Numbers 10
The Book of Numbers
܀ ܡܢܝܢܐ ܝ ܀
1 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
2 ܥܒܶܕ ܠܳܟ ܬܰܪܬܶܝܢ ܩܰܖ̈ܢܳܬܳܐ ܕܣܺܐܡܳܐ. ܕܢܶܣܟܬܳܐ ܥܒܶܕ ܐܶܢܶܝܢ. ܘܢܶܗܘ̈ܝܳܢ ܠܳܟ ܠܡܶܩܪܳܐ ܟܢܽܘܫܬܳܐ. ܘܰܠܡܰܫܩܳܠܽܘ ܡܰܫܪܺܝܬܳܐ.
3 ܘܢܶܩܪܽܘܢ ܒܗܶܝܢ. ܘܢܶܬܘܰܥܕܽܘܢ ܠܘܳܬܳܟ ܟܽܠܳܗ̇ ܟܢܽܘܫܬܳܐ ܠܬܰܪܥܳܐ ܕܡܰܫܟܰܢܙܰܒܢܳܐ.
4 ܘܶܐܢ ܒܰܚܕܳܐ ܢܶܩܪܽܘܢ. ܢܶܬܘܰܥܕܽܘܢ ܠܘܳܬܳܟ ܪܰܘܖ̈ܒܳܢܶܐ ܘܖ̈ܺܝܫܰܝ ܐܰܠܦ̈ܶܐ ܕܺܝܣܪܳܐܶܝܠ.
5 ܘܰܢܝܰܒܒܽܘܢ ܒܩܰܪܢܳܐ. ܘܢܶܫܩ̈ܠܳܢ ܡܰܫܖ̈ܝܳܬܳܐ ܕܫܰܖ̈ܝܳܢ ܡܶܢ ܡܰܕܢܚܳܐ.
6 ܘܰܢܝܰܒܒܽܘܢ ܒܩܰܪܢܳܐ ܕܬܰܪܬܶܝܢ. ܘܢܶܫܩ̈ܠܳܢ ܡܰܫܖ̈ܝܳܬܳܐ ܕܫܰܖ̈ܝܳܢ ܡܶܢ ܬܰܝܡܢܳܐ. ܒܩܰܪܢܳܐ ܢܶܩܪܽܘܢ ܒܡܰܫܩ̈ܠܳܢܰܝܗܽܘܢ.
7 ܘܡܳܐ ܕܟܳܢܫܺܝܢ ܐܢ̱ܬܽܘܢ ܟܢܽܘܫܝܳܐ. ܗܘܰܝܬܽܘܢ ܩܳܪܶܝܢ ܘܠܳܐ ܡܝܰܒܒܺܝܢ.
8 ܘܰܒܢܰܝ̈ ܐܰܗܪܽܘܢ ܟܳܗܢܳܐ ܢܶܩܪܽܘܢ ܒܩܰܖ̈ܢܳܬܳܐ. ܘܢܶܗܘ̈ܝܳܢ ܠܟܽܘܢ ܢܳܡܽܘܣܳܐ ܠܥܳܠܰܡ ܠܕܳܖ̈ܰܝܟܽܘܢ.
9 ܘܶܐܢ ܢܺܐܬܶܐ ܩܪܳܒܳܐ ܠܰܐܪܥܟܽܘܢ. ܥܰܠ ܐܳܠܽܘܨ̈ܶܐ ܕܳܐܠܨܺܝܢ ܠܟܽܘܢ ܝܰܒܶܒܘ ܒܩܰܖ̈ܢܳܬܳܐ ܘܬܶܬܕܰܟܪܽܘܢ ܩܕܳܡ ܡܳܪܝܳܐ ܐܰܠܳܗܟܽܘܢ. ܘܬܶܬܦܰܨܽܘܢ ܡܶܢ ܒܥܶܠܕܒܳܒܰܝ̈ܟܽܘܢ.
10 ܘܰܒܝܰܘܡܳܐ ܕܚܰܕܘܰܬܟܽܘܢ ܘܰܕܪܺܝܫ ܝܰܖ̈ܚܰܝܟܽܘܢ ܘܰܕܥܺܐܕܰܝ̈ܟܽܘܢ. ܩܪܰܘ ܒܩܰܖ̈ܢܳܬܳܐ ܥܰܠ ܝܰܩܕܰܝ̈ܟܽܘܢ ܘܥܰܠ ܕܶܒܚܰܝ̈ܟܽܘܢ ܫܰܠ̈ܡܶܐ. ܘܢܶܗܘ̈ܝܳܢ ܠܟܽܘܢ ܠܕܽܘܟܪܳܢܳܐ ܩܕܳܡ ܐܰܠܳܗܟܽܘܢ. ܐܶܢܳܐ ܐ̱ܢܳܐ ܡܳܪܝܳܐ ܐܰܠܳܗܟܽܘܢ.
11 ܘܰܗܘܳܐ ܒܰܫܢܰܬ ܬܰܪܬܶܝܢ ܒܰܥܣܰܪܬܳܐ ܒܝܰܪܚܳܐ ܕܰܬܪܶܝܢ. ܣܶܠܩܰܬ ܥܢܳܢܳܐ ܡܶܢ ܡܰܫܟܢܳܐ ܕܣܳܗܕܽܘܬܳܐ.
12 ܘܰܫܩܰܠܘ ܒܢܰܝ̈ ܝܺܣܪܳܐܶܝܠ ܒܡܰܫܩܠܳܢܰܝ̈ܗܽܘܢ ܡܶܢ ܡܰܕܒܪܳܐ ܕܣܺܝܢܰܝ. ܘܰܫܪܳܬ ܥܢܳܢܳܐ ܒܡܰܕܒܪܳܐ ܕܦܳܪܳܢ.
13 ܘܰܫܩܰܠܘ ܒܩܰܕܡܳܝܬܳܐ ܒܡܶܠܰܬ ܦܽܘܡܶܗ ܕܡܳܪܝܳܐ ܒܺܐܝܕܳܐ ܕܡܽܘܫܶܐ.
14 ܘܰܫܩܰܠ ܠܽܘܩܕܳܡ ܛܽܘܠܩܳܐ ܕܡܰܫܪܺܝܬܳܐ ܕܰܒܢܰܝ̈ ܝܺܗܽܘܕܳܐ. ܘܚܰܝܠܗܽܘܢ. ܘܪܰܒ ܚܰܝܠܳܐ ܢܶܚܫܽܘܢ ܒܰܪ ܥܰܡܺܝܢܳܕܳܒ.
15 ܘܪܰܒ ܚܰܝܠܳܐ ܕܫܰܒܛܳܐ ܕܰܒܢܰܝ̈ ܐܺܝܣܳܟܳܪ. ܢܰܬܢܺܝܐܶܝܠ ܒܰܪ ܨܽܘܥܳܪ.
16 ܘܪܰܒ ܚܰܝܠܳܐ ܕܫܰܒܛܳܐ ܕܰܒܢܰܝ̈ ܙܒܳܘܠܽܘܢ. ܐܶܠܝܰܒ ܒܰܪ ܚܰܠܽܘܢ.
17 ܘܰܐܚܬܽܘܗܝ ܠܡܰܫܟܢܳܐ. ܘܰܫܩܰܠܘ ܒܢܰܝ̈ ܓܶܪܫܽܘܢ. ܘܰܒܢܰܝ̈ ܡܪܳܪܺܝ ܫܳܩ̈ܠܰܝ ܡܰܫܟܢܳܐ.
18 ܘܰܫܩܰܠܘ ܛܽܘܠܩܳܐ ܕܡܰܫܪܺܝܬܳܐ ܕܪܽܘܒܺܝܠ. ܘܚܰܝܠܗܽܘܢ. ܘܪܰܒ ܚܰܝܠܳܐ ܐܶܠܺܝܨܽܘܪ ܒܰܪ ܫܰܕܐܽܘܪ.
19 ܘܪܰܒ ܚܰܝܠܳܐ ܕܫܰܒܛܳܐ ܕܰܒܢܰܝ̈ ܫܶܡܥܽܘܢ. ܫܰܠܡܽܘܐܶܝܠ ܒܰܪ ܨܽܘܪܺܝܫܰܕܰܝ.
20 ܘܪܰܒ ܚܰܝܠܳܐ ܕܫܰܒܛܳܐ ܕܰܒܢܰܝ̈ ܓܳܕ. ܐܶܠܝܳܐܣܳܦ ܒܰܪ ܪܥܽܘܐܶܝܠ.
21 ܘܫܳܩܠܺܝܢ ܒܢܰܝ̈ ܩܳܗܳܬ ܫܳܩ̈ܠܰܝ ܡܰܫܟܢܳܐ. ܘܰܡܩܺܝܡܺܝܢ ܠܶܗ ܠܡܰܫܟܢܳܐ ܥܰܕ ܐܳܬܶܝܢ.
22 ܘܰܫܩܰܠ ܛܽܘܠܩܳܐ ܕܡܰܫܪܺܝܬܳܐ ܕܰܐܦܪܶܝܡ ܠܚܰܝܠܗܽܘܢ. ܘܪܰܒ ܚܰܝܠܳܐ ܐܶܠܺܝܫܡܰܥ ܒܰܪ ܥܰܡܺܝܗܽܘܕ.
23 ܘܪܰܒ ܚܰܝܠܳܐ ܕܫܰܒܛܳܐ ܕܰܡܢܰܫܶܐ. ܓܰܡܰܠܺܝܐܶܝܠ ܒܰܪ ܦܰܪܨܽܘܪ.
24 ܘܪܰܒܚܰܝܠܳܐ ܕܫܰܒܛܳܐ ܕܒܶܢܝܳܡܶܝܢ. ܐܳܒܺܝܕܳܢ ܒܰܪ ܓܶܕܥܽܘܢܺܝ.
25 ܘܰܫܩܰܠ ܛܽܘܠܩܳܐ ܕܡܰܫܪܺܝܬܳܐ ܕܰܒܢܰܝ̈ ܕܳܢ. ܘܰܡܟܰܢܶܫ ܠܟܽܠܗܶܝܢ ܡܰܫܖ̈ܝܳܬܳܐ ܘܰܠܚܰܝܠܗܶܝܢ. ܘܪܰܒ ܚܰܝܠܳܐ ܕܫܰܒܛܳܐ ܕܰܒܢܰܝ̈ ܕܳܢ. ܐܰܚܺܝܥܳܙܳܪ ܒܰܪ ܥܰܡܺܝܫܰܕܰܝ.
26 ܘܪܰܒܚܰܝܠܳܐ ܕܫܰܒܛܳܐ ܕܳܐܫܺܝܪ. ܦܰܓܥܳܐܶܝܠ ܒܰܪ ܥܰܟܪܳܢ.
27 ܘܪܰܒܚܰܝܠܳܐ ܕܫܰܒܛܳܐ ܕܢܰܦܬܳܠܺܝ. ܐܰܚܺܝܕܰܥ ܒܰܪ ܥܰܝܢܳܢ.
28 ܗܳܠܶܝܢ ܡܰܫܩ̈ܠܳܢܶܐ ܕܰܒܢܰܝ̈ ܝܺܣܪܳܐܶܝܠ ܠܚܰܝ̈ܠܘܳܬܗܽܘܢ.
29 ܘܶܐܡܰܪ ܡܽܘܫܶܐ ܠܚܽܘܒܳܒ. ܒܰܪ ܪܥܽܘܐܶܝܠ ܡܶܕܝܰܢܳܝܳܐ ܚܡܽܘܗܝ ܕܡܽܘܫܶܐ. ܫܳܩܠܺܝܢܰܢ ܠܰܐܬܪܳܐ ܕܶܐܡܰܪ ܡܳܪܝܳܐ ܠܶܗ ܐܶܬܶܠ ܠܟܽܘܢ. ܬܳܐ ܥܰܡܰܢ ܘܢܶܛܐܰܒ ܠܳܟ. ܡܶܛܽܠ ܕܡܳܪܝܳܐ ܡܰܠܶܠ ܛܳܒܬܳܐ ܥܰܠ ܝܺܣܪܳܐܶܝܠ.
30 ܘܶܐܡܰܪ ܠܶܗ ܠܳܐ ܐܳܙܶܠ ܐ̱ܢܳܐ. ܐܶܠܳܐ ܠܰܐܪܥܝ ܐܳܙܶܠ ܐ̱ܢܳܐ. ܠܰܐܝܟܳܐ ܕܺܝܠܺܝܕ ܐ̱ܢܳܐ.
31 ܐܶܡܰܪ ܠܶܗ ܡܽܘܫܶܐ ܠܳܐ ܬܶܫܒܩܰܢ. ܡܶܛܽܠ ܕܰܐܢ̱ܬ ܝܳܕܰܥ ܐܰܢ̱ܬ ܒܶܝܬ ܡܰܫܪܝܰܢ ܕܰܒܡܰܕܒܪܳܐ. ܘܗܳܘܶܐ ܐܰܢ̱ܬ ܠܰܢ ܥܰܝ̈ܢܶܐ.
32 ܘܶܐܢ ܬܺܐܙܰܠ ܥܰܡܰܢ. ܡܶܢ ܗܳܝ ܛܳܒܬܳܐ ܕܡܰܛܐܶܒ ܠܰܢ ܡܳܪܝܳܐ. ܢܰܛܐܶܒ ܠܳܟ.
33 ܘܰܫܩܰܠܘ ܡܶܢ ܛܽܘܪܶܗ ܕܡܳܪܝܳܐ ܡܰܪܕܶܐ ܬܠܳܬܳܐ ܝܰܘܡܺܝ̈ܢ. ܘܩܺܐܒܽܘܬܳܐ ܕܰܩܝܳܡܶܗ ܕܡܳܪܝܳܐ ܫܶܩܠܰܬ ܡܶܢ ܩܕܳܡܝܗܽܘܢ ܡܰܪܕܶܐ ܝܰܘܡܳܐ ܚܰܕ. ܕܰܬܛܰܝܶܒ ܠܗܽܘܢ ܒܶܝܬ ܡܰܫܪܝܳܐ.
34 ܘܰܥܢܳܢܶܗ ܕܡܳܪܝܳܐ ܠܥܶܠ ܡܶܢܗܽܘܢ ܒܺܐܝܡܳܡܳܐ. ܡܳܐ ܕܫܳܩܠܺܝܢ ܡܶܢ ܡܰܫܪܺܝܬܳܐ.
35 ܘܰܗܘܳܐ ܕܟܰܕ ܫܶܩܠܰܬ ܩܺܐܒܽܘܬܳܐ ܐܶܡܰܪ ܡܽܘܫܶܐ. ܩܽܘܡ ܡܳܪܝܳܐ. ܘܢܶܬܬܰܒܪܽܘܢ ܣܳܢܰܐܝ̈ܟ. ܘܢܶܥܪܩܽܘܢ ܒܥܶܠܕܒܳܒܰܝ̈ܟ ܡܶܢ ܩܕܳܡܰܝܟ.
36 ܘܟܰܕ ܫܪܳܬ ܐܶܡܰܪ. ܐܶܬܦܰܢܝ ܡܳܪܝܳܐ ܥܰܠ ܖ̈ܶܒܘܳܬܳܐ. ܘܥܰܠ ܐܰܠܦ̈ܶܐ ܕܺܝܣܪܳܐܶܝܠ.