Numbers 22
The Book of Numbers
܀ ܡܢܝܢܐ ܟܒ ܀
1 ܘܰܫܩܰܠܘ ܒܢܰܝ̈ ܝܺܣܪܳܐܶܝܠ. ܘܰܫܪܰܘ ܒܥܰܪܒܽܘܬ ܡܽܘܐܳܒ ܕܥܰܠ ܝܽܘܪܕܢܳܢ ܕܺܐܝܪܺܝܚܽܘ.
2 ܢܒܺܝܽܘܬܶܗ ܕܒܶܠܥܰܡ. ܘܰܚܙܳܐ ܒܳܠܳܩ ܒܰܪ ܨܶܦܽܘܪ. ܟܽܠ ܕܰܥܒܰܕ ܝܺܣܪܳܐܶܝܠ ܠܳܐܡܽܘܖ̈ܳܝܶܐ.
3 ܘܰܕܚܶܠܘ ܡܽܘܐܳܒܳܝ̈ܶܐ ܡܶܢ ܩܕܳܡ ܥܰܡܳܐ ܛܳܒ. ܡܶܛܽܠ ܕܣܰܓܺܝ ܗܘܳܐ ܛܳܒ. ܘܥܳܩܰܬ ܠܗܽܘܢ ܠܡܽܘܐܳܒܳܝ̈ܶܐ ܡܶܢ ܩܕܳܡ ܒܢܰܝ̈ ܝܺܣܪܳܐܶܝܠ.
4 ܘܶܐܡܰܪ ܡܽܘܐܳܒ ܠܣܳܒ̈ܶܐ ܕܡܶܕܝܰܢ. ܡܶܟܺܝܠ ܪܳܥܶܝܢ ܟܶܢܫܳܐ ܗܳܢܳܐ ܠܟܽܠܗܽܘܢ ܕܰܚܕܳܪܰܝܢ ܐܰܝܟ ܕܪܳܥܶܐ ܬܰܘܪܳܐ ܠܝܽܘܪܳܩܳܐ ܕܚܰܩܠܳܐ. ܘܒܳܠܳܩ ܗܘܳܐ ܒܰܪ ܨܶܦܽܘܪ ܡܰܠܟܳܐ ܕܡܽܘܐܳܒܳܝ̈ܶܐ ܒܙܰܒܢܳܐ ܗܰܘ.
5 ܘܫܰܕܰܪ ܐܺܝܙܓܰܕ̈ܶܐ ܠܘܳܬ ܒܶܠܥܰܡ ܒܰܪ ܒܥܽܘܪ ܦܳܫܽܘܪܳܐ ܕܥܰܠ ܢܰܗܪܳܐ. ܠܰܐܪܥܳܐ ܕܰܒܢܰܝ̈ ܥܰܡܽܘܢ ܠܡܶܩܪܝܶܗ. ܘܰܠܡܺܐܡܰܪ ܠܶܗ. ܗܳܐ ܥܰܡܳܐ ܢܦܰܩ ܡܶܢ ܡܶܨܪܶܝܢ. ܘܟܰܣܺܝ ܐܰܦܶܝ̈ܗ̇ ܕܰܐܪܥܳܐ. ܘܗܳܐ ܫܪܶܝܢ ܠܽܘܩܒܰܠܝ.
6 ܡܶܟܺܝܠ ܬܳܐ ܠܽܘܛܳܝܗܝ ܠܺܝ ܠܥܰܡܳܐ ܗܳܢܳܐ. ܡܶܛܽܠ ܕܥܰܫܺܝܢ ܗܽܘ ܡܶܢܝ. ܟܒܰܪ ܢܶܫܟܰܚ ܢܶܚܪܽܘܒ ܡܶܢܶܗ. ܘܢܰܘܒܕܺܝܘܗܝ ܡܶܢ ܐܰܪܥܳܐ. ܡܶܛܽܠ ܕܝܳܕܰܥ ܐ̱ܢܳܐ ܕܰܠܡܰܢ ܕܰܡܒܰܪܶܟ ܐܰܢ̱ܬ ܒܪܺܝܟ ܗ̱ܘ. ܘܰܠܡܰܢ ܕܠܳܐܶܛ ܐܰܢ̱ܬ ܠܺܝܛ ܗܽܘ.
7 ܘܶܐܙܰܠܘ ܣܳܒ̈ܶܐ ܕܡܽܘܐܳܒ ܘܣܳܒ̈ܶܐ ܕܡܶܕܶܝܢ. ܘܩܶܨܡܰܝ̈ܗܽܘܢ ܒܺܐܝܕܰܝ̈ܗܽܘܢ. ܘܶܐܬܰܘ ܠܘܳܬ ܒܶܠܥܰܡ. ܘܶܐܡܰܪܘ ܠܶܗ ܡܶܠܰܘ̈ܗܝ ܕܒܳܠܳܩ.
8 ܘܶܐܡܰܪ ܠܗܽܘܢ. ܒܽܘܬܘ ܗܳܪܟܳܐ ܒܠܺܠܝܳܐ. ܘܶܐܬܶܠ ܠܟܽܘܢ ܦܶܬܓܳܡܳܐ ܐܰܝܟ ܕܳܐܡܰܪ ܠܺܝ ܡܳܪܝܳܐ. ܘܦܳܫܘ ܪܰܘܖ̈ܒܳܢܶܐ ܕܡܽܘܐܳܒ ܠܘܳܬ ܒܶܠܥܰܡ.
9 ܘܶܐܬܳܐ ܐܰܠܳܗܳܐ ܥܰܠ ܒܶܠܥܰܡ. ܘܶܐܡܰܪ ܠܶܗ. ܡܰܢ ܐܶܢܽܘܢ ܗܳܠܶܝܢ ܓܰܒܖ̈ܶܐ ܕܥܰܡܳܟ.
10 ܘܶܐܡܰܪ ܒܶܠܥܰܡ ܠܰܐܠܳܗܳܐ. ܒܳܠܳܩ ܒܰܪ ܨܶܦܽܘܪ ܡܰܠܟܳܐ ܕܡܽܘܐܳܒ ܫܰܕܰܪ ܥܠܰܝ. ܘܶܐܡܰܪ ܠܺܝ.
11 ܗܳܐ ܥܰܡܳܐ ܢܦܰܩ ܡܶܢ ܡܶܨܪܶܝܢ. ܘܟܰܣܺܝ ܐܰܦܶܝ̈ܗ̇ ܕܰܐܪܥܳܐ. ܗܳܫܳܐ ܬܳܐ ܠܽܘܛܳܝܗܝ ܠܺܝ. ܟܒܰܪ ܐܶܫܟܰܚ ܠܡܶܬܟܰܬܳܫܽܘ ܥܰܡܶܗ ܘܰܐܘܒܕܺܝܘܗܝ.
12 ܘܶܐܡܰܪ ܐܰܠܳܗܳܐ ܠܒܶܠܥܰܡ ܠܳܐ ܬܺܐܙܰܠ ܥܰܡܗܽܘܢ. ܘܠܳܐ ܬܠܽܘܛܺܝܘܗܝ ܠܥܰܡܳܐ ܡܶܛܽܠ ܕܰܒܪܺܝܟ ܗ̱ܘ.
13 ܘܩܳܡ ܒܶܠܥܰܡ ܒܨܰܦܪܳܐ. ܘܶܐܡܰܪ ܠܪܰܘܖ̈ܒܳܢܶܐ ܕܒܳܠܳܩ. ܙܶܠܘ ܠܰܐܪܥܟܽܘܢ. ܡܶܛܽܠ ܕܠܳܐ ܨܒܳܐ ܡܳܪܝܳܐ ܠܡܶܫܒܩܰܢܝ ܕܺܐܙܰܠ ܥܰܡܟܽܘܢ.
14 ܘܩ̣ܳܡܘ ܪܰܘܖ̈ܒܳܢܶܐ ܕܡܽܘܐܳܒ ܘܶܐܬܰܘ ܠܘܳܬ ܒܳܠܳܩ. ܘܳܐܡܪܺܝܢ ܠܶܗ. ܠܳܐ ܨܒܳܐ ܒܶܠܥܰܡ ܠܡܶܐܬܳܐ ܥܰܡܰܢ.
15 ܘܰܗܦܰܟ ܬܽܘܒ ܒܳܠܳܩ. ܘܫܰܕܰܪ ܐܺܝܙܓܰܕ̈ܶܐ ܕܪܰܘܪܒܺܝܢ ܘܝܰܩܺܝܪܺܝܢ ܡܶܢ ܗܳܠܶܝܢ.
16 ܘܶܐܬܰܘ ܠܘܳܬ ܒܶܠܥܰܡ. ܘܶܐܡܰܪܘ ܠܶܗ. ܗܳܟܰܢܳܐ ܐܳܡܰܪ ܒܳܠܳܩ ܒܰܪ ܨܶܦܽܘܪ. ܠܳܐ ܬܶܬܟܠܶܐ ܠܡܶܐܬܳܐ ܠܘܳܬܝ.
17 ܡܶܛܽܠ ܕܰܡܝܰܩܪܽܘ ܐܶܝܰܩܪܳܟ ܛܳܒ. ܘܟܽܠ ܕܬܺܐܡܰܪ ܠܺܝ ܐܶܥܒܶܕ. ܘܬܰܐ ܠܽܘܛ ܠܺܝ ܠܥܰܡܳܐ ܗܳܢܳܐ.
18 ܘܰܥܢܳܐ ܒܶܠܥܰܡ ܘܶܐܡܰܪ ܠܺܐܝܙܓܰܕܰܘ̈ܗܝ ܕܒܳܠܳܩ. ܐܶܢ ܢܶܬܶܠ ܠܺܝ ܒܳܠܳܩ ܡ̇ܠܶܐ̣ ܒܰܝܬܶܗ ܣܺܐܡܳܐ ܐܰܘ ܕܰܗܒܳܐ. ܠܳܐ ܡܶܫܟܰܚ ܐ̱ܢܳܐ ܕܶܐܥܒܰܪ ܥܰܠ ܡܶܠܰܬ ܦܽܘܡܶܗ ܕܡܳܪܝܳܐ ܐܰܠܳܗܝ. ܠܳܐ ܥܰܠ ܕܰܙܥܽܘܪܝܳܐ ܘܠܳܐ ܥܰܠ ܕܪܰܒܳܐ.
19 ܡܶܟܺܝܠ ܦܽܘܫܘ ܐܳܦ ܐܰܢ̱ܬܽܘܢ ܗܳܪܟܳܐ ܒܠܺܠܝܳܐ. ܘܶܐܕܰܥ ܡܳܢܳܐ ܡܰܘܣܶܦ ܠܰܡܡܰܠܳܠܽܘ ܥܰܡܝ.
20 ܘܶܐܬܳܐ ܐܰܠܳܗܳܐ ܥܰܠ ܒܶܠܥܰܡ ܒܠܺܠܝܳܐ. ܘܶܐܡܰܪ ܠܶܗ. ܐܶܢ ܠܡܶܩܪܝܳܟ ܐܶܬܰܘ ܓܰܒܖ̈ܶܐ ܗܳܠܶܝܢ. ܩܽܘܡ ܙܶܠ ܥܰܡܗܽܘܢ. ܒܰܠܚܽܘܕ ܦܶܬܓܳܡܳܐ ܕܳܐܡܰܪ ܐ̱ܢܳܐ ܠܳܟ. ܗܰܘ ܥܒܶܕ.
21 ܘܩ̣ܳܡ ܒܶܠܥܰܡ ܒܨܰܦܪܳܐ. ܘܰܐܪܡܺܝ ܥܰܠ ܐܰܬܳܢܶܗ. ܘܶܐܙܰܠ ܥܰܡ ܪܰܘܖ̈ܒܳܢܶܐ ܕܡܽܘܐܳܒ.
22 ܘܶܐܬܚܰܡܰܬ ܪܽܘܓܙܶܗ ܕܰܐܠܳܗܳܐ ܥܠܰܘܗܝ ܥܰܠ ܕܶܐܙܰܠ. ܘܩܳܡ ܡܰܠܰܐܟܶܗ ܕܡܳܪܝܳܐ ܒܽܐܘܪܚܳܐ ܕܢܶܗܘܶܐ ܠܶܗ ܣܳܛܳܢܳܐ. ܘܗܽܘ ܪܟܺܝܒ ܥܰܠ ܚܡܳܪܶܗ. ܘܬܪܶܝܢ ܥܠܰܝ̈ܡܰܘܗܝ ܥܰܡܶܗ.
23 ܘܰܚܙܳܬ ܐܰܬܳܢܳܐ ܠܡܰܠܰܐܟܶܗ ܕܡܳܪܝܳܐ ܕܩܳܐܶܡ ܒܽܐܘܪܚܳܐ. ܘܣܰܝܦܶܗ ܫܡܺܝܛ ܘܰܐܚܺܝܕ ܒܺܐܝܕܶܗ. ܘܰܣܛܬ ܐܰܬܳܢܳܐ ܡܶܢ ܐܽܘܪܚܳܐ ܘܶܐܙܰܠܬ ܒܚܰܩܠܳܐ. ܘܰܡܚܳܐ ܒܶܠܥܰܡ ܠܰܐܬܳܢܳܐ ܠܡܰܣܛܳܝܽܘܬܳܗ̇ ܠܽܐܘܪܚܳܐ.
24 ܘܩ̣ܳܡ ܡܰܠܰܐܟܶܗ ܕܡܳܪܝܳܐ ܒܰܫܒܺܝܠܳܐ ܕܟܰܪܡܳܐ. ܕܰܣܝܳܓܳܐ ܡܶܟܳܐ. ܘܰܣܝܳܓܳܐ ܡܶܟܳܐ.
25 ܘܰܚܙܳܬ ܐܰܬܳܢܳܐ ܠܡܰܠܰܐܟܶܗ ܕܡܳܪܝܳܐ. ܘܶܐܬܚܰܒܨܰܬ ܒܶܐܣܬܳܐ. ܘܰܚܒܰܨܬܳܗ̇ ܪܶܓܠܶܗ ܕܒܶܠܥܰܡ ܒܶܐܣܬܳܐ. ܘܰܐܘܣܶܦ ܬܽܘܒ ܠܡܶܡܚܝܳܗ̇.
26 ܘܰܐܘܣܶܦ ܡܰܠܰܐܟܶܗ ܕܡܳܪܝܳܐ. ܘܰܥܒܰܪ ܘܩ̣ܳܡ ܒܰܐܬܪܳܐ ܐܰܠܺܝܨܳܐ. ܐܰܬܰܪ ܕܠܰܝܬ ܐܽܘܪܚܳܐ ܠܡܶܣܛܳܐ. ܠܳܐ ܠܝܰܡܺܝܢܳܐ ܘܠܳܐ ܠܣܶܡܳܠܳܐ.
27 ܘܰܚܙܳܬ ܐܰܬܳܢܳܐ ܠܡܰܠܰܐܟܶܗ ܕܡܳܪܝܳܐ. ܘܪܶܒܥܰܬ ܬܚܶܝܬ ܒܶܠܥܰܡ. ܘܶܐܬܚܰܡܰܬ ܪܽܘܓܙܶܗ ܕܒܶܠܥܰܡ. ܘܰܡ̣ܚܳܗ̇ ܠܰܐܬܳܢܳܐ ܒܚܽܘܛܪܳܐ.
28 ܘܰܦܬܰܚ ܡܳܪܝܳܐ ܦܽܘܡܳܗ̇ ܕܰܐܬܳܢܳܐ. ܘܶܐܡܪܰܬ ܠܒܶܠܥܰܡ. ܡܳܢܳܐ ܥܶܒ̣ܕܶܬ ܠܳܟ ܕܰܡܚܰܝܬܳܢܝ ܗܳܐ ܬܠܳܬ ܙܰܒܢܺܝ̈ܢ.
29 ܘܶܐܡܰܪ ܒܶܠܥܰܡ ܠܰܐܬܳܢܳܐ. ܥܰܠ ܕܒܰܙܰܚܬܝ ܒܺܝ. ܘܶܐܠܽܘ ܐܺܝܬ ܗܘܳܐ ܣܰܝܦܳܐ ܒܺܐܝܕܰܝ̈ ܗܳܫܳܐ ܩܳܛܶܠ ܗܘܺܝܬ ܠܶܟܝ.
30 ܘܶܐܡܪܰܬ ܐܰܬܳܢܳܐ ܠܒܶܠܥܰܡ. ܠܳܐ ܗܘܺܝܬ ܐܶܢܳܐ ܐܰܬܳܢܳܟ. ܕܰܪܟܺܝܒ ܐܰܢ̱ܬ ܥܠܰܝ ܡܶܢ ܛܰܠܝܽܘܬܳܟ ܘܰܥܕܰܡܳܐ ܠܝܰܘܡܳܢܳܐ. ܕܰܠܡܳܐ ܡܶܢ ܡܬܽܘܡ ܥ̣ܶܒܕܶܬ ܠܳܟ ܗܳܟܰܢܳܐ. ܐܳܡܰܪ ܠܳܗ̇. ܠܳܐ.
31 ܘܰܓܠܳܐ ܡܳܪܝܳܐ ܥܰܝܢܰܘ̈ܗܝ ܕܒܶܠܥܰܡ. ܘܰܚܙܳܐ ܠܡܰܠܰܐܟܶܗ ܕܡܳܪܝܳܐ ܩܳܐܶܡ ܒܽܐܘܪܚܳܐ. ܘܣܰܝܦܶܗ ܫܡܺܝܛ ܘܰܐܚܺܝܕ ܒܺܐܝܕܶܗ. ܘܰܩܥܶܕ ܘܰܣܓܶܕ ܥܰܠ ܐܰܦܰܘ̈ܗܝ.
32 ܘܶܐܡܰܪ ܠܶܗ ܡܰܠܰܐܟܶܗ ܕܡܳܪܝܳܐ. ܠܡܳܢܳܐ ܡܚܰܝܬ ܐܰܬܳܢܳܟ ܗܳܐ ܬܠܳܬ ܙܰܒܢܺܝ̈ܢ. ܗܳܐ ܐܶܢܳܐ ܢܶܦܩܶ݀ܬ ܕܶܐܗܘܶܐ ܠܳܟ ܣܳܛܳܢܳܐ. ܥܰܠ ܕܰܬܪܰܨܬ ܐܽܘܪܚܳܐ ܠܽܘܩܒܰܠܝ.
33 ܘܰܚܙܳܬܰܢܝ ܐܰܬܳܢܳܐ ܘܰܣܛܳܬ ܡܶܢ ܩܕܳܡܰܝ ܗܳܐ ܬܠܳܬ ܙܰܒܢܺܝ̈ܢ. ܐܶܠܽܘܠܳܐ ܣܛܳܬ ܡܶܢ ܩܕܳܡܰܝ. ܗܳܫܳܐ ܠܳܟ ܩܳܛܶܠ ܗܘܺܝ݀ܬ. ܘܠܳܗ̇ ܡܰܚܶܐ ܗܘܺܝ݀ܬ.
34 ܘܶܐܡܰܪ ܒܶܠܥܰܡ ܠܡܰܠܰܐܟܶܗ ܕܡܳܪܝܳܐ. ܚܛܺܝܬ. ܠܳܐ ܝܳܕܰܥ ܗܘܺܝ݀ܬ ܕܰܐܢ̱ܬ ܩܳܐܶܡ ܠܽܘܩܒܰܠܝ ܒܽܐܘܪܚܳܐ. ܗܳܫܳܐ ܐܶܢ ܒܺܝܫ ܒܥܰܝܢܰܝ̈ܟ ܐܶܗܦܽܘܟ ܠܺܝ.
35 ܘܶܐܡܰܪ ܡܰܠܰܐܟܶܗ ܕܡܳܪܝܳܐ ܠܒܶܠܥܰܡ. ܙܶܠ ܥܰܡ ܓܰܒܖ̈ܶܐ ܒܰܠܚܽܘܕ ܦܶܬܓܳܡܳܐ ܕܳܐܡܰܪ ܐ̱ܢܳܐ ܠܳܟ ܗܰܘ ܥܒܶܕ. ܘܶܐܙܰܠ ܒܶܠܥܰܡ ܥܰܡ ܪܰܘܖ̈ܒܳܢܶܐ ܕܒܳܠܳܩ.
36 ܘܰܫ̣ܡܰܥ ܒܳܠܳܩ ܕܶܐܬܳܐ ܒܶܠܥܰܡ. ܘܰܢܦܰܩ ܠܽܐܘܪܥܶܗ ܠܰܩܪܺܝܬܳܐ ܕܡܽܘܐܳܒ. ܕܒܰܬܚܽܘܡܳܐ ܕܰܐܪܢܽܘܢ ܕܒܰܣܦܳܖ̈ܰܝ ܬܚܽܘܡܳܐ.
37 ܘܶܐܡܰܪ ܒܳܠܳܩ ܠܒܶܠܥܰܡ. ܗܳܐ ܫܰܕܪܶܬ ܥܠܰܝܟ ܠܡܶܩܪܝܳܟ. ܐܰܝܟܰܘ ܠܳܐ ܐܶܬܰܝܬ ܠܘܳܬܝ. ܟܒܰܪ ܐܳܡܰܪ ܗܘܰܝܬ ܕܠܳܐ ܡܨܶܐ ܐ̱ܢܳܐ ܒܚܰܝܠܳܐ ܠܰܡܝܰܩܳܪܽܘܬܳܟ.
38 ܘܶܐܡܰܪ ܒܶܠܥܰܡ ܠܒܳܠܳܩ. ܗܳܐ ܐܶܬܺܝܬ ܠܘܳܬܳܟ. ܗܳܫܳܐ ܕܰܠܡܳܐ ܡܶܫܟܳܚܽܘ ܡܶܫܟܰܚ ܐ̱ܢܳܐ ܕܺܐܡܰܪ ܡܶܕܶܡ. ܐܶܠܳܐ ܗܰܘ ܦܶܬܓܳܡܳܐ ܕܣܳܐܶܡ ܐܰܠܳܗܳܐ ܒܦܽܘܡܝ. ܗܰܘ ܗܽܘ ܐܳܡܰܪ ܐ̱ܢܳܐ.
39 ܘܶܐܙܰܠ ܒܶܠܥܰܡ ܥܰܡ ܒܳܠܳܩ. ܘܰܐܥܠܶܗ ܠܩܽܘܪܝܰܬ ܚܶܨܪܽܘܬ.
40 ܘܰܢܟܰܣ ܒܳܠܳܩ ܬܰܘܖ̈ܶܐ ܘܥܳܢ̈ܳܐ. ܘܫܰܕܰܪ ܠܒܶܠܥܰܡ ܘܰܠܪܰܘܖ̈ܒܳܢܶܐ ܕܥܰܡܶܗ.
41 ܘܟܰܕ ܗܘܳܐ ܨܰܦܪܳܐ. ܕܒܰܪ ܒܳܠܳܩ ܠܒܶܠܥܰܡ. ܘܰܐܣܩܶܗ ܠܒܶܡܽܘܬ ܒܰܥܠܳܐ. ܘܰܚܙܳܐ ܡܶܢ ܬܰܡܳܢ ܣܳܟܶܗ ܕܥܰܡܳܐ.