Genesis 22
The Book of Genesis
܀ ܒܪܝܬܐ ܟܒ ܀
1 ܘܰܗܘܳܐ ܡܶܢ ܒܳܬܰܪ ܦܶܬܓܳܡ̈ܶܐ ܗܳܠܶܝܢ: ܐܰܠܳܗܳܐ ܢܰܣܺܝ ܠܰܐܒܪܳܗܳܡ ܘܶܐܡܰܪ ܠܶܗ: ܐܰܒܪܳܗܳܡ: ܘܶܐܡܰܪ ܗܳܐ ܐܶܢܳܐ.
2 ܘܶܐܡܰܪ ܠܶܗ. ܕܒܰܪ ܠܰܒܪܳܟ ܠܺܝܚܺܝܕܳܝܳܟ ܕܪܳܚܶܡ ܐܰܢ̱ܬ ܠܺܐܝܣܚܳܩ: ܘܙܶܠ ܠܳܟ ܠܰܐܪܥܳܐ ܕܳܐܡܽܘܖ̈ܳܝܶܐ: ܘܰܐܣܶܩܳܝܗܝ ܬܰܡܳܢ ܠܰܥܠܳܬܳܐ ܥܰܠ ܚܰܕ ܡܶܢ ܛܽܘܖ̈ܶܐ ܕܺܐܡܰܪ ܠܳܟ.
3 ܘܩܰܕܶܡ ܐܰܒܪܳܗܳܡ ܒܨܰܦܪܳܐ ܘܰܐܪܡܺܝ ܥܰܠ ܚܡܳܪܶܗ: ܘܰܕܒܰܪ ܠܰܬܪܶܝܢ ܥܠܰܝ̈ܡܰܘܗܝ ܥܰܡܶܗ ܘܠܺܐܝܣܚܳܩ ܒܪܶܗ: ܘܨܰܠܰܚ ܩܰܝ̈ܣܶܐ ܠܰܥܠܳܬܳܐ: ܘܩܳܡ ܐܶܙܰܠ ܠܰܐܬܪܳܐ ܕܶܐܡܰܪ ܠܶܗ ܐܰܠܳܗܳܐ.
4 ܘܰܠܝܰܘܡܳܐ ܬܠܺܝܬܝܳܐ ܐܰܪܺܝܡ ܐܰܒܪܳܗܳܡ ܥܰܝܢܰܘ̈ܗܝ ܘܰܚܙܳܝܗܝ ܠܰܐܬܪܳܐ ܗܰܘ ܡܶܢ ܪܽܘܚܩܳܐ.
5 ܘܶܐܡܰܪ ܠܰܥܠܰܝܡܰܘ̈ܗܝ: ܦܽܘܫܘ ܠܟܽܘܢ ܗܳܪܟܳܐ ܠܘܳܬ ܚܡܳܪܳܐ: ܘܶܐܢܳܐ ܘܛܰܠܝܳܐ ܢܺܐܙܰܠ ܥܕܰܡܳܐ ܠܗܳܪܟܳܐ: ܢܶܣܓܽܘܕ ܘܢܶܗܦܽܘܟ ܠܘܳܬܟܽܘܢ.
6 ܘܰܢܣܰܒ ܐܰܒܪܳܗܳܡ ܩܰܝ̈ܣܶܐ ܠܰܥܠܳܬܳܐ: ܘܣܳܡ ܥܰܠ ܐܺܝܣܚܳܩ ܒܪܶܗ: ܘܰܢܣܰܒ ܒܺܐܝܕܶܗ ܢܽܘܪܳܐ ܘܣܰܟܺܝܢܳܐ: ܘܶܐܙܰܠܘ ܬܖ̈ܰܝܗܽܘܢ ܐܰܟܚܕܳܐ.
7 ܘܶܐܡܰܪ ܐܺܝܣܚܳܩ ܠܰܐܒܪܳܗܳܡ ܐܰܒܽܘܗܝ: ܘܶܐܡܰܪ ܐܰܒܳܐ: ܘܶܐܡܰܪ : ܗܳܐ ܐܶܢܳܐ ܒܶܪܝ ܘܶܐܡܰܪ ܠܶܗ: ܗܳܐ ܢܽܘܪܳܐ ܘܩܰܝ̈ܣܶܐ: ܐܰܝܟܰܘ ܐܶܡܪܳܐ ܠܰܥܠܳܬܳܐ.
8 ܘܶܐܡܰܪ ܐܰܒܪܳܗܳܡ: ܐܰܠܳܗܳܐ ܢܶܚܙܶܐ ܠܶܗ ܐܶܡܪܳܐ ܠܰܥܠܳܬܳܐ ܒܶܪܝ: ܘܶܐܙܰܠܘ ܬܖ̈ܰܝܗܽܘܢ ܐܰܟܚܕܳܐ.
9 ܘܶܐܬܰܘ ܠܰܐܬܪܳܐ ܕܶܐܡܰܪ ܠܶܗ ܐܰܠܳܗܳܐ: ܘܰܒܢܳܐ ܬܰܡܳܢ ܐܰܒܪܳܗܳܡ ܡܰܕܒܚܳܐ: ܘܰܣܕܰܪ ܩܰܝ̈ܣܶܐ: ܘܦܰܟܪܶܗ ܠܺܐܝܣܚܳܩ ܒܪܶܗ: ܘܣܳܡܶܗ ܥܰܠ ܡܰܕܒܚܳܐ ܠܥܶܠ ܡܶܢ ܩܰܝ̈ܣܶܐ.
10 ܘܰܐܘܫܶܛ ܐܺܝܕܶܗ ܐܰܒܪܳܗܳܡ: ܘܰܢܣܰܒ ܣܰܟܺܝܢܳܐ ܠܡܶܟܣܶܗ ܠܰܒܪܶܗ.
11 ܘܰܩܪܳܐ ܠܶܗ ܡܰܠܰܐܟܶܗ ܕܰܐܠܳܗܳܐ ܡܶܢ ܫܡܰܝܳܐ ܘܶܐܡܰܪ: ܐܰܒܪܳܗܳܡ: ܐܰܒܪܳܗܳܡ: ܘܶܐܡܰܪ ܗܳܐ ܐܶܢܳܐ.
12 ܘܶܐܡܰܪ ܠܶܗ: ܠܳܐ ܬܰܘܫܶܛ ܐܺܝܕܳܟ ܥܰܠ ܛܰܠܝܳܐ: ܘܠܳܐ ܬܶܥܒܶܕ ܠܶܗ ܡܶܕܶܡ: ܡܶܛܽܠ ܕܗܳܫܳܐ ܐܰܘܕܰܥܬ ܕܕܳܚܠܶܗ̇ ܐܰܢ̱ܬ ܕܰܐܠܳܗܳܐ: ܘܠܳܐ ܚܣܰܟܬ ܠܰܒܪܳܟ ܠܺܝܚܺܝܕܳܟ ܡܶܢܝ.
13 ܘܰܐܪܺܝܡ ܐܰܒܪܳܗܳܡ ܥܰܝܢܰܘ̈ܗܝ ܘܰܚܙܳܐ: ܘܗܳܐ ܕܶܟܪܳܐ ܚܰܕ ܐܰܚܺܝܕ ܒܣܰܘܟܬܳܐ ܒܩܰܖ̈ܢܳܬܶܗ: ܘܶܐܙܰܠ ܐܰܒܪܳܗܳܡ ܘܢܰܣܒܶܗ ܠܕܶܟܪܳܐ: ܘܰܐܣܩܶܗ ܠܰܥܠܳܬܳܐ ܚܠܳܦ ܒܪܶܗ.
14 ܘܰܩܪܳܐ ܐܰܒܪܳܗܳܡ ܫܡܶܗ ܕܰܐܬܪܳܐ ܗܰܘ: ܡܳܪܝܳܐ ܢܶܚܙܶܐ: ܕܶܐܬܶܐܡܰܪ ܝܰܘܡܳܢܳܐ ܒܛܽܘܪܳܐ ܗܳܢܳܐ ܡܳܪܝܳܐ ܢܶܚܙܶܐ.
15 ܘܰܩܪܳܐ ܡܰܠܰܐܟܶܗ ܕܰܐܠܳܗܳܐ ܠܰܐܒܪܳܗܳܡ ܕܬܰܪܬܶܝܢ ܙܰܒܢܺܝ̈ܢ ܡܶܢ ܫܡܰܝܳܐ: ܘܶܐܡܰܪ.
16 ܒܺܝ ܝܺܡܺܝܬ ܐܳܡܰܪ ܡܳܪܝܳܐ. ܚܠܳܦ ܕܰܥܒܰܕܬ ܦܶܬܓܳܡܳܐ ܗܳܢܳܐ: ܘܠܳܐ ܚܣܰܟܬ ܠܰܒܪܳܟ ܠܺܝܚܺܝܕܳܟ ܡܶܢܝ.
17 ܡܒܰܪܳܟܽܘ ܐܶܒܰܪܟܳܟ: ܘܡܰܣܓܳܝܽܘ ܐܰܣܓܶܐ ܙܰܪܥܳܟ ܐܰܝܟ ܟܰܘ̈ܟܒܰܝ ܫܡܰܝܳܐ: ܘܰܐܝܟ ܚܳܠܳܐ ܕܥܰܠ ܣܶܦܬܶܗ ܕܝܰܡܳܐ: ܘܢܺܐܪܰܬ ܙܰܪܥܳܟ ܐܰܖ̈ܥܳܬܳܐ ܕܰܒܥܶܠܕܒܳܒܰܘ̈ܗܝ.
18 ܘܢܶܬܒܰܪܟܽܘܢ ܒܙܰܪܥܳܟ ܟܽܠܗܽܘܢ ܥܰܡ̈ܡܶܐ ܕܰܐܪܥܳܐ: ܚܠܳܦ ܕܰܫܡܰܥܬ ܒܩܳܠܝ.
19 ܘܰܗܦܰܟ ܐܰܒܪܳܗܳܡ ܠܘܳܬ ܥܠܰܝܡܰܘ̈ܗܝ: ܘܩܳܡܘ ܘܶܐܙܰܠܘ ܐܰܟܚܕܳܐ ܠܒܺܪ ܫܒܰܥ. ܘܺܝܬܶܒ ܐܰܒܪܳܗܳܡ ܒܒܺܪ ܫܒܰܥ.
20 ܘܰܗܘܳܐ ܡܶܢ ܒܳܬܰܪ ܦܶܬܓܳܡ̈ܶܐ ܗܳܠܶܝܢ: ܘܶܐܬܚܰܘܺܝ ܠܰܐܒܪܳܗܳܡ ܘܶܐܡܰܪ ܠܶܗ: ܗܳܐ ܝܶܠܕܰܬ ܡܶܠܟܳܐ ܐܳܦ ܗܺܝ ܒܢܰܝ̈ܳܐ ܠܢܳܚܽܘܪ ܐܰܚܽܘܟ.
21 ܠܥܽܘܨ ܒܽܘܟܪܶܗ ܘܰܠܒܽܘܙ ܐܰܚܽܘܗܝ: ܘܠܰܩܡܽܘܐܶܝܠ ܐܰܒܽܘܗܝ ܕܳܐܪܳܡ.
22 ܘܰܠܟܳܣܳܪ: ܘܰܠܚܰܙܽܘ. ܘܰܠܦܰܠܪܰܫ: ܘܰܠܝܰܪܠܰܦ: ܘܠܰܒܬܽܘܐܶܝܠ.
23 ܘܰܒܬܽܘܐܶܝܠ ܐܰܘܠܶܕ ܠܪܰܦܩܰܐ: ܬܡܳܢܝܳܐ ܗܳܠܶܝܢ ܝܶܠܕܰܬ ܡܶܠܟܳܐ ܠܢܳܚܽܘܪ ܐܰܚܽܘܗܝ ܕܰܐܒܪܳܗܳܡ.
24 ܘܰܕܪܽܘܟܬܶܗ ܫܡܳܗ̇ ܪܽܘܡܳܐ: ܘܝܶܠܕܰܬ ܐܳܦ ܗܺܝ ܠܛܳܒܳܚ: ܘܰܠܓܳܚܳܡ: ܘܰܠܬܰܚܳܫ: ܘܰܠܡܰܥܟܳܐ.