܘܶܐܡܰܪ ܠܶܗ: ܥܽܘܠ ܒܪܺܝܟܶܗ ܕܡܳܪܝܳܐ: ܠܡܳܢܳܐ ܩܳܐܶܡ ܐܰܢ̱ܬ ܒܫܽܘܩܳܐ: ܘܶܐܢܳܐ ܬܰܩܢܶܬ ܒܰܝܬܳܐ ܘܕܽܘܟܬܳܐ ܠܓܰܡ̈ܠܶܐ.
32 ܘܥ̣ܰܠ ܓܰܒܪܳܐ ܠܒܰܝܬܳܐ: ܘܰܫܪܳܐ ܡܶܢ ܓܰܡ̈ܠܶܐ: ܘܰܐܪܡܺܝ ܬܶܒܢܳܐ ܘܟܶܣܬܳܐ ܠܓܰܡ̈ܠܶܐ: ܘܡܰܝ̈ܳܐ ܠܰܡܫܳܓܽܘ ܖ̈ܶܓܠܰܘܗܝ ܘܖ̈ܶܓܠܶܐ ܕܓܰܒܖ̈ܶܐ ܕܥܰܡܶܗ.
33 ܘܣܳܡ ܩܕܳܡܰܝܗܽܘܢ ܠܡܶܠܥܰܣ: ܘܶܐܡܰܪ: ܠܳܐ ܠܳܥܶܣ ܐ̱ܢܳܐ ܥܕܰܡܳܐ ܕܺܐܡܰܪ ܡܶܠܰܝ̈: ܐܳܡܪܺܝܢ ܠܶܗ: ܐܶܡܰܪ.
34 ܘܶܐܡܰܪ: ܥܰܒܕܳܐ ܐ̱ܢܳܐ ܕܰܐܒܪܳܗܳܡ.
35 ܘܡܳܪܝܳܐ ܒܰܪܶܟ ܠܡܳܪܝ: ܘܺܝܪܶܒ ܛܳܒ ܘܰܗܘܰܘ ܠܶܗ ܥܳܢ̈ܳܐ: ܘܬܰܘܖ̈ܶܐ: ܘܣܺܐܡܳܐ: ܘܕܰܗܒܳܐ: ܘܥܰܒ̈ܕܶܐ: ܘܰܐܡܗ̈ܳܬܳܐ: ܘܰܐܬܳܢ̈ܶܐ: ܘܓܰܡ̈ܠܶܐ: ܘܚܶܡܖ̈ܳܐ.
36 ܘܝܶܠܕܰܬ ܣܰܪܳܐ ܐܰܢ̱ܬܬܶܗ ܕܡܳܪܝ ܒܪܳܐ ܠܡܳܪܝ ܡܶܢ ܒܳܬܰܪ ܕܣܶܐܒܰܬ: ܘܝܰܗܒ ܠܶܗ ܟܽܠܡܶܕܶܡ ܕܺܐܝܬ ܠܶܗ.
37 ܘܰܐܘܡܝܰܢܝ ܡܳܪܝ ܘܶܐܡܰܪ ܠܺܝ: ܠܳܐ ܬܶܣܰܒ ܐܰܢ̱ܬܬܳܐ ܠܒܶܪܝ ܡܶܢ ܒܢ̈ܳܬ ܟܢܰܥܢܳܝ̈ܶܐ ܕܝܳܬܶܒ ܐ̱ܢܳܐ ܒܰܐܪܥܗܽܘܢ.
38 ܐܶܠܳܐ ܙܶܠ ܠܒܶܝܬ ܐܳܒܝ ܘܰܠܫܰܪܒܰܬܝ: ܘܣܰܒ ܐܰܢ̱ܬܬܳܐ ܠܒܶܪܝ ܡܶܢ ܬܰܡܳܢ.
39 ܘܶܐܡܪܶܬ ܠܡܳܪܝ: ܘܕܰܠܡܳܐ ܠܳܐ ܬܶܨܒܶܐ ܐܰܢ̱ܬܬܳܐ ܠܡܶܐܬܳܐ ܥܰܡܝ.
40 ܘܶܐܡܰܪ ܠܺܝ ܡܳܪܝ: ܡܳܪܝܳܐ ܕܦܶܠܚܶܬ ܩܕܳܡܰܘܗܝ: ܗܽܘ ܢܫܰܕܰܪ ܡܰܠܰܐܟܶܗ ܥܰܡܳܟ ܘܢܰܬܩܶܢ ܐܽܘܪܚܳܟ: ܘܬܶܣܰܒ ܐܰܢ̱ܬܬܳܐ ܠܒܶܪܝ ܡܶܢ ܫܰܪܒܰܬܝ ܘܡܶܢ ܒܶܝܬ ܐܳܒܝ.
41 ܘܗܳܝܕܶܝܢ ܬܶܬܚܰܣܶܐ ܡܶܢ ܡܰܘܡܳܬܝ ܟܰܕ ܬܺܐܙܰܠ ܠܫܰܪܒܰܬܝ. ܘܶܐܢ ܠܳܐ ܢܶܬܠܽܘܢ ܠܳܟ: ܗܘܰܝܬ ܡܚܰܣܰܝ ܡܶܢ ܡܰܘܡܳܬܝ.
42 ܘܶܐܬܺܝܬ ܝܰܘܡܳܢܳܐ ܠܘܳܬ ܒܺܪܳܐ ܘܶܐܡܪܶܬ: ܡܳܪܝܳܐ ܐܰܠܳܗܳܐ ܕܡܳܪܝ ܐܰܒܪܳܗܳܡ: ܐܶܢ ܐܰܬܩܶܢܬ ܐܽܘܪܚܝ ܕܶܐܬܺܝܬ ܥܠܶܝܗ̇.
43 ܗܳܐ ܐܶܢܳܐ ܩܳܐܶܡ ܐ̱ܢܳܐ ܥܰܠ ܒܺܪܳܐ ܕܡܰܝ̈ܳܐ: ܘܰܥܠܰܝܡܬܳܐ ܕܢܳܦܩܳܐ ܠܡܶܡܠܳܐ ܡܰܝ̈ܳܐ: ܘܺܐܡܰܪ ܠܳܗ̇.
44 ܐܰܫܩܳܐܺܝܢܝ ܩܰܠܺܝܠ ܡܰܝ̈ܳܐ ܡܶܢ ܩܽܘܠܬܶܟܝ. ܘܬܺܐܡܰܪ ܠܺܝ ܐܳܦ ܐܰܢ̱ܬ ܐܶܫܬܰܝ ܘܳܐܦ ܠܓܰܡ̈ܠܰܝܟ ܐܶܡܠܶܐ: ܗܺܝ ܗܺܝ ܐܰܢ̱ܬܬܳܐ ܕܛܰܝܶܒ ܡܳܪܝܳܐ ܠܒܰܪ ܡܳܪܝ.
45 ܘܶܐܢܳܐ ܥܕܰܟܺܝܠ ܠܳܐ ܫܰܠܡܶܬ ܠܰܡܡܰܠܳܠܽܘ ܒܠܶܒܝ: ܘܗܳܐ ܪܰܦܩܰܐ ܢܶܦܩܰܬ ܘܩܽܘܠܬܳܐ ܥܰܠ ܟܰܬܦܳܗ̇: ܘܢܶܚܬܰܬ ܠܥܰܝܢܳܐ ܘܰܡܠܳܬ: ܘܶܐܡܪܶܬ ܠܳܗ̇: ܐܰܫܩܳܐܺܝܢܝ ܩܰܠܺܝܠ ܡܰܝ̈ܳܐ ܡܶܢ ܩܽܘܠܬܶܟܝ.
46 ܘܶܐܣܬܰܪܗܒܰܬ ܘܰܐܚܬܰܬ ܩܽܘܠܬܳܗ̇ ܡܶܢܳܗ̇: ܘܶܐܡܪܰܬ ܠܺܝ: ܐܶܫܬܰܝ ܐܳܦ ܠܓܰܡ̈ܠܰܝܟ ܐܰܫܩܳܐ: ܘܶܐܫܬܺܝܬ ܘܳܐܦ ܠܓܰܡܠܰܝ̈ ܐܰܫܩܺܝܬ.
47 ܘܫܰܐܶܠܬܳܗ̇ : ܘܶܐܡܪܶܬ ܠܳܗ̇: ܒܰܪܬ ܡܰܢ ܐܰܢ̱ܬ ܘܶܐܡܪܰܬ: ܒܰܪܬ ܒܬܽܘܐܶܝܠ ܐ̱ܢܳܐ ܒܰܪ ܢܳܚܽܘܪ ܕܝܶܠܕܰܬ ܠܶܗ ܡܶܠܟܳܐ: ܘܰܐܪܡܺܝܬ ܫܶܐܖ̈ܶܐ ܒܺܐܝ̈ܕܶܝܗ̇ ܘܰܩܕܳܫ̈ܶܐ ܒܶܐܕܢܶܝ̈ܗ̇. ܘܩܶܥܕܶܬ ܘܣܶܓܕܶܬ ܠܡܳܪܝܳܐ.
48 ܘܒܰܪܟܶܬ ܠܡܳܪܝܳܐ ܐܰܠܳܗܳܐ ܕܡܳܪܝ ܐܰܒܪܳܗܳܡ: ܕܕܰܒܪܰܢܝ ܒܽܐܘܪܚܳܐ ܕܩܽܘܫܬܳܐ ܠܒܶܝܬ ܐܰܚܽܘܗܝ ܕܡܳܪܝ: ܠܡܶܣܰܒ ܒܰܪܬ ܐܰܚܽܘܗܝ ܕܡܳܪܝ ܠܰܒܪܶܗ.
49 ܘܗܳܫܳܐ ܐܶܢ ܥܳܒܕܺܝܢ ܐܰܢ̱ܬܽܘܢ ܛܰܝܒܽܘܬܳܐ ܘܩܽܘܫܬܳܐ ܥܰܡ ܡܳܪܝ: ܚܰܘܰܐܢܝ. ܘܶܐܢ ܠܳܐ: ܚܰܘܰܐܢܝ: ܘܶܐܬܦܢܶܐ ܠܝܰܡܺܝܢܳܐ ܐܰܘ ܠܣܶܡܳܠܳܐ.
50 ܘܰܥܢܰܘ ܠܳܒܳܢ ܘܰܒܬܽܘܐܶܝܠ: ܘܶܐܡܰܪܘ: ܡܶܢ ܡܳܪܝܳܐ ܢܶܦܩܰܬ ܡܶܠܬܳܐ: ܠܳܐ ܡܶܫܟܚܺܝܢܰܢ ܠܡܺܐܡܰܪ ܠܳܟ ܛܳܒܬܳܐ ܐܰܘ ܒܺܝܫܬܳܐ.
51 ܗܳܐ ܪܰܦܩܰܐ ܩܕܳܡܰܝܟ ܕܒܰܪ ܘܙܶܠ: ܘܬܶܗܘܶܐ ܐܰܢ̱ܬܬܳܐ ܠܒܰܪ ܡܳܪܳܟ ܐܰܝܟܰܢܳܐ ܕܶܐܡܰܪ ܡܳܪܝܳܐ.
52 ܘܟܰܕ ܫܡܰܥ ܥܰܒܕܳܐ ܕܰܐܒܪܳܗܳܡ ܡܶܠܰܝ̈ܗܽܘܢ: ܣܓܶܕ ܥܰܠ ܐܰܪܥܳܐ ܩܕܳܡ ܡܳܪܝܳܐ.
53 ܘܰܐܦܶܩ ܥܰܒܕܳܐ ܡܳܐܢ̈ܶܐ ܕܕܰܗܒܳܐ: ܘܡܳܐܢ̈ܶܐ ܕܣܺܐܡܳܐ: ܘܰܠܒܽܘܫ̈ܶܐ: ܘܝܰܗܒ ܠܪܰܦܩܰܐ: ܘܡܰܘ̈ܗܒܳܬܳܐ ܝܰܗܒ ܠܰܐܚܶܝ̈ܗ̇ ܘܠܶܐܡܳܗ̇.
54 ܘܰܠܥܶܣܘ ܘܶܐܫܬܺܝܘ ܗܽܘ ܘܓܰܒܖ̈ܶܐ ܕܥܰܡܶܗ: ܘܒܳܬܘ: ܘܩܰܕܶܡ ܒܫܰܦܪܳܐ ܘܶܐܡܰܪ ܠܗܽܘܢ: ܫܰܕܪܽܘܢܝ ܐܺܙܰܠ ܠܘܳܬ ܡܳܪܝ.
55 ܘܶܐܡܰܪܘ ܠܶܗ ܐܰܚ̈ܶܝ̈ܗ̇ ܘܶܐܡܳܗ̇: ܬܶܬܶܒ ܥܠܰܝܡܬܳܐ ܥܰܡܰܢ ܝܺܪܰܚ ܝܰܘܡܺܝ̈ܢ: ܘܗܳܝܕܶܝܢ ܬܺܐܙܰܠ.
56 ܘܶܐܡܰܪ ܠܗܽܘܢ: ܠܳܐ ܬܫܰܘܚܪܽܘܢܳܢܝ: ܕܡܳܪܝܳܐ ܐܰܬܩܶܢ ܐܽܘܪܚܝ: ܫܰܕܪܽܘܢܝ ܐܺܙܰܠ ܠܘܳܬ ܡܳܪܝ.
57 ܘܶܐܡܰܪܘ: ܢܶܩܪܶܐ ܠܰܛܠܺܝܬܳܐ ܘܢܶܫܐܰܠ ܡܶܢ ܦܽܘܡܳܗ̇.
58 ܘܰܩܪܰܐܗ̇ ܠܪܰܦܩܰܐ: ܘܶܐܡܰܪܘ ܠܳܗ̇: ܐܳܙܳܠܐ ܐܰܢ̱ܬ ܥܰܡ ܓܰܒܪܳܐ ܗܳܢܳܐ: ܘܶܐܡܪܰܬ : ܐܳܙܳܠܐ ܐ̱ܢܳܐ.
59 ܘܫܰܕܪܽܘܗ̇ ܠܪܰܦܩܰܐ ܚܳܬܗܽܘܢ ܘܰܠܡܰܝܢܰܩܬܳܗ̇. ܘܰܠܥܰܒܕܳܐ ܕܰܐܒܪܳܗܳܡ: ܘܰܠܓܰܒܖ̈ܰܘܗܝ.
60 ܘܒܰܪܟܽܘܗ̇ ܠܪܰܦܩܰܐ ܚܳܬܗܽܘܢ: ܘܶܐܡܰܪܘ ܠܳܗ̇: ܚܳܬܰܢ ܐܰܢ̱ܬܝ: ܗܘܳܝ ܠܰܐܠܦ̈ܶܐ ܘܰܠܖ̈ܶܒܘܳܬܳܐ: ܘܢܺܐܪܰܬ ܙܰܪܥܶܟܝ ܐܰܖ̈ܥܳܬܳܐ ܕܰܒܥܶܠܕܒܳܒܰܘ̈ܗܝ.
61 ܘܩܳܡܰܬ ܪܰܦܩܰܐ ܘܰܥܠܰܝ̈ܡܳܬܳܗ̇: ܘܺܝܬܶܒܝ̈ ܥܰܠ ܓܰܡ̈ܠܶܐ ܘܶܐܙܰܠ̈ܝ ܒܳܬܰܪ ܓܰܒܪܳܐ: ܘܰܕܒܰܪ ܥܰܒܕܳܐ ܠܪܰܦܩܰܐ ܘܶܐܙܰܠ.
62 ܘܺܐܝܣܚܳܩ ܐܳܬܶܐ ܡܶܐܬܳܐ ܡܶܢ ܒܺܪܳܐ ܕܚܰܝܳܐ ܚܙܳܢܝ: ܘܗܽܘ ܝܳܬܶܒ ܒܰܐܪܥܳܐ ܕܬܰܝܡܢܳܐ.
63 ܘܰܢܦܰܩ ܐܺܝܣܚܳܩ ܠܰܡܗܰܠܳܟܽܘ ܒܚܰܩܠܳܐ ܒܥܶܕܳܢ ܪܰܡܫܳܐ. ܘܰܐܪܺܝܡ ܥܰܝܢܰܘ̈ܗܝ ܘܰܚܙܳܐ: ܘܗܳܐ ܓܰܡ̈ܠܶܐ ܐܳܬܶܝܢ.
64 ܘܰܐܪܺܝܡܬ ܪܰܦܩܰܐ ܥܰܝ̈ܢܶܝܗ̇ ܘܰܚܙܳܬ ܠܺܐܝܣܚܳܩ: ܘܶܐܬܪܰܟܢܰܬ ܥܰܠ ܓܰܡܠܳܐ.
65 ܘܶܐܡܪܰܬ ܠܥܰܒܕܳܐ: ܡܰܢܽܘ ܓܰܒܪܳܐ ܗܳܢܳܐ ܕܳܐܬܶܐ ܒܚܰܩܠܳܐ ܠܽܐܘܪܥܰܢ: ܘܶܐܡܰܪ ܥܰܒܕܳܐ: ܗܽܘܝܽܘ ܡܳܪܝ: ܘܢܶܣܒܰܬ ܐܰܪܕܺܝܕܳܐ ܘܶܐܬܟܰܣܝܰܬ.
66 ܘܶܐܫܬܰܥܺܝ ܥܰܒܕܳܐ ܠܺܐܝܣܚܳܩ ܟܽܠܗܽܘܢ ܦܶܬܓܳܡ̈ܶܐ ܕܥܶܒܕܰܬ.
67 ܘܰܐܥܠܳܗ̇ ܐܺܝܣܚܳܩ ܠܡܰܫܟܢܳܐ ܕܣܰܪܳܐ ܐܶܡܶܗ: ܘܢܰܣܒܳܗ̇ ܠܪܰܦܩܰܐ: ܘܰܗܘܳܬ ܠܶܗ ܐܰܢ̱ܬܬܳܐ: ܘܪܰܚܡܳܗ̇: ܘܶܐܬܒܰܝܰܐ ܐܺܝܣܚܳܩ ܒܳܬܰܪ ܐܶܡܶܗ.