Numbers 18
The Book of Numbers
܀ ܡܢܝܢܐ ܝܚ ܀
1 ܘܶܐܡܰܪ ܡܳܪܝܳܐ ܠܰܐܗܪܽܘܢ. ܐܰܢ̱ܬ ܘܰܒܢܰܝ̈ܟ ܘܒܶܝܬ ܐܰܒܽܘܟ ܥܰܡܳܟ. ܫܩܽܘܠܘ ܥܰܘܠܶܗ ܕܡܰܩܕܫܳܐ. ܘܰܐܢ̱ܬ ܘܰܒܢܰܝ̈ܟ ܥܰܡܳܟ. ܫܩܽܘܠܘ ܥܰܘܠܳܐ ܕܟܳܗܢܽܘܬܟܽܘܢ.
2 ܘܳܐܦ ܐܰܚܰܝ̈ܟ ܫܰܒܛܳܐ ܕܠܶܘܺܝ. ܫܰܒܛܳܐ ܕܰܐܒܽܘܟ ܬܩܰܪܶܒ ܥܰܡܳܟ. ܘܢܶܬܠܰܘܢ ܠܳܟ ܘܰܢܫܰܡܫܽܘܢܳܟ. ܘܰܐܢ̱ܬ ܘܰܒܢܰܝ̈ܟ ܥܰܡܳܟ ܩܕܳܡ ܡܰܫܟܢܳܐ ܕܣܳܗܕܽܘܬܳܐ.
3 ܘܢܶܛܪܽܘܢ ܡܰܛܰܪܬܳܟ. ܘܡܰܛܰܪܬܳܐ ܕܟܽܠܶܗ ܡܰܫܟܢܳܐ. ܒܪܰܡ ܠܡܳܐܢܰܝ̈ ܩܽܘܕܫܳܐ. ܘܰܠܡܳܐܢܰܝ̈ ܡܰܕܒܚܳܐ ܠܳܐ ܢܶܩܪܒܽܘܢ ܕܠܳܐ ܢܡܽܘܬܽܘܢ. ܐܳܦ ܗܶܢܽܘܢ. ܐܳܦ ܐܰܢ̱ܬܽܘܢ.
4 ܘܢܶܬܠܰܘܢ ܠܳܟ. ܘܢܶܛܪܽܘܢ ܡܰܛܰܪܬܳܐ ܕܡܰܫܟܰܢܙܰܒܢܳܐ. ܘܰܕܟܽܠܶܗ ܦܽܘܠܚܳܢܳܐ ܕܡܰܫܟܢܳܐ. ܘܢܽܘܟܪܳܝܳܐ ܠܳܐ ܢܶܬܩܰܪܰܒ ܠܘܳܬܟܽܘܢ.
5 ܘܛܰܪܘ ܡܰܛܰܪܬܳܐ ܕܩܽܘܕܫܳܐ. ܘܡܰܛܰܪܬܳܐ ܕܡܰܕܒܚܳܐ. ܘܬܽܘܒ ܠܳܐ ܢܶܗܘܶܐ ܪܽܘܓܙܳܐ ܥܰܠ ܒܢܰܝ̈ ܝܺܣܪܳܐܶܝܠ.
6 ܘܶܐܢܳܐ ܗܳܐ ܩܰܪܒܶܬ ܠܰܐܚܰܝ̈ܟܽܘܢ ܠܶܘ̈ܳܝܶܐ ܡܶܢ ܓܰܘ ܒܢܰܝ̈ ܝܺܣܪܳܐܶܝܠ. ܡܰܘܗܰܒܬܳܐ ܝܺܗܺܝܒܺܝܢ ܠܡܳܪܝܳܐ. ܠܡܶܦܠܰܚ ܦܽܘܠܚܳܢܳܐ ܕܡܰܫܟܰܢܙܰܒܢܳܐ.
7 ܘܰܐܢܬ ܘܰܒܢܰܝ̈ܟ ܥܰܡܳܟ ܛܰܪܘ ܟܳܗܢܽܘܬܟܽܘܢ. ܘܟܽܠܗܽܘܢ ܐܶܣܟܺܡܰܘ̈ܗܝ ܕܡܰܕܒܚܳܐ. ܘܰܠܓܰܘ ܡܶܢ ܐܰܦܰܝ̈ ܬܰܪܥܳܐ ܦܠܽܘܚܘ ܦܽܘܠܚܳܢܳܐ. ܡܰܘܗܰܒܬܳܐ ܕܝܶܗܒܶܬ ܠܟܳܗܢܽܘܬܟܽܘܢ. ܘܢܽܘܟܪܳܝܳܐ ܕܩܳܪܶܒ ܢܶܬܩܛܶܠ.
8 ܘܶܐܡܰܪ ܡܳܪܝܳܐ ܠܰܐܗܪܽܘܢ. ܗܳܐ ܐܶܢܳܐ ܝܶܗܒܶܬ ܠܳܟ ܡܰܛܰܪܬܳܐ ܕܦܽܘܖ̈ܫܳܢܰܝ ܘܟܽܠܗܽܘܢ ܩܽܘܕܫܳܐ ܕܰܒܢܰܝ̈ ܝܺܣܪܳܐܶܝܠ ܠܳܟ ܝܶܗܒܶܬ ܐܶܢܽܘܢ ܠܰܡܫܺܝܚܽܘܬܳܐ. ܠܳܟ ܘܠܰܒܢܰܝ̈ܟ ܥܰܡܳܟ. ܢܳܡܽܘܣܳܐ ܠܥܳܠܰܡ.
9 ܗܳܢܳܐ ܢܶܗܘܶܐ ܡܰܩܕܫܳܐ ܕܩܽܘܕܫܶܗ ܡܶܢ ܢܽܘܪܳܐ. ܟܽܠܶܗ ܩܽܘܪܒܳܢܗܽܘܢ. ܘܟܽܠܶܗ ܣܡܺܝܕܗܽܘܢ. ܘܟܽܠܗܽܘܢ ܚܛܳܗܰܝ̈ܗܽܘܢ. ܘܟܽܠܗܽܘܢ ܩܽܘܖ̈ܒܳܢܰܝܗܽܘܢ ܕܰܡܩܰܪܒܺܝܢ ܠܺܝ. ܩܕܽܘܫܩܽܘ̈ܕܫܺܝܢ ܐܶܢܽܘܢ ܠܳܟ ܘܠܰܒܢܰܝ̈ܟ.
10 ܒܰܩܕܽܘܫ ܩܽܘܕܫ̈ܶܐ ܬܶܐܟܠܽܘܢܶܗ. ܟܽܠ ܕܶܟܪܳܐ ܢܶܐܟܠܺܝܘܗܝ. ܩܽܘܕܫܳܐ ܢܶܗܘܶܐ ܠܳܟ.
11 ܘܗܳܢܰܘ ܦܽܘܪܫܳܢܳܐ ܕܡܰܘ̈ܗܒܳܬܟܽܘܢ. ܘܟܽܠܗܽܘܢ ܦܽܘܖ̈ܫܳܢܶܐ ܕܰܒܢܰܝ̈ ܝܺܣܪܳܐܶܝܠ ܠܳܟ ܝܶܗܒܶܬ ܐܶܢܽܘܢ. ܘܠܰܒܢܰܝ̈ܟ ܘܠܰܒ̈ܢܳܬܳܟ ܥܰܡܳܟ. ܢܳܡܽܘܣܳܐ ܠܥܳܠܰܡ. ܟܽܠܡܰܢ ܕܰܕܟܶܐ ܒܒܰܝܬܳܟ. ܢܶܐܟܠܺܝܘܗܝ.
12 ܟܽܠܶܗ ܫܽܘܡܢܳܐ ܕܡܶܫܚܳܐ. ܘܟܽܠܶܗ ܫܽܘܡܢܳܐ ܕܰܥܒܽܘܪܳܐ ܘܰܕܚܰܡܪܳܐ. ܘܖ̈ܺܝܫܝܳܬܗܽܘܢ ܕܝܳܗܒܺܝܢ ܠܡܳܪܝܳܐ. ܠܳܟ ܝܶܗܒܶܬ ܐܶܢܶܝܢ.
13 ܒܰܟܳܪܳܐ ܟܽܠܶܗ ܕܒܰܐܪܥܗܽܘܢ. ܕܡܰܝܬܶܝܢ ܠܡܳܪܝܳܐ ܠܳܟ ܢܶܗܘܶܐ ܘܟܽܠܡܰܢ ܕܰܕܟܶܐ ܒܒܰܝܬܳܟ. ܢܶܐܟܠܺܝܘܗܝ.
14 ܘܟܽܠ ܚܶܪܡܳܐ ܒܺܝܣܪܳܐܶܝܠ. ܠܳܟ ܢܶܗܘܶܐ.
15 ܘܟܽܠ ܦܳܬܰܚ ܡܰܪܒܥܳܐ ܕܟܽܠ ܒܣܰܪ ܕܰܡܩܰܪܒܺܝܢ ܠܡܳܪܝܳܐ. ܕܐ̱ܢܳܫ̈ܳܐ ܘܕܰܒܥܺܝܖ̈ܳܐ ܠܳܟ ܢܶܗܘܶܐ. ܒܪܰܡ ܕܶܝܢ ܡܶܦܪܰܩ ܬܶܦܪܽܘܩ ܒܽܘܟܖ̈ܰܝܗܽܘܢ ܕܐ̱ܢܳܫ̈ܳܐ. ܘܒܽܘܟܖ̈ܰܝܗܽܘܢ ܕܰܒܥܺܝܪܳܐ ܛܰܡܰܐܬܳܐ ܬܶܦܪܽܘܩ.
16 ܘܦܽܘܪܩܳܢܶܗ ܡܶܢ ܒܰܪ ܝܰܪܚܳܐ ܘܰܠܥܶܠ. ܬܶܦܪܽܘܩ ܒܰܕܡܰܝ̈ܳܐ ܕܟܶܣܦܳܐ. ܚܰܡܫܳܐ ܡܰܬܩ̈ܳܠܺܝܢ ܒܡܰܬܩܳܠܳܐ ܕܩܽܘܕܫܳܐ. ܥܶܣܪܺܝܢ ܡܳܥܺܝ̈ܢ ܗܳܘܶܐ ܡܰܬܩܳܠܳܐ.
17 ܒܪܰܡ ܕܶܝܢ ܒܽܘܟܪܳܐ ܕܬܰܘܖ̈ܶܐ ܘܒܽܘܟܪܳܐ ܕܥܶܙ̈ܶܐ. ܘܒܽܘܟܪܳܐ ܕܶܐܡܖ̈ܶܐ ܠܳܐ ܬܶܦܪܽܘܩ. ܡܶܛܽܠ ܕܩܽܘܕܫܳܐ ܐܶܢܽܘܢ. ܘܕܶܡܗܽܘܢ ܪܽܘܣ ܥܰܠ ܡܰܕܒܚܳܐ ܘܬܰܪܒܗܽܘܢ ܐܰܣܶܩ ܩܽܘܪܒܳܢܳܐ ܠܡܰܕܒܚܳܐ ܠܪܺܝܚ ܣܘܳܬܳܐ ܠܡܳܪܝܳܐ.
18 ܘܒܶܣܪܗܽܘܢ ܢܶܗܘܶܐ ܠܳܟ. ܐܰܝܟ ܚܰܕܝܳܐ ܕܦܽܘܪܫܳܢܳܐ. ܘܰܐܝܟ ܫܳܩܳܐ ܕܝܰܡܺܝܢܳܐ ܠܳܟ ܢܶܗܘܶܐ.
19 ܟܽܠܶܗ ܦܽܘܪܫܳܢܳܐ. ܕܩܽܘܕܫܳܐ ܕܰܡܦܰܪܫܺܝܢ ܒܢܰܝ̈ ܝܺܣܪܳܐܶܝܠ ܠܡܳܪܝܳܐ. ܝܶܗܒܶܬ ܠܳܟ. ܘܠܰܒܢܰܝ̈ܟ ܘܠܰܒ̈ܢܳܬܳܟ ܥܰܡܳܟ. ܢܳܡܽܘܣܳܐ ܠܥܳܠܰܡ. ܩܝܳܡܰܐ ܗ̱ܘ ܕܡܶܠܚܳܐ ܕܥܳܠܰܡ ܩܕܳܡ ܡܳܪܝܳܐ. ܠܳܟ ܘܰܠܙܰܪܥܳܟ ܥܰܡܳܟ.
20 ܘܶܐܡܰܪ ܡܳܪܝܳܐ ܠܰܐܗܪܽܘܢ. ܒܰܐܪܥܗܽܘܢ ܠܳܐ ܬܺܐܪܰܬ. ܘܦܳܠܓܽܘܬܳܐ ܠܳܐ ܬܶܗܘܶܐ ܠܳܟ ܒܰܝܢܳܬܗܽܘܢ ܐܶܠܳܐ ܦܳܠܓܽܘܬܳܟ ܘܝܳܪܬܽܘܬܳܟ ܒܰܝܢܳܬ ܒܢܰܝ̈ ܝܺܣܪܳܐܶܝܠ. ܦܽܘܪܫܳܢܰܘ̈ܗܝ ܕܡܳܪܝܳܐ ܘܩܽܘܕܫܰܘ̈ܗܝ.
21 ܘܠܰܒܢܰܝ̈ ܠܶܘܺܝ ܗܳܐ ܝܶܗܒܶܬ ܟܽܠܗܽܘܢ ܡܰܥܣܳܖ̈ܶܐ ܕܰܒܢܰܝ̈ ܝܺܣܪܳܐܶܝܠ ܠܝܽܘܪܬܳܢܳܐ. ܚܠܳܦ ܦܽܘܠܚܳܢܗܽܘܢ. ܕܗܶܢܽܘܢ ܦܳܠܚܺܝܢ ܦܽܘܠܚܳܢܳܐ ܕܡܰܫܟܰܢܙܰܒܢܳܐ.
22 ܘܬܽܘܒ ܠܳܐ ܢܶܬܩܰܪܒܽܘܢ ܒܢܰܝ̈ ܝܺܣܪܳܐܶܝܠ ܠܡܰܫܟܰܢܙܰܒܢܳܐ. ܕܠܳܐ ܢܩܰܒܠܽܘܢ ܚܛܳܗܳܐ ܘܰܢܡܽܘܬܽܘܢ.
23 ܘܢܶܦܠܚܽܘܢ ܠܶܘ̈ܳܝܶܐ ܦܽܘܠܚܳܢܳܐ ܕܡܰܫܟܰܢܙܰܒܢܳܐ. ܘܗܶܢܽܘܢ ܢܩܰܒܠܽܘܢ ܥܰܘܠܗܽܘܢ. ܢܳܡܽܘܣܳܐ ܠܥܳܠܰܡ. ܠܕܳܖ̈ܰܝܗܽܘܢ. ܘܒܰܝܢܳܬ ܒܢܰܝ̈ ܝܺܣܪܳܐܶܝܠ ܠܳܐ ܢܺܐܪܬܽܘܢ ܝܽܘܪܬܳܢܳܐ.
24 ܡܶܛܽܠ ܕܡܰܥܣܳܖ̈ܶܐ ܕܦܳܪܫܺܝܢ ܒܢܰܝ̈ ܝܺܣܪܳܐܶܝܠ ܠܡܳܪܝܳܐ. ܝܶܗܒܶܬ ܠܠܶܘ̈ܳܝܶܐ ܝܽܘܪܬܳܢܳܐ. ܡܶܛܽܠ ܗܳܢܳܐ ܐܶܡܪܶܬ ܠܗܽܘܢ. ܕܒܰܝܢܳܬ ܒܢܰܝ̈ ܝܺܣܪܳܐܶܝܠ ܠܳܐ ܢܺܐܪܬܽܘܢ ܝܽܘܪܬܳܢܳܐ.
25 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
26 ܡܰܠܶܠ ܥܰܡ ܠܶܘ̈ܳܝܶܐ. ܘܶܐܡܰܪ ܠܗܽܘܢ. ܡܳܐ ܕܢܳܣܒܺܝܢ ܐ̱ܢܬܽܘܢ ܡܶܢ ܒܢܰܝ̈ ܝܺܣܪܳܐܶܝܠ ܡܰܥܣܳܖ̈ܶܐ ܕܝܶܗܒܶܬ ܠܟܽܘܢ ܡܶܢܗܽܘܢ ܝܽܘܪܬܳܢܳܐ. ܦܪܽܘܫܘ ܡܶܢܶܗ ܦܽܘܪܫܳܢܳܐ ܠܡܳܪܝܳܐ. ܡܰܥܣܳܪܳܐ ܡܶܢ ܡܰܥܣܳܖ̈ܶܐ.
27 ܘܢܶܬܚܫܶܒ ܠܟܽܘܢ ܦܽܘܪܫܳܢܟܽܘܢ ܐܰܝܟ ܥܒܽܘܪܳܐ ܡܶܢ ܐܶܕܪܳܐ. ܘܰܐܝܟ ܦܽܘܪܫܳܢܳܐ ܡܶܢ ܡܰܥܨܰܪܬܳܐ.
28 ܗܳܟܰܢܳܐ ܦܪܽܘܫܘ ܐܳܦ ܐܰܢ̱ܬܽܘܢ ܦܽܘܪܫܳܢܳܐ ܠܡܳܪܝܳܐ. ܡܶܢ ܟܽܠܗܽܘܢ ܡܰܥܣܳܖ̈ܰܝܟܽܘܢ ܕܢܳܣܒܺܝܢ ܐ̱ܢܬܽܘܢ ܡܶܢ ܒܢܰܝ̈ ܝܺܣܪܳܐܶܝܠ. ܘܗܰܒܘ ܡܶܢܗܽܘܢ ܦܽܘܪܫܳܢܶܗ ܕܡܳܪܝܳܐ. ܠܰܐܗܪܽܘܢ ܟܳܗܢܳܐ ܘܠܰܒܢܰܘ̈ܗܝ.
29 ܡܶܢ ܟܽܠܗܶܝܢ ܡܰܘܗ̈ܒܳܬܟܽܘܢ ܦܪܽܘܫܘ ܟܽܠܶܗ ܦܽܘܪܫܳܢܳܐ ܠܡܳܪܝܳܐ. ܡܶܢ ܟܽܠܶܗ ܫܽܘܡܢܳܐ ܡܰܩܕܫܶܗ ܡܶܢܶܗ.
30 ܘܶܐܡܰܪ ܠܗܽܘܢ. ܡܳܐ ܕܦܳܪܫܺܝܢ ܐ̱ܢܬܽܘܢ ܫܽܘܡܢܶܗ ܡܶܢܶܗ. ܢܶܬܚܫܶܒ ܠܠܶܘ̈ܳܝܶܐ. ܐܰܝܟ ܥܠܰܠܬܳܐ ܕܶܐܕܪܳܐ. ܘܰܐܝܟ ܥܠܰܠܬܳܐ ܕܡܰܥܨܰܪܬܳܐ.
31 ܐܘܟܠܽܘܗܝ ܒܟܽܠ ܐܰܬܰܪ. ܐܰܢ̱ܬܽܘܢ ܘܐ̱ܢܳܫܰܝ̈ ܒܳܬܰܝ̈ܟܽܘܢ. ܡܶܛܽܠ ܕܗܳܢܰܘ ܐܰܓܪܟܽܘܢ ܚܠܳܦ ܦܽܘܠܚܳܢܟܽܘܢ ܕܰܒܡܰܫܟܰܢ ܙܰܒܢܳܐ.
32 ܘܠܳܐ ܬܩܰܒܠܽܘܢ ܥܠܰܘܗܝ ܚܛܳܗܳܐ. ܡܳܐ ܕܦܳܪܫܺܝܢ ܐ̱ܢܬܽܘܢ ܫܽܘܡܢܶܗ ܡܶܢܶܗ. ܘܩܽܘܕܫܳܐ ܕܰܒܢܰܝ̈ ܝܺܣܪܳܐܶܝܠ ܠܳܐ ܬܛܰܘܫܽܘܢ ܕܠܳܐ ܬܡܽܘܬܽܘܢ