Numbers 6
The Book of Numbers
܀ ܡܢܝܢܐ ܘ ܀
1 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
2 ܡܰܠܶܠ ܥܰܡ ܒܢܰܝ̈ ܝܺܣܪܳܐܶܝܠ. ܘܶܐܡܰܪ ܠܗܽܘܢ ܓܰܒܪܳܐ ܐܰܘ ܐܰܢ̱ܬܬܳܐ ܕܢܶܦܪܽܘܫ ܘܢܶܕܽܘܪ ܢܶܕܪܳܐ ܕܰܢܙܺܝܪܽܘܬܳܐ ܘܢܶܬܢܙܰܪ ܠܡܳܪܝܳܐ.
3 ܡܶܢ ܚܰܡܪܳܐ ܘܡܶܢ ܫܰܟܪܳܐ ܢܶܬܢܙܰܪ. ܚܰܠܳܐ ܕܚܰܡܪܳܐ ܘܚܰܠܳܐ ܕܫܰܟܪܳܐ ܠܳܐ ܢܶܫܬܶܐ. ܘܟܽܠ ܬܶܪܝܳܢܳܐ ܕܥܶܢ̈ܒܶܐ ܠܳܐ ܢܶܫܬܶܐ. ܘܥܶܢ̈ܒܶܐ ܘܰܐܦ̈ܫܳܬܳܐ ܠܳܐ ܢܶܐܟܽܘܠ.
4 ܟܽܠܗܽܘܢ ܝܰܘ̈ܡܳܬܳܐ ܕܰܢܙܺܝܪܽܘܬܶܗ ܟܽܠܡܶܕܶܡ ܕܡܶܬܥܒܶܕ ܡܶܢ ܓܦܶܬܳܐ ܕܚܰܡܪܳܐ ܡܶܢ ܥܽܘܨܳܖ̈ܶܐ ܘܰܥܕܰܡܳܐ ܠܟܰܡܫ̈ܽܘܢܶܐ. ܠܳܐ ܢܶܐܟܽܘܠ.
5 ܟܽܠܗܽܘܢ ܝܰܘ̈ܡܳܬܳܐ ܕܢܶܕܪܳܐ ܕܰܢܙܺܝܪܽܘܬܶܗ. ܘܰܡܕܰܟܝܳܐ ܠܳܐ ܢܶܣܰܩ ܥܰܠ ܪܺܝܫܶܗ. ܥܕܰܡܳܐ ܕܢܶܫܠܡܽܘܢ ܝܰܘ̈ܡܳܬܳܐ ܕܶܐܬܢܙܰܪ ܠܡܳܪܝܳܐ. ܩܰܕܺܝܫ ܢܶܗܘܶܐ. ܘܰܢܪܰܒܶܐ ܣܰܥܪܳܐ ܕܪܺܝܫܶܗ.
6 ܟܽܠܗܽܘܢ ܝܰܘ̈ܡܳܬܳܐ ܕܶܐܬܢܙܰܪ ܠܡܳܪܝܳܐ. ܘܥܰܠ ܢܰܦܫܳܐ ܕܡܺܝܬܳܐ ܠܳܐ ܢܶܥܽܘܠ.
7 ܘܒܰܐܒܽܘܗܝ. ܘܒܶܐܡܶܗ. ܘܒܰܐܚܽܘܗܝ. ܘܰܒܚܳܬܶܗ. ܠܳܐ ܢܶܬܛܰܡܰܐ ܒܗܽܘܢ ܒܡܰܘܬܗܽܘܢ. ܡܶܛܽܠ ܕܰܟܠܺܝܠܳܐ ܕܰܐܠܳܗܶܗ ܥܰܠ ܪܺܝܫܶܗ.
8 ܟܽܠܗܽܘܢ ܝܰܘ̈ܡܳܬܳܐ ܕܰܢܙܺܝܪܽܘܬܶܗ ܩܰܕܺܝܫ ܗ̱ܘ ܠܡܳܪܝܳܐ.
9 ܘܶܐܢ ܢܡܽܘܬ ܡܺܝܬܳܐ ܥܠܰܘܗܝ ܡܶܢ ܫܶܠܝܳܐ. ܢܶܬܛܰܡܰܐ ܪܺܝܫܳܐ ܕܰܢܙܺܝܪܽܘܬܶܗ. ܘܢܶܓܪܽܘܥ ܪܺܝܫܶܗ ܒܝܰܘܡܳܐ ܕܰܕܟܶܐ. ܘܰܠܝܰܘܡܳܐ ܕܫܰܒܥܳܐ ܢܶܓܪܥܺܝܘܗܝ.
10 ܘܰܠܝܰܘܡܳܐ ܕܰܬܡܳܢܝܳܐ. ܢܰܝܬܶܐ ܬܪܶܝܢ ܫܽܘܦܢܺܝ̈ܢܺܝܢ. ܐܰܘ ܬܪܶܝܢ ܒܢܰܝ̈ ܝܰܘܢܳܐ. ܠܘܳܬ ܟܳܗܢܳܐ ܠܬܰܪܥܳܐ ܕܡܰܫܟܰܢܙܰܒܢܳܐ.
11 ܘܰܢܩܰܪܶܒ ܟܳܗܢܳܐ ܚܰܕ ܚܠܳܦ ܚܛܳܗܳܐ. ܘܚܰܕ ܠܝܰܩܕܳܐ ܫܰܠܡܳܐ. ܘܰܢܚܰܣܶܐ ܥܠܰܘܗܝ ܟܳܗܢܳܐ ܥܰܠ ܚܛܳܗܳܐ ܕܰܚܛܳܐ ܒܢܰܦܫܳܐ. ܘܰܢܩܰܕܶܫ ܪܺܝܫܶܗ ܒܶܗ ܒܝܰܘܡܳܐ ܗܰܘ.
12 ܘܢܶܬܢܙܰܪ ܩܕܳܡ ܡܳܪܝܳܐ ܝܰܘ̈ܡܳܬܳܐ ܕܰܢܙܺܝܪܽܘܬܶܗ. ܘܢܰܝܬܶܐ ܐܶܡܪܳܐ ܒܰܪ ܫܰܢ̱ܬܳܐ ܠܩܽܘܪܒܳܢܳܐ. ܘܝܰܘ̈ܡܳܬܳܐ ܩܰܕܡܳܝ̈ܶܐ ܢܶܒܛܠܽܘܢ. ܡܶܛܽܠ ܕܶܐܬܛܰܡܐܰܬ ܢܙܺܝܪܽܘܬܶܗ.
13 ܗܳܢܰܘ ܢܳܡܽܘܣܳܐ ܕܰܢܙܺܝܪܳܐ. ܒܝܰܘܡܳܐ ܕܫܳܠܡܺܝܢ ܝܰܘ̈ܡܳܬܳܐ ܕܰܢܙܺܝܪܽܘܬܶܗ. ܢܰܝܬܽܘܢܶܗ ܠܬܰܪܥܳܐ ܕܡܰܫܟܰܢܙܰܒܢܳܐ.
14 ܘܰܢܩܰܪܶܒ ܩܽܘܪܒܳܢܶܗ ܠܡܳܪܝܳܐ. ܐܶܡܪܳܐ ܚܰܕ ܒܰܪ ܫܰܢ̱ܬܳܐ ܕܠܰܝܬ ܒܶܗ ܡܽܘܡܳܐ ܠܰܥܠܳܬܳܐ. ܘܦܰܪܬܳܐ ܚܕܳܐ ܫܰܢ̱ܬܳܐ ܕܠܰܝܬ ܒܳܗ̇ ܡܽܘܡܳܐ. ܚܠܳܦ ܚܛܳܗܳܐ. ܘܕܶܟܪܳܐ ܚܰܕ ܕܠܰܝܬ ܒܶܗ ܡܽܘܡܳܐ. ܠܕܶܒܚܳܐ ܫܰܠܡܳܐ.
15 ܘܣܰܠܳܐ ܕܦܰܛܺܝܖ̈ܶܐ. ܢܰܫܺܝܦܳܐ ܚܳܝܖ̈ܳܬܳܐ ܕܦܺܝ̈ܠܳܢ ܒܡܶܫܚܳܐ. ܘܠܶܓܢ̈ܶܐ ܦܰܛܺܝܖ̈ܶܐ ܕܰܡܫܺܝܚܺܝܢ ܒܡܶܫܚܳܐ. ܘܰܣܡܺܝܕܗܽܘܢ ܘܢܽܘܩܳܝܗܽܘܢ.
16 ܘܰܢܩܰܪܒܺܝܘܗܝ ܟܳܗܢܳܐ ܩܕܳܡ ܡܳܪܝܳܐ. ܘܰܢܩܰܪܶܒ ܚܛܳܗܶܗ ܘܝܰܩܕܶܗ ܫܰܠܡܳܐ.
17 ܘܕܶܟܪܳܐ ܢܶܥܒܶܕ ܕܶܒܚܳܐ ܫܰܠܡܳܐ ܠܡܳܪܝܳܐ. ܥܰܠ ܣܰܠܳܐ ܕܦܰܛܺܝܪܳܐ. ܘܢܶܥܒܶܕ ܟܳܗܢܳܐ ܣܡܺܝܕܶܗ ܘܢܽܘܩܳܝܶܗ.
18 ܘܢܶܓܪܽܘܥ ܢܙܺܝܪܳܐ ܒܬܰܪܥܳܐ ܕܡܰܫܟܰܢܙܰܒܢܳܐ ܪܺܝܫܐ ܕܰܢܙܺܝܪܽܘܬܶܗ. ܘܢܶܣܰܒ ܣܰܥܪܳܐ ܕܪܺܝܫܳܐ ܕܰܢܙܺܝܪܽܘܬܶܗ. ܘܢܰܪܡܶܐ ܒܢܽܘܪܳܐ ܕܰܬܚܶܝܬ ܕܶܒܚܳܐ ܫܰܠܡܳܐ.
19 ܘܢܶܣܰܒ ܟܳܗܢܳܐ ܕܪܳܥܳܐ ܒܰܫܺܝܠܳܐ ܡܶܢ ܕܶܟܪܳܐ. ܘܚܳܚܽܘܪܬܳܐ ܚܕܳܐ ܦܰܛܺܝܪܬܳܐ ܡܶܢ ܣܰܠܳܐ. ܘܠܶܓܢܳܐ ܚܰܕ ܦܰܛܺܝܪܳܐ. ܘܰܢܣܺܝܡ ܥܰܠ ܐܺܝܕܰܘ̈ܗܝ ܕܰܢܙܺܝܪܳܐ ܡܶܢ ܒܳܬܰܪ ܕܰܓܪܰܥ ܢܙܺܝܪܽܘܬܶܗ.
20 ܘܢܶܦܪܽܘܫ ܐܶܢܽܘܢ ܟܳܗܢܳܐ ܦܽܘܪܫܳܢܳܐ ܩܕܳܡ ܡܳܪܝܳܐ. ܩܽܘܕܫܰܐ ܗ̱ܘ ܠܟܳܗܢܳܐ. ܥܰܠ ܚܰܕܝܳܐ ܕܦܽܘܪܫܳܢܳܐ. ܘܥܰܠ ܫܳܩܳܐ ܕܦܽܘܪܫܳܢܳܐ. ܘܗܳܝܕܶܝܢ ܢܶܫܬܶܐ ܢܙܺܝܪܳܐ ܚܰܡܪܳܐ.
21 ܗܳܢܰܘ ܢܳܡܽܘܣܳܐ ܕܰܢܙܺܝܪܳܐ ܕܢܳܕܰܪ ܠܡܳܪܝܳܐ ܩܽܘܪܒܳܢܳܐ ܥܰܠ ܢܙܺܝܪܽܘܬܶܗ. ܣܛܰܪ ܡܶܢ ܡܶܕܶܡ ܕܣܳܦܩܳܐ ܒܺܐܝܕܰܘ̈ܗܝ. ܐܰܝܟ ܡܶܣܰܬ ܢܶܕܪܳܐ ܕܰܢܕܰܪ. ܗܳܟܰܢܳܐ ܢܶܥܒܶܕ ܥܰܠ ܢܳܡܽܘܣܳܐ ܕܰܢܙܺܝܪܽܘܬܶܗ.
22 ܕܥܰܠ ܒܽܘܖ̈ܟܳܬܳܐ. ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
23 ܡܰܠܶܠ ܥܰܡ ܐܰܗܪܽܘܢ ܘܥܰܡ ܒܢܰܘ̈ܗܝ. ܘܶܐܡܰܪ ܠܗܽܘܢ. ܗܳܟܰܢܳܐ ܗܘܰܝܬܽܘܢ ܡܒܰܪܟܺܝܢ ܠܰܒܢܰܝ̈ ܝܺܣܪܳܐܶܝܠ. ܐܶܡܰܪܘ ܠܗܽܘܢ.
24 ܢܒܰܪܟܳܟ ܡܳܪܝܳܐ ܘܰܢܢܰܛܪܳܟ.
25 ܢܰܢܗܰܪ ܡܳܪܝܳܐ ܐܰܦܰܘ̈ܗܝ ܥܠܰܝܟ ܘܢܰܚܶܝܟ.
26 ܢܪܺܝܡ ܡܳܪܝܳܐ ܐܰܦܰܘ̈ܗܝ ܥܠܰܝܟ ܘܢܶܥܒܶܕ ܠܳܟ ܫܠܳܡܳܐ.
27 ܘܰܢܣܺܝܡܽܘܢ ܫܶܡܝ ܥܰܠ ܒܢܰܝ̈ ܝܺܣܪܳܐܶܝܠ. ܘܶܐܢܳܐ ܐܶܒܰܪܶܟ ܐܶܢܽܘܢ.