Numbers 7
The Book of Numbers
܀ ܡܢܝܢܐ ܙ ܀
1 ܘܰܗܘܳܐ ܒܝܰܘܡܳܐ ܕܫܰܠܶܡ ܡܽܘܫܶܐ ܠܰܡܩܳܡܽܘܬܶܗ ܠܡܰܫܟܢܳܐ. ܡܰܫܚܶܗ ܘܩܰܕܫܶܗ ܠܶܗ ܘܰܠܟܽܠܗܽܘܢ ܡܳܐܢܰܘ̈ܗܝ. ܘܰܠܡܰܕܒܚܳܐ ܘܰܠܟܽܠܗܽܘܢ ܡܳܐܢܰܘ̈ܗܝ. ܡܫܰܚ ܐܶܢܽܘܢ ܘܩܰܕܶܫ ܐܶܢܽܘܢ.
2 ܘܩܰܪܶܒܘ ܪܰܘܖ̈ܒܳܢܶܐ ܕܰܒܢܰܝ̈ ܝܺܣܪܳܐܶܝܠ. ܪܺܝܫܳܐ ܕܒܶܝܬ ܐܰܒܳܗܰܝ̈ܗܽܘܢ. ܗܶܢܽܘܢ ܪܰܘܖ̈ܒܳܢܶܐ ܕܫܰܒ̈ܛܶܐ. ܗܳܢܽܘܢ ܕܩܳܝܡܺܝܢ ܥܰܠ ܡܶܢܝܳܢܳܐ.
3 ܘܰܐܝܬܺܝܘ ܩܽܘܖ̈ܒܳܢܰܝܗܽܘܢ ܩܕܳܡ ܡܳܪܝܳܐ. ܫܶܬ ܥܶܓ̈ܠܳܢ ܟܰܕ ܡܰܬܩ̈ܢܳܢ. ܘܰܬܪܶܥܣܰܪ ܬܰܘܖ̈ܺܝܢ. ܥܓܶܠܬܳܐ ܠܰܬܪܶܝܢ ܪܰܘܖ̈ܒܳܢܺܝ̈ܢ. ܘܬܰܘܪܳܐ ܠܚܰܕ. ܘܩܰܪܶܒܘ ܐܶܢܽܘܢ ܩܕܳܡ ܡܰܫܟܢܳܐ.
4 ܘܶܐܡܰܪ ܡܳܪܝܳܐ ܠܡܽܘܫܶܐ.
5 ܣܰܒ ܡܶܢܗܽܘܢ. ܘܢܶܗܘܽܘܢ ܠܡܶܦܠܰܚ ܒܗܽܘܢ ܦܽܘܠܚܳܢܳܐ ܕܡܰܫܟܰܢ ܙܰܒܢܳܐ. ܘܗܰܒ ܐܶܢܽܘܢ ܠܠܶܘ̈ܳܝܶܐ ܐ̱ܢܳܫ ܡܶܣܰܬ ܦܽܘܠܚܳܢܶܗ.
6 ܘܰܕܒܰܪ ܡܽܘܫܶܐ ܬܰܘܖ̈ܶܐ ܘܥܶܓ̈ܠܳܬܳܐ. ܘܰܐܫܠܶܡ ܐܶܢܽܘܢ ܠܠܶܘ̈ܳܝܶܐ.
7 ܬܰܪܬܶܝܢ ܥܶܓ̈ܠܳܢ ܘܰܐܪܒܥܳܐ ܬܰܘܖ̈ܺܝܢ. ܝܰܗܒ ܠܰܒܢܰܝ̈ ܓܶܪܫܽܘܢ. ܡܶܣܰܬ ܦܽܘܠܚܳܢܗܽܘܢ.
8 ܘܰܐܪܒܰܥ ܥܶܓ̈ܠܳܢ ܘܰܬܡܳܢܝܳܐ ܬܰܘܖ̈ܺܝܢ. ܝܰܗܒ ܠܰܒܢܰܝ̈ ܡܪܳܪܺܝ. ܡܶܣܰܬ ܦܽܘܠܚܳܢܗܽܘܢ. ܒܺܐܝܕܳܐ ܕܺܐܝܬܳܡܳܪ ܒܪܶܗ ܕܰܐܗܪܽܘܢ ܟܳܗܢܳܐ.
9 ܘܠܰܒܢܰܝ̈ ܩܳܗܳܬ ܠܳܐ ܝܰܗܒ. ܡܶܛܽܠ ܕܦܽܘܠܚܳܢܳܐ ܕܩܽܘܕܫܳܐ ܡܰܫܠܰܡ ܠܗܽܘܢ. ܘܥܰܠ ܟܰܬܦ̈ܳܬܗܽܘܢ ܫܳܩܠܺܝܢ.
10 ܘܩܰܪܶܒܘ ܪܰܘܖ̈ܒܳܢܶܐ ܩܽܘܪܒܳܢܳܐ ܕܚܽܘܕܳܬܳܐ ܕܡܰܕܒܚܳܐ ܒܝܰܘܡܳܐ ܕܡܰܫܚܽܘܗܝ. ܘܩܰܪܶܒܘ ܪܰܘܖ̈ܒܳܢܶܐ ܩܽܘܖ̈ܒܢܰܝ̈ܗܽܘܢ ܩܕܳܡ ܡܳܪܝܳܐ.
11 ܘܶܐܡܰܪ ܡܳܪܝܳܐ ܠܡܽܘܫܶܐ. ܚܰܕ ܚܰܕ ܪܰܒܳܐ ܒܝܰܘܡܳܐ ܢܶܗܘܽܘܢ ܡܩܰܪܒܺܝܢ ܩܽܘܖ̈ܒܢܰܝ̈ܗܽܘܢ ܠܚܽܘܕܳܬܳܐ ܕܡܰܕܒܚܳܐ.
12 ܘܰܗܘܳܐ ܕܰܡܩܰܪܶܒ ܒܝܰܘܡܳܐ ܩܰܕܡܳܝܳܐ ܩܽܘܪܒܳܢܶܗ. ܢܶܚܫܽܘܢ ܒܰܪ ܥܰܡܺܝܢܳܕܳܒ. ܪܺܝܫ ܫܰܒܛܳܐ ܕܒܶܝܬ ܝܺܗܽܘܕܳܐ.
13 ܩܽܘܪܒܳܢܶܗ ܦܺܝܠܳܣܳܐ ܚܰܕ ܕܣܺܐܡܳܐ. ܡܶܢ ܡܳܐܐ ܘܰܬܠܳܬܺܝܢ ܡܰܬܩ̈ܳܠܺܝܢ. ܘܫܳܚܠܳܐ ܚܰܕ ܕܣܺܐܡܳܐ. ܡܶܢ ܫܰܒܥܺܝܢ ܡܰܬܩ̈ܳܠܺܝܢ ܒܡܰܬܩܳܠܳܐ ܕܩܽܘܕܫܳܐ. ܬܖ̈ܰܝܗܽܘܢ ܟܰܕ ܡܠܶܝܢ ܣܡܺܝܕܳܐ ܕܦܺܝܠ ܒܡܶܫܚܳܐ ܠܩܽܘܪܒܳܢܳܐ.
14 ܘܟܰܦܬܳܐ ܚܕܳܐ ܡܶܢ ܥܶܣܪܳܐ ܕܕܰܗܒܳܐ ܘܡܰܠܝܳܐ ܒܶܣ̈ܡܶܐ.
15 ܘܬܰܘܪܳܐ ܚܰܕ ܒܰܪ ܒܰܩܪܳܐ. ܘܕܶܟܪܳܐ ܚܰܕ. ܘܶܐܡܪܳܐ ܚܰܕ ܒܰܪ ܫܰܢ̱ܬܳܐ ܠܰܥܠܳܬܳܐ.
16 ܘܨܺܦܪܳܝܳܐ ܚܰܕ ܕܥܶܙ̈ܶܐ ܚܠܳܦ ܚܛܳܗܳܐ.
17 ܘܰܠܕܶܒܚܳܐ ܫܰܠܡܳܐ. ܬܰܘܖ̈ܶܐ ܬܪܶܝܢ. ܘܕܶܟܖ̈ܶܐ ܚܰܡܫܳܐ. ܘܰܓܕܰܝ̈ܳܐ ܚܰܡܫܳܐ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܚܰܡܫܳܐ. ܗܳܢܰܘ ܩܽܘܪܒܳܢܶܗ ܕܢܶܚܫܽܘܢ. ܒܰܪ ܥܰܡܺܝܢܳܕܳܒ.
18 ܘܰܒܝܰܘܡܳܐ ܕܰܬܪܶܝܢ. ܩܰܪܶܒ ܪܺܝܫ ܫܰܒܛܳܐ ܕܺܐܝܣܳܟܳܪ. ܢܰܬܢܺܝܐܶܝܠ ܒܰܪ ܨܽܘܥܳܪ.
19 ܩܽܘܪܒܳܢܶܗ ܦܺܝܠܳܣܳܐ ܚܰܕ ܕܣܺܐܡܳܐ. ܡܶܢ ܡܳܐܐ ܘܰܬܠܳܬܺܝܢ ܡܰܬܩܳܠܶܗ. ܘܫܳܚܠܳܐ ܚܰܕ ܕܣܺܐܡܳܐ. ܡܶܢ ܫܰܒܥܺܝܢ ܡܰܬܩ̈ܳܠܺܝܢ ܒܡܰܬܩܳܠܳܐ ܕܩܽܘܕܫܳܐ. ܬܖ̈ܰܝܗܽܘܢ ܟܰܕ ܡܠܶܝܢ ܣܡܺܝܕܳܐ ܕܦܺܝܠ ܒܡܶܫܚܳܐ ܠܩܽܘܪܒܳܢܳܐ.
20 ܘܟܰܦܬܳܐ ܚܕܳܐ ܡܶܢ ܥܶܣܪܳܐ ܕܕܰܗܒܳܐ. ܘܡܰܠܝܳܐ ܒܶܣ̈ܡܶܐ.
21 ܘܬܰܘܪܳܐ ܚܰܕ ܒܰܪ ܒܰܩܪܳܐ. ܘܕܶܟܪܳܐ ܚܰܕ. ܘܶܐܡܪܳܐ ܚܰܕ ܒܰܪ ܫܰܢ̱ܬܳܐ ܠܰܥܠܳܬܳܐ.
22 ܘܨܺܦܪܳܝܳܐ ܚܰܕ ܕܥܶܙ̈ܶܐ ܚܠܳܦ ܚܛܳܗܳܐ.
23 ܘܰܠܕܶܒܚܳܐ ܫܰܠܡܳܐ. ܬܰܘܖ̈ܶܐ ܬܪܶܝܢ. ܘܕܶܟܪܳܐ ܚܰܡܫܳܐ. ܘܰܓܕܰܝ̈ܳܐ ܚܰܡܫܳܐ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܚܰܡܫܳܐ. ܗܳܢܰܘ ܩܽܘܪܒܳܢܶܗ ܕܢܰܬܢܺܝܐܶܝܠ ܒܰܪ ܨܽܘܥܳܪ.
24 ܘܰܒܝܰܘܡܳܐ ܕܰܬܠܳܬܳܐ. ܩܰܪܶܒ ܪܺܝܫ ܫܰܒܛܳܐ ܕܰܙܒܳܘܠܽܘܢ. ܐܶܠܝܰܒ ܒܰܪ ܚܰܠܽܘܢ.
25 ܩܽܘܪܒܳܢܶܗ ܦܺܝܠܳܣܳܐ ܚܰܕ ܕܣܺܐܡܳܐ. ܡܶܢ ܡܳܐܐ ܘܰܬܠܳܬܺܝܢ ܡܰܬܩܳܠܶܗ. ܘܫܳܚܠܳܐ ܚܰܕ ܕܣܺܐܡܳܐ. ܡܶܢ ܫܰܒܥܺܝܢ ܡܰܬܩ̈ܳܠܺܝܢ ܒܡܰܬܩܳܠܳܐ ܕܩܽܘܕܫܳܐ. ܬܖ̈ܰܝܗܽܘܢ ܟܰܕ ܡܠܶܝܢ ܢܰܫܺܝܦܳܐ ܕܦܺܝܠ ܒܡܶܫܚܳܐ ܠܩܽܘܪܒܳܢܳܐ.
26 ܘܟܰܦܬܳܐ ܚܕܳܐ ܡܶܢ ܥܶܣܪܳܐ ܕܕܰܗܒܳܐ. ܘܡܰܠܝܳܐ ܒܶܣ̈ܡܶܐ.
27 ܘܬܰܘܪܳܐ ܚܰܕ ܒܰܪ ܒܰܩܪܳܐ. ܘܕܶܟܪܳܐ ܚܰܕ. ܘܶܐܡܪܳܐ ܚܰܕ ܒܰܪ ܫܰܢ̱ܬܳܐ ܠܰܥܠܳܬܳܐ.
28 ܘܨܺܦܪܳܝܳܐ ܚܰܕ ܕܥܶܙ̈ܶܐ ܚܠܳܦ ܚܛܳܗܳܐ.
29 ܘܰܠܕܶܒܚܳܐ ܫܰܠܡܳܐ. ܬܰܘܖ̈ܶܐ ܬܪܶܝܢ. ܘܕܶܟܖ̈ܶܐ ܚܰܡܫܳܐ. ܘܰܓܕܰܝ̈ܳܐ ܚܰܡܫܳܐ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܚܰܡܫܳܐ. ܗܳܢܰܘ ܩܽܘܪܒܳܢܶܗ ܕܶܐܠܝܰܒ ܒܰܪ ܚܰܠܽܘܢ.
30 ܘܰܒܝܰܘܡܳܐ ܕܰܐܪܒܥܳܐ. ܩܰܪܶܒ ܪܺܝܫ ܫܰܒܛܳܐ ܕܪܽܘܒܺܝܠ. ܐܶܠܺܝܨܽܘܪ ܒܰܪ ܫܰܕܐܽܘܪ.
31 ܩܽܘܪܒܳܢܶܗ ܦܺܝܠܳܣܳܐ ܚܰܕ ܕܣܺܐܡܳܐ. ܡܶܢ ܡܳܐܐ ܘܰܬܠܳܬܺܝܢ ܡܰܬܩܳܠܶܗ. ܘܫܳܚܠܳܐ ܚܰܕ ܕܣܺܐܡܳܐ. ܡܶܢ ܫܰܒܥܺܝܢ ܡܰܬܩ̈ܳܠܺܝܢ ܒܡܰܬܩܳܠܳܐ ܕܩܽܘܕܫܳܐ. ܬܖ̈ܰܝܗܽܘܢ ܟܰܕ ܡܠܶܝܢ ܢܰܫܺܝܦܳܐ ܕܦܺܝܠ ܒܡܶܫܚܳܐ ܠܩܽܘܪܒܳܢܳܐ.
32 ܘܟܰܦܬܳܐ ܚܕܳܐ ܡܶܢ ܥܶܣܪܳܐ ܕܕܰܗܒܳܐ. ܘܡܰܠܝܳܐ ܒܶܣ̈ܡܶܐ.
33 ܘܬܰܘܪܳܐ ܚܰܕ ܒܰܪ ܒܰܩܪܳܐ. ܘܕܶܟܪܳܐ ܚܰܕ. ܘܶܐܡܪܳܐ ܚܰܕ ܒܰܪ ܫܰܢ̱ܬܳܐ ܠܰܥܠܳܬܳܐ.
34 ܘܨܺܦܪܳܝܳܐ ܚܰܕ ܕܥܶܙ̈ܶܐ ܚܠܳܦ ܚܛܳܗܳܐ.
35 ܘܰܠܕܶܒܚܳܐ ܫܰܠܡܳܐ. ܬܰܘܖ̈ܶܐ ܬܪܶܝܢ. ܘܕܶܟܖ̈ܶܐ ܚܰܡܫܳܐ. ܘܰܓܕܰܝ̈ܳܐ ܚܰܡܫܳܐ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܚܰܡܫܳܐ. ܗܳܢܰܘ ܩܽܘܪܒܳܢܶܗ ܕܶܐܠܺܝܨܽܘܪ ܒܰܪ ܫܰܕܐܳܘܪ.
36 ܘܰܒܝܰܘܡܳܐ ܕܚܰܡܫܳܐ. ܩܰܪܶܒ ܪܺܝܫ ܫܰܒܛܳܐ ܕܫܶܡܥܽܘܢ. ܫܰܠܡܽܘܐܶܝܠ ܒܰܪ ܨܽܘܪܺܝܫܰܕܰܝ.
37 ܩܽܘܪܒܳܢܶܗ ܦܺܝܠܳܣܳܐ ܚܰܕ ܕܣܺܐܡܳܐ. ܡܶܢ ܡܳܐܐ ܘܰܬܠܳܬܺܝܢ ܡܰܬܩܳܠܶܗ. ܘܫܳܚܠܳܐ ܚܰܕ ܕܣܺܐܡܳܐ. ܡܶܢ ܫܰܒܥܺܝܢ ܡܰܬܩ̈ܳܠܺܝܢ ܒܡܰܬܩܳܠܳܐ ܕܩܽܘܕܫܳܐ. ܬܖ̈ܰܝܗܽܘܢ ܟܰܕ ܡܠܶܝܢ ܢܰܫܺܝܦܳܐ ܕܦܺܝܠ ܒܡܶܫܚܳܐ ܠܩܽܘܪܒܳܢܳܐ.
38 ܘܟܰܦܬܳܐ ܚܕܳܐ ܡܶܢ ܥܶܣܪܳܐ ܕܕܰܗܒܳܐ. ܘܡܰܠܝܳܐ ܒܶܣ̈ܡܶܐ.
39 ܘܬܰܘܪܳܐ ܚܰܕ ܒܰܪ ܒܰܩܪܳܐ. ܘܕܶܟܪܳܐ ܚܰܕ. ܘܶܐܡܪܳܐ ܒܰܪ ܫܰܢ̱ܬܳܐ ܠܰܥܠܳܬܳܐ.
40 ܘܨܺܦܪܳܝܳܐ ܚܰܕ ܕܥܶܙ̈ܶܐ ܚܠܳܦ ܚܛܳܗܳܐ.
41 ܘܰܠܕܶܒܚܳܐ ܫܰܠܡܳܐ. ܬܰܘܖ̈ܶܐ ܬܪܶܝܢ. ܘܕܶܟܖ̈ܶܐ ܚܰܡܫܳܐ. ܘܰܓܕܰܝ̈ܳܐ ܚܰܡܫܳܐ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܚܰܡܫܳܐ. ܗܳܢܰܘ ܩܽܘܪܒܳܢܶܗ ܕܫܰܠܡܽܘܐܶܝܠ ܒܰܪ ܨܽܘܪܺܝܫܰܐܕܰܝ.
42 ܘܰܒܝܰܘܡܳܐ ܕܶܫܬܳܐ. ܩܰܪܶܒ ܪܺܝܫ ܫܰܒܛܳܐ ܕܓܳܕ. ܐܶܠܝܳܐܣܳܦ ܒܰܪ ܪܥܽܘܐܶܝܠ.
43 ܩܽܘܪܒܳܢܶܗ ܦܺܝܠܳܣܳܐ ܚܰܕ ܕܣܺܐܡܳܐ. ܡܶܢ ܡܳܐܐ ܘܰܬܠܳܬܺܝܢ ܡܰܬܩܳܠܶܗ. ܘܫܳܚܠܳܐ ܚܰܕ ܕܣܺܐܡܳܐ ܡܶܢ ܫܰܒܥܺܝܢ ܡܰܬܩ̈ܳܠܺܝܢ ܒܡܰܬܩܳܠܳܐ ܕܩܽܘܕܫܳܐ ܬܖ̈ܰܝܗܽܘܢ ܟܰܕ ܡܠܶܝܢ ܢܰܫܺܝܦܳܐ ܕܦܺܝܠ ܒܡܶܫܚܳܐ ܠܩܽܘܪܒܳܢܳܐ.
44 ܘܟܰܦܬܳܐ ܚܕܳܐ ܡܶܢ ܥܶܣܪܳܐ ܕܕܰܗܒܳܐ. ܘܡܰܠܝܳܐ ܒܶܣ̈ܡܶܐ.
45 ܘܬܰܘܪܳܐ ܚܰܕ ܒܰܪ ܒܰܩܪܳܐ. ܘܕܶܟܪܳܐ ܚܰܕ. ܘܶܐܡܪܳܐ ܚܰܕ ܒܰܪ ܫܰܢ̱ܬܳܐ ܠܰܥܠܳܬܳܐ.
46 ܘܨܺܦܪܳܝܳܐ ܚܰܕ ܕܥܶܙ̈ܶܐ ܚܠܳܦ ܚܛܳܗܳܐ.
47 ܘܰܠܕܶܒܚܳܐ ܫܰܠܡܳܐ. ܬܰܘܖ̈ܶܐ ܬܪܶܝܢ. ܘܕܶܟܖ̈ܶܐ ܚܰܡܫܳܐ. ܘܰܓܕܰܝ̈ܳܐ ܚܰܡܫܳܐ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܚܰܡܫܳܐ. ܗܳܢܰܘ ܩܽܘܪܒܳܢܶܗ ܕܶܐܠܝܳܐܣܳܦ ܒܰܪ ܪܥܽܘܐܶܝܠ.
48 ܘܰܒܝܰܘܡܳܐ ܕܫܰܒܥܳܐ ܩܰܪܶܒ ܪܺܝܫ ܫܰܒܛܳܐ ܕܰܐܦܪܶܝܡ. ܐܶܠܺܝܫܡܰܥ ܒܰܪ ܥܰܡܺܝܗܽܘܕ.
49 ܩܽܘܪܒܳܢܶܗ ܦܺܝܠܳܣܳܐ ܚܰܕ ܕܣܺܐܡܳܐ. ܡܶܢ ܡܳܐܐ ܘܰܬܠܳܬܺܝܢ ܡܰܬܩܳܠܶܗ. ܘܫܳܚܠܳܐ ܚܰܕ ܕܣܺܐܡܳܐ. ܡܶܢ ܫܰܒܥܺܝܢ ܡܰܬܩ̈ܳܠܺܝܢ ܒܡܰܬܩܳܠܳܐ ܕܩܽܘܕܫܳܐ. ܬܖ̈ܰܝܗܽܘܢ ܟܰܕ ܡܠܶܝܢ ܢܰܫܺܝܦܳܐ ܕܦܺܝܠ ܒܡܶܫܚܳܐ ܠܩܽܘܪܒܳܢܳܐ.
50 ܘܟܰܦܬܳܐ ܚܕܳܐ ܡܶܢ ܥܶܣܪܳܐ ܕܕܰܗܒܳܐ. ܘܡܰܠܝܳܐ ܒܶܣ̈ܡܶܐ.
51 ܘܬܰܘܪܳܐ ܚܰܕ ܒܰܪ ܒܰܩܪܳܐ. ܘܕܶܟܪܳܐ ܚܰܕ. ܘܶܐܡܪܳܐ ܚܰܕ ܒܰܪ ܫܰܢ̱ܬܳܐ ܠܥܠܳܬܳܐ.
52 ܘܨܺܦܪܳܝܳܐ ܚܰܕ ܕܥܶܙ̈ܶܐ ܚܠܳܦ ܚܛܳܗܳܐ.
53 ܘܰܠܕܶܒܚܳܐ ܫܰܠܡܳܐ. ܬܰܘܖ̈ܶܐ ܬܪܶܝܢ. ܘܕܶܟܖ̈ܶܐ ܚܰܡܫܳܐ. ܘܰܓܕܰܝ̈ܳܐ ܚܰܡܫܳܐ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܚܰܡܫܳܐ. ܗܳܢܰܘ ܩܽܘܪܒܳܢܶܗ ܕܶܐܠܺܝܫܡܰܥ ܒܰܪ ܥܰܡܺܝܗܽܘܕ.
54 ܘܰܒܝܰܘܡܳܐ ܕܰܬܡܳܢܝܳܐ. ܩܰܪܶܒ ܪܺܝܫ ܫܰܒܛܳܐ ܕܰܡܢܰܫܶܐ. ܓܰܡܰܠܺܝܐܶܝܠ ܒܰܪ ܦܰܪܨܽܘܪ.
55 ܩܽܘܪܒܳܢܶܗ ܦܺܝܠܳܣܳܐ ܚܰܕ ܕܣܺܐܡܳܐ. ܡܶܢ ܡܳܐܐ ܘܰܬܠܳܬܺܝܢ ܡܰܬܩܳܠܶܗ. ܘܫܳܚܠܳܐ ܚܰܕ ܕܣܺܐܡܳܐ ܡܶܢ ܫܰܒܥܺܝܢ ܡܰܬܩ̈ܳܠܺܝܢ ܒܡܰܬܩܳܠܳܐ ܕܩܽܘܕܫܳܐ. ܬܖ̈ܰܝܗܽܘܢ ܟܰܕ ܡܠܶܝܢ ܢܰܫܺܝܦܳܐ ܕܦܺܝܠ ܒܡܶܫܚܳܐ ܠܩܽܘܪܒܳܢܳܐ.
56 ܘܟܰܦܬܳܐ ܚܕܳܐ ܡܶܢ ܕܕܰܗܒܳܐ. ܘܡܰܠܝܳܐ ܒܶܣ̈ܡܶܐ.
57 ܘܬܰܘܪܳܐ ܚܰܕ ܒܰܪ ܒܰܩܪܳܐ. ܘܕܶܟܪܳܐ ܚܰܕ. ܘܶܐܡܪܳܐ ܚܰܕ ܒܰܪ ܫܰܢ̱ܬܳܐ ܠܰܥܠܳܬܳܐ.
58 ܘܨܺܦܪܳܝܳܐ ܚܰܕ ܕܥܶܙ̈ܶܐ ܚܠܳܦ ܚܛܳܗܳܐ.
59 ܘܰܠܕܶܒܚܳܐ ܫܰܠܡܳܐ. ܬܰܘܖ̈ܶܐ ܬܪܶܝܢ. ܘܕܶܟܪܳܐ ܚܰܡܫܳܐ. ܘܰܓܕܰܝ̈ܳܐ ܚܰܡܫܳܐ. ܘܶܐܡܖ̈ܶܐ ܒܢܰܝ̈ ܫܰܢܬܳܐ ܚܰܡܫܳܐ. ܗܳܢܰܘ ܩܽܘܪܒܳܢܶܗ ܕܓܰܡܰܠܺܝܐܶܝܠ ܒܰܪ ܦܰܪܨܽܘܪ.
60 ܘܰܒܝܰܘܡܳܐ ܕܬܶܫܥܳܐ ܩܰܪܶܒ ܪܺܝܫ ܫܰܒܛܳܐ ܕܒܶܢܝܳܡܶܝܢ. ܐܳܒܺܝܕܳܢ ܒܰܪ ܓܶܕܥܽܘܢܺܝ.
61 ܩܽܘܪܒܳܢܶܗ ܦܺܝܠܳܣܳܐ ܚܰܕ ܕܣܺܐܡܳܐ. ܡܶܢ ܡܳܐܐ ܘܰܬܠܳܬܺܝܢ ܡܰܬܩܳܠܶܗ. ܘܫܳܚܠܳܐ ܚܰܕ ܕܣܺܐܡܳܐ ܡܶܢ ܫܰܒܥܺܝܢ ܡܰܬܩ̈ܳܠܺܝܢ ܒܡܰܬܩܳܠܳܐ ܕܩܽܘܕܫܳܐ. ܬܖ̈ܰܝܗܽܘܢ ܟܰܕ ܡܠܶܝܢ ܢܰܫܺܝܦܳܐ ܕܦܺܝܠ ܒܡܶܫܚܳܐ ܠܩܽܘܪܒܳܢܳܐ.
62 ܘܟܰܦܬܳܐ ܚܕܳܐ ܡܶܢ ܥܶܣܪܳܐ ܕܕܰܗܒܳܐ. ܘܡܰܠܝܳܐ ܒܶܣ̈ܡܶܐ.
63 ܘܬܰܘܪܳܐ ܚܰܕ ܒܰܪ ܒܰܩܪܳܐ. ܘܕܶܟܪܳܐ ܚܰܕ. ܘܶܐܡܪܳܐ ܚܰܕ ܒܰܪ ܫܰܢ̱ܬܳܐ ܠܰܥܠܳܬܳܐ.
64 ܘܨܺܦܪܳܝܳܐ ܚܰܕ ܕܥܶܙ̈ܶܐ ܚܠܳܦ ܚܛܳܗܳܐ.
65 ܘܰܠܕܶܒܚܳܐ ܫܰܠܡܳܐ. ܬܰܘܖ̈ܶܐ ܬܪܶܝܢ. ܘܕܶܟܖ̈ܶܐ ܚܰܡܫܳܐ. ܘܰܓܕܰܝ̈ܳܐ ܚܰܡܫܳܐ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܚܰܡܫܳܐ. ܗܳܢܰܘ ܩܽܘܪܒܳܢܶܗ ܕܰܐܒܺܝܕܳܢ ܒܰܪ ܓܶܕܥܽܘܢܺܝ.
66 ܘܰܒܝܰܘܡܳܐ ܕܥܶܣܪܳܐ ܩܰܪܶܒ ܪܺܝܫ ܫܰܒܛܳܐ ܕܕܳܢ. ܐܰܚܺܝܥܳܙܳܪ ܒܰܪ ܥܰܡܺܝܫܰܕܰܝ.
67 ܩܽܘܪܒܳܢܶܗ ܦܺܝܠܳܣܳܐ ܚܰܕ ܕܣܺܐܡܳܐ. ܡܶܢ ܡܳܐܐ ܘܰܬܠܳܬܺܝܢ ܡܰܬܩܳܠܶܗ. ܘܫܳܚܠܳܐ ܚܰܕ ܕܣܺܐܡܳܐ ܡܶܢ ܫܰܒܥܺܝܢ ܡܰܬܩ̈ܳܠܺܝܢ ܒܡܰܬܩܳܠܳܐ ܕܩܽܘܕܫܳܐ. ܬܖ̈ܰܝܗܽܘܢ ܟܰܕ ܡܠܶܝܢ ܢܰܫܺܝܦܳܐ ܕܦܺܝܠ ܒܡܶܫܚܳܐ ܠܩܽܘܪܒܳܢܳܐ.
68 ܘܟܰܦܬܳܐ ܚܕܳܐ ܡܶܢ ܥܶܣܪܳܐ ܕܕܰܗܒܳܐ. ܘܡܰܠܝܳܐ ܒܶܣ̈ܡܶܐ.
69 ܘܬܰܘܪܳܐ ܚܰܕ ܒܰܪ ܒܰܩܪܳܐ. ܘܕܶܟܪܳܐ ܚܰܕ. ܘܶܐܡܪܳܐ ܚܰܕ ܒܰܪ ܫܰܢ̱ܬܳܐ ܠܰܥܠܳܬܳܐ.
70 ܘܨܺܦܪܳܝܳܐ ܚܰܕ ܕܥܶܙ̈ܶܐ ܚܠܳܦ ܚܛܳܗܳܐ.
71 ܘܰܠܕܶܒܚܳܐ ܫܰܠܡܳܐ. ܬܰܘܖ̈ܶܐ ܬܪܶܝܢ. ܘܕܶܟܖ̈ܶܐ ܚܰܡܫܳܐ ܘܰܓܕܰܝ̈ܳܐ ܚܰܡܫܳܐ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܚܰܡܫܳܐ. ܗܳܢܰܘ ܩܽܘܪܒܳܢܶܗ ܕܰܐܚܺܝܥܳܙܳܪ ܒܰܪ ܥܰܡܺܝܫܰܕܰܝ.
72 ܘܰܒܝܰܘܡܳܐ ܕܰܚܕܰܥܣܰܪ ܩܰܪܶܒ ܪܺܝܫ ܫܰܒܛܳܐ ܕܳܐܫܺܝܪ. ܦܰܓܥܳܐܶܝܠ ܒܰܪ ܥܰܟܪܳܢ.
73 ܩܽܘܪܒܳܢܶܗ ܦܺܝܠܳܣܳܐ ܚܰܕ ܕܣܺܐܡܳܐ. ܡܶܢ ܡܳܐܐ ܘܰܬܠܳܬܺܝܢ ܡܰܬܩܳܠܶܗ. ܘܫܳܚܠܳܐ ܚܰܕ ܕܣܺܐܡܳܐ. ܡܶܢ ܫܰܒܥܺܝܢ ܡܰܬܩ̈ܳܠܺܝܢ ܒܡܰܬܩܳܠܳܐ ܕܩܽܘܕܫܳܐ. ܬܖ̈ܰܝܗܽܘܢ ܟܰܕ ܡܠܶܝܢ ܢܰܫܺܝܦܳܐ ܕܦܺܝܠ ܒܡܶܫܚܳܐ ܠܩܽܘܪܒܳܢܳܐ.
74 ܘܟܰܦܬܳܐ ܚܕܳܐ ܡܶܢ ܥܶܣܪܳܐ ܕܕܰܗܒܳܐ. ܘܡܰܠܝܳܐ ܒܶܣ̈ܡܶܐ.
75 ܘܬܰܘܪܳܐ ܚܰܕ ܒܰܪ ܒܰܩܪܳܐ. ܘܕܶܟܪܳܐ ܚܰܕ. ܘܶܐܡܪܳܐ ܚܰܕ ܒܰܪ ܫܰܢ̱ܬܳܐ ܠܰܥܠܳܬܳܐ.
76 ܘܨܺܦܪܳܝܳܐ ܚܰܕ ܕܥܶܙ̈ܶܐ ܚܠܳܦ ܚܛܳܗܳܐ.
77 ܘܰܠܕܶܒܚܳܐ ܫܰܠܡܳܐ. ܬܰܘܖ̈ܶܐ ܬܪܶܝܢ. ܘܕܶܟܖ̈ܶܐ ܚܰܡܫܳܐ. ܘܰܓܕܰܝ̈ܳܐ ܚܰܡܫܳܐ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܚܰܡܫܳܐ. ܗܳܢܰܘ ܩܽܘܪܒܳܢܶܗ ܕܦܰܓܥܳܐܶܝܠ ܒܰܪ ܥܰܟܪܳܢ.
78 ܘܰܒܝܰܘܡܳܐ ܕܰܬܪܶܥܣܰܪ ܩܰܪܶܒ ܪܺܝܫ ܫܰܒܛܳܐ ܕܢܰܦܬܳܠܺܝ. ܐܰܚܺܝܕܳܥ ܒܰܪ ܥܰܝܢܳܢ.
79 ܩܽܘܪܒܳܢܶܗ ܦܺܝܠܳܣܳܐ ܚܰܕ ܕܣܺܐܡܳܐ. ܡܶܢ ܡܳܐܐ ܘܰܬܠܳܬܺܝܢ ܡܰܬܩܳܠܶܗ. ܘܫܳܚܠܳܐ ܚܰܕ ܕܣܺܐܡܳܐ. ܡܶܢ ܫܰܒܥܺܝܢ ܡܰܬܩ̈ܳܠܺܝܢ ܒܡܰܬܩܳܠܳܐ ܕܩܽܘܕܫܳܐ. ܬܖ̈ܰܝܗܽܘܢ ܟܰܕ ܡܠܶܝܢ ܢܰܫܺܝܦܳܐ ܕܦܺܝܠ ܒܡܶܫܚܳܐ ܠܩܽܘܪܒܳܢܳܐ.
80 ܘܟܰܦܬܳܐ ܚܕܳܐ ܡܶܢ ܥܶܣܪܳܐ ܕܕܰܗܒܳܐ ܘܡܰܠܝܳܐ ܒܶܣ̈ܡܶܐ.
81 ܘܬܰܘܪܳܐ ܚܰܕ ܒܰܪ ܒܰܩܪܳܐ. ܘܕܶܟܪܳܐ ܚܰܕ. ܘܶܐܡܪܳܐ ܚܰܕ ܒܰܪ ܫܰܢ̱ܬܳܐ ܠܰܥܠܳܬܳܐ.
82 ܘܨܺܦܪܳܝܳܐ ܚܰܕ ܕܥܶܙ̈ܶܐ ܚܠܳܦ ܚܛܳܗܳܐ.
83 ܘܰܠܕܶܒܚܳܐ ܫܰܠܡܳܐ. ܬܰܘܖ̈ܶܐ ܬܪܶܝܢ. ܘܕܶܟܖ̈ܶܐ ܚܰܡܫܳܐ. ܘܰܓܕܰܝ̈ܳܐ ܚܰܡܫܳܐ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܚܰܡܫܳܐ. ܗܳܢܰܘ ܩܽܘܪܒܳܢܶܗ ܕܰܐܚܺܝܕܳܥ ܒܰܪ ܥܰܝܢܳܢ.
84 ܗܳܢܰܘ ܩܽܘܪܒܳܢܳܐ ܕܚܽܘܕܳܬܳܐ ܕܡܰܕܒܚܳܐ. ܒܝܰܘܡܳܐ ܕܶܐܬܡܫܰܚ ܡܶܢ ܠܘܳܬ ܪܰܘܖ̈ܒܳܢܶܐ ܕܺܝܣܪܳܐܶܝܠ. ܦܺܝܠܳܣ̈ܶܐ ܬܪܶܥܣܰܪ ܕܣܺܐܡܳܐ. ܘܫܳܚ̈ܠܶܐ ܬܪܶܥܣܰܪ ܕܣܺܐܡܳܐ. ܘܟܰܦ̈ܶܐ ܬܰܪܬܰܥܶܣܖ̈ܶܐ ܕܕܰܗܒܳܐ.
85 ܡܳܐܐ ܘܰܬܠܳܬܺܝܢ ܗܳܘܶܐ ܡܰܬܩܳܠܶܗ ܕܦܺܝܠܳܣܳܐ ܚܰܕ ܕܣܺܐܡܳܐ. ܘܫܰܒܥܺܝܢ ܕܫܳܚܠܳܐ ܚܰܕ. ܟܽܠܶܗ ܣܺܐܡܳܐ ܕܡܳܐܢ̈ܶܐ ܬܪܶܝܢ ܐܰܠܦܺܝ̈ܢ ܘܰܐܪܒܰܥܡܳܐܐ ܒܡܰܬܩܳܠܳܐ ܕܩܽܘܕܫܳܐ.
86 ܘܟܰܦ̈ܶܐ ܕܕܰܗܒܳܐ ܬܰܪܬܰܥܶܣܖ̈ܶܐ ܕܡܰܠ̈ܝܳܢ ܒܶܣ̈ܡܶܐ. ܡܶܢ ܥܶܣܪܳܐ ܥܶܣܪܳܐ ܡܰܬܩ̈ܳܠܺܝܢ ܗܳܘܝܳܐ ܗܘܳܬ ܟܰܦܬܳܐ. ܒܡܰܬܩܳܠܳܐ ܕܩܽܘܕܫܳܐ. ܟܽܠܶܗ ܕܰܗܒܳܐ ܕܟܰܦ̈ܶܐ ܡܳܐܐ ܘܥܶܣܪܺܝܢ.
87 ܘܟܽܠܗܽܘܢ ܬܰܘܖ̈ܶܐ ܠܰܥܠܳܬܳܐ ܬܪܶܥܣܰܪ. ܘܕܶܟܖ̈ܶܐ ܬܪܶܥܣܰܪ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܬܪܶܥܣܰܪ. ܘܰܢܫܺܝܦܗܽܘܢ. ܘܨܶܦܖ̈ܳܝܶܐ ܕܥܶܙ̈ܶܐ ܬܪܶܥܣܰܪ. ܠܰܚܛܳܗܳܐ.
88 ܘܟܽܠܗܽܘܢ ܬܰܘܖ̈ܶܐ ܠܕܶܒܚܳܐ ܫܰܠܡܳܐ ܥܶܣܪܺܝܢ ܘܰܐܪܒܥܳܐ. ܘܕܶܟܖ̈ܶܐ ܫܬܺܝܢ. ܘܰܓܕܰܝ̈ܳܐ ܫܬܺܝܢ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܫܬܺܝܢ. ܗܳܢܰܘ ܚܽܘܕܳܬܶܗ ܕܡܰܕܒܚܳܐ ܡܶܢ ܒܳܬܰܪ ܕܶܐܬܡܫܰܚ.
89 ܘܟܰܕ ܥ̣ܰܠ ܡܽܘܫܶܐ ܠܡܰܫܟܰܢܙܰܒܢܳܐ. ܫܡܰܥ ܩܳܠܳܐ ܕܰܡܡܰܠܶܠ ܥܰܡܶܗ ܡܶܢ ܚܽܘܣܳܝܳܐ ܕܰܠܥܶܠ ܡܶܢ ܩܺܐܒܽܘܬܳܐ ܕܣܳܗܕܽܘܬܳܐ. ܡܶܢ ܒܰܝܢܳܬ ܬܪܶܝܢ ܟܖ̈ܽܘܒܺܝܢ. ܡܰܠܶܠ ܥܰܡܶܗ.