Numbers 35
The Book of Numbers
܀ ܡܢܝܢܐ ܠܗ ܀
1 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ ܒܥܰܪܒܽܘܬ ܡܽܘܐܳܒ. ܕܥܰܠ ܝܽܘܪܕܢܳܢ ܕܺܐܝܪܺܝܚܽܘ. ܘܶܐܡܰܪ ܠܶܗ.
2 ܦܰܩܶܕ ܠܰܒܢܰܝ̈ ܝܺܣܪܳܐܶܝܠ. ܘܢܶܬܠܽܘܢ ܠܠܶܘ̈ܳܝܶܐ ܡܶܢ ܝܽܘܪܬܳܢܳܐ ܕܽܐܘܚܕܳܢܗܽܘܢ ܩܽܘܖ̈ܝܳܐ ܠܡܶܬܰܒ. ܘܰܐܓܽܘܖ̈ܣܶܐ ܕܩܽܘܖ̈ܝܳܐ ܕܒܰܚܕܳܖ̈ܰܝܗܶܝܢ ܢܶܬܠܽܘܢ ܠܠܶܘ̈ܳܝܶܐ.
3 ܘܢܶܗܘ̈ܝܳܢ ܠܗܽܘܢ ܩܽܘܖ̈ܝܳܐ ܠܡܶܬܰܒ. ܘܰܐܓܽܘܖ̈ܣܰܝܗܶܝܢ ܢܶܗܘܽܘܢ ܠܰܒܥܺܝܪܗܽܘܢ ܘܰܠܩܶܢܝܳܢܗܽܘܢ. ܘܰܠܟܽܠܳܗ̇ ܚܰܝܘܰܬܗܽܘܢ.
4 ܘܰܐܓܽܘܖ̈ܣܶܐ ܕܩܽܘܖ̈ܝܳܐ ܕܬܶܬܠܽܘܢ ܠܠܶܘ̈ܳܝܶܐ ܡܶܢ ܐܶܣܬܳܐ ܕܰܩܪܺܝܬܳܐ ܘܰܠܒܰܪ. ܐܳܠܶܦ ܐܰܡܺܝ̈ܢ ܟܰܕ ܚܳܕܪܳܐ.
5 ܘܰܡܫܽܘܚ ܡܶܢ ܠܒܰܪ ܠܰܩܪܺܝܬܳܐ ܠܣܶܛܪܳܐ ܕܡܰܕܢܚܳܐ. ܬܪܶܝܢ ܐܰܠܦܺܝ̈ܢ ܐܰܡܺܝ̈ܢ. ܘܰܠܣܶܛܪܳܐ ܕܬܰܝܡܢܳܐ ܬܪܶܝܢ ܐܰܠܦܺܝ̈ܢ ܐܰܡܺܝ̈ܢ. ܘܰܠܣܶܛܪܳܐ ܕܡܰܥܪܒܳܐ ܬܪܶܝܢ ܐܰܠܦܺܝ̈ܢ ܐܰܡܺܝ̈ܢ. ܘܰܠܣܶܛܪܳܐ ܕܓܰܪܒܝܳܐ ܬܪܶܝܢ ܐܰܠܦܺܝ̈ܢ ܐܰܡܺܝ̈ܢ. ܘܰܩܪܺܝܬܳܐ ܒܰܡܨܰܥܬܳܐ. ܗܳܢܳܐ ܢܶܗܘܶܐ ܠܟܽܘܢ ܫܶܛܚܳܐ ܕܩܽܘܖ̈ܝܳܐ.
6 ܘܩܽܘܖ̈ܝܳܐ ܕܝܳܗܒܺܝܢ ܐ̱ܢܬܽܘܢ ܠܠܶܘ̈ܳܝܶܐ. ܫܶܬ ܩܽܘܖ̈ܝܳܐ ܕܒܶܝܬ ܓܰܘܣܳܐ ܢܶܗܘ̈ܝܳܢ ܠܟܽܘܢ. ܕܢܶܗܘܶܐ ܥܳܪܶܩ ܠܬܰܡܳܢ ܩܳܛܽܘܠܳܐ ܕܩܳܛܶܠ ܠܚܰܒܪܶܗ ܕܠܳܐ ܒܨܶܒܝܳܢܶܗ. ܘܰܥܠܰܝܗܽܘܢ ܐܰܪܡܰܘ ܐܰܪܒܥܺܝܢ ܘܬܰܪܬܶܝܢ ܩܽܘܖ̈ܝܳܐ.
7 ܟܽܠܗܶܝܢ ܩܽܘܖ̈ܝܳܐ ܕܝܳܗܒܺܝܢ ܐ̱ܢܬܽܘܢ ܠܠܶܘ̈ܳܝܶܐ. ܐܰܪܒܥܺܝܢ ܘܰܬܡܳܢܶܐ ܩܽܘܖ̈ܝܳܐ. ܗܶܢܶܝܢ ܘܫܶܛܚܰܝ̈ܗܶܝܢ.
8 ܘܩܽܘܖ̈ܝܳܐ ܕܝܳܗܒܺܝܢ ܐ̱ܢܬܽܘܢ ܡܶܢ ܝܳܪܬܽܘܬܳܐ ܕܰܒܢܰܝ̈ ܝܺܣܪܳܐܶܝܠ. ܡܶܢ ܣܰܓܺܝ̈ܐܶܐ ܬܰܣܓܽܘܢ. ܘܡܶܢ ܙܥܽܘܖ̈ܶܐ ܬܰܙܥܪܽܘܢ. ܐ̱ܢܳܫ ܐܰܝܟ ܠܦܽܘܬ ܝܳܪܬܽܘܬܳܐ ܕܝܳܪܶܬ. ܢܶܬܶܠ ܡܶܢ ܩܽܘܖ̈ܳܝܗ ܠܠܶܘ̈ܳܝܶܐ.
9 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
10 ܡܰܠܶܠ ܥܰܡ ܒܢܰܝ̈ ܝܺܣܪܳܐܶܝܠ. ܘܶܐܡܰܪ ܠܗܽܘܢ ܡܳܐ ܕܰܥܒܰܪܬܽܘܢ ܝܽܘܪܕܢܳܢ ܠܰܐܪܥܳܐ ܕܰܟܢܰܥܢ.
11 ܛܰܝܶܒܘ ܠܟܽܘܢ ܩܽܘܖ̈ܝܳܐ ܠܒܶܝܬ ܓܰܘܣܳܐ ܕܢܶܗܘ̈ܝܳܢ ܠܟܽܘܢ. ܕܢܶܥܪܽܘܩ ܠܬܰܡܳܢ ܩܳܛܽܘܠܳܐ ܐܰܝܢܳܐ ܕܢܶܩܛܽܘܠ ܢܰܦܫܳܐ ܒܛܽܘܥܝܰܝ.
12 ܘܢܶܗܘ̈ܝܳܢ ܠܟܽܘܢ ܗܳܠܶܝܢ ܩܽܘܖ̈ܝܳܐ ܠܒܶܝܬ ܓܰܘܣܳܐ. ܡܶܢ ܬܳܒܰܥ ܥܝܳܪܬܳܐ ܕܰܕܡܳܐ. ܘܠܳܐ ܢܶܬܩܛܶܠ ܩܳܛܽܘܠܳܐ. ܥܕܰܡܳܐ ܕܩܳܐܶܡ ܩܕܳܡ ܟܢܽܘܫܬܳܐ ܒܕܺܝܢܳܐ.
13 ܘܩܽܘܖ̈ܝܳܐ ܕܝܳܗܒܺܝܢ ܐ̱ܢܬܽܘܢ. ܫܶܬ ܩܽܘܖ̈ܝܳܐ ܕܒܶܝܬ ܓܰܘܣܳܐ ܢܶܗܘ̈ܝܳܢ ܠܟܽܘܢ.
14 ܬܠܳܬ ܩܽܘܖ̈ܝܳܐ ܗܰܒܘ ܒܥܶܒܪܳܐ ܕܝܽܘܪܕܢܳܢ. ܘܰܬܠܳܬ ܩܽܘܖ̈ܝܳܐ ܗܰܒܘ ܒܰܐܪܥܳܐ ܕܰܟܢܰܥܢ. ܩܽܘܖ̈ܝܳܐ ܕܒܶܝܬ ܓܰܘܣܳܐ ܢܶܗܘ̈ܝܳܢ. ܠܰܒܢܰܝ̈ ܝܺܣܪܳܐܶܝܠ.
15 ܘܠܰܐܝܢܳܐ ܕܡܶܬܦܢܶܐ ܠܘܳܬܝ. ܘܠܰܐܝܠܶܝܢ ܕܥܳܡܪܺܝܢ ܒܰܝܢܳܬܟܽܘܢ. ܘܢܶܗܘ̈ܝܳܢ ܠܟܽܘܢ ܗܳܠܶܝܢ ܫܶܬ ܩܽܘܖ̈ܝܳܐ ܠܒܶܝܬ ܓܰܘܣܳܐ. ܕܢܶܥܪܽܘܩ ܠܗܶܝܢ ܟܽܠ ܕܩܳܛܶܠ ܢܰܦܫܳܐ ܒܛܽܘܥܝܰܝ.
16 ܘܶܐܢ ܒܡܳܐܢܳܐ ܕܦܰܪܙܠܳܐ ܡܚܳܝܗܝ ܐܰܝܟ ܕܰܢܡܽܘܬ ܘܡܺܝܬ. ܩܳܛܽܘܠܰܐ ܗ̱ܘ. ܡܶܬܩܛܳܠܽܘ ܢܶܬܩܛܶܠ ܩܳܛܽܘܠܰܐ ܗ̱ܘ.
17 ܘܶܐܢ ܒܟܺܐܦܳܐ ܒܺܐܝܕܳܐ ܡܚܳܝܗܝ ܐܰܝܟ ܕܰܢܡܽܘܬ ܘܡܺܝܬ. ܡܶܬܩܛܳܠܽܘ ܢܶܬܩܛܶܠ ܩܳܛܽܘܠܰܐ ܗ̱ܘ.
18 ܐܰܘ ܒܡܳܐܢܳܐ ܕܩܰܝܣܳܐ ܒܺܐܝܕܳܐ ܡܚܳܝܗܝ ܐܰܝܟ ܕܰܢܡܽܘܬ ܘܡܺܝܬ. ܩܳܛܽܘܠܰܐ ܗ̱ܘ. ܡܶܬܩܛܳܠܽܘ ܢܶܬܩܛܶܠ ܩܳܛܽܘܠܰܐ ܗ̱ܘ.
19 ܬܳܒܰܥ ܥܝܳܪܬܳܐ ܕܰܕܡܳܐ. ܗܽܘ ܢܶܩܛܠܺܝܘܗܝ ܠܩܳܛܽܘܠܳܐ ܡܳܐ ܕܦܳܓܰܥ ܒܶܗ.
20 ܘܶܐܢ ܒܣܶܢܶܐܬܳܐ ܡܚܳܝܗܝ. ܐܰܘ ܫܕܳܐ ܒܶܗ ܒܢܶܟܠܳܐ ܘܡܺܝܬ. ܩܳܛܽܘܠܰܐ ܗ̱ܘ.
21 ܒܰܒܥܶܠܕܒܳܒܽܘܬܳܐ ܡܚܳܝܗܝ ܒܺܐܝܕܶܗ ܐܰܝܟ ܕܰܢܡܽܘܬ. ܘܡܺܝܬ. ܩܳܛܽܘܠܰܐ ܗ̱ܘ ܡܶܬܩܛܳܠܽܘ ܢܶܬܩܛܶܠ. ܬܳܒܰܥ ܥܝܳܪܬܳܐ ܕܰܕܡܳܐ. ܗܽܘ ܢܶܩܛܠܺܝܘܗܝ ܠܩܳܛܽܘܠܳܐ ܡܳܐ ܕܦܳܓܰܥ ܒܶܗ.
22 ܘܶܐܢ ܡܶܢ ܫܶܠܝܳܐ ܕܠܳܐ ܒܥܶܠܕܒܳܒܽܘܬܳܐ ܡܚܳܝܗܝ. ܐܰܘ ܫܕܳܐ ܒܶܗ ܟܽܠ ܡܳܐܢ ܕܠܳܐ ܒܢܶܟܠܳܐ.
23 ܐܰܘ ܒܟܽܠ ܟܺܐܦ ܕܩܶܛܠܳܐ. ܟܰܕ ܠܳܐ ܚܙܳܐ. ܫܕܳܐ ܥܠܰܘܗܝ ܘܡܺܝܬ. ܘܠܳܐ ܗܘܳܐ ܒܥܶܠܕܒܳܒܶܗ. ܘܠܳܐ ܨܳܒܶܐ ܗܘܳܐ ܠܒܺܝܫܬܶܗ.
24 ܬܕܽܘܢ ܟܢܽܘܫܬܳܐ ܒܶܝܬ ܩܳܛܽܘܠܳܐ ܠܬܳܒܰܥ ܥܝܳܪܬܳܐ ܕܰܕܡܳܐ ܥܰܠ ܕܺܝܢ̈ܶܐ ܗܳܠܶܝܢ.
25 ܘܰܬܦܰܨܶܝܘܗܝ ܟܢܽܘܫܬܳܐ ܠܩܳܛܽܘܠܳܐ ܡܶܢ ܬܳܒܰܥ ܥܝܳܪܬܳܐ ܕܰܕܡܳܐ. ܘܰܬܫܰܕܪܺܝܘܗܝ ܟܢܽܘܫܬܳܐ ܠܰܩܪܺܝܬܳܐ ܕܒܶܝܬ ܓܰܘܣܳܐ ܕܰܥܪܰܩ ܗܘܳܐ ܠܳܗ̇. ܘܢܶܬܶܒ ܒܳܗ̇ ܥܕܰܡܳܐ ܕܰܢܡܽܘܬ ܟܳܗܢܳܐ ܪܰܒܳܐ ܕܶܐܬܡܫܰܚ ܒܡܶܫܚܳܐ ܕܩܽܘܕܫܳܐ.
26 ܘܶܐܢ ܢܶܦܽܘܩ ܩܳܛܽܘܠܳܐ ܠܒܰܪ ܡܶܢ ܬܚܽܘܡܳܐ ܕܰܩܪܺܝܬܳܐ ܕܒܶܝܬ ܓܰܘܣܳܐ ܕܰܥܪܰܩ ܠܳܗ̇.
27 ܘܢܶܫܟܚܺܝܘܗܝ ܬܳܒܰܥ ܥܝܳܪܬܳܐ ܕܰܕܡܳܐ ܠܒܰܪ ܡܶܢ ܬܚܽܘ̈ܡܶܐ ܕܰܩܪܺܝܬܳܐ ܕܒܶܝܬ ܓܰܘܣܳܐ. ܘܢܶܩܛܽܘܠ ܬܳܒܰܥ ܥܝܳܪܬܳܐ ܕܰܕܡܳܐ ܠܩܳܛܽܘܠܳܐ. ܠܰܝܬ ܠܶܗ ܥܝܳܪܬܳܐ.
28 ܡܶܛܽܠ ܗܳܢܳܐ ܒܰܩܪܺܝܬܳܐ ܕܒܶܝܬ ܓܰܘܣܳܐ ܢܶܬܶܒ. ܥܕܰܡܳܐ ܕܰܢܡܽܘܬ ܟܳܗܢܳܐ ܪܰܒܳܐ. ܘܡܳܐ ܕܡܺܝܬ ܟܳܗܢܳܐ ܪܰܒܳܐ. ܢܶܗܦܽܘܟ ܩܳܛܽܘܠܳܐ ܠܰܐܪܥܳܐ ܕܝܳܪܬܽܘܬܶܗ.
29 ܘܢܶܗܘܽܘܢ ܠܟܽܘܢ ܗܳܠܶܝܢ ܢܳܡܽܘܣ̈ܶܐ ܠܥܳܠܰܡ ܠܕܳܖ̈ܰܝܟܽܘܢ ܒܟܽܠܶܗ ܒܶܝܬ ܡܰܥܡܰܪܟܽܘܢ.
30 ܟܽܠ ܕܢܶܩܛܽܘܠ ܢܰܦܫܳܐ. ܥܰܠ ܦܽܘܡ ܣܳܗ̈ܕܶܐ ܢܶܬܩܛܶܠ ܩܳܛܽܘܠܳܐ. ܘܣܳܗܕܳܐ ܚܰܕ ܠܳܐ ܢܰܣܗܶܕ ܥܰܠ ܢܰܦܫܳܐ ܕܰܬܡܽܘܬ.
31 ܘܠܳܐ ܬܩܰܒܠܽܘܢ ܫܽܘܚܕܳܐ ܥܰܠ ܢܰܦܫܳܐ ܕܩܳܛܽܘܠܳܐ ܕܚܰܝܳܒ ܡܰܘܬܳܐ. ܐܶܠܳܐ ܡܶܬܩܛܳܠܽܘ ܢܶܬܩܛܶܠ.
32 ܘܠܳܐ ܬܶܣܒܽܘܢ ܫܽܘܚܕܳܐ ܕܢܶܥܪܽܘܩ ܠܰܩܪܺܝܬܳܐ ܕܒܶܝܬ ܓܰܘܣܳܐ. ܘܢܺܐܙܰܠ ܘܢܶܬܶܒ ܒܰܐܪܥܳܐ ܥܕܰܡܳܐ ܕܰܢܡܽܘܬ ܟܳܗܢܳܐ ܪܰܒܳܐ.
33 ܠܳܐ ܬܛܰܢܦܽܘܢܳܗ̇ ܠܰܐܪܥܳܐ ܕܥܳܡܪܺܝܢ ܐ̱ܢܬܽܘܢ ܒܳܗ̇. ܡܶܛܽܠ ܕܰܕܡܳܐ ܗܽܘ ܡܛܰܢܶܦ ܠܰܐܪܥܳܐ ܘܰܐܪܥܳܐ ܕܰܕܡܳܐ ܐܰܫܺܝܕ ܒܳܗ̇. ܠܳܐ ܢܶܬܚܰܣܶܐ ܥܠܶܝܗ̇. ܐܶܠܳܐ ܐܶܢ ܐܶܬܐܫܶܕ ܒܳܗ̇ ܕܡܳܐ ܕܗܰܘ ܡܰܢ ܕܰܐܫܕܶܗ.
34 ܘܠܳܐ ܬܛܰܡܐܽܘܢܳܗ̇ ܠܰܐܪܥܳܐ ܕܥܳܡܪܺܝܢ ܐ̱ܢܬܽܘܢ ܒܳܗ̇ ܕܫܳܪܶܐ ܐ̱ܢܳܐ ܒܓܰܘܳܗ̇. ܡܶܛܽܠ ܕܶܐܢܳܐ ܐ̱ܢܳܐ ܡܳܪܝܳܐ ܕܫܳܪܶܐ ܐ̱ܢܳܐ ܒܰܝܢܳܬ ܒܢܰܝ̈ ܝܺܣܪܳܐܶܝܠ.