Genesis 14
The Book of Genesis
܀ ܒܪܝܬܐ ܝܕ ܀
1 ܘܰܗܘܳܐ ܒܝܰܘܡܰܘ̈ܗܝ ܕܳܐܡܰܪܦܶܝܠ ܡܰܠܟܳܐ ܕܣܶܢܥܳܪ: ܘܰܐܪܺܝܟ ܡܰܠܟܳܐ ܕܕܳܠܰܣܳܪ: ܘܟܰܪܕܠܰܥܡܰܪ ܡܰܠܟܳܐ ܕܥܺܝܠܰܡ : ܘܬܰܪܥܺܝܠ ܡܰܠܟܳܐ ܕܓܶܠܳܝ̈ܶܐ.
2 ܥܒܰܕܘ ܩܪܳܒܳܐ ܥܰܡ ܒܳܪܳܥ ܡܰܠܟܳܐ ܕܰܣܕܽܘܡ: ܘܥܰܡ ܒܰܪܫܳܥ ܡܰܠܟܳܐ ܕܥܳܡܽܘܪܳܐ: ܘܫܶܢܐܳܒ ܡܰܠܟܳܐ ܕܳܐܕܳܡܳܐ: ܘܰܫܡܳܐܺܝܪ ܡܰܠܟܳܐ ܕܰܨܒܽܘܐܶܝܡ: ܘܡܰܠܟܳܐ ܕܒܳܠܳܥ. ܗܺܝ ܗܺܝ ܨܳܥܳܪ.
3 ܟܽܠܗܽܘܢ ܗܳܠܶܝܢ ܐܶܬܟܰܢܰܫܘ ܠܥܽܘܡܩܳܐ ܕܰܣܕܽܘܡܳܝ̈ܶܐ: ܗܽܘ ܝܰܡܳܐ ܕܡܶܠܚܳܐ.
4 ܬܰܪܬܰܥܶܣܖ̈ܶܐ ܫܢܺܝ̈ܢ ܦܠܰܚܘ ܠܟܰܪܕܠܰܥܡܰܪ: ܘܰܒܕܰܬܠܳܬ ܥܶܣܖ̈ܶܐ ܫܢܺܝ̈ܢ ܡܪܰܕܘ.
5 ܘܒܰܫܢܰܬ ܐܰܪܒܰܥܶܣܖ̈ܶܐ ܫܢܺܝ̈ܢ: ܐܶܬܳܐ ܟܰܪܕܠܰܥܡܰܪ ܘܡܰܠܟ̈ܶܐ ܕܥܰܡܶܗ: ܘܰܡܚܰܘ ܠܓܰܢ̱ܒܳܖ̈ܶܐ ܕܰܒܥܶܣܬܪܽܘܬ ܩܽܘܪܢܺܝܡ ܘܰܠܥܰܫܺܝܢ̈ܶܐ ܕܰܒܗܶܝܢ: ܘܠܰܐܡܢ̈ܶܐ ܕܒܰܫܘܳܐ ܩܽܘܪܝܰܬܺܝܡ.
6 ܘܰܠܚܽܘܖ̈ܳܝܶܐ ܕܰܒܛܽܘܖ̈ܰܝ ܣܳܥܺܝܪ: ܥܕܰܡܳܐ ܠܒܶܛܡܬܳܐ ܕܦܳܪܳܢ ܕܰܒܡܰܕܒܪܳܐ.
7 ܘܰܗܦܰܟܘ ܘܶܐܬܰܘ ܠܥܺܝܢ ܕܺܝܢܳܐ: ܗܺܝ ܗܺܝ ܪܩܶܡ: ܘܰܚܪܰܒܘ ܟܽܠ ܖ̈ܺܝܫܳܢܶܐ ܕܥܰܡܠܩܳܝ̈ܶܐ: ܘܳܐܦ ܠܳܐܡܽܘܖ̈ܳܝܶܐ ܕܝܳܬܒܺܝܢ ܒܥܺܝܢ ܓܳܕ.
8 ܘܰܢܦܰܩ ܡܰܠܟܳܐ ܕܰܣܕܽܘܡ ܘܡܰܠܟ̈ܶܐ ܕܥܳܡܽܘܪܳܐ: ܘܡܰܠܟܳܐ ܕܳܐܕܳܡܳܐ ܘܡܰܠܟܳܐ ܕܰܨܒܽܘܐܶܝܡ: ܘܡܰܠܟܳܐ ܕܒܳܠܳܥ ܗܺܝ ܗܺܝ ܨܳܥܳܪ: ܟܽܠܗܽܘܢ ܗܳܠܶܝܢ ܥܒܰܕܘ ܩܪܳܒܳܐ ܒܥܽܘܡܩܳܐ ܕܰܣܕܽܘܡܳܝ̈ܶܐ.
9 ܥܰܡ ܟܰܪܕܠܰܥܡܰܪ ܡܰܠܟܳܐ ܕܥܺܝܠܰܡ: ܘܬܰܪܥܺܝܠ ܡܰܠܟܳܐ ܕܓܶܠܳܝ̈ܶܐ: ܘܳܐܡܰܪܦܺܝܠ ܡܰܠܟܳܐ ܕܣܶܢܥܳܪ: ܘܰܐܪܺܝܟ ܡܰܠܟܳܐ ܕܕܳܠܳܣܳܪ: ܐܰܪܒܥܳܐ ܡܰܠܟܺܝ̈ܢ ܥܰܡ ܚܰܡܫܳܐ.
10 ܘܥܽܘܡܩܳܐ ܕܰܣܕܽܘܡܳܝ̈ܶܐ ܒܺܐܖ̈ܶܐ ܒܺܐܖ̈ܶܐ ܕܩܺܝܪܳܐ: ܘܰܥܪܰܩܘ ܡܰܠܟܳܐ ܕܰܣܕܽܘܡ ܘܡܰܠܟܳܐ ܕܥܳܡܽܘܪܳܐ: ܘܰܢܦܰܠܘ ܬܰܡܳܢ ܘܕܶܐܫܬܚܰܪܘ ܠܛܽܘܪܳܐ ܥܪܰܩܘ.
11 ܘܰܢܣܰܒܘ ܟܽܠܶܗ ܩܶܢܝܳܢܳܐ ܕܰܣܕܽܘܡ ܘܰܕܥܳܡܽܘܪܳܐ ܘܟܽܠܳܗ̇ ܡܶܐܟܽܘܠܬܗܽܘܢ ܘܶܐܙܰܠܘ.
12 ܘܰܕܒܰܪܘ ܠܠܽܘܛ ܒܰܪ ܐܰܚܽܘܗܝ ܕܰܐܒܪܰܡ ܘܰܠܩܶܢܝܳܢܶܗ ܘܶܐܙܰܠܘ ܘܗܽܘ ܝܺܬܶܒ ܒܰܣܕܽܘܡ.
13 ܘܶܐܬܳܐ ܡܰܢ ܕܶܐܬܦܰܠܰܛ: ܘܚܰܘܺܝ ܠܰܐܒܪܰܡ ܥܶܒܪܳܝܳܐ. ܘܗܽܘ ܫܪܶܐ ܗܘܳܐ ܒܶܝܬ ܒܰܠܽܘܛܳܐ ܕܡܰܡܪܶܐ ܐܳܡܽܘܪܳܝܳܐ: ܐܰܚܽܘܗܝ ܕܥܳܢܺܝܪ ܘܰܐܚܽܘܗܝ ܕܰܐܫܟܽܘܠ: ܘܗܶܢܽܘܢ ܒܰܥ̈ܠܰܝ ܩܝܳܡܶܗ ܕܰܐܒܪܰܡ.
14 ܘܰܫܡܰܥ ܐܰܒܪܰܡ ܕܶܐܫܬܒܺܝ ܒܰܪ ܐܰܚܽܘܗܝ: ܘܙܰܝܶܢ ܥܠܰܝܡܰܘ̈ܗܝ ܝܺܠܺܝܕܰܝ̈ ܒܰܝܬܶܗ ܬܠܳܬܡܳܐܐ ܘܰܬܡܳܢܬܰܥܣܰܪ: ܘܰܪܕܰܦ ܒܳܬܪܗܽܘܢ ܥܕܰܡܳܐ ܠܕܳܢ.
15 ܘܶܐܬܦܰܠܰܓ ܥܠܰܝܗܽܘܢ ܒܠܺܠܝܳܐ ܗܽܘ ܘܥܰܒܕܰܘ̈ܗܝ: ܘܰܡܚܰܘ ܐܶܢܽܘܢ: ܘܰܪܕܰܦܘ ܐܶܢܽܘܢ ܥܕܰܡܳܐ ܠܚܽܘܒܳܐ : ܕܡܶܢ ܣܶܡܳܠܳܗ̇ ܕܕܰܪܡܣܽܘܩ.
16 ܘܰܐܗܦܶܟ ܟܽܠܶܗ ܩܶܢܝܳܢܳܐ: ܘܳܐܦ ܠܠܽܘܛ ܒܰܪ ܐܰܚܽܘܗܝ ܘܰܠܩܶܢܝܳܢܶܗ ܐܰܗܦܶܟ: ܐܳܦ ܠܢܶܫ̈ܶܐ ܘܳܐܦ ܠܥܰܡܳܐ.
17 ܘܰܢܦܰܩ ܡܰܠܟܳܐ ܕܰܣܕܽܘܡ ܠܽܐܘܪܥܶܗ ܡܶܢ ܒܳܬܰܪ ܕܰܗܦܰܟ: ܟܰܕ ܚܪܰܒ ܠܟܰܪܕܠܰܥܡܳܪ ܘܰܠܡܰܠܟ̈ܶܐ ܕܥܰܡܶܗ ܒܥܽܘܡܩܳܐ ܕܰܫܘܶܐ: ܗܽܘ ܥܽܘܡܩܳܐ ܕܡܰܠܟ̈ܶܐ.
18 ܘܡܰܠܟܺܝܙܕܶܩ ܡܠܶܟ ܫܳܠܺܝܡ ܐܰܦܶܩ ܠܰܚܡܳܐ ܘܚܰܡܪܳܐ: ܘܗܽܘ ܟܽܘܡܪܳܐ ܗܘܳܐ ܕܰܐܠܳܗܳܐ ܡܪܰܝܡܳܐ.
19 ܘܒܰܪܟܶܗ ܘܶܐܡܰܪ: ܒܪܺܝܟ ܐܰܒܪܰܡ ܠܰܐܠܳܗܳܐ ܡܪܰܝܡܳܐ: ܩܢܶܐ ܫܡܰܝܳܐ ܘܰܐܪܥܳܐ.
20 ܘܰܒܪܺܝܟ ܗ̱ܘ ܐܰܠܳܗܳܐ ܡܪܰܝܡܳܐ: ܕܰܐܫܠܶܡ ܒܥܶܠܕܒܳܒܰܝ̈ܟ ܒܺܐܝܕܰܝ̈ܟ: ܘܝܰܗܒ ܠܶܗ ܡܰܥܣܳܖ̈ܶܐ ܡܶܢ ܟܽܠ.
21 ܘܶܐܡܰܪ ܡܰܠܟܳܐ ܕܰܣܕܽܘܡ ܠܰܐܒܪܰܡ: ܗܰܒܠܺܝ ܢܰܦ̈ܫܳܬܳܐ ܘܩܶܢܝܳܢܳܐ ܣܰܒ ܠܳܟ.
22 ܘܶܐܡܰܪ ܐܰܒܪܰܡ ܠܡܰܠܟܳܐ ܕܰܣܕܽܘܡ: ܐܰܪܺܝܡܶܬ ܐܺܝܕܰܝ̈ ܠܘܳܬ ܐܰܠܳܗܳܐ ܡܪܰܝܡܳܐ: ܕܩܶܢܝܳܢܶܗ ܫܡܰܝܳܐ ܘܰܐܪܥܳܐ.
23 ܐܶܢ ܡܶܢ ܚܽܘܛܳܐ ܘܰܥܕܰܡܳܐ ܠܥܶܪܰܩܬܳܐ ܕܰܡܣܳܐܢܳܐ: ܐܶܢ ܐܶܣܰܒ ܡܶܢ ܟܽܠܡܶܕܶܡ ܕܺܐܝܬ ܠܳܟ: ܕܠܳܐ ܬܺܐܡܰܪ ܕܶܐܢܳܐ ܐܰܥܬܪܶܬ ܠܰܐܒܪܰܡ. 24 ܣܛܰܪ ܡܶܢ ܡܶܕܶܡ ܕܶܐܟܰܠܘ ܥܠܰܝ̈ܡܶܐ: ܘܰܡ̈ܢܰܘܳܬܳܐ ܕܓܰܒܖ̈ܶܐ ܕܶܐܙܰܠܘ ܥܰܡܝ: ܥܳܢܺܝܪ ܘܰܐܫܟܽܘܠ ܘܡܰܡܪܶܐ: ܗܳܢܽܘܢ ܢܶܣܒܽܘܢ ܡܢܰܘ̈ܳܬܗܽܘܢ.